មីយ៉ាន់ម៉ា៖ការរញ្ជួយដីដ៏មានឥទ្ធិពលមួយបានអង្រួនប្រទេសមីយ៉ាន់ម៉ាកាលពីថ្ងៃពុធដោយបានសម្លាប់មនុស្សយ៉ាងតិចបីនាក់និងបានបំផ្លាញវត្តព្រះពុទ្ធសាសនាសម័យបុរាណជាង១០០វត្តនៅក្នុងអតីតរដ្ឋធានី Bagan ដែលជាកន្លែងទេសចរណ៍ដ៏សំខាន់មួយ។
ក្រុមអង្កេតភូមិសាស្ត្ររបស់សហរដ្ឋអាមេរិកបានឲ្យដឹងថា ការរញ្ជួយដីកម្រិត៦,៨រ៉ិចទ័រគឺមានចំណុចកណ្តាលនៅចម្ងាយប្រហែល១៥ម៉ាយភាគខាងលិចតំបន់ Chauk ដែលជាទីប្រជុំជនមួយនៅភាគខាងត្បូងទីក្រុង Bagan ។ ទីភ្នាក់ងារនេះបាននិយាយថា វាបានវាយប្រហារនៅខាងក្រោមផ្ទៃផែនដីនៅជម្រៅប្រហែល៥២ម៉ាយ។ ការរញ្ជួយដីជ្រៅជាធម្មតាបង្កឲ្យមានការខូចខាតតិចនៅផ្ទៃខាងលើកាសែតរដ្ឋបានរាយការណ៍ថា វត្តអារាមសាងសង់ពីឥដ្ឋយ៉ាងហោចណាស់១៨៥វត្តនៅ Bagan ត្រូវបានបំផ្លាញ។
ទីក្រុង Bagan ដែលក៏ត្រូវបានគេស្គាល់ផងដែរថា Pagan គឺមានសំណង់រចនាសម្ព័ន្ធជាង ២.២០០ដោយរួមបញ្ចូលទាំងវត្តនិងប្រាសាទកសាងពីសតវត្សរ៍ទី១០ដល់ទី១៤ផងដែរ។ វត្តនិងប្រាសាទជាច្រើនមានភាពទ្រុឌទ្រោមរីឯផ្សេងទៀតត្រូវបានស្ដារឡើងវិញនៅក្នុងរយៈពេលប៉ុន្មានឆ្នាំចុងក្រោយនេះដោយមានជំនួយពីអង្គការយូណេស្កូដែលជាទីភ្នាក់ងាររបស់អង្គការសហប្រជាជាតិ៕
