​ប្រេ​ស៊ី​ល​៖​លោកស្រី Dilma Rousseff ត្រូវបាន​ដកហូត​តំណែង​ជា​ប្រធានាធិបតី​របស់​ប្រទេស​ប្រេ​ស៊ី​ល​នៅក្នុង​ការបោះឆ្នោត​ចោទប្រកាន់​មួយ​កាលពី​ថ្ងៃ​ពុធ​ហើយ​ជំនួស​ដោយ​គូប្រជែង​របស់លោក​ស្រី​គឺ​លោក Michel Temer ។​
​លោកស្រី Rousseff ដែលមាន​វ័យ​៦៨​ឆ្នាំ​ត្រូវបាន​កាត់ទោស​ដោយ​សមា​ជិ​ក​ព្រឹទ្ធសភា​ចំនួន​៦១​រូប​ក្នុងចំណោម​៨១​រូប​ពី​ការប្រើប្រាស់​ថវិកាជាតិ​ខុសច្បាប់​។​ការបោះឆ្នោត​មួយ​នេះ​ដែល​លើស សំឡេង​ភាគច្រើន​ពីរភាគបី​ដែល​ត្រូវការ​ជា​ចាំបាច់​គឺ​មានន័យថា​មេដឹកនាំ​ឆ្វេងនិយម​ជើងចាស់​រូបនេះ​ត្រូវតែ​ចុះ​ចេញពី​តំណែង​ភ្លាមៗ​។​
​បី​ម៉ោង​ក្រោយមក លោក Temer បាន​ស្បថ​ចូលកាន់​តំណែង​។ អតីត​អនុ​ប្រធានាធិបតី​និង​ធ្លាប់ជា​ដៃគូ​រដ្ឋាភិបាលចម្រុះ​ពេល​មួយ​នេះ ត្រូវបាន​លោកស្រី Rousseff ចោទប្រកាន់​ពី​ការរៀបចំ​ធ្វើ​រដ្ឋប្រហារ​ប្រឆាំងនឹង​លោកស្រី​។​
​ថ្លែង​នៅក្នុង​កិច្ចប្រជុំ​គណៈរដ្ឋមន្ត្រី​មួយ​ដែល​ផ្សាយ​តាម​ទូរទស្សន៍​បន្ទាប់ពីនោះ លោក Temer បាន​សន្យាថា​នឹង​ចាប់ផ្តើម “​យុគសម័យ​ថ្មី​” មួយ​នៅក្នុង​ប្រទេស​រងគ្រោះ​ដោយ​វិបត្តិ​មួយ​នេះ ខណៈដែល​លោក​នឹងត្រូវ​កាន់តំណែង​ជា​ប្រធានាធិបតី​រហូតដល់​អណ​ត្តិ​ដែល​នៅសល់​ត្រូវ​បញ្ចប់​ក្នុង​ឆ្នាំ​២០១៨​។​
​មេធាវី​របស់លោក​ស្រី Rousseff គឺ​លោក Jose Eduardo Cardozo បាន​និយាយថា លោក​នឹង​នាំយកមក​នូវ​ការ​ប្រឈម​ផ្លូវច្បាប់​ប្រឆាំងនឹង​ការចោទប្រកាន់​នេះ​ទៅ​តុលាការ​ជាន់ខ្ពស់​។​
​ជាមួយគ្នា​នោះ សមាជិក​ព្រឹទ្ធសភា​លោក Romero Juca មកពី​គណបក្ស PMDB របស់លោក Temer បាន​និយាយថា លោក​ក៏​រំពឹង​ផងដែរ​ថា​នឹងមាន​បណ្តឹងឧទ្ធរណ៍​ដើម្បី​រារាំង​លោកស្រី Rousseff ពី​ឆាកនយោបាយ​។​
​ថ្លែង​នៅឯ​វិមាន​ប្រធានាធិបតី Alvorada នៅ​ជាយក្រុង Brasilia លោក Rousseff នៃ​គណបក្ស​ពលករ​បាន​ថ្កោលទោស​ចំពោះ​ការចាកចេញ​ទាំង​បង្ខំ​របស់​លោកស្រី​។​
​លោកស្រី​បាន​និយាយថា “​ពួកគេ​បានសម្រេច​ចិត្ត​ផ្អាក​អាណត្តិ​របស់​ប្រធានាធិបតី​ដែល​មិនបាន​ប្រព្រឹត្ត​បទល្មើស​។ ពួកគេ​បាន​ផ្តន្ទាទោស​ជនស្លូតត្រង់​និង​ធ្វើ​រដ្ឋប្រហារ​សភា​”​។​
​គួរ​បញ្ជាក់ថា លោក Temer ដែលមាន​វ័យ​៧៥​ឆ្នាំ​នឹង​សម្គាល់​ថ្ងៃ​ដំបូង​របស់លោក​ជា​ប្រធានាធិបតី​នៅពេលដែល​លោក​ធ្វើដំណើរ​ទៅកាន់​កិច្ចប្រជុំ​កំពូល G20 ក្នុងប្រទេស​ចិន​នៅ​ល្ងាច​ថ្ងៃ​ពុធ​៕

​