គុយបា៖កាលពីថ្ងៃព្រហស្បតិ៍ នាយករដ្ឋមន្ត្រីជប៉ុនលោក Shinzo Abe បានក្លាយជាមេដឹកនាំជប៉ុនដំបូងគេដែលធ្វើទស្សនកិច្ចប្រទេសគុយបាដែលគ្រប់គ្រងដោយរបបកុម្មុយនិស្តដោយលោកបានទៅដល់ទីក្រុង Havana ដើម្បីធ្វើកិច្ចចរចាជាមួយប្រធានាធិបតីគុយបាលោក Raul Castro លើប្រធានបទការជំរុញពាណិជ្ជកម្មដើម្បីទប់ស្កាត់កម្មវិធីនុយក្លេអ៊ែររបស់កូរ៉េខាងជើង។
ដំណើរទស្សនកិច្ចរបស់លោក Abe ទៅកាន់ប្រទេសកោះការាប៊ីនមួយនេះគឺត្រូវបានសាទរដោយបណ្តាមេដឹកនាំលោកខាងលិចចាប់តាំងពីវាបានចាប់ផ្តើទំនាក់ទំនងធម្មតាឡើងវិញជាមួយសហរដ្ឋអាមេរិកជិតពីរឆ្នាំកន្លងមកនេះ។ លោកប្រធានាធិបតីសហរដ្ឋអាមេរិក Barack Obama បានទៅទស្សនកិច្ចគុយបានៅខែមីនា។
លោក Abe បានជិះយន្តហោះទៅប្រទេសគុយបាចេញពីញូវយ៉កកន្លែងដែលលោកបានប្រាប់មហាសន្និបាតប្រចាំឆ្នាំរបស់អង្គការសហប្រជាជាតិកាលពីថ្ងៃពុធថា ការគំរាមកំហែងដែលបង្កឡើងដោយកម្មវិធីនុយក្លេអ៊ែររបស់កូរ៉េខាងជើងនៅឆ្នាំនេះគឺធ្ងន់ធ្ងរជាងពេលកន្លងមក។
គួរបញ្ជាក់ថា ប្រទេសគុយបាគឺជាផ្នែកមួយនៃសម្ព័ន្ធមិត្តការទូតតិចតួចរបស់កូរ៉េខាងជើងនិងជាសមាជិកនៃចលនាមិនចូលបក្សសម្ព័ន្ធដែលបានបង្កើតឡើងក្នុងឆ្នាំ១៩៦១ដោយរដ្ឋនានាដែលចង់ជៀសវាងមិនចូលជាមួយសហរដ្ឋអាមេរិកឬសហភាពសូវៀត៕
