អង់ការ៉ា៖មន្ត្រីក្រសួងមហាផ្ទៃ និងក្រសួងការពារជាតិចំនួន៤៦០នាក់ទៀតត្រូវបានរដ្ឋាភិបាលតួកគីធ្វើការដកតំណែងដែលពាក់ព័ន្ធនឹងការធ្វើរដ្ឋប្រហារកាលពី ខែកក្កដាកន្លងទៅនេះ។ នេះបើយោងតាមសារព័ត៌មានស៊ិនហួរ នៅព្រឹកថ្ងៃសៅរ៍ ទី២៩ ខែតុលា ឆ្នាំ២០១៦នេះ។
ការដកតំណែងនេះធ្វើឡើងនៅមុនមួយថ្ងៃនៃពិធីបុណ្យជាតិរបស់ប្រទេសតួកគី ប្រារព្ធឡើង។ ប្រទេសតួកគីបានប្រកាសថា បុគ្គលិកជាមន្ត្រីរបស់ខ្លួនចំនួន១៥៣រូប ត្រូវបានបណ្តេញចេញពីជួរកងពលយោធារួមជាមួយនិង១១២រូបផ្សេងទៀត ត្រូវបានដកចេញពី កងល្បាតដែនសមុទ្រ ខណៈក្រសួងការពារជាតិវិញបានបញ្ជាក់ថា យោធាជើងគោក និងជើងទឹករបស់ ប្រទេសតួកគីបានដកតំណែងពលទាហានចំនួន១៩៥រូបផងដែរ។
គួរបញ្ជាក់ថា ការបណ្តេញចេញពីជួរការងារនេះត្រូវបានធ្វើឡើងជាផ្នែកមួយនៃការស៊ើបអង្កេត ទៅលើចលនារបស់បុព្វជិតអ៊ីស្លាមលោក Fethullah Gulen ដែលសព្វថ្ងៃកំពុងជ្រកកោណនៅក្នុងទឹកដី សហរដ្ឋអាមេរិកដោយសារតែទីក្រុងអង់ការ៉ា បានធ្វើការចោទប្រកាន់ថាជាមេខ្លោងនៅពីក្រោយ រដ្ឋប្រហារយោធាមិនបានសម្រេច៕
