ថៃ៖យោងតាមអង្គភាពទប់ស្កាត់ និងបង្ការគ្រោះមហន្តរាយនៅប្រទេសថៃបានបញ្ជាក់ថា ខេត្តចំនួន១០ក្នុងចំណោម១៤ខេត្តស្ថិតនៅភាគខាងត្បូងនៃប្រទេសថៃបានរងការជន់លិចដោយជំនន់ទឹកភ្លៀងនៅក្នុងរយៈពេលមួយសប្ដាហ៍កន្លងមកនេះ ដោយបណ្តាលឲ្យមនុស្សចំនួន២១បានស្លាប់ ខណៈប្រជាពលរដ្ឋជាង២៨ម៉ឺនគ្រួសាររងផលប៉ះពាល់នៃគ្រោះទឹកជំនន់នេះ។
មន្ត្រីនៅអង្គភាពនេះបានបន្តទៀតថា សេវារថភ្លើងមួយចំនួននឹងបន្តផ្អាកជាបណ្ដោះអាសន្ន ហើយព្រលានយន្តហោះនៅក្នុងទីក្រុងណាខនស៊ីថាម៉ារ៉ាតនៅភាគខាងត្បូងនៃប្រទេសនេះនឹងបន្តបិទទ្វាររហូតដល់ថ្ងៃចន្ទទី៩ខែមករានេះទើបចាប់ផ្ដើមដំណើរការឡើងវិញ។
អង្គភាពឧតុនិយមនៅប្រទេសថៃបានព្យាករថា ការធ្លាក់ភ្លៀងខ្លាំងលាយឡំដោយផ្គររន្ទះនឹងបន្តវាយប្រហារនៅផ្នែកមួយចំនួននៅភាគខាងត្បូងនៃប្រទេសថៃរហូតដល់ថ្ងៃចន្ទទី៩ខែមករានេះទើបអាកាសធាតុអាក្រក់នេះប្រហែលជាអាចការចុះស្ងប់ទៅវិញ៕
