ឧត្តរមានជ័យ៖ មនុស្ស ៣នាក់ បានស្លាប់ ក្នុងនោះ មានឧត្ដមសេនីយ៍យោធា ផ្កាយ២ លោក នួន នៅ បានស្លាប់ និងកុមារី រងគ្រោះម្នាក់ដាច់ក្បាលចេញពីដងខ្លួន និង៤នាក់ទៀតរងរបួសធ្ងន់ ស្រាល ក្នុងគ្រោះថ្នាក់បង្កឡើង ដោយរថយន្តធុនធំ ចុះពីលើភ្នំ ដាច់ហ្វ្រាំង បុករថយន្តវីហ្គោ ពេញទំហឹង ហើយធ្លាក់ជ្រោះ ដោយរថយន្តធំ សង្កត់ពីលើ។
គ្រោះថ្នាក់នោះ បានកើតឡើងនៅម៉ោងប្រមាណ ២ រសៀល ថ្ងៃទី២៧ ខែកុម្ភៈ ឆ្នាំ២០១៥ នៅចំណុចចំណោទលោកយាយម៉ៅ ចុះពីច្រកជាំ ស្ថិតនៅភូមិជើងភ្នំ ឃុំត្រពាំងព្រៃ ស្រុកអន្លង់វែង ខេត្តឧត្តរមានជ័យ។
សមត្ថកិច្ចបានឲ្យដឹងថា ករណីគ្រោះ ថ្នាក់ចរាចរណ៍ខាងលើនេះបង្កឡើងដោយ រថយន្ដម៉ាកFUSO ប្រភេទយីឌុបមួយ គ្រឿង ពាក់ស្លាកលេខក្រចេះ 3A-0339 បើកបរដោយជនសង្ស័យមិនស្គាល់អត្ដ សញ្ញាណបុកទៅលើរថយន្ដម៉ាកវីហ្គោ ពាក់ស្លាកលេខភ្នំពេញ2K-4066 ពណ៌ ត្រីឆ្លូញជារថយន្ត របស់លោកឧត្ដមសេនីយ៍ទោ នួន នៅ។
សមត្ថកិច្ចបានបន្ដថា លោកឧត្ដមសេនីយ៍ទោ នួន នៅ ប្រធានគណៈបញ្ជាការឯកភាពភូមិភាគទិសទី២ បានធ្វើដំណើររួមជាមួយតៃកុងម្នាក់ទៀត ដោយរថយន្តវីហ្គោ ចុះពីលើភ្នំ ស្រាប់តែដល់ចំណុច កើត ហេតុ ក៏មានរថយន្តបែនដឹកដីប្រភេទធំ បានដាច់ហ្វ្រាំងចុះពីលើចំណោទ ក៏បុកពេញទំហឹង ធ្លាក់ជ្រោះជម្រៅប្រហែល ៣០ម៉ែត្រ ហើយសង្កត់លើរថយន្តលោក នួន នៅ បណ្ដាលឲ្យស្លាប់មនុស្សចំនួន២នាក់បានស្លាប់ ភ្លាមៗនៅកន្លែងកើតហេតុ ក្នុងនោះមាន ជនរងគ្រោះម្នាក់ដាច់ក្បាលពីដងខ្លួន ហើយ៣នាក់ទៀតរងរបួសធ្ងន់ស្រាល។
ជនរងគ្រោះ ទី១-ឈ្មោះ ទៀង ចាន់ ដារ៉ា ភេទប្រុស អាយុ៣០ឆ្នាំ រស់នៅ ភ្នំពេញ របួសស្រាល ទី២-ឈ្មោះ ជួង ប៊ុន្នី ភេទប្រុស អាយុ៣៦ឆ្នាំ របួសស្រាល រស់នៅភ្នំពេញ ទី៣-ឈ្មោះ គង់ យ៉េត ភេទស្រី អាយុ៥០ឆ្នាំ រស់នៅភ្នំពេញ របួសធ្ងន់ ទី៤-ឈ្មោះ សំ ពុទ្ធា ភេទស្រី អាយុ៣០ឆ្នាំ រស់នៅភ្នំពេញ របួសធ្ងន់ ទី៥-ឈ្មោះសំ រិទ្ធមុន្នីសេត ភេទស្រី អាយុ៨ឆ្នាំ ស្លាប់ ទី៦-ឈ្មោះ នួន នៅ ភេទប្រុស អាយុ៥៦ឆ្នាំ ស្លាប់ និងទី៧-ឈ្មោះ សំ វុទ្ធី ភេទស្រី អាយុ៥៤ឆ្នាំ រស់ នៅភូមិភ្នៀត សង្កាត់-ក្រុងសំរោង រងរបួសធ្ងន់។
សាក្សីនៅកន្លែងកើតហេតុបានឱ្យដឹង ថា ក្រោយពេលបង្កគ្រោះថ្នាក់ចរាចរណ៍ ដ៏សែនរន្ធត់នេះ ភ្លាមៗនោះអ្នកបើកបរ រថយន្ដFUSO បង្កហេតុបានព្យាយាម បើកគេចក្នុងចម្ងាយជិត១០០ម៉ែត្រ ទើបពួកគេបើកទ្វាររថយន្ដរត់គេចខ្លួន បាត់ស្រមោលអស់។
ក្រោយពីកើតហេតុភ្លាម កម្លាំងសមត្ថកិច្ចនគរបានជំនាញបានទៅដល់ ហើយបានហៅឡានស្ទួច មកស្ទួចរថយន្តទាំង២គ្រឿង មកលើយកទៅរក្សាទុក។ ចំណែកសពទាំងអស់ ត្រូវបានសមត្ថកិច្ច បានទាក់ទង ទៅក្រុមគ្រួសារ មកទទួលយកទៅធ្វើបុណ្យ៕
