ភ្នំពេញ ៖ ការជ្រើសរើសយកចំណីអាហារ ដែលមានគុណភាព មានអនាម័យ និងពិនិត្យមើលឱ្យបានត្រឹមត្រូវ មុននឹងយកមកបរិភោគ គឺជារឿងសំខាន់ សម្រាប់សុខភាព ដែលគ្រប់គ្នាត្រូវមានចំណេះដឹង ស្វែងយល់ ពិនិត្យ និងតាមដាន នូវប្រភពចំណីអាហារឱ្យបានច្បាស់លាស់ ដើម្បីធានាថា មិនប៉ះពាល់ដល់សុខភាព។
លើកឡើងនៅក្នុងពិធី បើកវគ្គអប់រំផ្សព្វផ្សាយ អំពី សុវត្ថិភាព
ម្ហូបអាហារ និងកិច្ចការពារអ្នកប្រើប្រាស់នៅវិទ្យាល័យ ជាស៊ីម ឈូកវ៉ា លោក ខៀវ បញ្ញាវឌ្ឍន៍ គ្រូបង្គោលសុវត្ថិភាព ម្ហូបអាហារ នៃអគ្គនាយកដ្ឋានកាំកុងត្រូលបាន អះអាងថា នៅលើពិភពលោកនេះ គ្មានម្ហូបអាហារណាមួយ ដែលគ្មានសារធាតុគីមីនោះទេ គ្រាន់តែថា សារធាតុគីមីនោះកើតមានស្រាប់ពីធម្មជាតិ ឬមួយបានមកពីការដាក់បន្ថែម ក្នុងដំណាក់ការផលិត ហើយត្រឹមត្រូវតាមបទដ្ឋានកំណត់ ឬ អត់ ហើយធ្វើឱ្យប៉ះពាល់ដល់សុខភាពមនុស្ស ដែលច្បាប់ហាមឃាត់អនុញ្ញាតឬ អនុញ្ញាតិតែប៉ុណ្ណោះ។
មន្ត្រីសាខាកាំកុងត្រូល ផែស្ងួតចុងទី-ភ្នំពេញ រូបនេះ បានថ្លែងទៅកាន់ក្មួយសិក្សានុសិស្ស និងអ្នកចូលរួមថា ហានិភ័យនៃម្ហូបអាហារមាន៣ គឺ ហានិភ័យ នៃផ្នែកអតិសុខុមជីវសាស្ត្រ គីមីសាស្ត្រ និងកត្តារូបវ័ន្ត ហើយក្នុងនោះហានិភ័យ នៃផ្នែកអតិសុខុមជីវសាស្ត្រ បានប្រឈមមុខខ្លាំងជាងគេ នៅលើពិភព
លោក។
លោកបានឱ្យដឹងផងដែរថា ដើម្បីកាត់បន្ថយ និងចៀសវៀងហានិភ័យទាំងនោះ អ្នកប្រើប្រាស់ត្រូវអនុវត្តវិធានការចាំបាច់មួយចំនួន ដូចជា លាងដៃ លាងបន្លែ ផ្លែឈើ សាច់ សម្ភារៈផ្ទះបាយ ដោយទឹកស្អាត ហើយហូរ ពិសេស ញែកឱ្យដាច់ រវាងបន្លែ និងត្រីសាច់ឆៅ អាហារឆ្អិន អាហារឆៅ ជ្រុញ កាំបិត ហាន់បន្លែ និងជ្រុញ កាំបិត ហាន់សាច់ សម្ភារៈដាក់បន្លែ និងសម្ភារៈដាក់សាច់។
លោក ខៀវ បញ្ញាវឌ្ឍន៍បានបន្តទៀតថា សុវត្ថិភាពម្ហូបអាហារជា
កត្តាសំខាន់ ដែលអ្នកគ្រប់គ្នាត្រូវតែចេះ និងដឹងឱ្យបានគ្រប់គ្នា។ ព្រោះថាបើកង្វះចំណេះដឹងផ្នែកនេះ នឹងធ្វើឱ្យខាតបង់សេដ្ឋកិច្ច គ្រួសារ និងសេដ្ឋកិច្ចសង្គមជាតិ បាត់បង់ធនធានមនុស្ស ប៉ះពាល់ខ្លាំង ដល់សុភមង្គលគ្រួសារ និងសុខមាលភាពសង្គម។
ទាក់ទិននឹងផលប៉ះពាល់ពីម្ហូបអាហារនេះដែរ លោក ជា សាវ៉ន មន្ត្រីកាំកុងត្រូលសាខាផែស្ងួតចុងទី-ភ្នំពេញបានឱ្យដឹងដែរថា ចំណីអាហារ វាធ្វើឱ្យប៉ះពាល់ដល់សុខភាពយ៉ាងធ្ងន់ធ្ងរ ពិសេសចំណីអាហារណាដែលបានប្រើប្រាស់សារធាតុគីមី និង កង្វះចំណេះដឹងផ្នែកម្ហូបអាហារ ដោយគិតចាប់ពី កសិដ្ឋាន រហូតដល់លើតុអាហារ។ ដែលទាមទារឱ្យប្រជាពលរដ្ឋគ្រប់រូប ត្រូវតែយល់ដឹង និងយកចិត្តទុកដាក់បំផុត ចំពោះសមិទ្ធិផលម្ហូបអាហារប្រចាំថ្ងៃ ពោល គឺត្រូវតែសម្អាតឱ្យបានត្រឹមត្រូវ មុននឹងយកទៅចំអិន ឬ ទទួលទាន។
លោកបញ្ជាក់ទៀតថា កង្វះសារធាតុអីយ៉ូតក៏ជារឿងសំខាន់ ដែលអាចឱ្យមនុស្សសត្វ ជួបបញ្ហាជាច្រើន ដូចជា បញ្ហាពកក បញ្ញាអន់ គរថ្លង់ ខ្សោយកម្លាំង កាយសម្បទាលូតលាស់យឺត ក្រិន ពិសេសអាចបណ្តាលឱ្យទារកស្លាប់ក្នុងផ្ទៃម្តាយ។ ក្នុងជីវភាពប្រចាំថ្ងៃ សារធាតុអ៊ីយ៉ូត៩០% បានមកពីការហូប ១០% បានមកពីផឹក ហើយ៨០% ស្ថិតក្នុងក្រពេញទីរ៉ូអ៊ីត និង២០% ស្ថិតក្នុងសិរីរាងរបស់មនុស្ស។ ចៀសវាងបញ្ហាខាងលើ ត្រូវបរិភោគឱ្យបានញឹកញាប់ នូវអាហារសមុទ្រ និងប្រើប្រាស់អំបិលដែលមានសារធាតុអ៊ីយ៉ូតជាប្រចាំ៕
