ស្ទឹងត្រែង៖ កាលពីថ្ងៃទី១០ ខែកញ្ញា ឆ្នាំ២០១៤ អ្នកយកព័ត៌កាសែតវិមានឯករាជ្យម្នាក់ត្រូវបានក្រុមឈ្មួញរកស៊ីបទល្មើសព្រៃឈើប្ដឹងឱ្យកម្លាំងសមត្ថកិច្ចចាប់ខ្លួនដោយចោទពីបទកំហែងយក។ប៉ុន្តែអ្នកដឹងហេតុការណ៍នេះបាននិយាយថា ការចាប់ខ្លួននេះគឺគេរៀបចំដើម្បីសងសឹកពីសំណាក់ពួកឈ្មួញរកស៊ីឈើល្មើសច្បាប់ ដែលឈ្មួញខ្លះជាមន្ត្រីមានអំណាច។
នេះជាលើកទី៥ហើយដែលអ្នកយកព័ត៌មានត្រូវបានក្រុមឈ្មួញរកស៊ីល្មើសច្បាប់មានខ្នងបង្អែកជាសមត្ថកិច្ចប្ដឹងនៅពេលដែលអ្នកកាសែតសាកសួរ ឬថតរូប។ករណីខ្លះមេឈ្មួញបានយកលេសថាជាឈើរបស់ប្រជាពលរដ្ឋ រួចលបទៅប្ដឹងសមត្ថកិច្ច(បក្ខពួករបស់ខ្លួន)ឱ្យឃាត់ខ្លួនអ្នកកាសែតដោយចោទប្រកាន់ពីបទកំហែងយក ប៉ុន្តែមិនបានឃាត់ខ្លួនឈ្មួញរកស៊ីល្មើសច្បាប់ជាដើមបណ្ដឹងនោះទេទោះបីជាឃើញបទល្មើសជាកស្តែងក៏ដោយ និងករណីខ្លះទៀតគ្មានដើមបណ្ដឹងក៏ត្រូវឃាត់ខ្លួនយកទៅឃុំដែរ។
អ្នករាយការណ៍ព័ត៌មានបានឲ្យដឹងថា នៅល្ងាចថ្ងៃទី១០ ខែកញ្ញា ឆ្នាំ២០១៤ អ្នកកាសែតម្នាក់ឈ្មោះ ព្រំ ធា ជាអ្នកយកព័ត៌មានឱ្យកាសែតវិមានឯករាជ្យត្រូវបានអ្នករកស៊ីដឹកឈើបានឱ្យមន្ដ្រីយោធាម្នាក់នៅអង្គភាពយោធភូមិភាគទី១ប្ដឹងទៅកម្លាំងសមត្ថកិច្ចថា បានទារលុយចំនួន១០០ដុល្លារ ហើយបានឃាត់ខ្លួនអ្នកនោះតែម្តង។
លោក ព្រំ ធា អ្នកយកព័ត៌មានឱ្យកាសែតវិមានឯករាជ្យដែលសមត្ថកិច្ចឃាត់ខ្លួនបានឱ្យដឹងថា នៅល្ងាចថ្ងៃទី៩ ខែកញ្ញា ឆ្នាំ២០១៤ លោកបានបើករថយន្ដចេញពីផ្ទះប្រទះឃើញគោយន្ដសណ្ដោងរ៉ឺម៉កមួយគ្រឿងដឹកឈើច្រេសចំនួន៤សន្លឹកចេញពីក្នុងព្រៃ ហើយលោកក៏បានសួរនាំនិងបានរាយការណ៍ជូនមន្ដ្រីប៉ុស្ដិ៍រដ្ឋបាលស្រែគរដោយមិនបានទារលុយទេតែម្ចាស់ឈើបានសុំសម្រួលឱ្យ១០០ដុល្លារ។
លោក អ៊ី មន្ដ្រីប៉ុស្ដិ៍រដ្ឋបាលស្រែគរ បានបញ្ជាក់តាមទូរស័ព្ទថា ក្រោយពី លោក ព្រំ ធា បានរាយការណ៍មកលោកៗបានចុះទៅដល់ភ្លាមហើយបានឃើញគោយន្ដសណ្ដោងរ៉ឺម៉កដឹកឈើ៤សន្លឹកធំៗដោយមិនមានច្បាប់អនុញ្ញាតពីរដ្ឋបាលព្រៃឈើ ប៉ុន្ដែឈ្មោះ មាស សុវណ្ណ ជាមន្ដ្រីយោធភូមិភាគទី១ជាឈ្មួញរកស៊ីឈើបានសុំសម្រួលជាមួយលោក និងកូនចៅលោកម្នាក់ទៀតរួមជាមួយនឹងអ្នកកាសែតម្នាក់ដោយគេជាអ្នកសម្រួលដោយខ្លួនគេជូនថ្លៃសាំង១០០ដុល្លារ គឺលោកមិនបានទារនោះទេ ហើយលោកមាស សុវណ្ណក៏មិន បានឱ្យលុយភ្លាមៗទេថាចាំទៅយកនៅឯខេត្ដ។
លោកបានបន្ដថា រឿងនេះឈ្មោះ មាស សុវណ្ណ ជាមន្ដ្រីយោធាជាអ្នកចេញមុខមកសុំសម្រួល ដោយខ្លួនឯងមិនមែនជាការជំរិតនោះទេ ទើបលោកបានឱ្យឈ្មោះ ព្រំ ធា ទូរស័ព្ទទៅសួររឿងលុយដើម្បីយកមកចាក់សាំងទៅប្រជុំ តែមិនដឹងថា ការសន្យាឱ្យលុយនេះគឺដើម្បីយកលេសប្ដឹងចាប់អ្នកកាសែតបែបនេះឡើយ។
គួររំលឹកថា ចាប់តាំងពីចុងឆ្នាំ២០១៣ រហូតមកដល់ពេលនេះនៅខេត្ដស្ទឹងត្រែង អ្នកកាសែតចំនួន១១នាក់៥ករណីនិង មន្ដ្រីការពារបរិស្ថាននិងធនធានធម្មជាតិ ៤នាក់ត្រូវបានចាប់ខ្លួនពីបទកំហែងយក ដែលមាន៦ករណីរួមនឹងមន្ដ្រីបរិស្ថាន។ក្នុងករណីឃាត់ខ្លួនអ្នកកាសែត នេះក្រោមពាក្យបណ្ដឹងរបស់ឈ្មួញរកស៊ីឈើល្មើសច្បាប់ដែលខ្លួនជាមន្ត្រីរាជការ ។
អ្នកកាសែតដែលសមត្ថកិច្ចឃាត់ ខ្លួនទាំង១១នាក់ខ្លះមានដើមបណ្ដឹង និងខ្លះគ្មានដើមបណ្ដឹងដោយសារមានខ្នងបង្អែកពីសមត្ថកិច្ចខិលខូចមួយចំនួនញុះញង់ពីក្រោយឈ្មួញដើម្បីប្ដឹងអ្នកកាសែតដែលធ្វើឱ្យប៉ះពាល់ដល់ផលប្រយោជន៍គេ។
គួររំលឹកផងដែរថា កន្លងទៅថ្មីៗនេះអ្នកកាសែតម្នាក់ ឈ្មោះសូត្រ ទ្រី ត្រូវបានលោក ផាត់ ថៃ ព្រះរាជអាជ្ញារងកោះហៅចូលបំភ្លឺពី ករណីឃាត់រថយន្ដជំរិតទារលុយ ប៉ុន្ដែដើមបណ្ដឹងមិនចេញមុខដោយរកមិនឃើញកំហុសក៏បានដោះលែងទៅវិញ។ អ្នកកាសែតទាំង ១១នាក់ខ្លះត្រូវបានក្រុមអ្នកសារព័ត៌មានដូចគ្នាសុំធានាឱ្យនៅក្រៅឃុំបណ្តោះអាសន្ន និងមួយចំនួនទៀតត្រូវបានជាប់ពន្ធនាគារ ដោយសារក្រុមឈ្មួញរកស៊ីខុសច្បាប់ប្តឹងពីបទស្រដៀងគ្នានេះដែរ។
កន្លងមក មិនខ្វះទេជនខិលខូចដែលជាសមត្ថកិច្ចបានឆ្លៀតប្រើប្រាស់ជំនាញរបស់ខ្លួនជំរិតលុយពីអ្នករកស៊ីខុសច្បាប់ ប៉ុន្តែគ្មានក្រុមឈ្មួញណាមួយហ៊ានប្ដឹងផ្តល់ទេព្រោះខ្លាចខានរកស៊ី ឯអ្នករកស៊ីល្មើសខ្លះទៀតជាមន្ត្រីមានអំណាច ។
មជ្ឈដ្ឋានជាច្រើន បានផ្តោតការយកចិត្តទុកដាក់យ៉ាងខ្លាំងចំពោះចំណាត់ការរបស់សមត្ថកិច្ចទៅលើអ្នកកាសែតក្នុងហេតុការណ៍ដូចខាងលើនេះ ហើយបានចាត់ទុកថាជាការគំរាមកំហែងបំបាក់ស្មារតីចំពោះអ្នករាយការណ៍ព័ត៌មានឲ្យស្ថាប័នសាព័ត៌មាននានា និងការសម្តែងមតិប្រឆាំងចំពោះកាប្រព្រឹត្តបទល្មើស និងអំពើពុករលួយ៕
អ្នកកាសែតម្នាក់ត្រូវបានក្រុមឈ្មួញប្ដឹងឱ្យសមត្ថកិច្ចឃាត់ខ្លួន
ពីបទកំហែងយក
