ក្រុមហ៊ុនអាកាសចរណ៍ម៉ាឡេស៊ីជម្រុះបុគ្គលិកប្រមាណ៦ពាន់នាក់

ដោយ មេគង្គ ប៉ុស្តិ៍ ចេញផ្សាយ ថ្ងៃទី 2 June, 2015 ក+ ក-

ម៉ាឡេស៊ី៖ក្រុមហ៊ុនអាកាសចរណ៍ម៉ា ឡេស៊ីបានបញ្ជាក់ពីផែនការមួយចំនួនសម្រាប់ការធ្វើកំណែទម្រង់ក្រុមហ៊ុនដើម្បីរក្សាស្ថិរភាព។
មានរបាយការណ៍មកថា ក្រុមហ៊ុនដែលមានរដ្ឋាភិបាលជាម្ចាស់នឹងជម្រុះបុគ្គលិកប្រមាណ៦ពាន់ នាក់ ខណៈពេលដែលក្រុមហ៊ុននេះកំពុងតែមានបញ្ហាខាតបង់ប្រាក់យ៉ាងច្រើន។

ក្រុមហ៊ុន បានបញ្ចេញឲ្យដឹងផែនការនេះតាមរយៈអ៊ីមែលកាលពីម្សិលមិញថា ចាប់ពីថ្ងៃទី១ ខែកញ្ញា ឆ្នាំ២០១៥នេះ ក្រុមហ៊ុននឹងចាប់ធ្វើប្រតិបត្ដិការក្រោមឈ្មោះផ្លាកយីហោថ្មី។

មាន ការរំពឹងថា បុគ្គលិកប្រហែល១ម៉ឺន៤ពាន់នាក់ក្នុងចំណោមបុគ្គលិកសរុបប្រមាណ២ម៉ឺន នាក់នឹងទទួលបានលិខិតផ្ដល់ការងារឲ្យធ្វើការបន្ដនៅក្នុង ក្រុមហ៊ុនថ្មីដែលបានការធ្វើកំណែទម្រង់។

ក្រៅពីនេះក្រុមហ៊ុន ក៏នឹងកាត់បន្ថយយ៉ាងច្រើនផងដែរនូវការផ្ដល់សេវាកម្មជើងហោះហើរ ផ្លូវឆ្ងាយដែលមិនចំណេញដូចជាទៅអឺរ៉ុប ប៉ុន្ដែនឹងផ្ដោតការយកចិត្ដទុកដាក់វិញលើសេវាកម្មហោះហើរក្នុង តំបន់ ខណៈពេលដែលក្រុមហ៊ុនប្រមូលផ្ដុំកម្លាំងឡើងវិញ។

កាលពី ខែមីនា ឆ្នាំ២០១៤ យន្ដហោះជើង MH370 ដឹកអ្នកដំណើរ និងបុគ្គលិកសរុប២៣៩នាក់បានបាត់ខ្លួន ហើយគេមិនទាន់បានរកឃើញដានជើងយន្ដហោះនោះនៅឡើយទេ។ ៤ខែក្រោយមកគ្រោះថ្នាក់អកុសលមួយទៀតបានកើតឡើងលើជើងហោះហើរ MH17 ដែលគេសង្ស័យថា ត្រូវគ្រាប់មីស្ស៊ីល ហើយបានធ្លាក់នៅទឹកដីអ៊ុយក្រែន ក្នុងនោះអ្នកដំណើរ និងបុគ្គលិក២៩៨នាក់បាត់បង់ជីវិត។

បណ្ដាអ្នកវិភាគបានលើក ឡើងថា បរាជ័យរបស់ក្រុមហ៊ុននេះក្នុងការប្រកួតប្រជែង គឺដោយសារមានការដឹកនាំអន់, ការសម្រេចចិត្ដពាណិជ្ជកម្មមិនល្អ, ការលូកលាន់ពីរដ្ឋាភិបាល និងបញ្ហាជាច្រើនទៀត៕