ប៉េកាំង ៖ ប្រទេសចិននៅថ្ងៃព្រហស្បតិ៍ម្សិលមិញបានប្រកាសថា ខ្លួននឹងបរិច្ចាគថវិកាចំនួន ៣០លានដុល្លារអាមេរិកបន្ថែមទៀតដល់អង្គការសុខភាពពិភពលោក (WHO) ក្នុងការប្រយុទ្ធប្រឆាំងនឹងជំងឺ COVID-19។ នេះបើយោងតាមសារព័ត៌មាន CNA។
ការប្រកាសនេះធ្វើឡើងមួយសប្តាហ៍ប៉ុណ្ណោះ បន្ទាប់ពីសហរដ្ឋអាមេរិក ដែលជាអ្នកបង់វិភាគទានធំបំផុតរបស់ អង្គការសុខភាពពិភពលោក (WHO) បានប្រកាសថា នឹងផ្អាកបង់វិភាគទានទៅឲ្យអង្គការនេះ ដោយបានលើកជាហេតុលផលថា WHO មិនបានគ្រប់គ្រងស្ថានការណ៍ជំងឺ COVID-19 តាំងតែពីជំងឺនេះផ្ទុះឡើងដំបូងនៅប្រទេសចិន។
ការផ្តល់ជំនួយរបស់ចិនខាងលើនេះ គឺជាការបន្ថែមទៅលើថវិកាជំនួយ ២០លានដុល្លារអាមេរិក កាលពីលើកដំបូង ដែលចិនបានផ្តល់ដល់ WHO ក្នុងការប្រយុទ្ធប្រឆាំងនឹងជំងឺរាតត្បាតសកល COVID-19 ខណៈប្រទេសជាច្រើនសុទ្ធតែយល់ស្របដូចៗគ្នាថា អង្គការសុខភាពពិភពលោក ពិតជាដើរតួរនាទីចាំបាច់ណាស់នៅពេលនេះ និងត្រូវតែបន្តឈរនៅរឹងមាំទៅមុខទៀត៕
