ញូដេលី ៖ អាជ្ញាធរសុខាភិបាលឥណ្ឌាបានឲ្យដឹងថា នៅថ្ងៃព្រហស្បតិ៍ ទី១៤ ខែឧសភា ឆ្នាំ២០២០នេះមានមនុស្ស១៣៤នាក់បានស្លាប់ និង៣,៧២២នាក់ទៀតឆ្លងជំងឺ COVID-19 តែក្នុងរយៈពេល០១ថ្ងៃប៉ុណ្ណោះ។ នេះបើយោងតាមទីភ្នាក់ងារព័ត៌មានចិនស៊ីនហួរ។

បើតាមអាជ្ញាធរឥណ្ឌាបានអះអាងថា បូកបញ្ចូលទិន្នន័យបន្ថែមខាងលើនេះ ធ្វើឲ្យចំនួនករណីឆ្លង COVID-19 សរុបនៅឥណ្ឌាកើនដល់ ៧៨,០០៣ករណី ក្នុងនោះមានអ្នកស្លាប់សរុប ២,៥៤៩នាក់។ នៅព្រឹកថ្ងៃព្រហស្បតិ៍នេះផងដែរថា ចំនួនអ្នកជាសះស្បើយសរុបពីជំងឺ COVID-19 បានកើនឡើងដល់ ២៦,២៣៥នាក់ និង ៤៩,២១៩នាក់កំពុងស្ថិតក្នុងការព្យាបាល។

សូមជម្រាបថា នៅថ្ងៃព្រហស្បតិ៍ ទី១៤ ខែឧសភានេះគឺជាថ្ងៃទី ៥១ហើយ ដែលប្រទេសឥណ្ឌាអនុវត្តវិធានការបិទប្រទេស ដើម្បីប្រយុទ្ធនឹងជំងឺ COVID-19។ វិធានការរឹតបន្តឹងមួយចំនួនត្រូវបានដករួចទៅហើយ នៅមុនការបិទបញ្ចប់វិធានការបិទប្រទេស ដែលត្រូវធ្វើឡើងនៅថ្ងៃទី១៧ ខែឧសភា ប៉ុន្មានថ្ងៃខាងមុខនេះក្នុងនោះមានដូចជា ការអនុញ្ញាតឲ្យខ្សែរថភ្លើងមួយចំនួនដំណើរការឡើងវិញ និងការធ្វើពាណិជ្ជកម្មខ្លះៗជាដើម៕