បាងកក៖ប៉ូលិសថៃបានប្រកាសឲ្យដឹងនៅថ្ងៃព្រហស្បតិ៍ ទី២៦ វិច្ឆិកាថា ខ្លួនកំពុងតាមរកចាប់ខ្លួនឧត្តមសេនីយ៍យោធាម្នាក់ដែលជាប់ចោទពីបទប្រមាថព្រះចេស្តា។ នេះជាបទចោទប្រកាន់មួយដែលគេកម្រឃើញកើតមានលើមន្ត្រីស្ថាប័ន កងទ័ពដែលជាស្ថាប័នស្មោះស្ម័គ្រនឹងរាជានិយម។ យ៉ាងណាក៏ដោយ អ្នកនាំពាក្យប៉ូលិសលោក ចាយ៉ាពុង ឆាតឆាយដេ មិនបានបញ្ជាក់លំអិតពីទង្វើប្រមាថព្រះចេស្តារបស់រូឧត្តមសេនីយយោធារូបនោះទេ។
ថ្លែងក្នុងសន្និសីទកាសែតមួយក្នុងទីក្រុងបាងកក អ្នកនាំពាក្យប៉ូលិសលោក ចាយ៉ាពុង ឆាតឆាយដេ បានប្រាប់ឲ្យដឹងថា មានឧត្តមសេនីយ៍យោធាម្នាក់ និងមន្ត្រីប៉ូលិសជាន់ខ្ពស់ពីរនាក់បានជាប់ចោទពីបទប្រមាថព្រះចេស្តា តែមិនបានលំអិតអ្វីឲ្យបានច្រើនជាងនេះទេ។
គួរបញ្ជាក់ថាជាទូទៅ រឿងអាស្រូវប្រមាជរាជានិយមច្រើនតែកើតមានលើមនុស្សដែលជាក្រុម សកម្មជនរបស់បក្សប្រឆាំង ពិសេសក្រុមអ្នកស្មោះស្ម័គ្រនឹងលោកអតីតនាយករដ្ឋមន្ត្រីធ្លាក់ពី អំណាចថាក់ស៊ីន ស៊ីណាវ៉ាត់។ តែនារយៈពេលប៉ុន្មានខែចុងក្រោយ គេបានសង្កេតឃើញរឿងអាស្រូវដ៏រសើបមួយនេះបានប៉ះពាល់ដល់ មនុស្សជំនិតនឹងព្រះបរមរាជវាំង និងឥឡូវបានឈានចូលដល់ស្ថាប័នកងទ័ពដែលគេស្គាល់ថា ជាស្ថាប័នស្មោះស្ម័គ្រនឹងរាជានិយមជាងគេ។
មនុស្សជំនិតនឹង ព្រះបរមរាជវាំងដែលបានជាប់ចោទក្នុងបទប្រមាថព្រះចេស្តានាប៉ុន្មានខែ កន្លងទៅ គឺសមាជិកគ្រួសារសាច់ថ្លៃរបស់ព្រះអង្គម្ចាស់ម៉ាហា វ៉ាយីរ៉ាឡុងកនដែលទើបលែងលះគ្នា។ មានសមាជិកគ្រួសារសាច់ថ្លៃរបស់ព្រះអង្គម៉ាហាជាច្រើននាក់បានទទួល ទោសជាប់ពន្ធនាគារពីបទបានឆ្លៀតប្រើខ្នងរាជានិយមដើម្បីប្រយោជន៍ផ្ទាល់ខ្លួន។
គួររម្លឹកថា ក្នុងសំណុំរឿងប្រមាថព្រះចេស្តាដដែលនេះ មានបុរសពីរនាក់ ក្នុងនោះម្នាក់ជាមន្ត្រីប៉ូលិសជាន់ខ្ពស់ទើបបានចាប់ខ្លួន និងបញ្ជូនទៅកាន់តុលាការនាថ្ងៃព្រហស្បតិ៍ ទី២៦ វិច្ឆិកា។ បុរសទាំងពីររូបបានជាប់ចោទពីបទបញ្ជូនសារបរិហារកេរ្តិ៍នៅលើ បណ្តាញសង្គម Facebook៕
