ក្រុងឡុងដ៍៖ យោងតាមសារព័ត៌មាន Daily mail ចេញផ្សាយកាលពីម្សិលមិញថា ក្រុមឧទ្ទាមជ្រុលនិយមរដ្ឋឥស្លាម ISIS មានគម្រោងវាយប្រហារចក្រភពអង់គ្លេសក្នុងរយៈពេលប៉ុន្មានសប្តាហ៍ខាងមុខ។
ការព្រមានវាយប្រហារនេះធ្វើឡើងបន្ទាប់ពីសភាជាន់ទាបរបស់អង់គ្លេស សម្រេចយល់ព្រមចូលរួមក្នុងការវាយប្រហារប្រឆាំងពួកឧទ្ទាម ISIS នៅក្នុងប្រទេសស៊ីរី។ ទន្ទឹមនោះភ្នាក់ងារសន្តិសុខអឺរ៉ុបបានរាយការណ៍ថា ពួកគេបានទទួលនូវព័ត៌មានពីការស៊ើបការណ៍យ៉ាងច្បាស់ថា ចក្រភពអង់គ្លេស បានស្ថិតនៅក្នុងបញ្ជីនៃការគោលដៅវាយប្រហារលើកក្រោយ ដែលហានិភ័យខ្ពស់។
តាមប្រភពខាងលើបញ្ជាក់ថា ពួកជីហាដដែលមានដើមកំណើតនៅចក្រភពអង់គ្លេស ដែលបានធ្វើដំណើរទៅកាន់ប្រទេសស៊ីរី ដើម្បីចូលរួមជាមួយក្រុមជ្រុលនិយម បានទទួលបន្ទុកឲ្យវិលត្រឡប់ទៅប្រទេសកំណើតវិញ ដើម្បីធ្វើការវាយប្រហារចក្រភពអង់គ្លេស ក្នុងរយៈពេលប៉ុន្មានសប្តាហ៍ខាងមុខ ដែលការវាយប្រហារនេះ មានលក្ខណៈដូចគ្នានឹងការវាយប្រហារនៅទីក្រុងប៉ារីសផងដែរ៕
