All posts by មេគង្គ ប៉ុស្តិ៍

កម្ពុជាពន្យារពេលកិច្ចប្រជុំកំពូលអាស៊ី-អឺរ៉ុប ទៅពាក់កណ្តាលឆ្នាំក្រោយដោយសារបញ្ហាកូវីដ-១៩

July 29, 2020ព័ត៌មានថ្មីចុងក្រោយ, ព្រឹត្តិការណ៍កម្ពុជា, សន្តិសុខ/សង្គមមេគង្គ ប៉ុស្តិ៍

ភ្នំពេញ ៖ ឯកឧត្តម កុយ គួង អ្នកនាំពាក្យក្រសួងការបរទេសកម្ពុជាបានបញ្ជាក់ថា កម្ពុជាគ្រោងនឹងរៀបចំកិច្ចប្រជុំកំពូលអាស៊ី-អឺរ៉ុប (ASEM) លើកទី១៣ ក្នុងខែឧសភា ឬខែមិថុនា នៅពាក់កណ្ដាលឆ្នាំក្រោយ បន្ទាប់ពីកិច្ចប្រជុំដែលគ្រោងធ្វើនៅពាក់កណ្តាល ខែវិច្ឆិកា ឆ្នាំ២០២០ ក្រោមមូលបទ “ការពង្រឹងពហុភាគីនិយម ដើម្បីកំណើនរួមគ្នា” ត្រូវបានខកខាន ដោយសារតែវិបត្តិនៃជំងឺកូវីដ-១៩។
បើតាមសេចក្ដីប្រកាសព័ត៌មានស្ដីពីកិច្ចប្រជុំនេះកាលពីថ្ងៃទី២ ដល់ថ្ងៃទី៣ ខែកក្កដា ឆ្នាំ២០២០ បានបញ្ជាក់ថា ដោយសារតែផលវិបាកអាក្រក់នៃការរីករាលដាលនៃជំងឺកូវីដ-១៩ ឧត្ដមមន្ដ្រីទទួលបន្ទុកកិច្ចប្រជុំអាស៊ី-អឺរ៉ុប ទាំងអស់បានបង្ហាញការឯកភាពប្រកបដោយស្មារតីយោគយល់ និងគាំទ្រជាឯកច្ឆន្ទចំពោះសំណើរបស់កម្ពុជា សុំលើកពេលរៀបចំកិច្ចប្រជុំកំពូលនេះទៅប្រព្រឹត្តនៅពាក់កណ្ដាលឆ្នាំ២០២០ វិញ។

យោងតាមសេចក្ដីប្រកាសព័ត៌មានស្ដីពីកិច្ចប្រជុំនេះកាលពីថ្ងៃទី២ ដល់ថ្ងៃទី៣ កក្កដា ឆ្នាំ២០២០ បានឱ្យដឹងថា ដោយសារតែផលវិបាកអាក្រក់នៃការរីករាលដាលនៃជំងឺកូវីដ-១៩ ឧត្ដមមន្ដ្រីទទួលបន្ទុកកិច្ចប្រជុំអាស៊ី-អឺរ៉ុប ទាំងអស់បានបង្ហាញការឯកភាពប្រកបដោយស្មារតីយោគយល់ និងគាំទ្រជាឯកច្ឆន្ទចំពោះសំណើរបស់កម្ពុជា សុំលើកពេលរៀបចំកិច្ចប្រជុំកំពូលនេះទៅប្រព្រឹត្តនៅពាក់កណ្ដាលឆ្នាំ២០២១ វិញ៕

យុវជនម្នាក់រងរបួសធ្ងន់ ខណៈចូលដាក់អន្ទាក់សត្វ និងជីកទំពាំងក្នុងចំការមីន

ខេត្តបន្ទាយមានជ័យ ៖ មានការភ្ញាក់ផ្អើលមួយបានកើតឡើងកាលពីវេលាម៉ោង៥ល្ងាចថ្ងៃទី២៨ ខែកក្កដាឆ្នាំ២០២០ខណៈដែលមានសំលេងផ្ទុះចេញពីចំនុចចំការមីនក្បែរបន្ទាត់ព្រំដែនកម្ពុជា-ថៃចន្លោះបង្គោលសីម៉ាលេខ២៨-២៩ នៅចំណុចខាងលិចភូមិដងរ៉ែក ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ។ក្រោយមានករណីផ្ទុះកម្លាំងនគរបាលព្រំដែនបានចុះពិនិត្យទីតាំងផ្ទុះហើយបានជួយសង្គ្រោះយុវជនម្នាក់បញ្ជូនទៅកាន់មន្ទីរពេទ្យ។
លោកវរសេនីយ៍ឯក សៅ សារឿន អធិការនគរបាល ស្រុកថ្មពួក បានឲ្យដឹងថាក្មេងប្រុសដែលជួយសង្គ្រោះចេញពីចំការមីនមាន ឈ្មោះ ឈុំ ខេន អាយុ១៤ឆ្នាំ មានទីលំនៅភូមិដងរ៉ែក ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ ។
លោក អធិការបានបញ្ជាក់ថានៅមុនពេលកើតហេតុ ក្មេងរងគ្រោះបានបានចេញពីផ្ទះដើរចូលទៅក្នុងទឹកដីថៃតាមបន្ទាត់ព្រំដែន ដើម្បីដាក់អន្ទាក់សត្វនិងដើររកជីកទំពាំងយកមកធ្វើម្ហូប។ តែដោយខ្វះការប្រុងប្រយត្ន័បានជាន់មីនបណ្តាលឲ្យផ្ទុះរងរបួសធ្ងន់ជើងទាំង២និងខ្លួនប្រាណសុះសាច់ ។
លោកវរសេនីយ៍ឯក សៅ សារឿន អធិការនគរបាលស្រុថ្មពួក បានបញ្ជាក់ថាចំនុចចំការមីនខាងលើបានសំលាប់និងបង្កគ្រោះថ្នាក់ដល់មនុស្សជាច្រើននាក់មកហើយ ដែលអ្នកទាំងនោះសុទ្ធសឹងជាអ្នកដែលចូលទៅជីកទំពាំង ដាក់អន្ទាក់សត្វ គោះអង្ក្រង បេះផ្លែឈើនិងរុករកអនុផលព្រៃឈើ។លោកបានធ្វើការអំពាវនាវដល់បងប្អូនប្រជាពលរដ្ឋ សូមបង្កើនការប្រុងប្រយ័ត្ន បញ្ឈប់ការរុករកអនុផលព្រៃឈើឬក៏ដាក់អន្ទាក់សត្វ ក្នុងតំបន់គ្រោះថ្នាក់នេះទៀតព្រោះមីននិងគ្រាប់យុទ្ធភ័ណ្ឌមិនទាន់ផ្ទុះដែលបន្សល់ទុកក្រោមដីមិនភ្លេចយើងទេ អោយតែយើងធ្វេសប្រហែសតែមួយវិនាទីគឺបន្សល់វិប្បដិសារីអស់មួយជីវិត៕

សម្ដីតំណាងក្រុមវគ្គផ្ដាច់ព្រ័ត្រពានសម្ដេចតេជោ ហ៊ុន សែន ថ្នាក់ខេត្ត ២០២០

July 29, 2020កីឡា, ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ ៖ ការប្រកួតបាល់ទាត់ពានរង្វាន់សម្ដេចអគ្គមហាសេនាបតីតេជោ ហ៊ុន សែន ថ្នាក់ខេត្ត ២០២០ នឹងចូលដល់វគ្គផ្ដាច់ព្រ័ត្រនៅថ្ងៃពុធ ទី២៩ ខែកក្កដា នាពហុកីឡដ្ឋានជាតិ ដែលក្រុមខេត្តសៀមរាប ជួបជាមួយខេត្តកែប ដណ្ដើមចំណាត់ថ្នាក់លេខ៣ និងខេត្តត្បូងឃ្មុំ ប៉ះព្រៃវែងប្រជែងតំណែងជើងឯក។

ពាក់ព័ន្ធទៅនឹងការប្រកួតយកចំណាត់ថ្នាក់លេខ៣ លោក លី ធារ៉ា គ្រូបង្គោលជម្រើសខេត្តសៀមរាប លើកឡើងថា ទោះមិនបានឡើងមកកាន់វគ្គផ្ដាច់ព្រ័ត្រយកជើងឯក ក៏នៅតែបណ្ដុះគំនិតកូនក្រុមឲ្យប្រឹងប្រែងដើម្បីលទ្ធផលល្អក្នុងការប្រកួតយកលេខ៣ បន្ថែមពីលើបំណងអភិវឌ្ឍន៍ក្រុម។ លោកថា កូនក្រុមខ្លះមានស្ថានភាពមិនទាន់ពេញលេញ តែក៏បានត្រៀមខ្លួនរួចរាល់ហើយដែរ។ លោកបន្ថែមថា សម្រាប់ការលេងឆ្នាំនេះ សៀមរាបមានស្ថានភាពល្អជាងមុន។

ចំណែកលោក ស សារ៉ា គ្រូបង្គោលក្រុមជម្រើសខេត្តកែបសារភាពថា មានអារម្មណ៍ស្ដាយខ្លះដែរដែលមិនអាចឈានទៅយកជើងឯក ព្រោះមានកាតក្រហមដល់ទៅពីរនាក់ក្នុងវគ្គពាក់កណ្ដាលផ្ដាច់ព្រ័ត្រ ជើងទីពីរ។ លោកថា ក្រុមរបស់លោកត្រៀមបានល្អដើម្បីយកលេខ៣។ ជាចុងក្រោយ លោក ស សារ៉ា ក៏បានអរគុណថ្នាក់ដឹកនាំខេត្ត និងថ្នាក់នាំក្រុមដែលបានជួយឧបត្ថម្ភគាំទ្រកន្លងមក។

លោក ផន រស្មីពេជ្រ គ្រូបង្គោលក្រុមជម្រើសខេត្តត្បូងឃ្មុំដែលត្រូវប្រកួតយកតំណែងជើងឯកជាលើកទីពីរ អះអាងថា កូនក្រុមបានត្រៀមឆន្ទៈយ៉ាងខ្ពស់ដើម្បីឈានទៅក្រសោបពានរង្វាន់សម្ដេចតេជោ ហ៊ុន សែន ថ្នាក់ខេត្ត លើកទីពីរ។ លោកបញ្ជក់ថា ការលេងវគ្គផ្ដាច់ព្រ័ត្រប៉ះព្រៃវែងសាជាថ្មីក្នុងឆ្នាំនេះ ក្រុមលោកមិនមានសម្ពាធអ្វីឡើយ។

ចំណែកកូនក្រុមវិញក៏ពុំមាននរណាមានបញ្ហារបួសដែរ។ ជាចុងក្រោយ លោក Matthew Sinclair គ្រូបង្គោលក្រុមជម្រើសខេត្តព្រៃវែង សប្បាយចិត្តដែលកូនក្រុមបានចូលរួមប្រកួតប្រជែងក្នុងការប្រកួតពានរង្វាន់សម្ដេចតេជោ ហ៊ុន សែន ថ្នាក់ខេត្តនេះ ព្រោះបានស្រូបទាញបទពិសោធថ្មីៗ និងសម្រួចសមត្ថភាពពួកគេកាន់តែប្រសើរ។ លោកបន្ថែមថា ទោះប៉ះក្រុមណាក៏ដោយ កូនក្រុមតែងតែប្រឹងប្រែងអស់ពីសមត្ថភាព ជាពិសេសការប្រកួតផ្ដាច់ព្រ័ត្រដ៏សំខាន់នេះ។

គួរដឹងដែរថា មុនឈានដល់វគ្គផ្ដាច់ព្រ័ត្រដណ្ដើមជើងឯកថ្នាក់ខេត្ត២០២០ ព្រៃវែងបានទម្លាក់សៀមរាប និងត្បូងឃ្មុំ ឈ្នះកែប។ ក្នុងថ្ងៃផ្ដាច់ព្រ័ត្រទី២៩ ខែកក្កដា ដដែល សៀមរាបជួបកែបយកលេខ៣នៅម៉ោង៣រសៀល និងត្បូងឃ្មុំ ប៉ះព្រៃវែង យកជើងឯក នៅម៉ោង៦ល្ងាច។

ដោយឡែក ការចាប់ពូលវគ្គ១៦ក្រុម ថ្នាក់ជាតិ នឹងធ្វើឡើងនៅថ្ងៃសុក្រ ទី៣១ ខែកក្កដា មុនចាប់ផ្ដើមការប្រកួតផ្លូវការនៅថ្ងៃទី១២ និងទី១៣ ខែសីហា៕ អត្ថបទ ៖ CNCC

កម្ពុជានឹងមានទំនិញជាង៣០០មុខនាំទៅចិន ក្នុងនោះ៩៥% មិនជាប់ពន្ធនៅពេល FTA ចូលជាធរមាន

ភ្នំពេញ ៖ កម្ពុជានឹងមានទំនិញជាង៣០០មុខនាំទៅចិន ក្នុងនោះ៩៥% មិនគិតពន្ធនៅពេលកិច្ចព្រមព្រៀងពាណិជ្ជកម្មសេរីទ្វេ ភាគីកម្ពុជាចិន (FTA) ចូលជាធរមាន នៅដើមឆ្នាំ២០២១ខាងមុខ។ នេះបើយោងតាមការអះអាងរួមគ្នារបស់មន្ត្រីជាន់ខ្ពស់មកពីក្រសួងពាណិជ្ជកម្ម នៅក្នុងសន្និសីទសារព័ត៌មានរៀបចំដោយទីស្ដីការគណៈរដ្ឋមន្ត្រីនៅថ្ងៃទី២៨ ខែកក្កដា ឆ្នាំ២០២០នេះ។

រដ្ឋលេខាធិការក្រសួងពាណិជ្ជកម្ម លោក សុខ សុភ័ក្រ បានថ្លែងថា ទំនិញជាង៣០០មុខដែលត្រូវនាំទៅចិនភាគច្រើនគឺជាផលិផលកសិកម្ម និងផលិតផលសម្រេចចេញពីឧស្សាហកម្មកែច្នៃ។ ក្នុងចំណោមមុខទំនិញជាង៣០០មុខនេះ គឺផលិតផលកសិកម្ម៩៥ភាគរយត្រូវបានរួចពន្ធសម្រាប់ការនាំចេញទៅចិនដូចជាៈម្រេច ម្ទេសក្រៀម ផ្លែឈើ ត្រីសាច់ ជាដើម។ ចំណែកមុខទំនិញ ដែលចិនគិតពន្ធពីកកម្ពុជា គឺជាប្រភេទគ្រឿងចក្រ និងយានយន្តផ្សេងៗ។ លោកថា មូលហេតុដែលចិន គិតពន្ធលើមុខទំនិញទាំងនេះដោយសារចិន មិនចង់ឱ្យការនាំចូលទីផ្សារខ្លួន ប៉ះពាល់ផលិតផលក្នុងស្រុក។

លោក សុខ សុភ័ក្ត្រ បានបញ្ជាក់ដែរថា កាលពីមុន មុខទំនិញដែលប្រទេសកម្ពុជា នាំចូលទៅកាន់ប្រទេសចិន រួមមាន៖ ម្រេច ត្រូវភាគីចិន យកពន្ធ ២០ភាគរយ ប៉ុន្តែ ក្រោយកិច្ចព្រមព្រៀងពាណិជ្ជកម្មសេរីកម្ពុជា-ចិនចូលជាធរមាននោះ ម្រេចកម្ពុជាត្រូវបាន បញ្ចុះពន្ធ ០% បន្ថែមពីនេះសម្រាប់ម្រេចក្រៀមដែលប្រជាកសិករដាំបាននភខេត្តតាកែវ ក៏ត្រូវបានចុះពន្ធ០% បូករួមទាំងម្ទេសក្រៀមជាដើម។

មន្ត្រីជាន់ខ្ពស់រូបនេះបានបន្តថា ក្រៅពីមុខទំនិញទាំងនេះ កម្ពុជាក៏អាចនាំចេញត្រី សាច់ គ្រំ ខ្យង ក្តាម ព្រមទាំងផលិតមួយចំនួនធំទៀត ទៅកាន់ប្រទេសចិនផងដែរ។

ចំពោះការឆ្លើយតបទៅនឹងការលើកឡើងដែលថា ចិនចំណេញជាងកម្ពុជា ពីកិច្ចព្រមព្រៀមពាណិជ្ជកម្មសេរីទ្វេភាគីនោះ លោកបានគូសបញ្ជាក់ថា គ្មាននរណាចំណេញជាងនរណាឡើយក្នុងកិច្ចព្រមព្រៀងនេះ។ លោកថា ទោះជាគ្មានកិច្ចព្រមព្រៀងពាណិជ្ជកម្មសេរីក៏កម្ពុជាត្រូវតែនាំទំនិញមកពីចិនដដែល។ ផ្ទុយទៅវិញកម្ពុជាទទួលបានការអនុគ្រោះក្នុងការនាំចេញទំនិញទៅចិនដោយមិនគិតពន្ធប្រមាណ៩៥% ឯណោះ។ បន្ថែមលើនេះប្រយោជន៍ដែលកម្ពុជាទទួលបានពីកិច្ចព្រមព្រៀងពាណិជ្ជកម្មសេរីទ្វេភាគីគឺការនាំចេញទំនិញទៅចិនអាចមានការកើនឡើង២៥ភាគរយ៕

ចំនួនអ្នកឆ្លង COVID-19 លើលោកកើនដល់ជិត១៧លាននាក់ ស្លាប់ជាង៦៦ម៉ឺននាក់

July 29, 2020ព័ត៌មានថ្មីចុងក្រោយ, ព័ត៌មានអន្តរជាតិ, ព្រឹត្តិការណ៍កម្ពុជាមេគង្គ ប៉ុស្តិ៍

បរទេស ៖ យោងតាមទិន្នន័យពីគេហទំព័រអន្តរជាតិ Worldometer បានបង្ហាញថា គិតត្រឹមម៉ោង ៧ព្រឹកថ្ងៃពុធ ទី២៩ ខែកក្កដា ឆ្នាំ២០២០នេះ ចំនួនអ្នកឆ្លងជំងឺ COVID-19 នៅទូទាំងពិភពលោក បានកើនឡើងដល់ ១៦,៨៧៩,៧៥១នាក់ហើយ។ ក្នុងនោះអ្នកស្លាប់មានចំនួន ៦៦២,៣៨៣នាក់ និងជាសះស្បើយឡើងវិញ ១០,៤៣៧,៥៨៤នាក់។

គេហទំព័រដដែលបានបង្ហាញថា ការរីករាលដាលនៃជំងឺកូវីដ១៩ នៅតែមានសភាពស្រួចស្រាវចំនួនអ្នកឆ្លង និងស្លាប់ថ្មីនៅតែមានចំនួនច្រើន។ ក្នុងនោះសហរដ្ឋអាមេរិក នៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដែលមានអ្នកឆ្លងជំងឺ COVID-19 ចំនួន ៤,៤៩៥,០៨៧នាក់ ស្លាប់ចំនួន ១៥២,២៤៩នាក់ និងជាសះស្បើយចំនួន ២,១៧៤,៤៧២នាក់។

ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺកូវីដ១៩ គឺប្រទេសប្រេស៊ីល មានអ្នកឆ្លង ២,៤៨៤,៦៤៩នាក់ ស្លាប់ចំនួន ៨៨,៦៣៤នាក់ និងជាសះស្បើយ ១,៧២១,៥៦០នាក់ និងប្រទេសឈរនៅចំណាត់ថ្នាក់ទី៣ គឺប្រទេសឥណ្ឌា មានអ្នកឆ្លង ១,៥៣២,១៣៥នាក់ ស្លាប់ ៣៤,២២៤នាក់ និងជាសះស្បើយ ៩៨៨,៧៧០នាក់៕

អតីតនាយករដ្ឋមន្ត្រីម៉ាឡេស៊ី លោក Najib Razak ត្រូវតុលាការផ្តន្ទាទោសដាក់ពន្ធនាគារ១២ឆ្នាំ

គូឡាឡាំពួរ ៖ អតីតនាយករដ្ឋមន្ត្រីម៉ាឡេស៊ី លោក ណាជីប រ៉ាហ្សាក់ (Najib Razak) នៅថ្ងៃអង្គារនេះ ត្រូវបានតុលាការប្រកាសកាត់ទោសដាក់ពន្ធនាគារ១២ឆ្នាំ និងពិន័យប្រាក់៤៩.៣៨លានដុល្លារអាមេរិក ពីបទប្រព្រឹត្តិអំពើពុករលួយលុយរដ្ឋ។ នេះបើយោងតាមសារព័ត៌មាន CNA។

អតីតនាយករដ្ឋមន្ត្រីម៉ាឡេស៊ី លោក ណាជីប រ៉ាហ្សាក់ (Najib Razak) ត្រូវបានតុលាការរកឃើញថា ពិតជាបានប្រព្រឹត្តទោសកំហុសជុំវិញការចោទប្រកាន់លើបទល្មើសចំនួន៧ ពាក់ព័ន្ធនឹងរឿងអាស្រូវពុករលួយមូលនិធិរដ្ឋ 1Malaysia Development Berhad (1MDB)។

ចៅក្រមតុលាការជាន់ខ្ពស់ម៉ាឡេស៊ី លោក Mohd Nazlan Mohd Ghazali បានរកឃើញថាលោក ណាជីប មានអាយុ៦៧ឆ្នាំ បានប្រព្រឹត្តទោសកំហុសក្នុងនោះរួមមាន ល្មើសអំណាចមួយបទចោទ, រំលោភលើសេចក្ដីទុកចិត្ត៣បទចោទ, និងលាងលុយកខ្វក់៣បទចោទ ពាក់ព័ន្ធនឹងអំពើពុករលួយលើមូលនិធិរដ្ឋ 1MDB ក្នុងទំហំទឹកប្រាក់ ១៣.៦លានដុល្លារ។

សូមជម្រាបថា លោក ណាជីប រ៉ាហ្សាក់ ធ្លាប់កាន់តំណែងជានាយករដ្ឋមន្ត្រីម៉ាឡេស៊ី ពីឆ្នាំ២០០៩ ដល់ឆ្នាំ២០១៨៕

កូរ៉េខាងជើងបង្កើនការប្រយុទ្ធប្រឆាំងនឹង COVID-19 ក្រោយរកឃើញករណីសង្ស័យដំបូង

ព្យុងយ៉ាង ៖ កូរ៉េខាងជើងកាលពីថ្ងៃអង្គារម្សិលមិញបានប្រកាសដាក់ចេញនូវវិធានការដ៏តឹងរ៉ឹងបន្ថែមទៀត ដើម្បីទប់ស្កាត់ការឆ្លងរីករាលដាលនៃជំងឺ COVID-19 បន្ទាប់ពីមានករណីសង្ស័យដំបូងបំផុត កាលពីថ្ងៃអាទិត្យសប្តាហ៍កន្លងទៅនេះ។ នេះបើយោងតាមទីភ្នាក់ងារសរព័ត៌មាន Reuters។

ទីភ្នាក់ងារសារព័ត៌មានរដ្ឋកូរ៉េខាងជើង KCNA បានរាយការណ៍ឲ្យដឹងថា វិធានការធ្វើចត្តាឡីស័ក និងការត្រួតពិនិត្យទ្រង់ទ្រាយធំនៅតាមតំបន់នានា កំពុងដាក់ឲ្យដំណើរការ យ៉ាងសកម្ម ខណៈឧបករណ៍ធ្វើតេស្ត, សម្លៀកបំពាក់ការពារ និងឧបករណ៍វេជ្ជសាស្ត្រ ក៏ត្រូវបានផ្គត់ផ្គង់ទៅកាន់តំបន់នានាផងដែរ។

អាជ្ញាធរកូរ៉េខាងជើងបាននិយាយថា ខ្លួនបានបិទទីក្រុង Kaesong ស្ថិតនៅតំបន់ព្រំដែនជាប់កូរ៉េខាងត្បូង កាលពីថ្ងៃចន្ទម្សិលមិញនេះ ក្រោម ហេតុផលថា ករណីសង្ស័យដំបូងបំផុតនៃការឆ្លង COVID-19 ត្រូវបានរកឃើញនៅលើជននិរទេសម្នាក់ ដែលទើបមកពីកូរ៉េខាងត្បូង ដោយឆ្លងព្រំដែនខុសច្បាប់មកកាន់ កូរ៉េខាងជើង តាមទីក្រុងមួយនេះ។

ជុំវិញករណីសង្ស័យនេះ ត្រូវបានអ្នកអង្កេតការណ៍ បង្ហាញក្តីបារម្ភកាន់តែខ្លាំងឡើងជុំវិញស្ថានការណ៍ COVID-19 នៅក្នុងប្រទេសកូរ៉េខាងជើង ដ្បិតប្រព័ន្ធថែទាំសុខភាព របស់ប្រទេសឯកោមួយនេះ គឺមានភាពទន់ខ្សោយបំផុត ខ្វះទាំងអគ្គិសនីប្រើប្រាស់ ខ្វះមន្ទីរពេទ្យ ខ្វះថ្នាំសង្កូវ និងផ្សេងៗទៅទៀត។ ទោះជាយ៉ាងណា បើយោងតាម របាយការណ៍របស់អង្គការសុខភាពពិភពលោក WHO គិតត្រឹមថ្ងៃទី១៦ ខែកក្កដានេះ កូរ៉េខាងជើងបានធ្វើតេស្តរក COVID-19 លើមនុស្សចំនួន ១,២១១នាក់ ហើយជា លទ្ធផលគឺ «អវិជ្ជមាន» ទាំងអស់៕

សហគមន៍ផ្តល់ជំនួយបន្តគាំទ្ររាជរដ្ឋាភិបាលកម្ពុជាលើវិស័យសកម្មភាពមីនតាមរយៈគម្រោងបោស សម្អាតមីនដើម្បីលទ្ធផល

July 28, 2020ព័ត៌មានថ្មីចុងក្រោយ, ព្រឹត្តិការណ៍កម្ពុជា, សន្តិសុខ/សង្គមមេគង្គ ប៉ុស្តិ៍

ភ្នំពេញ ៖ ថ្ងៃទី២៨ ខែកក្កដា ឆ្នាំ២០២០ ឯកឧត្តម ទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន បានដឹកនាំកិច្ចប្រជុំក្រុមប្រឹក្សាភិបាលគម្រោងបោសសម្អាតមីនដើម្បីលទ្ធផលដំណាក់កាលទី៤ ដែលមានការអញ្ជើញចូលរួមពីតំណាងក្រសួងសេដ្ឋកិច្ច និងហិរញ្ញវត្ថុ ប្រទេសផ្តល់ជំនួយ និងដៃគូអភិវឌ្ឍន៍ រួមមាន៖ UNDP ប្រទេសអូស្ត្រាលី ភ្នាក់ងារសហប្រតិបត្តិការអន្តរជាតិសាធារណៈរដ្ឋកូរ៉េ(KOICA) និងប្រទេសនូវែលសេឡង់ ក្នុងគោលបំណងពិនិត្យលើវឌ្ឍនភាពនៃការអនុវត្តគម្រោងបោសសម្អាតមីនដើម្បីលទ្ធផល និងការរៀបចំផែនការសកម្មភាពការងារឆ្នាំ២០២១។

ក្នុងនាមសម្តេចតេជោនាយករដ្ឋមន្រ្តី និងជាប្រធានអាជ្ញាធរមីន ឯកឧត្តម ទេសរដ្ឋមន្រ្តី លី ធុជ បានវាយតម្លៃខ្ពស់ចំពោះការអនុវត្តគម្រោងបោសសម្អាតមីនដើម្បីលទ្ធផល ចាប់តាំងពីឆ្នាំ២០០៦ រហូតដល់ខែមិថុនា ឆ្នាំ២០២០ ដែលបានរំដោះផ្ទៃដី និងផ្តល់ដីមានសុវត្ថិភាព ពីការគម្រាមកំហែងដោយសារមីនបានប្រមាណ ២៤៥ គីឡូម៉ែត្រក្រឡា និងមានប្រជាពលរដ្ឋទទួលផលប្រមាណជាង ១ លាននាក់។

ឯកឧត្តម ទេសរដ្ឋមន្រ្តី ក៏បានថ្លែងអំណរគុណយ៉ាងជ្រាលជ្រៅដល់ប្រទេសម្ចាស់ជំនួយ និងដៃគូអភិវឌ្ឍន៍ ដែលបានបន្តចូលរួមជាមួយរាជរដ្ឋាភិបាលកម្ពុជា ក្នុងគម្រោងបោសសម្អាតមីនដើម្បីលទ្ធផលដំណាក់កាលទី៤ រួមមាន UNDP ប្រទេសអូស្រ្តាលី សាធារណរដ្ឋកូរ៉េ និងប្រទេសនូវែលសេឡង់។ ឯកឧត្តម ទេសរដ្ឋមន្រ្តី បានចាត់ទុកអង្គការ UNDP គឺជាដៃគូដ៏រឹងមាំ ក្នុងការចូលរួមជាមួយរាជរដ្ឋាភិបាលកម្ពុជា ក្នុងគម្រោងបោសសម្អាតមីនដើម្បីលទ្ធផល។

គម្រោងបោសសម្អាតមីនដើម្បីលទ្ធផលដំណាក់កាលទី៤ មានរយៈពេល ៦ឆ្នាំ ចាប់ពីឆ្នាំ២០២០-២០២៥ ដែលមានទំហំទឹកប្រាក់សរុបចំនួន ២០លានដុល្លារសហរដ្ឋអាមេរិក ដោយផ្តោតជាសំខាន់ទៅលើលទ្ធផលធំៗចំនួនបី ទី១-ការបោសសម្អាតមីន និងសំណល់ជាតិផ្ទុះពីសង្គ្រាម ទី២-គាំទ្រសកម្មភាពកិច្ចសង្គ្រោះជនពិការ ការអប់រំយល់ដឹងអំពីគ្រោះថ្នាក់ដោយសារមីន និងការបញ្ជ្រាបយេនឌ័រ និងទី៣-ពង្រឹងសមត្ថភាពថ្នាក់ជាតិ៕

បង្ក្រាបក្លឹបហ្គោលឡាញបំពានការណែនាំរបស់រាជរដ្ឋាភិបាល ឃាត់មនុស្សជិត៣០០នាក់

ភ្នំពេញ ៖ នៅវេលាម៉ោងជាង១២រំលងអធ្រាត្រឈានចូលថ្ងៃអង្គារ ទី២៨ ខែកក្កដា ឆ្នាំ២០២០ នេះ សមត្ថកិច្ចចម្រុះរបស់រាជធានីភ្នំពេញ បានចុះបង្ក្រាបក្លិបកម្សាន្ត យីហោ(ហ្គោលឡាញ) មានទីតាំងស្ថិតនៅតាមបណ្តោយផ្លូវ១៩៨៦ ស្ថិតក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ហើយបានឃាត់ខ្លួនមនុស្សប្រុស-ស្រីជាង៣០០នាក់។

សមត្ថកិច្ចបញ្ជាក់ថា មូលហេតុនៃការចុះបិទក្លិបនេះ គឺ ក្លិបនេះមិនស្តាប់តាម ការណែនាំ របស់រាជរដ្ឋាភិបាល ហើយបានបើកឲ្យមនុស្សចូលកម្សាន្តយ៉ាងអាណាធិបតេយ្យ៕

ស្អែកនេះ ដឹងហើយ ក្រុមណាជាម្ចាស់ពាន Hun Sen Cup ថ្នាក់ខេត្ត ឆ្នាំ២០២០

July 28, 2020កីឡា, ព័ត៌មានថ្មីចុងក្រោយ, ព្រឹត្តិការណ៍កម្ពុជាមេគង្គ ប៉ុស្តិ៍

ភ្នំពេញ ៖ ការប្រកួតបាល់ទាត់ដណ្ដើមពានរង្វាន់សម្ដេចតេជោ ហ៊ុន សែន ឬពាន Hun Sen Cup ថ្នាក់ខេត្ត លើកទី១៤ ឆ្នាំ២០២០ នឹងឈានដល់វគ្គផ្ដាច់ព្រ័ត្រនាល្ងាចថ្ងៃទី២៩ ខែកក្កដាស្អែកនេះហើយ នៅពហុកីឡដ្ឋានជាតិ រវាងក្រុមការពារតំណែងជើងឯកខេត្តត្បូងឃ្មុំ និងក្រុមជម្រើសខេត្តព្រៃវែង។ដូច្នេះចាំមើលតើត្បូងឃ្មុំ ឬព្រៃវែង នឹងក្លាយជាជើងឯកពានថ្នាក់ខេត្តឆ្នាំនេះ?

ចំណែកការប្រកួតដណ្ដើមចំណាត់ថ្នាក់លេខ៣ រវាងក្រុមជម្រើសខេត្តសៀមរាប ដែលជើងឯករងឆ្នាំចាស់ ជាមួយក្រុមជម្រើសខេត្តកែបនាវេលាម៉ោង ៣រសៀលស្អែកនេះនៅពហុកីឡដ្ឋានជាតិផងដែរ។

សូមបញ្ជាក់ថា ក្រោយចប់ការប្រកួតវគ្គផ្ដាច់ព្រ័ត្រពានសម្ដេចតេជោ-ថ្នាក់ខេត្ត ក្រុមទាំង ៤ ខាងលើ នឹងបន្ដបេសកកម្មកាន់តែធំទៀត គឺការត្រៀមចូលរួមប្រកួតពានរង្វាន់សម្ដេចតេជោ-ថ្នាក់ជាតិ ជាមួយក្រុមសមាជិកលីគកំពូលកម្ពុជាចំនួន ១២ក្លិប ដែលគ្រោងរៀបចំពិធីចាប់ឆ្នោតបែងចែកគូប្រកួត នាថ្ងៃទី៣១ ខែកក្កដា ឆ្នាំ២០២០ ខាងមុខ៕

សម្តេចតេជោអនុញ្ញាតឱ្យដំណើរការឡើងវិញ នូវសកម្មភាពហាត់ប្រាណ និងលេងកីឡាតាមទីធ្លាសាធារណៈ

ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានសម្រេចអនុញ្ញាតឱ្យដំណើរការឡើងវិញ នូវសកម្មភាពហាត់ប្រាណ និងលេងកីឡាតាមទីធ្លាសាធារណៈនៅតាមរាជធានី ខេត្ត និងក្នុងបរិវេណពហុកីឡដ្ឋានជាតិអូឡាំពិក។ នេះបើតាមសេចក្តីជូនដំណឹងរបស់ក្រសួងអប់រំ។

ក្រសួងអប់រំ បានបញ្ជាក់ថា «ដោយសារបច្ចុប្បន្ននេះ ការទប់ស្កាត់ការរីករាលដាលនៃជំងឺកូវីដ១៩ នៅក្នុងប្រទេសកម្ពុជាមានសភាពល្អប្រសើរ និងអាចគ្រប់គ្រងបាន និងដើម្បីលើកកម្ពស់ការថែទាំសុខភាព ផ្លូវកាយ និងផ្លូវចិត្តរបស់បងប្អូនប្រជាពលរដ្ឋ តាមរយៈការហាត់ប្រាណ និងការលេងកីឡា ក្រសួងអប់រំ យុវជន និង កីឡាទទួលបានការអនុញ្ញាតដ៏ខ្ពង់ខ្ពស់ពី សម្ដេចតេជោនាយករដ្ឋមន្ត្រី ដើម្បីដំណើរការឡើងវិញនូវសកម្មភាពហាត់ប្រាណ និងលេងកីឡាតាមទីធ្លាសាធារណៈនៅតាមរាជធានី ខេត្ត និងក្នុងបវិវេណពហុកីឡដ្ឋានជាតិអូឡាំពិក លើកលែងតែសកម្មភាពហាត់ប្រាណតាមក្លឹបកីឡា ដែលប្រើប្រាស់សម្ភារៈរួមគ្នា»។

ក្រសួងអប់រំបន្តថា នៅក្នុងការអនុញ្ញាតឱ្យដំណើរការឡើងវិញនេះ ក្រសួងស្នើឱ្យទីកន្លែងហាត់ប្រាណ និងលេងកីឡាទាំង អស់ត្រូវបន្តគោរពតាមវិធានសុវត្ថិភាពសុខភាព របស់ក្រសួងសុខាភិបាល និងអង្គការសុខភាពពិភពលោកយ៉ាង ត្រឹមត្រូវ និងម៉ឺងមាត់ដូចខាងក្រោម៖

១៖ រក្សាអនាម័យជាប្រចាំដោយលាងសម្អាតដៃនឹងសាប៊ូ ទឹកអាល់កុល ដែលសម្លាប់មេរោគ ពាក់ម៉ាស់ និងវ៉ាស់កម្ដៅ
២៖ រក្សាគម្លាតសុវត្ថិភាពបុគ្គល ដោយរក្សាចម្ងាយពីម្នាក់ទៅម្នាក់យ៉ាងតិច ១.៥ ម៉ែត្រ
៣៖ ទីកន្លែងហាត់ប្រាណ និងកន្លែងលេងកីឡា ត្រូវបាញ់ថ្នាំសម្លាប់មេរោគ និងធ្វើអនាម័យជាប្រចាំ
៤៖ ត្រូវធានាថា កន្លែងហាត់ប្រាណ និងកន្លែងលេងកីឡា មិនមែនជាកន្លែងឆ្លងជំងឺកូវីដ១៩។

ជាមួយគ្នានេះ ក្រសួងអប់រំសង្ឃឹម និងជឿជាក់ថា បងប្អូនប្រជាពលរដ្ឋទាំងអស់នឹងចូលរួមហាត់ប្រាណ និងលេងកីឡា ព្រមទាំងបន្តអនុវត្តនូវវិធានសុវត្ថិភាពសុខភាព របស់ក្រសួងសុខាភិបាល និងអង្គការសុខភាពពិភពលោក ប្រកបដោយការទទួលខុសត្រូវខ្ពស់៕