ភ្នំពេញ ៖ ក្រសួងសុខាភិបាល នៅព្រឹកថ្ងៃទី១១ ខែកក្កដា ឆ្នាំ២០២០នេះ បានចេញសេចក្តីប្រកាសព័ត៌មាន ដោយបញ្ជាក់ថា អ្នកជំងឺកូវីដ១៩ ចំនួន២នាក់ បានព្យាបាលជាសះស្បើយ ខណៈអ្នកជំងឺចំនួន៨នាក់ទៀត កំពុងសម្រាកព្យាបាលជំងឺនៅមន្ទីរពេទ្យ។

សេចក្តីប្រកាសព័ត៌មានរបស់ក្រសួងសុខាភិបាលបានឲ្យដឹងថា អ្នកជាសះស្បើយទាំង០២នាក់ ជាបុរសជនជាតិខ្មែរ អាយុ២៣ឆ្នាំ មានអាស័យដ្ឋាននៅភូមិអំពិល ស្រុកក្រូចឆ្មារ ខេត្តត្បូងឃ្មុំ និងបុរសជនជាតិខ្មែរម្នាក់ទៀត អាយុ១៥ឆ្នាំ មានអាសយដ្ឋាននៅស្រុកព្រៃកប្បាស ខេត្តតាកែវ ជាអ្នកធ្វើដំណើរមកពីប្រទេសម៉ាឡេស៊ី បានព្យាបាលជាសះស្បើយ ដោយទទួលបានលទ្ធផលតេស្ត អវិជ្ជមានវីរុសកូវីដ-១៩ ចំនួន០២ដង និងត្រូវបានអនុញ្ញាតឱ្យចេញពីមណ្ឌលសុខភាពចាក់អង្រែ រាជធានីភ្នំពេញ។

គិតត្រឹមម៉ោង០៧៖០០ព្រឹក ថ្ងៃទី១១ ខែកក្កដា ឆ្នាំ២០២០ ស្ថានភាពជំងឺកូវីដ-១៩ នៅកម្ពុជា បានរកឃើញអ្នកជំងឺទាំងអស់នៅទូទាំងប្រទេស សរុបចំនួន ១៤១នាក់ (ស្ត្រី ៤០នាក់ និងបុរស ១០១នាក់)។ ចំនួនអ្នកព្យាបាលជាសះស្បើយសរុបទូទាំងប្រទេស មានចំនួន ១៣៣នាក់ (ស្មើនឹង ៩៤.៣៣% ធៀប នឹងចំនួនអ្នកមានវីរុសកូវីដ-១៩ទាំងអស់) នៅក្នុងចំនួននេះ មានស្រី៣៩នាក់ និងបុរស៩៤នាក់។ អ្នកសម្រាកព្យាបាលនៅក្នុងមន្ទីរពេទ្យរដ្ឋ មានចំនួន០៨នាក់ ក្នុងនេះបុរសជនជាតិខ្មែរ ០៧ នាក់ និងស្ត្រីជនជាតិខ្មែរ ០១នាក់ ដែលបានវិលត្រឡប់មកពីប្រទេសឥណ្ឌូ ណេស៊ីកំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត អ្នកមានវីរុសកូវីដ-១៩៕ 

ភ្នំពេញ ៖ ឯកឧត្តមបណ្ឌិតសភាចារ្យ រស់ ចន្រ្តាបុត្រ ជាអ្នកនិពន្ធសៀវភៅចំណងជើង ប្រាសាទព្រះវិហារ បានចូលសង្រ្គោះបន្ទាន់ នៅមន្ទីពេទ្យកាល់ម៉ែត្រ ពាក់ព័ន្ធនឹងបញ្ហាបេះដូង នៅវេលាម៉ោង១១ និង២៣នាទីយប់ ថ្ងៃទី១០ ខែកក្កដា ឆ្នាំ២០២០។ នេះបើយោងតាមការជូនព័ត៌មានពី ឯកឧត្តម ផៃ ស៊ីផាន អ្នកនាំពាក្យរាជរដ្ឋាភិបាល៕

ភ្នំពេញ ៖ កិច្ចប្រជុំរដ្ឋមន្រ្តីការបរទេសមេគង្គ-ជប៉ុន លើកទី១៣ តាមរយៈប្រព័ន្ធវីដេអូ កាលពីនៅថ្ងៃទី៩ខែកក្កដាឆ្នាំ២០២០ នៅទីស្តីការក្រសួង កម្ពុជា បានគាំទ្រការបង្កើតមជ្ឈមណ្ឌល អាស៊ាន សម្រាប់ភាពបន្ទាន់ ផ្នែកសុខភាពសាធារណៈ និងជំងឺដែលកំពុងកើតមាននេះ។

កិច្ចប្រជុំដែលអញ្ជើញចូលរួមដោយឧបនាយករដ្ឋមន្រ្តី ប្រាក់ សុខុន រដ្ឋមន្រ្តីការបរទេស និងសហប្រតិបត្តិការអន្តរជាតិកម្ពុជា ត្រូវបានដឹកនាំដោយសហប្រធាន ឯកឧត្តម Pham Binh Minh ឧបនាយករដ្ឋមន្រ្តី រដ្ឋមន្រ្តីការបរទេសនៃសាធារណរដ្ឋសង្គមនិយម វៀតណាម និង ឯកឧត្តម MOTEGI Toshimitsu រដ្ឋមន្រ្តីការបរទេសជប៉ុន។

អង្គប្រជុំបានទទួលស្គាល់ថា ការសម្រេចបាននូវការគ្របដណ្តប់ សុខ ភាព ជាសកល រួមជាមួយនឹងការទប់ស្កាត់ កាន់តែប្រសើរការរកឲ្យឃើញ និងការឆ្លើយតបទៅនឹង បញ្ហាបន្ទាន់ ចំពោះសុខភាពសាធារណៈពិតជាមានភាពចាំបាច់សម្រាប់សុខភាព និងសន្តិសុខរបស់ ប្រជាជន ជាពិសេសក្នុងការដោះស្រាយជំងឺរាតត្បាតនាពេលអនាគត។

រដ្ឋមន្រ្តីការបរទេស បានកត់សម្គាល់ប្រកបដោយការពេញចិត្ត ចំពោះវឌ្ឍនភាព ដែលសម្រេចបាន នៅក្នុង កិច្ចសហប្រតិបត្តិការមេគង្គ-ជប៉ុន លើវិស័យ សុខាភិបាល ដែលក្នុងនោះរួមមាន ការត្រៀម ខ្លួនឆ្លើយតប ទៅនឹងជំងឺរាតត្បាត។

រដ្ឋមន្រ្តីនៃបណ្តាប្រទេសមេគង្គបានកោតសរសើរចំពោះការបន្តគាំទ្ររបស់ជប៉ុន នៅក្នុងតំបន់មេគង្គ ក្នុងការផ្តល់ជំនួយដើម្បីធានាបាននូវប្រព័ន្ធថែទាំសុខភាពប្រកបដោយប្រសិទ្ធភាព និងភាពរឹងមាំ តាមរយៈគំនិតផ្តួចផ្តើមចំនួន០២៖ (១) ជំនួយដែលមានទឹកប្រាក់ចំនួន ៥៦លានដុល្លារអាម៉េរិក របស់ជប៉ុន ប្រើប្រាស់ចំពោះកិច្ចសហប្រតិបត្តិការ បចេ្ចកទេសសម្រាប់ក្រុមបុគ្គលិកគ្រូពេទ្យ និងការ ផ្តល់បរិក្ខារវេជ្ជសាស្ត្រជូនមន្ទីរពេទ្យ និងស្ថាប័នវេជ្ជសាស្ត្រដទៃទៀត និង (២) បំណងរបស់ជប៉ុន ក្នុង ការផ្តល់ជំនួយបន្ថែមទៀត ដែលមានទឹកប្រាក់ប្រមាណ៥០លានដុល្លារអាម៉េរិក តាមរយៈការ ផ្តល់ជំនួយជាបរិក្ខារវេជ្ជសាស្ត្រដើម្បីពង្រឹងការត្រៀមខ្លួន និងឆ្លើយតបទៅនឹងជំងឺឆ្លង និងការបណ្តុះ បណ្តាល បច្ចេកទេសរបស់ទីភ្នាក់ងារ សហប្រតិបត្តិការអន្តរជាតិជប៉ុន (JICA) ស្របតាមតម្រូវការ របស់ បណ្ដាប្រទេសមេគង្គនីមួយៗ។

រដ្ឋមន្រ្តីការបរទេស បានស្វាគមន៍ចំពោះការបង្កើត៖ (១) មជ្ឈមណ្ឌលអាស៊ានសម្រាប់ភាពបន្ទាន់ ផ្នែកសុខភាពសាធារណៈ និងជំងឺដែលកំពុងកើតមាន (២) មូលនិធិអាស៊ាន សម្រាប់ការឆ្លើយតប នឹងជំងឺ កូវីដ១៩ និង (៣) ការស្តុកបម្រុងថ្នាក់តំបន់នៃគ្រឿងបរិក្ខារវេជ្ជសាស្រ្ត និងនីតិវិធីប្រតិបត្តិ ស្តង់ដារសម្រាប់ភាពអាសន្នផ្នែកវេជ្ជសាស្ត្រ ក្នុងគោលបំណងឆ្លើយតបឱ្យបានឆាប់រហ័ស ដើម្បី ពង្រឹងការការពារ ការរកឲ្យឃើញ ការគ្រប់គ្រង និងការឆ្លើយតបទៅនឹងជំងឺឆ្លង នានា ក្នុងពេល អនាគត។

ពាក់ព័ន្ធនឹងការពង្រឹង នូវទំនាក់ទំនងសេដ្ឋកិច្ចមេគង្គ-ជប៉ុន ក្រោយទទួលបានជោគជ័យ លើជំងឺ

ក្នុងអំឡុងពេលនៃកិច្ចប្រជុំតាមរយៈប្រព័ន្ធវីដេអូនេះ ឯកឧត្តម ឧបនាយករដ្ឋមន្រ្តី ប្រាក់សុខុន បាន បង្ហាញនូវការប្តេជ្ញាចិត្តដ៏មុតមាំរបស់រាជរដ្ឋាភិបាលកម្ពុជា ក្នុងការយកឈ្នះលើវិបត្តិជា សកល កូវីដ ១៩ តាមរយៈគំនិត ផ្តួចផ្តើម “កម្មវិធីផ្ទេរសាច់ប្រាក់សម្រាប់គ្រួសារក្រីក្រ និងងាយរងគ្រោះក្នុង អំឡុង ពេលកូវីដ១៩” ដែលមានទឹកប្រាក់សរុបចំនួន ១២៥លានដុល្លារសម្រាប់ផែនការរយៈពេល ៥ខែ ក្នុងការទ្រទ្រង់ប្រជាជនក្រីក្រ និងងាយរងគ្រោះ។

ឧបនាយករដ្ឋមន្រ្តី បានរំលឹកឡើងវិញនូវការអំពាវនាវរបស់សម្តេចតេជោ ហ៊ុន សែន នៅ ក្នុងឱកាសកិច្ចប្រជុំកំពូលអាស៊ានលើកទី៣៦ ដោយបានជំរុញឲ្យថ្នាំព្យាបាល និងវ៉ាក់សាំងការពារ ជំងឺកូវីដ១៩ ក្លាយជាទំនិញសាធារណៈពិភពលោក ដែលប្រជាពលរដ្ឋគ្រប់រូបអាចប្រើប្រាស់បាន។

ចំពោះបញ្ហាតំបន់ ឯកឧត្តម ឧបនាយករដ្ឋមន្រ្តី បានគូសបញ្ជាក់សាជាថ្មី នូវការគាំទ្រយ៉ាងមុត មាំ របស់កម្ពុជា ចំពោះការបង្កើត “មជ្ឈមណ្ឌលអាស៊ាន សម្រាប់ភាពបន្ទាន់ ផ្នែកសុខភាពសាធារណៈ និងជំងឺដែលកំពុងកើតមាន” ដែលនឹងក្លាយ ជាយន្តការចម្បងក្នុងការ ពង្រឹង នីតិវិធីនៃការការពារ ការរកឲ្យ ឃើញ ការគ្រប់គ្រង និងការឆ្លើយតបទៅនឹងជំងឺឆ្លងក្នុងពេលអនាគត ព្រមទាំងបញ្ជាក់ពី គោលបំណងរបស់កម្ពុជាក្នុងការទទួលធ្វើជាប្រទេសម្ចាស់ផ្ទះនៃមជ្ឈមណ្ឌលនេះ។

កិច្ចប្រជុំនេះ បានអនុម័តលើ “សេចក្តីប្រកាសសហប្រធាននៃកិច្ចប្រជុំរដ្ឋមន្រ្តីការបរទេស មេគង្គ-ជប៉ុន លើកទី១៣ ស្តីពីកិច្ចសហប្រតិបត្តិការមេគង្គ–ជប៉ុន ដើម្បីសម្រេចបាននូវការគ្របដណ្តប់ សុខភាពជាសកល និងការពង្រឹងឲ្យបានទាំងស្រុងនូវទំនាក់ទំនងសេដ្ឋកិច្ច” ដែលផ្តោតទៅលើសារ សំខាន់ នៃកិច្ចសហប្រតិបត្តិការមេគង្គ–ជប៉ុន ក្នុងការជំរុញកិច្ចខិតខំប្រឹងប្រែងរួមគ្នា ក្នុងការគ្រប់ គ្រង និងទប់ស្កាត់ ទៅនឹងការរីករាលដាលនៃជំងឺរាតត្បាត និងការដោះស្រាយផលប៉ះពាល់អវិជ្ជ មាន នៃជំងឺរាតត្បាតលើសង្គម និងសេដ្ឋកិច្ច ព្រមទាំងការពន្លឿនការស្តារសេដ្ឋកិច្ច ឡើងវិញបន្ទាប់ ពីការទទួលជោគជ័យលើជំងឺកូវីដ១៩៕

ភ្នំពេញ ៖ គ្រោះថ្នាក់ចរាចរណ៍មួយបានកេីតឡេីងរវាងរថយន្ត២គ្រឿងបុកគ្នាត្រង់ផ្លូវបំបែកជាបួនលា់ដូចរន្ទះខែប្រាំង បណ្តាលឱ្យរថយន្តម្ខាងខ្ចេចផ្នែកខាងមុខទាំងស្រុង រីឯរថយន្តម្ខាងទៀតក្រឡាបអូសជាង២០ម៉ែត្រ តែសំណាងល្អមិនបណ្តាលឱ្យមាននរណាម្នាក់ងបរបួសធ្ងន់ធ្ងរទេ ។ ហេតុការណ៍នេះបានកេីតឡេីងនៅវេលាម៉ោង២និង៣០នាទីយប់ថ្ងៃទី១១ខែកក្កដាឆ្នាំ២០២០ នៅតាមបណ្តោយផ្លូវ១០០៣កែង១៩៥២ ដែលស្ថិតក្នុងសង្កាត់ភ្នំពេញថ្មីខណ្ឌសែនសុខ។

ប្រភពនៅកន្លែងកេីតហេតុបានឱ្យដឹងថាមុនពេលកេីតហេតុ ប្រភពនៅកន្លែងកេីតហេតុបានឱ្យដឹងថាមុនពេលកេីបេីកបរដោយបុរសម្នាក់ក្នុងស្ថានភាពស្រវឹងស្រឺងៗ ក្នុងទិសដៅពីលិចទៅកេីតពេលមកដល់ចំណុចកេីតហេតុត្រង់ផលូវបំបែកជាបួនស្រាប់តែមានឬថយន្តស៊េរីទំនេីបម៉ាកវីហ្គូពណ៍សស្លាកលេខភ្នំពេញ2BE-5458បេីកបរក្នុងទិសដៅពីជេីងទៅត្បូង មកដល់ត្រង់ផលូវបំបែកជាបួន ក៏បានបុកគ្នាពេញទំហឹងបណ្តាលឱ្យឬថយន្រព្រុសខូចខាតផ្នែកខាងមុខស្ទេីរទាំងស្រុង រីឯរថយន្តម៉ាកវីហ្គូ បានក្រឡាបផ្ងារជេីងអូសប្រមាណជាង២០ម៉ែត្រ តែសំណាល្អមិនបណ្តាលឱ្យនរណាម្នាក់រងឬបួសធ្ងន់ក្នុងហេតុការណ៍នេះទេ។

ក្រោយពេលកេីតហេតុសមត្ថកិច្ចចរាចរណ៍មូលដ្ឋានបានចុះដល់កន្លែងកេីតហេតុភ្លាមៗ និងបានឱ្យភាគគីទាំងសងខាងធ្វេីការចរចាដោះស្រាយគ្នាដោយសន្តិវិធីនៅនឹងកន្លែងកេីតហេតុ។ សូមបញ្ជាក់ថារថយន្តទាំងគ្រឿងបេីកក្នុងល្បឿនលឿនដូចគ្នា៕

ភ្នំពេញ៖ ស្ត្រីម្នាក់បានដាច់ខ្លួនជា២បណ្តាលឲ្យស្លាប់ភ្លាមៗខណៈរថយន្តបូមស៊ីម៉ង់ត៍មួយគ្រឿងបើកបុកកិនចំពាក់កណ្តាលខ្លួន។ ហេតុការណ៏គ្រោះថ្នាក់ចរាចរណ៏ដ៏គួឲ្យរន្ធត់ខាងលើនេះបានកើតឡើងកាលពីវេលាម៉ោង៩និង៤០នាទីព្រឹកថ្ងៃទី១០ខែកក្កដា ឆ្នាំ២០២០ ស្តិននៅចំណុចផ្លូវ២១៧ស្តុបស្រាបៀ ភូមិឬស្សី១ សង្កាត់ស្ទឹងមានជ័យទី៣ខណ្ឌមានជ័យ។
សពស្ត្រីរងគ្រោះខាងលើមានឈ្មោះឆៃ ណា អាយុ៣១ឆ្នាំ មុខរបរលក់មាន់ ស្នាក់នៅភូមិឬស្សី សង្កាត់ស្ទឹងមានជ័យទី២ខណ្ឌមានជ័យ។ ចំណែកអ្នកបើកបររថយន្តបង្កមានឈ្មោះ សម្បត្តិ ខុង ភេទប្រុស អាយុ២៨ឆ្នាំ មុខរបរបើកបររថយន្តក្រុមហ៊ុត្រាហ្កន មានស្រុកកំនើតនៅភូមិចាក់ត្រាំង ឃុំក្រវ៉ាញ ស្រុកក្រវ៉ាញ ខេត្តពោធិសាត់

ប្រភពព័ត៍មាននៅកន្លែងកើតហេតុបានឲ្យដឹងថា មុនពេលកើតហេតុស្ត្រីម្នាក់បានជិះម៉ូតូមួយគ្រឿងម៉ាកសេ១២៥ ពណ៍ខ្មៅ សេរីឆ្នាំ២០១៦ ពាក់ស្លាកលេខ កំពត 1J 1061 ជិះម៉ូតូដឹកមាន់បំរុងយកទៅលក់នៅឯផ្សារក្នុងទិសដៅពីជើងទៅត្បូងលុះដល់ចំនុចភ្លើងស្តុបស្រាប់តែរថយន្តបូមស៊ីម៉ង់ត៍មួយគ្រឿងរបស់ក្រុមហ៊ុនត្រាហ្កន ពណ៍សពាក់ស្លាកលេខ5 A 2423បើកបរស្របទិសដៅគ្នាក្នុងល្បឿនលឿនរួមនិងរថយន្តបិតបាំងស្គុតលើកញ្ចាក់ធ្វើឲ្យអ្នកបើកបរមើលផ្លូវមិនឃើញបានកិនស្ត្រីជិះម៉ូតូខាងលើដាច់ខ្លួនជា២បំណែកហើយរថយន្តកិនម៉ូតូអូសជិត៣០០ម៉ែត្រ ទើបសមត្ថកិច្ចឃាត់អ្នកបើកបរបានរួចបញ្ជូនទៅកាន់ប៉ុស្តិនគរបាលស្ទឹងមានជ័យទី៣ចាត់ការបន្ត។

ក្រោយពេលកើតហេតុសមត្ថកិច្ចខណ្ឌមានជ័យសហការណ៍ជាមួយចរាចរណ៏ក្រុងចុះមកធ្វើការវាស់វែងនិងបញ្ជូនអ្នកបើកបររថយន្តបង្កនិងរថយន្តរួមនិងម៉ូតូស្ត្រីរងគ្រោះទៅកាន់ការិយាល័យចរាចរណ៏ជើងគោកស្នងការនគរបាលរាជធានីភ្នំពេញកសាងសុំនុំរឿងបញ្ជូនទៅតុលាការចាត់ការតាមផ្លូវច្បាប់។ ចំណែកសពសមត្ថកិច្ចបានប្រគល់ជូនទៅឲ្យក្រុមគ្រួសារសាច់ញាតិដឹកយកទៅធ្វើបុណ្យនៅឯស្រុកកំណើត៕

ខេត្តព្រះវិហារ ៖ កងពលតូចអន្តរាគមន៍លេខ៧មានរៀបចំពិធីប្រជំុបូកសរុបលទ្ធផលការងារយោធាខែកក្កដា ចាប់ពីថ្ងៃទី០៥ខែមិថុនា ដល់ថ្ងៃទី១០ ខែកក្កដា ឆ្នាំ២០២០ និងដាក់ចេញទិសដៅការងារយោធាខែសីហា ឆ្នាំ២០២០ ពិធីនេះធ្វេីឡេីងនាព្រឹកថ្ងៃទី១០ ខែកក្កដា ឆ្នាំ២០២០
ក្រោម អធិបតីភាពឧត្តមសេនីយ៍ទោ ដួង សំនៀង មេបញ្ជាការកងពលតូចអន្តរាគមន៍លេខ៧ រួមជាមួយឯកឧត្តម មេបញ្ជាការរង នាយទាហាន នឹងពលទាហាន ជាច្រេីនរូប ។

ក្នុងនោះ ឧត្តមសេនីយ៍ទោ ដួង សំ នៀង មេបញ្ជាការកងពលតូចអន្តរាគមន៍លេខ៧ បានមានប្រសាសន៍ផ្តាំផ្ញេីរដល់មេបញ្ជារការរង នាយទាហាន ពលទាហានទាំងអស់ចំនុះអោយទីបញ្ជាការកងពលតូចអន្តរាគមន៍លេខ៧ ទាំងអស់ ត្រូវខិតខំបំពេញការងារតាមផ្នែកអោយបានល្អប្រសេីរ នឹងសូមរក្សាភាពស្មោះត្រង់ថដាច់ខាតចំពោះ ជាតិ សាសនា ព្រះមហាក្សត្រ ព្រមទាំងគោរពអោយបានម៊ឺងម៉ាត់ នូវរដ្ឋធម្មនុញ្ញ នៃព្រះរាជាណាចក្រ កម្ពុជា នឹងច្បាប់ស្តីពីរលក្ខន្តិកទូទៅចំពោះយោធិន នៃកងយោធពលខេមរភូមិន្ទ ក៍ដូចជាច្បាប់ នឹងលិខិតបទដ្ឋានគតិយុត្តពាក់ព័ន្ធផ្សេងៗ។
លោក បានបញ្ជាក់ទៀតថា ក្នុងនាមជាយោធិនត្រូវបន្តយកចិត្តទុកដាក់អោយបានខ្លាំងក្លា ក្នុងការលេីកស្ទួយជីវភាពរស់នៅ នឹងសុខមាលភាពរបស់កងទ័ព នឹងត្រៀមកម្លាំង មធ្យោបាយ សំភារះជួយសង្រ្គោះ ប្រជាពលរដ្ឋ ដែលរងគ្រោះ ដោយគ្រោះមហន្តរាយ ដែលបង្ករដោយកត្តាមនុស្ស ឬ គ្រោះធម្មជាតិ នៅក្នុងភូមិសាស្រ្តទទួលខុសត្រូវ អោយបានរហ័សបំផុត ។

ជាមួយគ្នានេះ លោកបានថ្លែងនូវការកោតសរសើរ និង វាយតម្លៃ ខ្ពស់ ចំពោះ ការ អនុវត្ត តួនាទី និងភារកិច្ចយ៉ាងសកម្មប្រកបដោយស្មារតី ទទួលខុសត្រូវ ខ្ពស់ របស់នាយ ពលទាហាននិងសូមគាំទ្រលើកទឹកចិត្តឱ្យបន្តការខិតខំប្រឹងប្រែងបន្ថែមទៀត ដើម្បីឈានទៅសម្រេចភារកិច្ចកាន់តែល្អប្រសើរជូន ជាតិ មាតុភូមិ និងប្រជាជននៃយើង៕ ដោយ ៖ កូវ ប៊ុនហេង

ខេត្តកំពង់ចាម ៖ ដើម្បី ផ្គត់ផ្គង់ព្រះសង្ឃ ក្នុងឱកាសចូលកាន់ព្រះវស្សា អស់កាលត្រីមាស នាព្រឹកថ្ងៃទី០៩ ខែកក្កដា ឆ្នាំ២០២០នេះ លោក ស្រី ញូង ចរិយា អ៊ុន ចាន់ដា ប្រធានកិត្តិយស សាខាសមាគមនារីកម្ពុជា ដើម្បីអភិវឌ្ឍន៍សាខាខេត្តកំពង់ចាម និង លោក ស្រី គឹមឆយ អ្នកតំណាងរាស្រ្ត មណ្ឌលខេត្តកំពង់ចាម រួម ជាមួយ ថ្នាក់ដឹកនាំ ជា ច្រើន រូប ទៀត បាននាំយកសម្ភារៈបរិក្ខា ជាគ្រឿងឧបភោគ បរិភោគ និងថវិកាប្រគេន ដល់ព្រះសង្ឃ ដែលគង់ចាំព្រះវស្សា នៅវត្តកោះកែវ និងវត្តគង្គារាម (ហៅវត្តចុងបឹង) ស្ថិតនៅឃុំព្រែកដំបូក ស្រុកស្រីសន្ធរ ខេត្តកំពង់ចាម។

នាឱកាសនោះ លោក ស្រី គឹមឆយ អ្នកតំណាងរាស្រ្ត មណ្ឌលខេត្តកំពង់ចាម មានប្រសាសន៍ថា ថ្ងៃនេះ លោកស្រីផ្ទាល់ ក៏ដូចជា លោក ស្រី ជាអ្នកតំណាងរាស្ត្រដូចគ្នា រួមជាមួយ សាខាសមាគមនារីកម្ពុជា ដើម្បី អភិវឌ្ឍន៍សាខា ខេត្តកំពង់ចាម និងសប្បុរសជននានា បានបរិច្ចាកនូវធនធានផ្ទាល់ខ្លួន នាំនូវសម្ភារៈបរិក្ខា ជាគ្រឿងឧបភោគ បរិភោគ និងថវិកា ដើម្បី ចូលរួមចំណែកក្នុងវិស័យព្រះពុទ្ធសាសនា ជាពិសេស ការជួយទំនុកបម្រុង ដល់ព្រះសង្ឃ ក្នុងឱកាសចូលកាន់ព្រះវស្សា អស់កាលត្រីមាស នៅវត្តកោះកែវ និងវត្តគង្គារាម ។ ដែលក្នុង ១វត្តៗ មាន អង្ករ មី ត្រីខ ទឹកត្រី ទឹកស៊ីអ៊ីវ ទឹកបរិសុទ្ធ និងថវិកា ១.២០០.០០០រៀល ។

បន្ទាប់ពិធីវេរ នូវសម្ភារៈបរិក្ខា ជាគ្រឿងឧបភោគ បរិភោគ និងថវិកា ដល់ព្រះសង្ឃ ទៅតាមកិច្ចសាសាសនា រួចមក ព្រះគ្រូចៅអធិការ នៃវត្តទាំង ២ ក៏បានធ្វើការចម្រើនពរ អរគុណ ចំពោះ លោកឲ ស្រី គឹមឆយ ក៏ដូចជា សហការី ជាថ្នាក់ដឹកនាំទាំងអស់ ដែលបាននាំយកនូវ សម្ភារៈ ជាគ្រឿងឧបភោគ បរិភោគ និងបច្ច័យ មកប្រគេនដល់វត្ត ដើម្បី ទុកជាប្រយោជន៍ សម្រាប់ផ្គត់ផ្គង់ ជីវភាពព្រះសង្ឃ ដែលត្រូវគង់ចាំព្រះវស្សា រយៈពេល ៣ខែ ក្នុងរដូវចូលព្រះវស្សានេះ ផងដែរ៕ ដោយ ៖ ប៉ែន សុផល

ភ្នំពេញ ៖ ក្រសួង​សាធារណការ និង​ដឹកជញ្ជូន ​បាន​ឱ្យដឹងថា នីតិវិធីផ្ទេរកម្មសិទ្ធិយានជំនិះ និងបង់ពន្ធប្រថាប់ត្រារួមគ្នា នឹងធ្វើឡើង​នៅកន្លែងផ្តល់សេវាតែមួយ ដើម្បីកាត់បន្ថយនីតិវិធីស្មុគស្មាញ កាត់បន្ថយពេលវេលា ឱ្យមានតម្លាភាព ប្រសិទ្ធភាព និងឆាប់រហ័ស ត្រូវបានឯកភាព​គ្នា​ ដោយ​គ្រោងដាក់ឱ្យដំណើរការនៅក្នុង​ខែកញ្ញា ឆ្នាំ២០២០ ខាងមុខនេះ។

កាលពី​ថ្ងៃទី០៩ ខែកក្កដា ឆ្នាំ២០២០ នៅទីស្តីការក្រសួងសាធារណការ និងដឹកជញ្ជូន លោក​ទេសរដ្ឋមន្ដ្រី ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូន បានជួបប្រជុំពិភាក្សាការងារជាមួយលោក គង់ វិបុល ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃអគ្គនាយកដ្ឋានពន្ធដារ អំពីកិច្ចសហប្រតិបត្តិការតភ្ជាប់ប្រព័ន្ធផ្ទេរកម្មសិទ្ធិយានជំនិះរួមគ្នា និងពិនិត្យទៅលើសេចក្តីព្រាងប្រកាសអន្តរក្រសួងស្តីពី បែបបទ និងនីតិវិធីនៃការផ្ទេរកម្មសិទ្ធិយានជំនិះ ដោយមានការចូលរួមពីថ្នាក់ដឹកនាំ និងមន្ដ្រីអគ្គនាយកដ្ឋានដឹកជញ្ជូនផ្លូវគោក និង នាយកដ្ឋានព័ត៌មានវិទ្យានិងទំនាក់ទំនងសាធារណៈ នៃក្រសួងសាធារណការ និងដឹកជញ្ជូន និងអគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ។

កិច្ច​ប្រជុំពិភាក្សានេះ ក្នុងគោលបំណងដើម្បីពិនិត្យទៅលើលំហូរនីតិវិធីក្នុងការផ្តល់សេវាផ្ទេរកម្មសិទ្ធិយានជំនិះ និងបង់ពន្ធប្រថាប់ត្រាផ្ទេរកម្មសិទ្ធិយានជំនិះរួមគ្នា ប្រើប្រាស់ប្រព័ន្ធស្វ័យប្រវត្តិកម្ម របស់ក្រសួងសាធារណការ និងដឹកជញ្ជូន តភ្ជាប់ជាមួយប្រព័ន្ធបច្ចេកវិទ្យារបស់អគ្គនាយកដ្ឋានពន្ធដារ ដើម្បីសម្រួលដល់ប្រជាពលរដ្ឋ ក្នុងដាក់ពាក្យផ្ទេរកម្មសិទ្ធិយានជំនិះ បង់សេវា និងបង់ពន្ធប្រថាប់ត្រា ក្នុងពេលតែមួយ នៅទីតាំងផ្តល់សេវាតែមួយ របស់ក្រសួងសាធារណការ និងដឹកជញ្ជូន ឱ្យបានលឿនរហ័ស កាត់បន្ថយពេលវេលា និងនីតិវិធីស្មុគស្មាញក្នុងការផ្តល់សេវាផ្ទេរកម្មសិទ្ធិយានជំនិះ និងបង់ពន្ធប្រថាប់ត្រា។

លោក​ទេសរដ្ឋមន្ត្រី និង​លោក​ប្រតិភូរាជរដ្ឋាភិបាល មានសង្ឃឹមយ៉ាងមុតមាំថា បច្ចេកទេសផ្តល់សេវា តាមលំហូរចរន្តការងារដំណើរការផ្ទេរកម្មសិទ្ធិយានជំនិះតាមប្រព័ន្ធបច្ចេកវិទ្យានេះ លំហូរចរន្តដំណើរការនីតិវិធី នៃការផ្ទេរកម្មសិទ្ធិយានជំនិះ និងបង់ពន្ធប្រថាប់ត្រានេះ ដោយប្រើប្រព័ន្ធបច្ចេកវិទ្យានេះ នឹងដំណើរការទៅបានយ៉ាងរលូន និងចូលរួមចំណែកយ៉ាងសំខាន់ ទៅដល់ការពង្រឹងនូវការគ្រប់គ្រង ការផ្តល់សេវាសាធារណៈ ការគ្រប់គ្រងមធ្យោបាយធ្វើដំណើរ និងការគ្រប់គ្រងទិន្នន័យសន្តិសុខជាតិ ព្រមទាំងជួយពង្រឹងនូវការប្រមូលចំណូលសារពើរពន្ធផងដែរ។ ទាំងនេះស្តែងឱ្យឃើញពីការគិតគូរដិតដល់ និងយល់ពីតម្រូវការជាក់ស្តែងរបស់ប្រជាពលរដ្ឋ និងជាគន្លឹះសំខាន់ក្នុងការជួយសម្រួលនីតិវិធីជូនប្រជាពលរដ្ឋ ផ្តល់ភាពងាយស្រួល កាត់បន្ថយភាពស្មុគស្មាញ និងលុបបំបាត់ការចំណាយក្រៅផ្លូវការ ប្រកបដោយតម្លាភាព និងប្រសិទ្ធភាព។

សូមជម្រាបជូនផងដែរថា៖ ការផ្ទេរកម្មសិទ្ធិយានជំនិះ និងបង់ពន្ធប្រថាប់ត្រា នឹងត្រូវបានអនុវត្តនៅកន្លែងតែមួយ តាមរយៈប្រព័ន្ធស្វ័យប្រវត្តិកម្ម ដោយប្រជាពលរដ្ឋអាចធ្វើការដាក់ពាក្យ ONLINE តាមរយៈគេហទំព័រ vehicle.mpwt.gov.kh ឬអាចមកកាន់ទីតាំងផ្តល់សេវាផ្ទាល់ដើម្បីមន្ត្រីជំនាញធ្វើការបំពេញសំណុំបែបបទជូន រួចធ្វើការបងប្រាក់សេវាជាមួយគ្រឹះស្ថានហិរញ្ញវត្ថុជាដៃគូ របស់ក្រសួងសាធារណការ និងដឹកជញ្ជូន និងក្រសួងសេដ្ឋកិច្ច និងហិរញ្ញវត្ថុ។ នីតិវិធីរួមនៃការផ្ទេរកម្មសិទ្ធិយានជំនិះនេះ ត្រូវកំណត់ដោយប្រកាសអន្តរក្រសួងរវាងក្រសួងសាធារណការ និងដឹកជញ្ជូន និងក្រសួងសេដ្ឋកិច្ចនិងហិរញ្ញវត្ថុ គ្រោងសម្រេច ផ្តល់សុពលភាព និងដាក់ឱ្យប្រើប្រាស់ នៅក្នុងខែកញ្ញា ឆ្នាំ២០២០ ខាងមុខនេះ៕

ភ្នំពេញ ៖ សម្តេច​នាយករដ្ឋមន្រ្តី ហ៊ុន សែន និង​លោក ង្វៀន ហ៊្វូជុង ប្រធានរដ្ឋវៀតណាមបាន​សម្តែង​នូវការ​អបអរដ៏ខ្លាំងក្លា​ចំពោះ​ការចុះហត្ថលេខាលើកិច្ចព្រមព្រៀង​ទទួលស្គាល់​សមិទ្ធផល​នៃការងារ​ខណ្ឌសីមា និង​បោះបង្គោល​ព្រំដែន​គោករវាង​ប្រទេស​ទាំងពីរ ដែល​សម្រេចបាន ៨៤% ព្រមទាំង​ឯកភាព​ពន្លឿន​ការដោះស្រាយ​បញ្ហា​ព្រំដែន​១៦% ដែលនៅសេសសល់ ដើម្បី​កសាង​ព្រំដែន​កម្ពុជា-វៀតណាម ជាព្រំដែន​សន្តិភាព ស្ថិរភាព សហប្រតិបត្តិការ និង​ការអភិវឌ្ឍ។ ការលើកឡើង​នេះ ធ្វើឡើង​តាម​រយៈ​កិច្ចសន្ទនាតាមទូរសព្ទ កាលពីថ្ងៃទី៩ ខែ​កក្កដា ឆ្នាំ​២០២០។

សូមអាន​បន្ថែម​ក្នុងសេចក្តី​ប្រកាសព័ត៌មាន​ខាងក្រោម៖

ភ្នំពេញ៖ រដ្ឋមន្រ្តីក្រសួងពាណិជ្ជកម្មកម្ពុជា លោក ប៉ាន សូរស័ក្តិ បានជួបប្រជុំទ្វេភាគី តាមប្រព័ន្ធវីដេអូ (Video Conference) ជាមួយលោកស្រី យូ ម្យូងហ៊ី (YOO Myung-Hee) រដ្ឋមន្រ្តីពាណិជ្ជកម្មកូរ៉េ នៅថ្ងៃទី៩ ខែកក្កដា ឆ្នាំ២០២០ ដើម្បីចាប់ផ្តើមចរចាជាផ្លូវការនៃកិច្ចព្រមព្រៀងពាណិជ្ជកម្មសេរីទ្វេភាគី កម្ពុជា-កូរ៉េ។

មុននឹងឈានមកដល់ការប្រកាសជាផ្លូវការនេះ ក្រុមការងារនៃប្រទេសទាំងពីរ បានជួបប្រជុំជាច្រើនលើកច្រើនសារមកហើយ តាមរយៈប្រព័ន្ធវីដេអូ និងបានឆ្លងកាត់ជាច្រើនដំណាក់កាល រួមមាន ការសិក្សារួមស្តីពីលទ្ធភាពនៃការបង្កើតកិច្ចព្រមព្រៀងពាណិជ្ជកម្មសេរីទ្វេភាគី, ការរៀបចំគោលការណ៍រួមនៃការចរចា និង ការស្នើសុំគោលការណ៍អនុញ្ញាតពី រដ្ឋាភិបាលនៃប្រទេសទាំងពីរ។

ការសិក្សា បានបង្ហាញថា កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ នឹងអាចជាកាតាលីករជួយពង្រឹងទំនាក់ទំនងសេដ្ឋកិច្ច និងនយោបាយ បង្កើនទំហំពាណិជ្ជកម្ម និងការវិនិយោគ បង្កើនផលិតផលក្នុងស្រុកសរុប(GDP) ផ្តល់ផលប្រយោជន៍ ដល់អ្នកប្រើប្រាស់ ក៏ដូចជាពង្រឹងកិច្ចសហប្រតិបត្តិការរវាងស្ថាប័ននៃប្រទេសទាំងពីរផងដែរ។

សូមបញ្ជាក់ថា ទំហំពាណិជ្ជកម្មនៃប្រទេសទាំងពីរក្នុងឆ្នាំ២០១៩ មានប្រមាណ ១.០៣២លានដុល្លា មានការកើនឡើង ២៥៤%ធៀបនឹងឆ្នាំ២០០៩ ដែលមានប្រមាណ ២៩១លានដុល្លា។ ទំហំពាណិជ្ជកម្មនៃប្រទេសទាំងពីរមានការកើនឡើងជាមធ្យមប្រមាណ ១៥% ក្នុងមួយឆ្នាំ ក្នុងរយៈពេល១០ឆ្នាំចុងក្រោយនេះ។

រដ្ឋមន្រ្តីពាណិជ្ជកម្មនៃប្រទេសទាំងពីរ បានបង្ហាញជំហរសុទិដ្ឋិនិយម និងមានការប្តេជ្ញាចិត្តខ្ពស់ក្នុងការសម្រេចឱ្យបាននូវកិច្ចព្រមព្រៀងពាណិជ្ជកម្មសេរីទ្វេភាគីនេះ ដែលបង្ហាញពីការគាំទ្រយ៉ាងពេញទំហឹងនូវប្រព័ន្ធពាណិជ្ជកម្មពហុភាគីដែលពឹងផ្អែកលើគោលការណ៍ច្បាប់ និងជាពិសេសដើម្បីជួយស្តារសេដ្ឋកិច្ចឡើងវិញឱ្យបានឆាប់រហ័សបន្ទាប់ពីវិបត្តិជំងឺកូវីដ-១៩។ ក្រៅពីនោះក៏បានពិភាក្សា និងផ្លាស់ប្តូរយោបល់អំពីស្ថានភាព និងការវិវត្តរបស់អង្គការពាណិជ្ជកម្មពិភពលោក (WTO) និងបានបញ្ចេញទស្សនៈរួមស្តីពីការបន្តគាំទ្រអង្គការពាណិជ្ជកម្មពិភពលោក និងប្រព័ន្ធពាណិជ្ជកម្មពហុភាគី ដែលបានដើរតួនាទីយ៉ាងសំខាន់ ក្នុងការជួយដល់ប្រទេសជាសមាជិក ទាំងកំពុងអភិវឌ្ឍន៍ និងអភិវឌ្ឍន៍តិចតួច រួមទាំងកម្ពុជា ផងដែរ។

ជាមួយគ្នានេះដែរ ការងារចរចាបង្កើតកិច្ចព្រមព្រៀងពាណិជ្ជកម្មសេរីដែលក្រសួងពាណិជ្ជកម្មបាននិងកំពុងអនុវត្តនេះ ស្របតាមកម្មវិធីនយោបាយរបស់រាជរដ្ឋាភិបាល នីតិកាលទី៦ នៃរដ្ឋសភា និងយុទ្ធសាស្រ្តចតុកោណ ដំណាក់កាលទី៤ សំដៅធ្វើពិពិធកម្មទីផ្សារ និងផលិតផលនាំចេញរបស់កម្ពុជាបន្ថែមទៀត៕

ខេត្តកោះកុង ៖ លោក នេត្រ ភក្ត្រា រដ្ឋ​លេ​ខាធិការ និងជាអ្នកនាំពាក្យក្រសួងប​រិស្ថា​នបានបញ្ជាក់ថា អន្ទាក់ គឺជាឃាតករលាក់មុខដែលបានសម្លាប់សត្វព្រៃជាច្រើនរាប់មិនអស់ ហើយអន្ទាក់ចាប់សត្វព្រៃសរុបចំនួន២០ ១៧៩អន្ទាក់ ត្រូវបានដោះយកចេញពីតំបន់ការពារធម្មជាតិ ក្នុងរយៈពេល៦ខែ ក្នុងឆ្នាំ២០២០។

លោកបន្តថា ​ការដោះអន្ទាក់គ្រប់ប្រភេទចេញពី​តំបន់​កា​រ​ពា​រធម្មជាតិ៦ខែឆ្នាំ២០២០ ពីខែមករា ដល់ខែមិថុនា អន្ទាក់សរុបចំនួន ២០ ១៧៩ អន្ទា​ក់​ត្រូ​វ​បា​នដោះយកចេញមានន័យថា បានជួយជីវិតសត្វព្រៃជាច្រើនម៉ឺនក្បាលឱ្យរួចរស់ជីវិត។ នៅ​ឆ្នាំ​​២០១៩កន្លងទៅអន្ទាក់ចំនួនជាង៤ម៉ឺនអន្ទា​ក់ត្រូវបាន​ដោះចេញពី​តំប​ន់​កា​រ​ពា​រ​ធ​ម្ម​ជា​តិ​។

ការលើកឡើងរបស់លោក នេត្រ ភក្ត្រា ធ្វើឡើងក្នុងពេលដឹកនាំប្រតិភូក្រសួងបរិ​ស្ថា​ន អង្គការសម្ព័ន្ធមិត្តសត្វព្រៃនិងអ្ន​កសារព័ត៌មានជាច្រើនស្ថា​ប័នទៅកាន់​ស្នាក់ការល្បា​តស្ទឺ​ង​ព្រា​​ត់ស្ថិតក្នុស្រុកថ្មបាំងខេត្តកោះកុងកាលពីថ្ងៃទី០៩ខែកក្កដាឆ្នាំ២០២០។ ឯកឧត្តម​បាន​ប​ញ្ជា​ក់​ថា នៅក្នុងក្របខ័ណ្ឌនៃកិច្ចសហប្រតិបត្តិការរ​វាងក្រសួង​បរិស្ថាននិ​ងអ​ង្គ​កា​រ​ស​ម្ព័ន្ធមិត្តស​ត្វ​ព្រៃ​​ក្នុងការការពារតំបន់ការពារធម្មជាតិក្នុងខេត្តកំពង់ស្ពឺ កោះកុង និងពោធិសាត់ អន្ទា​ក់​ចំ​នួ​ន​៣២ ៣២២ អន្ទាក់ត្រូវបានដោះចេញពីតំបន់ការពារធម្មជាតិក្នុងរយៈពេល ១៨ ខែចុង​ក្រោ​យ​នេះ​ (ខែមករា ឆ្នាំ ២០១៩ ដល់ខែមិថុនា ឆ្នាំ ២០២០)។

អន្ទាក់ទាំងនោះ ខ្លះធ្វើពីខ្សែនីឡុង ឬខ្សែកាបដែកដែលបង្កគ្រោះថ្នាក់បំផុត។ អន្ទាក់កា​ន់តែមានសភាពគ្រោះថ្នាក់ឡើងនៅពេលជនល្មើសបានប្រើប្រាស់អន្ទាក់ដោយប្រើប្រាស់ចរន្តអគ្គុសនីដើម្បីឆក់សត្វក្នុងព្រៃ ឬការប្រើសំឡេងសត្វសប្បនិមិត្តដើម្បីចាប់សត្វ។ អន្ទាក់​គឺជា​ឃា​តកលាក់មុខដែលអាចសម្លាប់សត្វព្រៃគ្រប់ពេលវេលា ហើយអន្ទាក់ក៏ជាការគំ​រាមកំហែង​ដ​ល់​ប្រភេទសត្វមួយចំនួនដល់ស្ថិតក្នុងប្រភេទកម្រស្រាប់ឱ្យបាត់បង់ និងផុត​ពូជ​ពី​លើផែ​នដី​យើ​ង​នេះ​។

ចំពោះមុខនៃការគំរាមកំហែងរបស់អន្ទាក់លួចដាក់ដោយ ក្រុមព្រានព្រៃនេះ មន្ត្រីឧទ្យា​នុ​រក្សនៃក្រសួងបរិស្ថាន មិនត្រឹមតែចុះល្បាតដើម្បីទប់ស្កាត់បទល្មើសបំផ្លាញធនធានធម្មជាតិ កា​រកាប់បំផ្លាញព្រៃឈើទេ ប៉ុន្តែមន្ត្រីឧទ្យានុរក្សក៏បានដើរស្វែងរកអន្ទាក់ និងដោះចេញ និង​បំ​ផ្លា​ញអន្ទាក់ចោលដើម្បីសង្គ្រោះជីវិតសត្វព្រៃផងដែរ។

ដើម្បីបញ្ឈប់ការបរបាញ់សត្វ បញ្ឈ​ប់​កា​រដាក់អន្ទាក់ ចាប់សត្វ សូមបង​ប្អូន​ប្រ​ជា​ព​ល​រ​ដ្ឋ​កុំបរិភោគសាច់សត្វ កុំជួញដូរសត្វព្រែ និងកុំជឿលើជំនឿថា បរិភោគសាច់សត្វ ឈាម ឬ​យ​ក​ឆ្អឹងសត្វព្រៃទៅធ្វើឱសថប៉ូវកម្លាំងឬជំនួយដល់សុខភាព តែវាអាចនឹងធ្វើឱ្យបងប្អូនប្រឈម មុ​ខ​នឹងគ្រោះថ្នាក់ទៅវិញដោយសារតែអាចមានមេរោគផ្សេងៗ។

ជាមួយគ្នានេះ ដើម្បីកាត់ផ្តាច់មុខរបរចូលព្រៃកាប់ឈើ និងចូលព្រៃដាក់អន្ទាក់សត្វព្រៃ ននិងប​របាញ់សត្វព្រៃ ក្រសួងបរិស្ថានបានរៀបចំផែនការ បង្កើនជីវភាព​ប្រជាសហគ​ម​ន៍​មូ​ល​ដ្ឋា​នដែលរស់នៅក្នុងតំបន់ការពារធម្មជាតិ ឬនៅជុំវិញតំបន់ការពារធម្មជាតិ ឱ្យរីក​ចម្រើ​ន​ឡើ​ង​តាមរយៈការជំរុញឱ្យមានការបង្កើតការងារថ្មីក្នុងវិស័យទេសចរណ៍ធម្មជាតិនៅក្នុងតំបន់របស់ពួកគាត់៕

ភ្នំពេញ ៖ នៅថ្ងៃព្រហស្បតិ៍ ៤រោច ខែអាសាឍ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី០៩ ខែកក្កដា ឆ្នាំ២០២០ ក្រុមការងារចំពោះកិច្ច ក.ប.ប. រាជធានីភ្នំពេញ ដោយមានការសហការពី មន្ត្រី មន្ទីរពាណិជ្ជកម្មរាជធានី និងអាជ្ញាធរដែនដីខណ្ឌមួយចំនួន បានចុះធ្វើសកម្មភាពនៅតាមបណ្តាផ្សារសំខាន់ៗ ចំនួន ០៧ នៅរាជធានីភ្នំពេញមានដូចជា ៖ ផ្សារអូរឬស្សី ផ្សារធំថ្មី ផ្សារដើមគរ ផ្សារអូរឡាំពិក ផ្សារបឹងកេងកង ផ្សារជម្ពូវន្ត និងផ្សារពិភពថ្មីកំបូល។

គោលដៅសំខាន់នៃការត្រួតពិនិត្យគឺដើម្បី ស្រាវជ្រាវ ទប់ស្កាត់ការចរាចរណ៍ទំនិញខូចគុណភាព ក្លែងបន្លំស្លាកសញ្ញា និងផុតកំណត់កាលបរិច្ឆេទប្រើប្រាស់។ ក្នុងសកម្មភាពនេះ មន្ត្រីជំនាញបានធ្វើតេស្តបឋមទៅលើផលិតផលម្ហូបអាហារចំនួន ៤៥ គំរូ ដើម្បីរកសារធាតុគីមីហាមឃាត់ដែលអាចធ្វើឱ្យប៉ះពាល់ដល់សុខភាពប្រជាពលរដ្ឋ ។ ជាមួយគ្នានោះ មន្ត្រីជំនាញ បានធ្វើការត្រួតពិនិត្យរកភាពមិនអនុលោមនៅលើសំបកវេចខ្ចប់ផលិតផលម្ហូបអាហារផងដែរ ។

ជាលទ្ធផលមន្ត្រីជំនាញ បានរកឃើញ ពពុះសណ្ដែក មានផ្ទុកសារធាតុគីមីហាត់ឃាត់បូរ៉ាក់ (Borax) ចំនួន ៣៧.៩ គីឡូក្រាម។ មន្រ្តីជំនាញបានធ្វើកំណត់ហេតុដកហូតផលិតផលទាំងនោះ មករក្សាទុកដើម្បីដុតកម្ទេចចោលនាពេលក្រោយតាមនីតិវិធី និងបានធ្វើការណែនាំដល់អាជីវករ ឱ្យយល់ដឹង និងអនុវត្តទៅតាមច្បាប់ ស្តីពីការគ្រប់គ្រងគុណភាព សុវត្ថិភាព លើផលិតផល ទំនិញ និងសេវា ជៀសវាងបង្កផលប៉ះពាល់ដល់សុខភាពប្រជាពលរដ្ឋ នឹងអាចប្រឈមចំពោះមុខច្បាប់ថែមទៀត៕

ភ្នំពេញ ៖ ក្រោយពីបានពិភាក្សា និងបានពិនិត្យលើការណែនាំរបស់អង្គការសុខភាពពិភពលោកប្រចាំនៅកម្ពុជានាថ្ងៃទី១០ ខែកក្កដា ឆ្នាំ២០២០ ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានបន្តអំពាវនាវដល់បងប្អូនប្រជាពលរដ្ឋទាំងអស់បន្តយកចិត្តទុកដាក់ការពារការចម្លងវីរុសកូវីដ-១៩ ដើម្បីសុខភាពផ្ទាល់ខ្លួន ក្រុមគ្រួសាររបស់ខ្លួន មិនមានការចម្លងនៅក្នុងសហគមន៍ និងសូមពន្យល់ជូនសាធារណជនទាំងអស់នូវចំណុចសំខាន់ៗដែលពាក់ព័ន្ធទៅនឹងស្ថានភាពជំងឺកូវីដ-១៩ នៅប្រទេសកម្ពុជា មានដូចតទៅ៖

១. ស្ថានភាពទូទៅនៃជំងឺកូវីដ-១៩ នៅកម្ពុជា៖

• តាមទស្សនៈសុខភាពសាធារណៈ “រលកទីមួយ” សំដៅទៅលើខ្សែកោងនៃការរីករាលដាលនៃជំងឺឆ្លង ដែលករណីកើនឡើងដោយសារតែមានការចម្លងជំងឺជាទ្រង់ទ្រាយធំក្នុងសហគមន៍ ហើយបន្ទាប់មកក៏ធ្លាក់ចុះរហូតដល់ជិតដល់សូន្យ ដោយសារតែការអនុវត្តវិធានការសុខភាពសាធារណៈ។
• នៅក្នុងប្រទេសកម្ពុជា ក្រោមការដឹកនាំប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានដាក់ចេញនូវវិធានការបានទាន់ពេលវេលា រួមជាមួយនឹងកិច្ចខិតខំប្រឹងប្រែងក្នុងការរៀបចំ និងការឆ្លើយតបរហ័សរបស់យើងទាំងអស់គ្នា ព្រមទាំងមានការចូលរួមប្រតិបត្តិនូវវិធានការដែលបានដាក់ចេញ ប្រទេសកម្ពុជាទទួលបានលទ្ធផលល្អក្នុងការទប់ស្កាត់ការឆ្លងរាលដាល ហើយយើងមិនមានការចម្លងវីរុសកូវិឌ-១៩ ជាទ្រង់ទ្រាយធំក្នុងសហគមន៍នោះទេមកដល់ពេលនេះ។
• ប្រទេសកម្ពុជា មិនមានការកើនឡើងជាស្វ័យគុណនូវករណីវិជ្ជមានវីរុសកូវីដ-១៩ ដែលបង្កបានជារលក ដូចដែលកើតមានឡើងនៅក្នុងប្រទេសដទៃទៀតនៅលើសាកលលោក។ ផ្ទុយទៅវិញ យើងកំពុងតែស្ថិតក្នុងដំណាក់កាលដំបូងដោយមានករណីវិជ្ជមានជំងឺកូវីដ-១៩ ដែល ភាគច្រើននៃករណីទាំងនោះ ជាករណីនាំចូល។

២. ជំងឺកូវីដ-១៩ គឺជាភ្លើងដ៏សាហាវមួយហើយយើងត្រូវតែបង្ការការរាលដាល

• បច្ចុប្បន្ននៅទូទាំងសលកលោក មានករណីវិជ្ជមានវីរុសកូវីដ-១៩ ឡើងដល់ជាង១១លានករណី និងអ្នកស្លាប់កើនឡើងដល់ជាងកន្លះលាននាក់ហើយ ដែលត្រូវបានរាយការណ៍ទៅអង្គការសុខភាពពិភពលោកគិតត្រឹមថ្ងៃនេះ។ វីរុសនេះ កំពុងរាលដាលដូចភ្លើងឆេះព្រៃនៅជុំវិញពិភពលោក ដូច្នេះ ប្រទេសកម្ពុជា នៅតែប្រឈមនឹងហានិភ័យ ដរាបណាវីរុសនេះនៅកំពុងតែរាលដាលពាសពេញពិភពលោក។
• យើងត្រូវគិតអំពីករណីនិមួយៗដូចជាផ្កាភ្លើង-ផ្កាភ្លើងដែលអាចចាប់ផ្តើមឆេះ ឬយើងអាចពន្លត់វាបានមុនពេលដែលវាមានឱកាសរីករាលដាល។
• នេះជាមូលហេតុដែលការធ្វើតេស្តយ៉ាងតឹងរឹងដែលកំពុងត្រូវបានធ្វើឡើងនៅតាមព្រំដែន នៅពេលដែលប្រជាជនធ្វើដំណើរចូលមកក្នុងប្រទេស។ វិធានការណ៍ត្រួតពិនិត្យនៅតាមព្រំដែននិងការធ្វើចត្តាឡីស័កចំនួន១៤ថ្ងៃ គឺជាកិច្ចការចាំបាច់ដើម្បីទប់ស្កាត់ការកើនឡើងនូវចំនួនករណីវិជ្ជមានវីរុសកូវីដ-១៩ នៅក្នុងប្រទេសកម្ពុជា។
• យើងទាំងអស់គ្នាត្រូវមានការប្រុងប្រយ័ត្នខ្ពស់ ដោយនៅក្នុងចំណោមប្រជាជនដែលងាយនឹងឆ្លងវីរុសនេះ បែបដូចជាផ្កាភ្លើងតែមួយប៉ុណ្ណោះ វាអាចធ្វើឱ្យឆាបឆេះបាន និងរាលដាលទៀតផង។
• ប៉ុន្តែប្រសិនបើយើងទាំងអស់គ្នាមានការប្រុងប្រយ័ត្នខ្ពស់ ចៀសវាងការជួបជុំកកកុញ ចៀសវាងការមានទំនាក់ទំនងជិតស្និទ្ធ និងលំហចង្អៀត ដែលយើងត្រូវតែកាត់បន្ថយនូវហានិភ័យ ក្នុងការចម្លងជំងឺពីមនុស្សម្នាក់ទៅអ្នកដទៃផ្សេងទៀត។ ប្រសិនបើយើងលាងដៃឱ្យបានទៀងទាត់ ហើយយើងពាក់ម៉ាស់នៅពេលចាំបាច់ ព្រមទាំងរក្សាបាននូវគម្លាតសុវត្ថិភាពបុគ្គល គឺ យើងអាចការពារការចម្លង និងកាត់បន្ថយនូវឱកាសនៃការរីករាលដាល ក្នុងករណីមានផ្កាភ្លើងកើតឡើង។

៣. យើងទាំងអស់គ្នាត្រូវធ្វើការដោយមានសាមគ្គីភាព

• ប្រទេសកម្ពុជាមិនអាចកាត់ផ្តាច់ខ្លួនឯងទាំងស្រុងពីពិភពលោកបានទេ ហើយរិតតែមានសារៈសំខាន់ណាស់ ដែលសេដ្ឋកិច្ចកម្ពុជា ត្រូវតែគិតគូររក្សាឲ្យនៅរឹងមាំ។
• នៅពេលនេះ ជំងឺកូវីដ-១៩ គឺជាការរំលឹកមួយថា សុខភាពជាសមូហភាពរបស់យើង គឺផ្អែកលើសកម្មភាពរបស់បុគ្គលម្នាក់ៗ។
• យើងដឹងថា ផលប៉ះពាល់នៃជំងឺរាតត្បាតនេះមានទំហំធំណាស់សម្រាប់គ្រួសារ សង្គមជាតិ និងសេដ្ឋកិច្ច ហើយប្រជាជនមានការថប់បារម្ភ និងមានអារម្មណ៍អស់កម្លាំង។ ប៉ុន្តែក្នុងកាលៈទេសៈនេះ ភាពពេញចិត្តឬតម្រូវចិត្តបុគ្គលឲ្យបានគ្រប់ៗគ្នានោះ ជាការលំបាកណាស់ ដរាបណាវីរុសនេះ នៅតែបន្តរីករាលដាលនៅកន្លែងណាមួយ ដែលគ្មានប្រទេសណាមួយ និងគ្មាននរណាម្នាក់មានសុវត្ថិភាពនោះឡើយ ប្រសិនបើយើងមិនរួមគ្នាអនុវត្តន៍វិធានការការពារ។
• បន្ថែមលើវិធានការទាំងឡាយរបស់រាជរដ្ឋាភិបាល បុគ្គលម្នាក់ៗ សហគមន៍ និងធុរកិច្ចទាំងអស់ត្រូវបន្តធ្វើការជ្រើសរើសជម្រើសដែលមានសុខភាពល្អ និងចាត់វិធានការការពារ – រួមមានការអនុវត្តអនាម័យដៃ និងអនាម័យផ្លូវដង្ហើមស្អាតល្អ ស្ថិតនៅយ៉ាងតិច ១ម៉ែត្រកន្លះពីអ្នកដទៃ និងស្នាក់នៅផ្ទះប្រសិនបើមានរោគសញ្ញាសង្ស័យជាចាំបាច់។
• យើងទាំងអស់គ្នាត្រូវចូលរួមចំណែកទាំងអស់គ្នា ដើម្បីធានាឱ្យបានថាករណីនិមួយៗមិនក្លាយជាអណ្តាតភ្លើងហើយមិនវិវត្តទៅជាភ្លើងនាពេលបន្ទាប់។ ប្រសិនបើយើងធ្វើសកម្មភាពដោយមានសាមគ្គីភាព យើងអាចការពារប្រទេសកម្ពុជា ពីការចម្លងជំងឺជាទ្រង់ទ្រាយធំក្នុងសហគមន៍ ដូចដែលយើងធ្លាប់បានឃើញនៅក្នុងបណ្តាប្រទេសមួយចំនួននៅលើសាកលលោក។
• រួមគ្នាទប់ស្កាត់ការចម្លងវីរុសកូវីដ-១៩ គឺជាកាតព្វកិច្ចរបស់បុគ្គលគ្រប់រូប ដើម្បីសហគមន៍គ្មានការរាតត្បាតជំងឺដ៏កាចសាហាវនេះ៕