ភ្នំពេញ ៖ បន្ទាប់ពីប្រមុខរាជរដ្ឋាភិបាលសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានប្រកាសផ្តល់ការឧបត្ថម្ភសាច់ប្រាក់ ជូនគ្រួសារក្រីក្រ និងងាយរងគ្រោះ ក្នុងអំឡុងពេលជំងឺកូវីដ-១៩ រួចមកនោះ នៅថ្ងៃទី២៥ ខែមិថុនា ឆ្នាំ២០២០ នេះ មានប្រជាពលរដ្ឋដែលរងផលប៉ះពាល់ក្នុងអំឡុងពេលអន្តរកាល ចំនួន ៨.៨២៣ គ្រួសារ ស្មើនឹងទឹកប្រាក់ ១៥៧៩លាន ៤២០ពាន់ រៀល ក្នុងចំណោមពលរដ្ឋក្រីក្រជាង ៥៦ម៉ឺនគ្រួសារ ស្មើនឹងចំនួនមនសុ្សជាង ២លាន ៥សែននាក់ នៅទាំងប្រទេស នឹងទទួលបានការឧបត្ថម្ភនេះ។

នេះបើតាម លោក សំហេង បុរស រដ្ឋលេខាធិការក្រសួងសង្គមកិច្ច អតីតយុទ្ធជននិងយុវនីតិសម្បទា បានថ្លែងឱ្យដឹងនៅក្នុងសន្នីសីទសារព័ត៌មានស្តីពី «នីតិវិធី និងដំណើរការអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងពេលជំងឺកូវីដ-១៩» ដែលប្រព្រឹត្តទៅនៅថ្ងៃទី២៥ ខែមិថុនា ឆ្នាំ២០២០ នៅអង្គភាពអ្នកនាំពាក្យរាជរដ្ឋាភិបាល នាទីស្តីការគណៈរដ្ឋមន្រ្តី។

លោក ឈួរ សុបញ្ញា ប្រធាននាយកដ្ឋានសុខមាលភាពសង្គម នៃក្រសួងសង្គមកិច្ចអតីតៈយុទ្ធជននិងយុវនិតិសម្បទាបានថ្លែងឱ្យដឹងថា ប្រជាពលរដ្ឋមានបណ្ណសមធម៌ ដែលទទួលបានការវាយតម្លៃពីឃុំសង្កាត់នោះ សូមទៅទទួលសាច់ប្រាក់ឧបត្ថម្ភពីរាជរដ្ឋាភិបាលតាមរយៈធនាគារឯកទេសវីង ទៅតាមការគណនាជូន ដោយមិនមានការកាត់សេវាកម្មអ្វីឡើយ។

លោក ថេង បញ្ញាធន ប្រតិភូរាជរដ្ឋាភិបាលទទួលបន្ទុកអគ្គនាយកដ្ឋាននៃក្រសួងផែនការ បានបញ្ជាក់ពីនិតិវិធីកំណត់អត្ថសញ្ញាណគ្រួសារក្រីក្រ របស់ក្រសួងផែនការ តាមការស្នើសុំ ដែលមកដល់ពេលនេះបានធ្វើការកំណត់តាមជុំធម្មតាគឺចំនួន១៣ជុំហើយ ប៉ុន្តែចំនួននេះនៅមិនទាន់គ្រប់គ្រាន់សម្រាប់រាជរដ្ឋាភិបាលប្រើប្រាស់ក្នុងកម្មវិធីឧបត្ម្ភសាច់ប្រាក់នៅពេលនេះទេ។

លោក សំហេង បុរស ក៏បានបញ្ជាក់ដែរថា ប្រមុខរាជរដ្ឋាភិបាល បានគិតគូរបញ្ហានេះ តាំងពីដែលកម្ពុជាបានទទួលរងការរាតត្បាតជំងឺផ្លូវដង្ហើមកូវីដ១៩មកម៉្លេះ។ រាល់ការការគិតគូរនោះបានចេញជាលទ្ធផលជាក់ស្តែងដូចដែលសម្តេចតេជោនាយករដ្ឋមន្រ្តីបានបញ្ជាក់ថា គឺមិនទុកឱ្យពលរដ្ឋណាម្នាក់ ដាច់ពោះស្លាប់ដោយមិនបានដឹងនិងមិនបានដោះស្រាយនោះទេ។

លោករដ្ឋលេខាធិការ ក៏បានអំពាវនាវឱ្យប្រជាពលរដ្ឋដែលរងផលប៉ះពាល់ពិតប្រាកដនិង ជនងាយរងគ្រោះ ទាំងអ្នកមានបណ្ណសមធម៌ និង អ្នកមិនទាន់ទទួលបានបណ្ណសមធម៌ត្រូវធ្វើទំនាក់ទំនងផ្ទាល់ជាមួយអាជ្ញាធរមូលដ្ឋាន ឃុំ សង្កាត់ ដើម្បីដាក់ពាក្សស្នើធ្វើបណ្ណសមធម៌នេះ៕

ខេត្តសៀមរាប ៖ កំពែងក្រុងអង្គរធំចំនួន៧កន្លែងក្នុងចំណោម១៨កន្លែងដែលរងការខូចខាតដោយគ្រោះធម្មជាតិ បរិយាកាស អាយុកាលថ្ម រចនាសម្ពន្ធសំណង់ទ្រុឌទ្រោម និងដីកណ្តៀរ ត្រូវបានអ្នកជំនាញអាជ្ញាធរជាតិអប្សរាជួសជុលបានសម្រេចប្រវែង១៣៥ម៉ែត្រ ក្នុង៣ដំណាក់កាលផ្សេងគ្នាដោយប្រើប្រាស់ថវិកាជាតិទាំងស្រុង។

ការជួសជុលនេះធ្វើឡើងក្នុងគោលបំណងអភិរក្សនិងពង្រឹងកំពែងក្រុងអង្គរធំឱ្យកាន់តែរឹងមាំដើម្បីរក្សាសោភ័ណភាពកំពែង និងខ្លោងទ្វារអង្គរធំទាំងអស់ឱ្យនៅគង់វង្សយូរអង្វែង។ ដំណើរការជួសជុលបានចាប់ផ្តើមពីឆ្នាំ២០១៤ សរុបបានប្រវែង១៣៥ម៉ែត្រ ដែលក្នុងនោះមានប្រវែង២០ម៉ែត្រនៅខាងកើតខ្លោងទ្វារដីឆ្នាំង និងប្រវែង១១៥ម៉ែត្រនៅខាងលិចខ្លោងទ្វារទន្លេអុំ។

លោក ម៉ៅ សុខនី ប្រធានការដ្ឋានជួសជុលកំពែងក្រុងអង្គរធំនិងជាមន្ត្រីនាយដ្ឋានអភិរក្សប្រាសាទក្នុងឧទ្យានអង្គរនិងបុរាណវិទ្យាបង្ការ បានលើកឡើងថា អាជ្ញាធរជាតិអប្សរាបានរើសយកកន្លែងដែលមានហានីភ័យខ្ពស់មកជួសជុលមុន ព្រោះកន្លែងទាំងនោះបានរងផលប៉ះពាល់ខ្លាំងដោយធម្មជាតិ។

ក្នុងការជួសជុល ក្រុមការងារបានផ្តោតសំខាន់លើបច្ចេកទេសការរៀបជញ្ជាំងថ្មបាយក្រៀមទៅវិញពីមួយស្រទាប់ទៅមួយស្រទាប់ ការបុកបង្ហាប់ដីឱ្យមាំ ដើម្បីពង្រឹងកំពែងឱ្យមានសុវត្ថិភាពខ្ពស់ការពារការជ្រៀបទឹក បង្កើនគុណភាពសំណង់ សោភ័ណភាព ដោយរក្សាទម្រង់ដើមនៃកំពែង និងស្រាវជ្រាវប្រវត្តិនៃការជួសជុលពីអតីតកាល។ មិនតែប៉ុណ្ណោះ អាជ្ញាធរជាតិអប្សរាក៏គិតគូរពីសុវត្ថិភាពសំណង់ដើម្បីរក្សាភាពគង់វង្ស ដោយការធ្វើជំរាលទឹកហូរ និងដាំស្មៅតាមជើងទេរដើម្បីទប់ការហូរច្រោះ។

ចំពោះការជួសជុលកំពែងអង្គរធំនេះគឺត្រូវការពេលវេលាច្រើនព្រោះត្រូវការសិក្សាស្រាវជ្រាវពីរចនាសម្ពន្ធសំណង់ ប្រវត្តិជួសជុល និងចំណុចដែលមានហានីភ័យខ្ពស់។ ពិសេស គឺពេលជួសជុលទាមទារត្រូវគោរពតាមធម្មនុញ្ញអង្គរ ការចុះតាមដានការងារនិងវាយតម្លៃពីអ្នកជំនាញគណៈកម្មការស៊ីស៊ី-អង្គរ រួមទាំងការថែទាំ ការទល់ទ្រ កាត់ក្រីមែកឈើ និងដករុក្ខជាតិដែលដុះលើជញ្ជាំងកំពែងផងទៀតផង។

ចំពោះផែនការអនាគត អាជ្ញាធរជាតិអប្សរាមានគម្រោងជួសជុលកំពែងអង្គរធំដែលរងនូវគ្រោះថ្នាក់ទាំងអស់ឱ្យមានសុវត្ថិភាពតាមរយៈការអភិរក្សជាជំហានៗដើម្បីលើកតម្លៃមរតកដូនតាឱ្យនៅយូរអង្វែង៕

ភ្នំពេញ ៖ អាជ្ញាធរជាតិប្រយុទ្ធប្រឆាំងគ្រឿងញៀន នឹងដុតបំផ្លាញគ្រឿងញៀនជិត៥០០គីឡូក្រាម ក្នុងឱកាសប្រារព្ធពិធីអបអរសាទរ ទិវាអន្តរជាតិប្រយុទ្ធប្រឆាំងគ្រឿងញៀន ថ្ងៃទី២៦ ខែមិថុនា ឆ្នាំ២០២០នេះ។

ពិធីនេះធ្វើឡើងនៅសាលសន្និបាត និងពិព័រណ៍កោះពេជ្រ ក្រោមវត្តមានឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ព្រមទាំងមានការអញ្ជើញចូលរួមពីតំណាងក្រសួង ស្ថាប័ន និងថ្នាក់ដឹកនាំមកពីបណ្តារាជធានី-ខេត្តមួយចំនួនផងដែរ។

អាជ្ញាធរជាតិប្រយុទ្ធប្រឆាំងគឿងញៀន តែងតែរៀបចំការដុតបំផ្លាញគ្រឿងញៀន ដែលរឹបអូសបានពីឧក្រិដ្ឋជនជួញដូរគ្រឿងញៀន ក្នុងពិធីអបអរសាទរ ទិវាអន្តរជាតិប្រយុទ្ធប្រឆាំងគ្រឿងញៀននេះ ជាក់ស្តែងកាលពីឆ្នាំ២០១៩ មានការដុតបំផ្លាញគ្រឿងញៀនជិត២តោនផងដែរ៕

ភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានចេញសារលិខិត ក្នុងឱកាសប្រារព្ធទិវាអន្តរជាតិ ប្រយុទ្ធប្រឆាំងគ្រឿងញៀន ថ្ងៃទី២៦ ខែមិថុនា ឆ្នាំ២០២០។

ក្នុងសារលិខិតរបស់សម្តេចតេជោបានឲ្យដឹងថា ក្នុងឱកាសដ៏មហោឡារិក នៃការប្រារព្ធទិវាអន្តរជាតិប្រយុទ្ធប្រឆាំងគ្រឿងញៀន ថ្ងៃទី២៦ ខែមិថុនា ឆ្នាំ២០២០នេះ សម្តេចសូមសំដែង នូវមនោសញ្ចេតនារីករាយ និងគាំទ្រយ៉ាងពេញទំហឹង ចំពោះការរៀបចំទិវាដ៏មានសារៈសំខាន់នេះ។

សម្តេចតេជោ ហ៊ុន សែន បានបញ្ជាក់ថា ក្នុងនាមជាភាគីនៃអនុសញ្ញា និងពិធីសាររបស់អង្គការសហប្រជាជាតិ ដែលទាក់ទងនឹងគ្រឿងញៀន កម្ពុជា បានបំពេញកាតព្វកិច្ចយ៉ាងសកម្ម និងប្រកបដោយការទទួលខុសត្រូវខ្ពស់ ទាំងក្នុងកម្រិតថ្នាក់ជាតិ តំបន់ និងអន្តរជាតិ។ ជាមួយនេះ ការរៀបចំប្រារព្ធទិវាអន្តរជាតិប្រយុទ្ធប្រឆាំងគ្រឿងញៀន ថ្ងៃទី២៦ ខែមិថុនា ដែលជាស្មារតីបានកំណត់ឡើង ដោយមហាសន្និបាតអង្គការសហប្រជាជាតិ កាលពីឆ្នាំ១៩៨៧ ក៏ត្រូវបានរៀបចំរៀងរាល់ឆ្នាំ ក្រោមប្រធានបទផ្សេងៗ ដើម្បីបន្តពញ្ញាក់ស្មារតី និងដាស់តឿនក្រើន រំលឹកដល់ជនគ្រប់រូបឲ្យយកចិត្តទុកដាក់ជាប្រចាំ និងចូលរួមឲ្យកាន់តែសកម្មថែមទៀត ក្នុងការបង្ការ ទប់ស្កាត់ បង្ក្រាប និងដោះស្រាយរាល់បញ្ហា ដែលមានការពាក់ព័ន្ធនឹងគ្រឿងញៀន៕

ភ្នំពេញ ៖ នៅព្រឹកថ្ងៃទី២៦ ខែមិថុនា ឆ្នាំ២០២០ នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា នឹងអញ្ជើញចូលរួមកិច្ចប្រជុំកំពូលអាស៊ានលើកទី៣៦ ក្រោមមូលបទ «ភាពស្អិតរមួត និងការឆ្លើយតប» ដែលធ្វើឡើងតាមរយៈប្រព័ន្ធវីដេអូ ( Video Conference) នៅវិមានសន្តិភាព។ កិច្ចប្រជុំនេះធ្វើឡើងតបតាមការអញ្ជើញរបស់ លោក ង្វៀន សួនហ្វុក នាយករដ្ឋមន្ត្រីវៀតណាម។

ក្នុងកិច្ចប្រជុំកំពូលអាស៊ានលើកទី៣៦ ថ្ងៃនេះ ថ្នាក់ដឹកនាំអាស៊ាននឹងផ្តោតការយកចិត្តទុកដាក់លើកិច្ចខិតខំប្រឹងប្រែងរួមរបស់អាស៊ាន ក្នុងការដោះស្រាយជំងឺរាតត្បាតជាសកលកូវីដ-១៩ និងការលើកកម្ពស់ការស្តារសេដ្ឋកិច្ច-សង្គម ក្រោយជំងឺកូវីដ-១៩។ កិច្ចប្រជុំនេះក៏នឹងពិភាក្សាផងដែរលើវិធី និងមធ្យោបាយនានា ដើម្បីសម្រេចបាននូវចក្ខុវិស័យសហគមន៍អាស៊ានឆ្នាំ២០២៥ និងទំនាក់ទំនងរបស់អាស៊ានជាមួយដៃគូខាងក្រៅ និងសហគមន៍អន្តរជាតិ។

សម្តេចតេជោ ហ៊ុន សែន នាយករដ្ឋមន្រ្តី ក៏នឹងអញ្ជើញចូលរួមកិច្ចប្រជុំពាក់ព័ន្ធមួយចំនួនទៀត រួមមាន៖ សម័យប្រជុំពិសេសរបស់ថ្នាក់ដឹកនាំអាស៊ាន នាឱកាសកិច្ចប្រជុំកំពូលអាស៊ានលើកទី៣៦ ស្តីពីការលើកកម្ពស់តួនាទីស្រ្តីក្នុងយុគសម័យឌីជីថល (Digital), កិច្ចប្រជុំថ្នាក់ដឹកនាំអាស៊ានជាមួយតំណាងអន្តរសភាអាស៊ាន, កិច្ចប្រជុំថ្នាក់ដឹកនាំអាស៊ានជាមួយតំណាងយុវជនអាស៊ាន និងកិច្ចប្រជុំថ្នាក់ដឹកនាំអាស៊ានជាមួយតំណាងក្រុមប្រឹក្សាផ្តល់យោបល់ធុរកិច្ចអាស៊ាន៕

ខេត្តកណ្តាល ៖ តាមព័ត៌មានដែលទទួលបានឲ្យដឹងថា មកដល់ពេលនេះ​អ្នកស្លាប់​បាន​កើន​ដល់​៣​នាក់ ខណៈដែល​អ្នករងរបួស​ធ្ងន់​ស្រាល​រហូតដល់​៥១​នាក់​ឯណោះ នៅក្នុង​ករណី​រថយន្ត​ដឹក​ដី​បើក​បុក​រថយន្ត​ដឹក​កម្មករ​កម្មការិនី​២​គ្រឿង​កាលពី​ម្សិលមិញ​នៅលើ​ដងផ្លូវ​ជាតិ​លេខ​៩​ត្រង់ចំណុច​ចន្លោះ​គីឡូម៉ែត្រ លេខ​៤៨-៤៩ ស្ថិតក្នុង​ភូមិ​ពោធិ៍​មៀ​វ ឃុំ​គគីរ​ធំ ស្រុក​កៀនស្វាយ ខេត្តកណ្តាល​។​

​គួ​រម្លឹក​ឡើងវិញ​ថា មាន​ករណី​គ្រោះថ្នាក់​ចរាចរណ៍​រវាង​រថយន្ត​ដឹក​ដី​១​គ្រឿង បាន​បើក​បុក​រះ​ជាមួយ​រថយន្ត​ដឹក​កម្មករ​រោងចក្រ​សួន​ឧស្សាហកម្ម​សំរោង​ធំ​២​គ្រឿងក្នុង​ទិសដៅ​ប​ញ្ជ្រា​ស់​គ្នា បណ្តាលអោយ​មនុស្ស​ប្រុស​ស្រី​៣​នាក់​ស្លាប់ និង​៥១​នាក់​ទៀត បាន​រងរបួស​ធ្ងន់​ស្រាល​។ ​ហេតុការណ៍​នេះ​កើតឡើង​កាលពី​វេលា​ម៉ោង​១៨ និង​២០​នាទី​យប់ ថ្ងៃទី​២៤ ខែមិថុនា ឆ្នាំ​២០២០ នៅលើ​កំណាត់​ផ្លូវជាតិ​លេខ​១ ត្រង់ចំណុច​ចន្លោះ​គីឡូម៉ែត្រ លេខ​៤៨-៤៩ ស្ថិតក្នុង​ភូមិ​ពោធិ៍​មៀ​វ ឃុំ​គគីរ​ធំ ស្រុក​កៀនស្វាយ ខេត្តកណ្តាល​។

​បើ​យោងតាម​ប្រភព​ព័​ត៌​មានបាន​ឲ្យដឹងថា មុនពេល​កើតហេតុ​គេ​ឃើញ​រថយន្ត កូរ៉េ​ដឹក​ដី​១​គ្រឿង ទម្ងន់​២​តោន​កន្លះ កន្ទុយ​ពណ៌ស ក្បាល​ព​ណ៌​ខៀវ គ្មាន​ស្លាក​លេខ បើកបរ​ដោយ​ឈ្មោះ ម៉ម សារ៉ាក់ ភេទ​ប្រុស​អាយុ​៣៦​ឆ្នាំ មាន​ទីលំនៅ​ភូមិ​សំរោង​ក្អែ​២ ឃុំ​សំរោង​ធំ ស្រុក​កៀនស្វាយ ទិសដៅ​ពី​ត្បូង​ទៅ​ជើង ​(​អ្នក​លឿង​-​ភ្នំពេញ​) ​ក្នុង​ល្បឿន យ៉ាង​លឿន​។ ​លុះ​មកដល់​ចំណុចកើតហេតុ​ខាងលើ មិនដឹង​ជាមាន​ឧបសគ្គ​អ្វី​ក៍ បាន​ជ្រុល​ចង្កូត​ទៅបុក​រថយន្ត​កូរ៉េ​ដឹក​កម្មករ​រោងចក្រ​១​គ្រឿង ម៉ាក ហាន់​ដាយ ព៏​ណ ស ពាក់​ស្លាក​លេខ​”​ភ្នំពេញ​”៣D.៥៨៤១ ដែល​កំពុងបើក​បរប​ញ្ជ្រា​ស់ទិស​ដៅ​គ្នា​(​ភ្នំពេញ​-​អ្នក​លឿង​)​បណ្តាលអោយ​ក្រឡាប់​ផ្ងារជើង​នៅ​ចិញ្ចើមថ្នល់។

​ប៉ុន្តែ​ភ្លាមៗ​នោះ​រថយន្ត​បង្ក​មិនទាន់​អស់​ល្បឿន​ក៍បាន​ជ្រុល​ទៅបុក​រថយន្ត​ដឹក​កម្មករ​រោងចក្រ​១​គ្រឿង​ទៀត ម៉ាក​តូ​រី​ស ព​ណ៌​លឿង ពាក់​ស្លាក​លេខ​”​ភ្នំពេញ​”២I.៦៤៣៩ ដែល​កំពុងបើក​បរប​ញ្ច្រា​សទិស​ដៅ​គ្នា​ផ្ទុប​ចំ​ពីមុខ គ្នា​ពេញទំហឹង​បង្ក​ឲ្យឈ្មោះ ម៉ម សារ៉ាក់ តៃកុង​រថយន្ត​ដឹក​ដី​គៀប​ជាប់​ដាក់​ខ្យល់​ស្លាប់ នៅក្នុង​កា​របៀន​រថយន្ត​ភ្លាមៗ នឹង​បណ្តាលឲ្យ​កម្មករ​រោងចក្រ​ប្រុស​ស្រី​រួម ទាំង​តៃកុង​រថយន្ត​ទាំង​២​គ្រឿង​ចំនួន​៥៣​នាក់​ទៀត​បាន​រងរបួស​ធ្ងន់​ស្រាល ត្រូវបាន​អាជ្ញាធរ​និង​សមត្ថកិច្ច​ហៅ​រថយន្ត​សា​ម៉ុ​យ​មណ្ឌល​សុខភាព និង​ឡាន​មន្ទីរពេទ្យបង្អែក​ស្រុក មក​ដឹក​យកទៅ​សង្គ្រោះ​ភ្លាមៗ​ផងដែរ។​

​ប៉ុន្តែ​ជា​អកុសល​ពេលទៅដល់​មន្ទីរពេទ្យ​រហូត​មកដល់​ព្រឹក​ថ្ងៃទី​២៥ ខែមិថុនា ឆ្នាំ​២០២០​នេះ​មានកម្ម​ការ​នី​២​នាក់​បាន​ស្លាប់​នៅ​មន្ទីរពេទ្យ នៅ​អ្នករងរបួស​ធ្ងន់​ស្រាល​ចំនួន​៥១​នាក់​ទៀត​ដែល​កំពុង​សម្រាក​ព្យាបាល​នៅតាម​មន្ទីរពេទ្យ​ផ្សេងៗ​គ្នា មិនដឹង​វាសនា​របស់​ពួក​ទៅជា​យ៉ាងណា​នោះទេ​។​ហើយ​ចំពោះ​កម្មករ​រោងចក្រ​ទាំង​អ្នកស្លាប់​និង​អ្នករងរបួស​ធ្ងន់​ស្រាល​នោះ នៅ​មិនទាន់បាន​ស្គាល់​អត្តសញ្ញាណ​នៅឡើយ​ទេ គ្រាន់តែ​ដឹងថា ជា​កម្មករ​រោងចក្រ​អគារ​៧ អគារ​៦ ​និង​អគារ​៣ នៃ​សួន​ឧ​ស្សហកម្ម​សំរោង​ធំ ស្ថិតក្នុង​ឃុំ​សំរោង​ធំ ស្រុក​កៀនស្វាយ​។

​ក្នុងករណី​គ្រោះថ្នាក់​ចរាចរណ៍​ដ៏​រន្ធត់​នេះដែរ ក៍បាន​បង្ក​ឲ្យ​កកស្ទះ​ចរាចរណ៍​យ៉ាង​ណែន តាន់តាប់​រាប់​គីឡូ​ដី​នៅលើ​ផ្លូវជាតិ​លេខ​១​ដោយសារ​រថយន្ត​២​គ្រឿង​បុក​រួញ​គៀប​ជាប់​គ្នា​ស្ទើ​តែ​ពេញ​ផ្លូវ​តែម្តង​។​ក្នុង​ហេតុការណ៍​នេះដែរ​គេ​ឃើញ​កម្លាំង​សមត្ថកិច្ច ប៉ូលិស ប៉េអឹម ប្រជា​ការពារ​ភូមិ អាជ្ញាធរ​ភូមិ ឃុំ នឹង​ក្រុមគ្រូពេទ្យ ដែល​ដឹកនាំ​ដោយ លោក អ៊ូ ឈាង អភិបាលស្រុក​កៀនស្វាយ​រួម​ដំណើរ​ជាមួយ​លោក ពៅ គឹម​លី អភិបាលរង​ស្រុក និង​មានការ​សហការ​ជាមួយ​កម្លាំង​អាវុធហត្ថ​ស្រុក​លើកដែក បាន​ចុះ​មកជួយ​អន្តរាគមន៍​ហៅ រថយន្ត​មក​ស្ទូច​ដើម្បី​ជួយ​សម្រួល​ចរាចរណ៍​អោយ​បងប្អូន​ងាយស្រួល​ក្នុងការ​ធ្វើដំណើរ​ជាធម្មតា​វិញ​។ ​បន្ទាប់មក​មន្ត្រីនគរបាល​ជំនាញ​ស្រុក​ក៏បាន​ធ្វើការ​វាស់វែង​ចាត់ការ​តាម​នីតិវិធី​៕