ភ្នំពេញ ៖ ក្រសួងសុខាភិបាល នៅព្រឹកថ្ងៃទី២៤ ខែកក្កដា ឆ្នាំ២០២០នេះ បានចេញសេចក្ដីប្រកាសព័ត៌មាន បញ្ជាក់ពីការរកឃើញករណីវិជ្ជមានវីរុសកូវីដ-១៩ ថ្មី ចំនួន០៤នាក់ លើកងទ័ពមួកខៀវកម្ពុជា ដែលទើបត្រឡប់មកពីប្រទេសម៉ាលី។

សេចក្តីប្រកាសព័ត៌មានរបស់ក្រសួងសុខាភិបាលបានបញ្ជាក់ថា ករណីវិជ្ជមានវីរុសកូវីដ-១៩ថ្មីចំនួន០៤នាក់ (ស្ត្រី ០១នាក់) រួមមាន៖

* បុរសជនជាតិខ្មែរអាយុ ៣៧ឆ្នាំ មានអាស័យដ្ឋាននៅភូមិព្រះស្រែ ឃុំព្រះស្រែ ស្រុកឧដុង្គ ខេត្តកំពង់ស្ពឺ
* បុរសជនជាតិខ្មែរ អាយុ ២៨ឆ្នាំ មានអាសយដ្ឋាននៅខេត្តត្បូងឃ្មុំ
* បុរសជនជាតិខ្មែរ អាយុ ៤៧ឆ្នាំ មានអាស័យដ្ឋាននៅភូមិដំណាក់ចង្អើរ ខេត្តកែប
* ស្ត្រីជនជាតិខ្មែរ អាយុ ២៩ឆ្នាំ មានអាស័យដ្ឋាននៅរាជធានីភ្នំពេញ

លទ្ធផលវិភាគវត្ថុសំណាកលើកទីពីររបស់ពួកគាត់ ទទួលបានលទ្ធផលវិជ្ជមានវីរុសកូវីដ-១៩ នៅថ្ងៃ ទី២៣ ខែកក្កដា ឆ្នាំ២០២០ ហើយបច្ចុប្បន្ន អ្នកជំងឺជាបុរសទាំង០៣នាក់នេះ ត្រូវបានដាក់ឱ្យសម្រាកព្យាបាលនៅមណ្ឌលសុខភាពចាក់អង្រែ រាជធានីភ្នំពេញ និងអ្នកជំងឺជាស្ត្រី០១នាក់ ត្រូវបានដាក់ឱ្យ សម្រាកព្យាបាលនៅក្នុងមន្ទីរពេទ្យមិត្តភាពខ្មែរ-សូវៀតរាជធានីភ្នំពេញ។

ក្រសួងសុខាភិបាលបាបញ្ជាក់ថា ក្រុមមួកខៀវអង្គការសហប្រជាជាតិរបស់កម្ពុជា សរុបចំនួន ៨០នាក់ (ស្រី ០៧នាក់) បានវិល ត្រឡប់មកពីប្រទេសម៉ាលីមកកាន់កម្ពុជាវិញ នៅថ្ងៃទី១០ ខែកក្កដា ឆ្នាំ២០២០ ដែលតេស្តលើកទី១ របស់ពួកគាត់ គឺអវិជ្ជមានវីរុសកូវីដ-១៩ ហើយត្រូវបានដាក់ឱ្យនៅធ្វើចត្តាឡីស័កក្នុងមណ្ឌលកងទ័ពអង្គការសហប្រជា ជាតិនៅខេត្តកំពង់ស្ពឺ។ នៅថ្ងៃទី១៣ នៃការធ្វើចត្តាឡីស័ករបស់ក្រុមនេះ តេស្តលើកទីពីរត្រូវបានធ្វើនៅថ្ងៃទី២៣ ខែកក្កដា ឆ្នាំ២០២០ ដែលបានទទួលលទ្ធផល វិជ្ជមានវិជ្ជមានវីរុសកូវីដ-១៩ ចំនួន០៤នាក់ ខាងលើនេះ។

សូមជម្រាបថា គិតត្រឹមម៉ោង ០៧៖០០ព្រឹក ថ្ងៃទី២៤ ខែកក្កដា ឆ្នាំ២០២០ កម្ពុជារកឃើញអ្នកមានវីរុសកូវីដ-១៩ មានចំនួនសរុប ២០២នាក់ (ស្ត្រី៤៤នាក់ និងបុរស១៥៨នាក់) ក្នុងចំនួនអ្នកព្យាបាលជាសះស្បើយសរុបទូទាំងប្រទេស មានចំនួន១៤២នាក់ (ស្រី៣៩នាក់ និងបុរស១០៣នាក់) ខណៈអ្នកសម្រាកព្យាបាលនៅក្នុងមន្ទីរពេទ្យរដ្ឋ មានចំនួនសរុប៥៨នាក់ និងអ្នកសម្រាកព្យាបាលនៅបន្ទប់ដោយឡែកក្នុងស្ថានទូតអាមេរិកប្រចាំកម្ពុជា ជាស្ត្រីជនជាតិ អាមេរិកកាំង០២នាក់៕

ភ្នំពេញ ៖ រដ្ឋាភិបាលបារាំង តាមរយៈទីភ្នាក់ងារអភិវឌ្ឍន៍បារាំង (AFD) បានផ្តល់ហិរញ្ញប្បទានឥតសំណងចំនួន ១.៥លានអឺរ៉ូ (ប្រមាណ១.៧លានដុល្លារ) ដើម្បីចូលរួមស្តារឡើងវិញនូវវិស័ទេសចរណ៍កម្ពុជា ក្រោយវិបត្តិ Covid-19។

វិស័យនេះ បានរងនូវផលប៉ះពាល់យ៉ាងធ្ងន់ធ្ងរ អំឡុងពេលរីករាលដាលជំងឺកូវីដ១៩ ដោយសារតែការបាត់បង់នូវភ្ញៀវបរទេសមកកម្ពុជា រួមទាំងការផ្អាកជើងហោះហើរ ចេញពីបណ្តាប្រទេសមួយចំនួន ដើម្បីទប់ស្កាត់ការរីករាលដាលជំងឺកូវីដ។

ក្នុងជំនួបពិភាក្សាការងារលើគម្រោងស្តារឡើងវិញក្នុងវិស័យទេសចរណ៍ ក្រោយវិបត្តិនៃជំងឺកូវីដ១៩រវាងក្រសួងទេសចរណ៍ និងទីភ្នាក់ងារអភិវឌ្ឍន៍បារាំង (AFD) ឯកឧត្ដម ណេប សាមុត អគ្គនាយកគ្រប់គ្រងឧស្សាហកម្មទេសចរណ៍ និងជាអគ្គលេខាធិការនៃគណៈកម្មាធិការជាតិវាយតម្លៃទីក្រុងស្អាតនៃក្រសួងទេសចរណ៍ តំណាងឯកឧត្ដមបណ្ឌិត ថោង ខុន រដ្ឋមន្ត្រីក្រសួងទេសចរណ៍ បានបញ្ជាក់ថា ទីភ្នាក់ងារអភិវឌ្ឍន៍បារាំង (AFD) បានឯកភាពគ្នាប្រើប្រាស់ហិរញ្ញប្បទាន ១.៥លានអឺរ៉ូ ក្រោមគម្រោងពង្រឹងសមត្ថភាពក្នុងវិស័យទេសចរណ៍ (២០២០-២០២៣) ដើម្បីចូលរួមអនុវត្តផែនទីចង្អុលផ្លូវស្តារឡើងវិញ លើវិស័យទេសចរណ៍កម្ពុជាក្រោយវិបត្តិនៃជំងឺកូវីដ១៩។

ជំនួបពិភាក្សាការងារនេះធ្វើឡើងនៅទីស្តីការក្រសួងទេសចរណ៍ នាព្រឹកថ្ងៃទី២៣ ខែកក្កដា ឆ្នាំ២០២០ ដោយទីភ្នាក់ងារអភិវឌ្ឍន៍បារាំង (AFD) ដឹកនាំដោយលោកស្រី Ophelie BOURHIS ទីភ្នាក់ងារបារាំងសម្រាប់ការអភិវឌ្ឍន៍ (AFD) ប្រចាំកម្ពុជា និងមានការចូលរួមពីអាជីវករទេសចរណ៍ជាជនជាតិបារាំងនៅកម្ពុជាផងដែរ។

នៅក្នុងឱកាសនោះភាគីទាំងពីរបានផ្លាស់ប្តូរយោបល់គ្នាលើការដាក់ចេញវិធានការគាំទ្រវិស័យទេសចរណ៍កម្ពុជា ក្នុងដំណាក់កាលជំងឺកូវីដ១៩ និងចាប់ផ្តើមពីការអនុវត្តន៍ វិធានសុវត្ថិភាពទេសចរណ៍ ការជំរុញចលនាទេសចរណ៍ក្នុងស្រុក ដើម្បីធានាថា កម្ពុជាជាគោលដៅទេសចរណ៍គុណភាព និងកក់ក្តៅសម្រាប់ភ្ញៀវទេសចរ និងបាន ពិភាក្សាបន្ថែមអំពីធាតុចូល (Inputs) សម្រាប់ការរៀបចំផែនទីចង្អុលផ្លូវសម្រាប់ត្រៀមស្តារឡើងវិញនៃកំណើនទេសចរណ៍ ឆ្នាំ២០២០-២០២៣ ផងដែរ។

ឯកឧត្ដម ណេប សាមុត បានឱ្យដឹងទៀតថា នៅក្នុងកិច្ចប្រជុំនេះដែរទីភ្នាក់ងារអភិវឌ្ឍន៍បារាំង បានគាំទ្រក្នុងការប្រើប្រាស់គម្រោងហិរញ្ញប្បទានរបស់ទីភ្នាក់ងារអភិវឌ្ឍន៍ បារាំងពង្រឹងស្តារឡើងវិញក្នុងវិស័យទេសចរណ៍ក្រោមហិរញ្ញប្បទាន ១,៥ លានអ៊ឺរ៉ូ របស់ខ្លួន នឹងប្រើប្រាស់លើគម្រោងសកម្មភាពចំនួន២៤ គម្រោងសម្រាប់ ចូលរួមផែនការស្តារឡើងវិញក្នុង និងក្រោយវិបត្តិកូវីដ១៩ ឱ្យមានភាពល្អប្រសើរឡើងវិញ។

សូមបញ្ជាក់ថា គម្រោងអភិវឌ្ឍន៍ទាំង២៤នេះ មានធាតុចូលសំខាន់ៗចំនួន៣ ដែលមានដូចជា៖ ការជួយពង្រឹងអភិបាលកិច្ចក្នុងវិស័យទេសចរណ៍ ដែលមានការជួយ ពង្រឹងសមត្ថភាព ពង្រឹងរចនាសម្ព័ន្ធវិស័យឯកជននៅក្នុងឧស្សាហកម្មទេសចរណ៍ , ការជួយពង្រឹងសមត្ថភាពស្ថាប័ន និងភាពជាដៃគូរដ្ឋនិងឯកជន, ការជួយរៀបចំគម្រោងចាំបាច់ ដើម្បីជួយរៀបចំវិស័យទេសចរណ៍គម្រោងជួយគាំទ្រផ្នែកសិក្សាទីផ្សារ និងផ្សព្វផ្សាយគម្រោងជួយអេកូទេសចរណ៍ ទេសចរណ៍ម្ហូបអាហារ ទេសចរណ៍ទីក្រុង៕

ខេត្តព្រះវិហារ ៖ ថ្ងៃទី២៣ ខែកក្កដា ឆ្នាំ២០២០ ក្រុមការងារមនុស្សស្រុកត្បែងមានជ័យដឹកនាំដោយលោកអធិកាស្រុក រិទ្ ធសូណា បានក្រុមការងារចុះស៊ួសុខទុក្ខដល់ ជនរងគ្រោះ ឈ្មោះ ទូច នាង អាយុ ៣១ ឆ្នាំ រងគ្រោះ ដោយគ្រោះថ្នាក់ចរាចរណ៍ ត្រូវបាន កាត់ជើងឆ្វេំងត្រឹមភ្លូវ បច្ចុប្បន្ន រស់នៅ ជាមួយម្តាយ ចាស់ជរា ម្នាក់ និង ចិញ្ចឹមក្មួយប្រុសម្នាក់ ដោយគ្មាន អ្វីជាទីពឹងឡើយ មានអាស័យដ្ឋាន នៅភូមិ បុ.:ធំ ឃុំប្រមេរ ស្រុកត្បែងមានជ័យ។

ដោយមានការយកចិត្តទុក្ខ ពីសំណាក់ លោក ស៊ូ សិរី ប្រធាន ក្រុមការងារោ បានចង្អុលបង្ហាញ អោយនាំយកនូវថវិកាចំនួន៥០ដុលាអំណោយផ្ទាល់ខ្លួន និងមានការចូលរួម ពីសមាជិកក្រុមការងារ មនុស្សធម៌ ស្រុកត្បែងមានជ័យ រួម និងអំណោយកាកបាទក្រហម បានចុះសួរសុខទុក្ខ ដល់ គេហដ្ឋាន។

កញ្ញា ទូច នាង សំណូមពរដល់ក្រុមការងារ ជួយសម្រួលជួយឧបត្ថម្ភជេីងបនិមិត្តរូបនាងផងដែរក្រោយស្តាប់កាសំណូមពរកញ្ញាទូចនាងរួចមកក្រុមការងារបានសន្យាជួយរកជេីងបនិមិត្តនឹងស្វែងរកអំណោយពីសបុរស្សជនដេីម្បីជួយសម្រួលទុក្ខលំបាកដល់កញាទូចនាង៕ ដោយ ៖ កូវ ប៊ុនហេង

ខេត្តត្បូងឃ្មុំ ៖ លោក កែវ វណ្ណៈ ប្រធានមន្ទីរសុខាភិបាលខេត្តត្បូងឃ្មុំ បានបញ្ជាក់ថានៅថ្ងៃទី២៣ ខែកក្កដា ឆ្នាំ២០២០មានបុរសជនជាតិខ្មែរម្នាក់បានស្លាប់ អំឡុងពេលធ្វើចត្តាឡីស័ក នៅក្នុងអនុវិទ្យាល័យស្វាយឃ្លាំង ស្រុកក្រូចឆ្មារ ខេត្តត្បូងឃ្មុំ។

លោក កែវ វណ្ណៈ បានឲ្យដឹងទៀតថា ជនជាតិខ្មែររូបនេះបានស្លាប់នៅថ្ងៃទី២២ ខែកក្កដា ឆ្នាំ២០២០ វេលាម៉ោងប្រហែល៧៖៣០យប់មិញ អំឡុងពេលធ្វើចត្តាឡីស័កបាន៣ថ្ងៃជាមួយនឹងអ្នកធ្វើ ចត្តាឡីស័កចំនួន១០នាក់។ មន្ត្រីជំនាញបានចុះទៅធ្វើកោសល្យវិច្ច័យសាកសពបុរសខាងលើហើយសន្និដ្ឋានថា គាត់ស្លាប់ដោយសារខ្យល់គរ ខណៈមុនពេលស្លាប់ បុរសរូបនេះបានប្រើថ្នាំផ្តាសាយយក មកលេបផងដែរ។ ប្រធានមន្ទីរសុខាភិបាលខេត្តត្បូងឃ្មុំ បានឲ្យដឹងបន្ថែមថា បុរសជនជាតិខ្មែរនេះគឺជាអ្នកឆ្លងដែនតាមផ្លូវគោកមកពីម៉ាឡេស៉ី ដោយធ្វើដំណើរឆ្លងកាត់ប្រទេសថៃមុនចូលមកដល់កម្ពុជាវិញ។

បើតាមប្រធានសុខាភិបាល ជនរងគ្រោះស្លាប់ មិនបណ្តាលមកពីជំងឺកូវីដ១៩នោះឡើយ ដោយសារខាងគ្រូពេទ្យមិនទាន់បានយកសំណាកទៅពិនិត្យនៅឡើយនោះទេ៕

ភ្នំពេញ ៖ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នៅថ្ងៃទី២៣ ខែកក្កដានេះ បានសរសេរលើបណ្តាញទំនាក់ទំនងសង្គមថា មួយរយៈពេលចុងក្រោយនេះមានពលរដ្ឋមួយចំនួន ចង់ដឹងអំពីមាសដែលជាទុនបំរុងរបស់ជាតិ។

សម្តេចថា ការចង់ដឹងរបស់បងប្អូនមួយចំនួនធំមានភាពសុច្ចរិត ពីព្រោះវាជារបស់ជាតិ តែនៅមានជនអាក្រក់មួយចំនួនតូចបាននិងកំពុងប្រើប្រាស់ការបាត់ បង់ដំណឹងអំពីមាស ដើម្បីវាយប្រហាររាជរដ្ឋាភិបាលថា ចង់បន្លំយកមាស ក្នុងពេលមានជំងឺឆ្លងកូវីត១៩ ព្រោះមិនដែលឮលោក ហ៊ុន សែននិយាយពីមាសនេះទៀតទេ។

ដើម្បីច្បាស់ពីមាស សម្តេចតេជោ បានសូមឱ្យមើលការពន្យល់របស់ធានាគារជាតិកម្ពុជានោះ ពលរដ្ឋប្រាកដជាយល់ និងអបអរសាទរជាមួយទុនបំរុងរបស់ជាតិយើងដែលកើនឡើងជាលំដាប់។

សម្តេចតេជោ ហ៊ុន សែន បានលើកឡើងថា “ប្រហែលមួយឆ្នាំមុន ខ្ញុំធ្លាប់ប្រកាសថា មាសរបស់យើង មាន ៣០តោន តែតាមតួរលេខថ្មីនេះ មាសរបស់យើងមានដល់៣៦,៥តោន។ នេះមិនមែនជាមាយាទ
ស្រីកញ្ជើរធ្លុះក្នុងការគ្រប់គ្រងសេដ្ឋកិច្ច ជាតិនោះទេ” ។

យោងតាមសេចក្តីបំភ្លឺរបស់ធនាគារជាតិនៃកម្ពុជា បានឱ្យដឹងថា មាសដែលជាកេរ្តិ៍មរតកតាំងពីមុនសម័យសង្គ្រាមនេះ ចំនួន ១២.៤តោន កំពុងរក្សាទុកនៅប្រទេសស្វីស, ១៤.១តោន កំពុងវិនិយោគនៅធនាគារកណ្តាលអង់គ្លេស ហើយមាស ១០តោន ត្រូវបានរក្សាទុកនៅកម្ពុជា។

ក្នុងសេចក្តីបំភ្លឺរបស់ធានាគារជាតិ ក៏បានឱ្យដឹងផងដែរថា បច្ចុប្បន្នកម្ពុជា ក៏មានទុនបម្រុងអន្តរជាតិប្រមាណជា ១៩.៥ប៊ីលានដុល្លារផងដែរ គិតត្រឹមចុងខែមិថុនា ឆ្នាំ២០២០៕

ភ្នំពេញ ៖ រដ្ឋមន្ត្រី​ក្រសួងទេសចរណ៍​លោក ថោង ខុន កាលពី​រសៀល​ម្សិលមិញ​បានដាក់​ចេញ​នូវ​វិធានការ​ចំនួន​៤​ចំណុច​សំខាន់ៗ នៅមុន​ថ្ងៃ​ឈប់សម្រាក​សង​ពិធីបុណ្យ​ចូលឆ្នាំ​ខ្មែរ​ដែល​នឹង​ប្រព្រឹត្តិ​ទៅ​ចាប់ពី​ថ្ងៃទី​១៧​ដល់​២១ ខែកក្កដា ឆ្នាំ​២០២០​ខាងមុខ ។

ចំពោះ​វិធានការ​ទាំង​៤​នោះ​រួមមាន ៖

​ទី​១៖ ណែនាំ​ដល់​នាយកដ្ឋាន​ជំរុញ​ចលនា​ទេសចរណ៍​ក្នុងស្រុក និង​បញ្ជ្រាប​ការយល់ដឹង​ជា​សាធារណៈ ធ្វើការ​សហការ​ជាមួយ​មន្ទីរ​ទេសចរណ៍​រាជធានី​ខេត្ត ជំរុញ​ការផ្សព្វផ្សាយ​សេចក្តីណែនាំ​លេខ ០១៥ ស​ណន ស្តីពី​ចលនា​ទេសចរណ៍​ផ្ទៃក្នុង ស្របតាម​ការអនុវត្ត​ន៍​វិធាន​សុវត្ថិភាព​ទេសចរណ៍​នាឱកាស​ថ្ងៃ​ឈប់សម្រាក ជំនួស​ពិធីបុណ្យ​ចូលឆ្នាំថ្មី​ប្រពៃណី​ខ្មែរ ឱ្យដល់​មូលដ្ឋាន​អាជីវកម្ម​ទេសចរណ៍​។​

​ទី​២៖ ណែនាំ​ដល់​មន្ទីរ​ទេសចរណ៍​រាជធានី​ខេត្ត​ទាំង​២៥ ត្រូវអនុវត្ត​វិធាន​សុវត្ថិភាព​ទេសចរណ៍ សម្រាប់​ដំណាក់​​កាលវិបត្តិ​ជំងឺ​កូ​វីដ​១៩ ឱ្យបាន​កាន់តែ​រឹងមាំ​ថែមទៀត ដើម្បី​ធានាបាន​សុខ​សុវត្ថិភាព និង​ការទទួលខុសត្រូវ និង​ដើម្បី​ត្រៀម​ទទួល​ការធ្វើដំណើរ​កម្សាន្ត​ទេសចរណ៍​ប្រកបដោយ​សុវត្ថិភាព​ជូន​ប្រជាពលរដ្ឋ នាឱកាស​ថ្ងៃ​ឈប់សម្រាក ជំនួស​ពិធីបុណ្យ​ចូលឆ្នាំថ្មី​ប្រពៃណី​ជាតិខ្មែរ ដែល​នឹង​ឈាន​មកដល់​នាពេល​ឆាប់ៗ​នេះ​។​

​ទី​៣៖ ណែនាំ​ដល់​មន្ទីរ​ទេសចរណ៍​រាជធានី​ខេត្ត​ទាំង​២៥ យកចិត្តទុកដាក់​ខ្ពស់​ចំពោះ​គោលដៅ​រមណីយដ្ឋាន​ទេសចរណ៍​ទាំងអស់​ចំពោះ​ការអនុវត្តន៍​វិធាន​សុវត្ថិភាព និង​យកចិត្តទុកដាក់​ចំពោះ​បញ្ហា​សណ្តាប់ធ្នាប់​ដូចដែល​ធ្លាប់បាន​អនុវត្ត​កន្លងមក និង​បន្ត​ពង្រឹង​​គុណភាព​ភាព​សេវាកម្ម​ទេសចរណ៍​ឱ្យបាន​កាន់តែ​ប្រសើរឡើង​ថែមទៀត​។​

​ទី​៤៖ ពង្រឹង​ការអនុវត្តន៍​ប្រព័ន្ធ​ចុះឈ្មោះ​ភ្ញៀវទេសចរ​តាម TELEGRAM ដែលជា​ការ​​ចូលរួម​ក្នុង​យន្តការ​ថែរក្សា​សុវត្ថិភាព វិធានការ Quarantines ក៏ដូចជា​ផ្ដល់​ភាពងាយស្រួល​ក្នុងការ​ស្វែងរក​អត្តសញ្ញាណ​ភ្ញៀវទេសចរ​ក្នុងករណី​មាន​ផ្ទុក​ជំងឺ​កូ​វីដ​១៩ ហើយ​រត់គេច​ពី​ការ Quarantine ដែល​អាច​នាំឱ្យ​មានការ​ចម្លង​នៅក្នុង​សហគមន៍​។​

​ទន្ទឹម​នោះ​លោក​រដ្ឋមន្ត្រី​ក៏បាន​ក្រើនរំលឹក​ដល់​ផ្នែក​ឯកជន​ក្នុង​វិស័យ​ទេសចរណ៍​ត្រូវ​បន្ត​ចូលរួម​ផ្សព្វផ្សាយ និង​អនុវត្ត​នូវ​វិធានការ​នានា​របស់​រាជ​រដ្ឋាភិបាល ក្រសួងសុខាភិបាល និង​ក្រសួងទេសចរណ៍​ឲ្យ​បាន​ខ្ជាប់ខ្ជួន ដើម្បី​បង្ការ​ការពារ​និង​រក្សាបាន​នូវ​សុវត្ថិភាព​ទំនុកចិត្ត និង​ផ្ដល់​ភាពកក់ក្ដៅ​ជូន​ភ្ញៀវទេសចរ​ដែល​ធ្វើដំណើរ កម្សាន្ត​ក្នុងប្រទេស​កម្ពុជា​ផងដែរ ។​

​សូមជម្រាបថា ការដាក់ចេញ​នូវ​វិធានការ​ទាំង​៤​ចំណុច​ខាងលើនេះ​ធ្វើឡើង​ក្នុងឱកាស​នៃ​កិច្ចប្រជុំ​បូកសរុប​ការងារ​អនុវត្ត​វិធាន សុវត្ថិភាព​ទេសចរណ៍ (​ជំហាន​ទី​១) សម្រាប់​ដំណាក់កាល​វិបត្តិ​ជំងឺ​កូ​វីដ​១៩ រយៈពេល​១​ខែ អម​ជាមួយនឹង​ការប្រកាស​ដាក់ឱ្យអនុវត្ត​ប្រព័ន្ធ​ចុះឈ្មោះ​ភ្ញៀវទេសចរ​តាម TELEGRAM ដែល​បាន​រៀបចំឡើង​នៅ​គណៈកម្មាធិការ​ជាតិ​អូឡាំពិក​កម្ពុជា កាលពី​ថ្ងៃទី​២៣ ខែកក្កដា ឆ្នាំ​២០២០ ដោយមាន​ការចូលរួម​ពី​អាជ្ញាធរ​ទាំង​២៥​រាជធានី​-​ខេត្ត រួមទាំង​មន្ត្រី​មន្ទីរ​ទេសចរណ៍ គ្រប់​បណ្តា​ខេត្ត និង​ផ្នែក​ឯកជន​ជាច្រើនរូប​ផងដែរ ៕

ភ្នំពេញ ៖ នៅថ្ងៃទី២៣ ខែកក្កដា ឆ្នាំ២០២០នេះ ក្រសួងសុខាភិបាលកម្ពុជា បានរកឃើញករណីវិជ្ជមានជំងឺកូវីដ១៩ ចំនួន១ករណីថែមទៀត ខណៈដែលនៅថ្ងៃនេះដែរ មានអ្នកជំងឺ២នាក់បានជាសះស្បើយ។ នេះបើតាមសេចក្តីប្រកាសរបស់ក្រសួងសុខាភិបាល។

ពលរដ្ឋដែលក្រសួងរកឃើញវិជ្ជមានជំងឺកូវីដ១៩នេះ គឺជាបុរសអាយុ២៨ឆ្នាំ មានទីលំនៅនៅភូមិគោកត្នោត ឃុំកណ្តែង ស្រុកប្រាសាទបាគង ខេត្តសៀមរាប។ រូបគេជាអ្នកដំណើរតាមជើងហោះហើរមកពីប្រទេសរុស្ស៉ី ដែលបានបន្តជើងហោះហើរនៅប្រទេសម៉ាឡេស៊ី មកដល់កម្ពុជា នៅថ្ងៃទី១៩ ខែកក្កដា ឆ្នាំ២០២០។ នេបើតាមការបញ្ជាក់របស់ក្រសួងសុខាភិបាល។

ដោយឡែកករណីជាសះស្បើយ២នាក់នោះ ត្រូវបានក្រសួងសុខាភិបាលអះអាងថា គឺជាបុរសជនជាតិខ្មែរ អាយុ២៦ឆ្នាំ រស់នៅភូមិចុងខ្សាច់ ឃុំទួលទទឹង ស្រុកព្រៃនប់ ខេត្តព្រះសីហនុ និងបុរសជនជាតិខ្មែរអាយុ២៥ឆ្នាំ នៅភូមិចុងខ្សាច់ ឃុំទួលទទឹង ស្រុកព្រៃនប់ ខេត្តព្រះសីហនុ។ ពួកគាត់ទាំងពីរ ជាអ្នកដំណើរមកពីប្រទេសឥណ្ឌូនេស៊ី។

សូមជម្រាបថា រហូតមកដល់ថ្ងៃទី២៣ ខែកក្កដា ឆ្នាំ២០២០នេះ កម្ពុជាបានរកឃើញអ្នកឆ្លងជំងឺកូវីដ១៩ ចំនួន១៩៨នាក់ ដែលក្នុងនោះមាន១៤២នាក់ បានជាសះស្បើយ និង៥៤នាក់ កំពុងសម្រាកនៅមន្ទីរពេទ្យ ខណៈដែល២នាក់ ជាពលរដ្ឋអាមេរិក សម្រាកព្យាបាលនៅក្នុងស្ថានទូតអាមេរិកប្រចាំនៅកម្ពុជា៕

ខាងក្រោមនេះជាសេចក្តីប្រកាសរបស់ក្រសួងសុខាភិបាល៖

ខេត្តព្រះវិហារ ៖ នៅព្រឹកថ្ងៃទី ២២ ខែកក្កដា ឆ្នាំ២០២០ រដ្ឋបាលខេត្តព្រះវិហារ បានរៀបចំកិច្ចប្រជុំគណៈកម្មាធិការសម្របសម្រួលបច្ចេកទេស ក្រុមប្រឹក្សាខេត្តអាណត្តិទី៣ ក្រោមអធិបតីភាព លោក ប្រាក់ សុវណ្ណ អភិបាលខេត្ត និងជាប្រធានគណៈកម្មាធិការសម្របសម្រួលបច្ចេកទេសខេត្ត ដោយមានការអញ្ជើញចូលរួមពី ឯកឧត្តម លោកជំទាវសមាជិកក្រុមប្រឹក្សាខេត្ត អភិបាលរងខេត្ត ប្រធានមន្ទីរអង្គភាពជុំវិញខេត្ត អភិបាលក្រុង ស្រុក និងសមាជិកគណៈកម្មាធិការសម្របសម្រួលបច្ចេកទេសជាច្រើនរូប ។

លោក ប្រាក់ សុវណ្ណ បានមានប្រសាសន៍ថា ថ្ងៃនេះក្រុមការងារកសាងផែនការរបស់រដ្ឋបាលខេត្ត បានបើកកិច្ចប្រជុំពិគ្រោះយោបល់លើសេចក្តីព្រាង កម្មវិធីវិនិយោគបីឆ្នាំរំកិល (២០២០-២០២២) ពិនិត្យ និងផ្តល់យោបល់លើសេចក្តីព្រាងប្រតិទិនការងារសម្រាប់រៀបចំកម្មវិធីវិនិយោគបីឆ្នាំរំកិល (២០២១-២០២៣) និងពិនិត្យ និងផ្តល់យោបល់លើសេចក្តីព្រាងណែនាំស្តីពីការរៀបចំកម្មវិធីវិនិយោគបីឆ្នាំរំកិល (២០២១-២០២៣) ឲ្យសម្រេចបានជោគជ័យ ។

លោក ក៏បានផ្តល់ចំណាប់អារម្មណ៍មួយចំនួនដែលពាក់ព័ន្ធនឹងការងារ និងទិសដៅការងារសម្រាប់អនុវត្តនៅឆ្នាំបន្តបន្ទាប់ ដោយជម្រុញអោយ លោក លោកស្រី ជាប្រធានមន្ទីរអង្គភាពនានា អនុវត្តន៍គម្រោងនីមួយៗអោយចប់តាមការកំណត់ ដោយធ្វើការសហការជាមួយអាជ្ញាធរមូលដ្ឋានឲ្យបានជិតស្និទ្ធ និងត្រូវប្រើប្រាស់អោយអស់លទ្ធភាពធនធាន ដែលបានពីថ្នាក់ជាតិ តាមរយៈក្រសួង ឬធនធានពីដៃគូរនានា ដើម្បីបន្តការអភវិឌ្ឍន៍ជារៀងរាល់ឆ្នាំ ធ្វើយ៉ាងណាឲ្យជីវភាពរស់នៅរបស់ប្រជាពលរដ្ឋមានភាពប្រសើរឡើង ៕ ដោយ ៖ កូវ ប៊ុនហេង