ខេត្តកំពង់ចាម ៖ លោកជំទាវ ប៉ាង ដានី អនុប្រធានអចិន្ត្រៃយ៍សាខា តំណាង លោក អ៊ុន ចាន់ដា ប្រធានគណៈកម្មាធិការសាខា អមដំណើរដោយលោកនាយកសាខា លោកស្រីប្រធានអនុសាខាស្រុក និងក្រុម ការងារ កាកបាទក្រហមកម្ពុជាឃុំ នារសៀល ថ្ងៃ ទី ២១ ខែកក្កដា ឆ្នាំ ២០២០នេះ បាននាំយកសម្ភារ និងថវិកា ជូនជនរងគ្រោះ០២គ្រួសារ ក្នុង នោះមាន ៖ ១.ចូលរូម រំលែកទុក្ខគ្រួសារសពឈ្មោះ ដន គួយអេង ភេទស្រី អាយុ២២ ឆ្នាំ នៅភូមិត្នោតបាក់ ឃុំត្រពាំងគរ ស្រុកជើងព្រៃ ២.សួរសុខទុក្ខ ឈ្មោះ យាន សុខអ៊ាន់ ភេទស្រី អាយុ២២ឆ្នាំ ដែលរងរបួសកំពុងសម្រាកព្យាបាលនៅមន្ទីរពេទ្យស្រុកជើងព្រៃ។

គួរ បញ្ជាក់ផងដែរថា ទាំង០២នាក់នេះ ជាកម្មការិនី ធ្វើការនៅ រោងចក្រផលិតស្បែកជើង ស្កាយណាយ ស្រុកជើងព្រៃ បានរងគ្រោះដោយត្រូវរន្ទះបាញ់ស្លាប់ម្នាក់ និងរបួសម្នាក់ កាលពីម៉ោង ៥ ល្ងាច ថ្ងៃទី ២០ ខែកក្កដា ឆ្នាំ ២០២០ ពេលចេញពីធ្វើការ ហើយជិះម៉ូតូឌុបគ្នា វិលត្រឡប់មកផ្ទះទាំងកំពុងភ្លៀង ។

លោកជំទាវ អនុប្រធានអចិន្ត្រៃយ៍សាខា បាន ពាំនាំនូវ ប្រសាសន៍ផ្ដាំផ្ញើសួរសុខទុក្ខ និងចូលរួមរំលែកទុក្ខយ៉ាងក្រៀមក្រំបំផុត ពី លោក អ៊ុន ចាន់ដា ប្រធានគណៈកម្មាធិការសាខា និង លោក ហ៊ុន ណេង ប្រធានកិត្តិយសសាខា ពិសេសពីសំណាក់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ចំពោះក្រុមគ្រួសារសព ដែលបានបាត់បង់ម្តាយ ប្រពន្ធ បង ប្អូន ជាទីស្រឡាញ់ និងចំពោះអ្នករងរបូសដែលគ្រោះថ្នាក់ដោយឧប្បត្តិហេតុចៃដន្យនេះ ។

ជាមួយនេះ លោកជំទាវ ប៉ាង ដានី ក៏បានណែនាំទាំងអស់គ្នា ត្រូវខិតខំការពារខ្លួនជាប្រចាំ ជៀសអោយផុតពីការឆ្លងនៃជំងឺCovid19 ដោយអនុវត្តត្រឹមត្រូវតាមសារណែនាំរបស់ក្រសួងសុខាភិបាល ។

សម្ភារដែលចូលបុណ្យសព រួមមាន អង្ករ២៥គក្រ ទឹកត្រី ទឹកស៊ីអ៊ីវ ត្រីខ ទឹកសុទ្ធ ទឹកផ្លែឈើ និងបច្ច័យចំនួន ៥០០,០០០រៀល ។ ដោយឡែក អ្នករកងរបួស កំពុងសម្រាកនៅមន្ទីរពេទ្យស្រុក ផ្តល់ជូន មី ត្រីខ និងថវិកាចំនួន ៣០០,០០០ រៀល ផង ដែរ ៕ ដោយ ៖ ប៉ែន សុផល

ខេត្តព្រះវិហារ ៖ ភ្លៀងមួយមេធំលាយឡំនិងខ្យល់កន្ត្រាក់ បណ្ដាលឲ្យបាក់ដើមឈើរលំលេីផ្លូវ និងស្ទះលូលិចផ្លូវជាច្រើនកន្លែងក្នុងក្រុងព្រះវិហារ មន្ទីរសាធារណការខេត្ត សហការជាមួយសមត្តកិច្ចចុះអន្តរគមន៍ទាំងយប់។

នៅព្រលប់ថ្ងៃទី២១ ខែកក្កដា ឆ្នាំ២០២០ ម្សិលមិញនេះ ដើមឈើជាច្រើនដើមបានបាក់រលំលើផ្លូវជាតិលេខ ៦២ ជាច្រើនកន្លែង និងផ្លូវជាច្រើនខ្សែទៀត នៅក្នុងក្រុងព្រះវិហារ បានរងការលិចលង់ដោយសារស្ទះលូ ក្រោយហេតុការណ៍ភ្លៀង មួយមេធំលាយ និងឡំខ្យល់កន្ត្រាក់។

ដើម្បីសម្រួលដល់ការធ្វើចរាចរណ៍របស់បងប្អូនប្រជាពលរដ្ឋ លោក សំ លាងទ្រី ប្រធានមន្ទីរសាធារណការ និងដឹកជញ្ជូនខេត្តព្រះវិហារ មិនបង្អង់យូរនោះ ដោយបានចាត់មន្ត្រីជំនាញ សហការជាមួយមន្ត្រីនគរបាលប៉ុស្តិ៍រដ្ឋបាលប៉ាលហាលទាំងយប់ ចុះកាត់ដើមឈើដែលរលំលើផ្លូវជាតិលេខ៦២ ចំនួន៤កន្លែង និងដើរប្រមូលសម្រាមដែលបណ្តាលឲ្យលូស្ទះលិចផ្លូវ ជាច្រើនខ្សែរផងដែរ។

ទន្ទឹមគ្នានោះដែរ លោក សំ លាងទ្រី បានអំពាវនាវដល់បងប្អូនប្រជាពលរដ្ឋរស់នៅក្នុងក្រុងព្រះវិហារ ត្រូវចូលរួមសហការសម្អាតអនាម័យ បរិស្ថាន ដោយមិនត្រូវចោលសម្រាមផ្តេសផ្តាស ពិសេសមិនត្រូវយកសម្រាមដាក់មាត់លូ ដែលធ្វើឲ្យលូស្ទះនោះឡើយ៕ ដោយ ៖ កូវ ប៊ុនហេង

 ​ភ្នំពេញ ៖ តុលាការ​រាជធានី​ភ្នំពេញ កាលពី​ម្សិលមិញ​បាន​ផ្ញើលិខិត​មួយ​ទៅជូន​លោក កឹម សុខា ខណៈដែល​លិខិត​នោះបាន​ក្រើនរំលឹក​ឲ្យ​ជនជាប់ចោទ​ឈ្មោះ កឹម សុខា ត្រូវគោរពឲ្យ​បាន​ហ្មត់ចត់​ម៉ឺងម៉ាត់​និង​ត្រូវ​ប្រកាន់ខ្ជាប់​នូវ​កាតព្វកិច្ច​ដែល​តុលាការ​បាន​តម្រូវ​ដាក់​លើ​ជន ជាប់ចោទ។​

​សូមជម្រាបថា ការ​ក្រើនរំលឹក​របស់​តុលាការ​ខាងលើនេះ ក្រោយ​ពេលដែល​ជនជាប់ចោទ កឹម សុខា បាន​ចុះទៅ​បណ្តា​ខេត្ត​មួយចំនួន​នៅ​កម្ពុជា ហើយ​បាន​ថ្លែងអំណរគុណ​ពលរដ្ឋ​ដែល​បាន មក​ទទួល​ស្វាគមន៍​លោក​ជា​ហូរហែរ​ផងដែរ។​

​គួ​រម្លឹកថា កាលពី​ម្សិលមិញ​តាមរយៈ​បណ្តាញ​សង្គម​ហ្វេ​ស​ប៊ុ​ក​ផ្ទាល់ខ្លួន​លោក កឹម សុខា បានសរសេរថា “​ខ្ញុំ​សូម​ថ្លែង​អំណរ​ព្រះ​គុណ និង​អរគុណ​យ៉ាង​ជ្រាលជ្រៅ​បំផុត​ចំពោះ ព្រះសង្ឃ និង​បងប្អូន​ជនរួមជាតិ មកពី​រាជធានី ខេត្ត​មួយចំនួន​ដែល​កន្លងមក​បាន​និមន្ត និង​អញ្ជើញ​មក​សួរសុខទុក្ខ​ខ្ញុំព្រះករុណា ខ្ញុំ​នៅ​គេហ ដ្ឋា​ន​ផ្ទាល់ និង​ចំពោះ​ព្រះសង្ឃ​បងប្អូន ដែល​បាន​ស្កាត់ មកជួប​សួរសុខទុក្ខ​ដោយ​សម្តែង​នូវ​មនោសញ្ចេតនា​នឹករលឹក​ក្រៃលែង ចំពោះ​រូបខ្ញុំ នៅពេលដែល​ខ្ញុំ​ធ្វើ ដំណើរ​ទៅតាម​បណ្តា​ខេត្ត​មួយចំនួន​នាពេល​ថ្មីៗ​នេះ ទោះបី​មិនមាន​ការជូនដំណឹង ឬ​ផ្សព្វផ្សាយ​ក៏ដោយ​”​។​

​លោក ​កឹម សុខា ​បង្ហាញ​អារម្មណ៍​ថា នៅតែមាន ក្តី​នឹករលឹក ចង់​ជួប ចង់​ស្តាប់ និង​ចង់​និយាយ​ឆ្លើយឆ្លង​សួរសុខទុក្ខ​ជាមួយ​ពលរដ្ឋ​នៅ​ទីកន្លែង​នានា​បន្តទៀត ឲ្យ​តែមាន​ឱកាស​។​

​ប៉ុន្តែ​តុលាការ​បានចាត់ទុក​ការចុះ​តាម​បណ្តា​ខេត្ត​របស់លោក កឹម សុខា គឺជា​ការបំពាន​ទៅ នឹង​ការសម្រេច​របស់​ក្រុមប្រឹក្សា​ជំនុំជម្រះ​នៃ​សាលាដំបូង​រាជធានី​ភ្នំពេញ​ដែល​បានដាក់​ឲ្យ​ជន ជាប់ចោទ កឹម សុខា ឲ្យ​ស្ថិតនៅក្រោម​ការត្រួតពិនិត្យ​តាមផ្លូវ​តុលាការ។ ដូច្នេះ​សកម្ម​ភាពចុះ មូលដ្ឋាន​របស់លោក កឹម សុខា អាច​នឹង​ឈានទៅ​ហួស​ព្រំដែន​ឬ​នាំទៅដល់​ការបំពាន​លើ កាតព្វកិច្ច​នៃ​ការត្រួតពិនិត្យ​តាមផ្លូវ​តុលា​ការដែល​តម្រូវ​ដាក់​លើ​ជនជាប់ចោទ៕

ខេត្តបន្ទាយមានជ័យ  ៖ លោក គឹង វណ្ណះ អភិបាលរងខេត្តបន្ទាយមានជ័យនិងក្រុមការងារសមាគមមូលនិធិ វ៉ាយអិលភីបានចុះពិនិត្យ តាមបណ្តាកសិដ្ឋាន ដាំបន្លែ និងចិញ្ចឹមសត្វនៅឃុំចំណោម និងឃុំភ្នំធំ ស្រុកមង្គលបូរី ខេត្តបន្ទាយមានជ័យនៅព្រឹក ថ្ងៃទី២០ ខែកក្កដា ឆ្នាំ ២០២០។

លោកគឹងវណ្ណះបានមានប្រសាសន៍ទៅកាន់កសិករថាលោកឧបនាយករដ្ឋមន្ត្រី កែ គឹមយ៉ាន ប្រធានក្រុមការងារចុះជួយខេត្តបន្ទាយមានជ័យនិងលោកជំទាវ ព្រមទាំងក្រុមគ្រួសារបានផ្តល់ទុនជូនប្រជាកសិករខ្ចីដោយគ្មានការប្រាក់ផ្តល់លទ្ធភាពឲ្យកសិករបានយកទៅដាំដុះបន្លែនិងចិញ្ចឹមសត្វមានចំណូលដើម្បីលើកកំពស់ជីវភាពគ្រួសារ។

ក្នុងឱកាសដើរពិនិត្យមើលបន្លែគ្រប់មុខនិងកន្លែងចិញ្ចឹមសត្វនោះលោកគឹងវណ្ណះបានធ្វើការអប់រំអំការបណ្ដុះបណ្ដាលពីរបៀបដាំដុះបន្លែជាលក្ខណគ្រួសារ និងជាលក្ខណះទ្រង់ទ្រាយធំ ដើម្បីបង្កើនជីវភាពគ្រួសារ ហើយ ក្រៅពី ការ ផ្គត់ផ្គង់ ក្នុង គ្រួសារ បន្លែ ធម្មជាតិ ទាំងនេះ អាច នាំ យក ទៅ លក់ នៅ លើ ទីផ្សារ ក្នុង ភូមិ ឃុំ ស្រុក ថែមទៀត ព្រោះថា បន្លែ ទាំងនេះ គ្មាន ជាតិគីមី ដែល មិន ធ្វើ ឲ្យ ប៉ះ ពាល់ ដល់ សុខភាព អ្នក ហូប និង ម្យ៉ាងទៀត ជួយ កាត់បន្ថយ ការ នាំចូល បន្លែ ពី ប្រទេសជិតខាងផងដែរ។

លោកគឹងវណ្ណះបានបញ្ជាក់ឲ្យដឹងទៀតថា ការងារ ដាំ ដុះ នេះ អាច ជា មុខរបរ រួមផ្សំ មួយ នៅ ពេល ទំនេរ ពី ការងារ បង្ក បង្កើន ផល ស្រូវ ក្រុម គ្រួសារ នី មួយៗ ក្រៅពី ការងារ បង្កបង្កើនផល ស្រូវ ដើម្បី បង្កើន ជីវភាព គ្រួសារ ហើយ សង្ឃឹមថា ប្រជាពលរដ្ឋក្នុងខេត្តបន្ទាយមានជ័យនាំគ្នាបន្តដាំដុះបន្លែផ្លែឈើ កាន់តែ ផុលផុស នា ពេល ខាង មុខ។

លោកគឹងវណ្ណះក៏បានធ្វើការណែនាំប្រជាពលរដ្ឋត្រូវយកចិត្តទុកដាក់ទុកដាក់ក្នុងការដាំដុះបន្លែជាលក្ខណះគ្រួសារបន្ថែមទៀត ប្រសិនបើ មានការ ខ្វះខាត នូវ លក្ខណ បច្ចេកទេស ដាំ ដុះ ណាមួយ មន្ត្រី កសិកម្ម និង ជួយ ជា ប្រឹក្សា ផ្តល់ យោបល់ បន្ថែម អំពី លក្ខណៈ ដាំ ដុះ តាម បច្ចេកទេស ថ្មី ទទួល បាន ផល ច្រើនគ្មាន ជាតិគីមី។

លោកគឹង វណ្ណះ បាន ឲ្យ ដឹង បន្តថា ក្រៅពី ផ្តល់ ពូជ បន្លែ លោកតែងតែ ផ្តល់ ប្រឹក្សា អំពី របៀប ដាំ ដុះ របស់ ប្រជាពលរដ្ឋ នូវ បច្ចេកទេស ថ្មីៗ ដល់ ពួកគាត់ កាន់ តែ មាន ភាព ងាយ ស្រួល ហើយ មកដល់ សព្វថ្ងៃនេះ ប្រជាពលរដ្ឋក្នុងខេត្តបានងាកមកដាំបន្លែជា លក្ខណ គ្រួសារ នៅ តាម ភូមិ ឃុំ ហើយ ទទួល បាន ផល គួរ ឲ្យ កត់សំគាល់ ផង ដែរ៕

ភ្នំពេញ ៖ ក្រសួងសុខាភិបាល នៅព្រឹកថ្ងៃទី២១ ខែកក្កដា ឆ្នាំ២០២០នេះ បានចេញសេចក្ដីជូនព័ត៌មាន ប្រកាសពីការរកឃើញករណីវិជ្ជមានវីរុសកូវីដ-១៩ ចំនួន២៦នាក់ថ្មីទៀត ដែលសុទ្ធសឹងជាករណីនាំចូល ខណៈអ្នកព្យាបាលជាសះស្បើយមានចំនួន៤នាក់។

សេចក្តីប្រកាសព័ត៌មានបានឲ្យដឹងថា ករណីវិជ្ជមានវីរុសកូវីដ-១៩ថ្មី ចំនួន២៦នាក់នេះ ក្នុងនោះជាបុរសជនជាតិខ្មែរ ដែលត្រឡប់មកពីសិក្សានៅរុស្ស៊ី និងប្រទេសអេហ្ស៉ីបចំនួន២៥នាក់ និងម្នាក់ទៀតជាបុរសជនជាតិខ្មែរមកពីប្រទេសកូរ៉េខាងត្បូង ត្រូវបានបញ្ជូនទៅសម្រាកព្យាបាលរួចរាល់ហើយនៅ មណ្ឌលសុខភាពចាក់អង្រែ រាជធានីភ្នំពេញ។

បើតាមក្រសួងសុខាភិបាលជំងឺកូវីដ១៩ថ្មីទាំង២៦នាក់នេះ មាន២៥នាក់ធ្វើដំណើរមកពីសិក្សានៅប្រទេសរុស្ស៊ី និងអេហ្ស៊ីប តាមជើងហោះហើរមកពីប្រទេសរុស្ស៊ី ដោយបន្តដំណើរតាមជើងហោះហើរតាមប្រទេសម៉ាឡេស៊ី មកដល់កម្ពុជានៅថ្ងៃទី១៩ ខែកក្កដា ឆ្នាំ២០២០។ ចំណែកម្នាក់ទៀតជាបុរសជនជាតិខ្មែរ អាយុ៦៥ឆ្នាំ ធ្វើដំណើរប្រទេសកូរ៉េខាងត្បូង ចូលមកកម្ពុជា នៅថ្ងៃទី១៩ ខែកក្កដា ឆ្នាំ២០២០។ សម្រាប់អ្នកដំណើរដែលរួមដំណើរលើយន្តហោះទាំង២ សរុបចំនួន២២៨នាក់ផ្សេងទៀត ត្រូវបានដាក់ធ្វើចត្តាឡីស័ក ដើម្បីតាមដានបន្តទៀត។

ដោយឡែកសម្រាប់អ្នកព្យាបាលជាសះស្បើយចំនួន៤នាក់ ក្នុងនោះមាន៣នាក់ជាបរុសជនជាតិខ្មែរដែលត្រឡប់មកពីប្រទេសអារ៉ាឌីសាអូឌីត និងម្នាក់ទៀតជាបុរសជនជាតិខ្មែរ ដែលត្រឡប់មកពីប្រទេសឥណ្ឌូនេស៊ី ។ អ្នកជាសះស្បើយត្រូវបានអនុញ្ញាតឲ្យចេញពីមន្ទីរពេទ្យ បន្ទាប់ពីធ្វើតេស្តអវិជ្ជមាន២លើក៕

ភ្នំពេញ ៖ លោក វង សូត រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទាបានគូស​បញ្ជាក់ថា គិតត្រឹមថ្ងៃទី២០ ខែកក្កដា ឆ្នាំ២០២០ ការបើកប្រាក់ឧបត្ថម្ភ ជូនប្រជាពលរដ្ឋ​ក្រីក្រ និងងាយរងគ្រោះក្នុងអំឡុងពេលវិបត្ដិជំងឺកូវីដ-១៩ របស់រាជរដ្ឋាភិបាលកម្ពុជា បាន​ចំនួនប្រមាណជា៥៣ម៉ឺនគ្រួសារ លើប្រមាណ៥៦ម៉ឺនគ្រួសារ។

ថ្លែងក្នុងសិក្ខាសាលា ស្តីពីនីតិវិធី និងដំណើរការនៃការអនុវត្តកម្មវិធីឧបត្ថម្ភសាច់​ប្រាក់ជូន​គ្រួសារក្រីក្រ និងជនងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ-១៩ កាល​ពី​ព្រឹកថ្ងៃទី២០ ខែកក្កដា ឆ្នាំ២០២០ នៅទីស្ដីការក្រសួងសង្គមកិច្ច អតីតយុទ្ធជន និង​យុវនីតិ​សម្បទា លោក វង សូត បានក្រើនរម្លឹកដល់ប្រជាពលរដ្ឋ ក៏ដូចជាអាជ្ញាធរ​មូល​ដ្ឋាន សូមជូន​ដំណឹងដល់ប្រជាពលរដ្ឋតាមមូលដ្ឋាន ដែលនៅសេសសល់មិនទាន់​បាន​បើក​ប្រាក់ សូម​អញ្ជើញរួសរាន់មកបើកឱ្យបានមុនថ្ងៃកំណត់ សម្រាប់ជុំទី១នេះ ដែលបាន​អនុវត្ដន៍ ពីថ្ងៃទី​២៤ ខែមិថុនា ឆ្នាំ២០២០ ដល់ថ្ងៃទី២៤ ខែកក្កដា ឆ្នាំ២០២០។

លោករដ្ឋ​មន្រ្ដីបានបន្ដថា សម្រាប់ប្រជាពលរដ្ឋ ដែលធ្លាប់បានបើករួចហើយនៅខែមិថុនា(ជុំទី១) ក៏​សូមអញ្ជើញ​ទៅ​បើកជុំទី២ នៅថ្ងៃទី២៥ ខែកក្កដា រហូតដល់ថ្ងៃទី២៤ ខែសីហា ឆ្នាំ២០២០ ដែលនេះ​ជាការបើកក្នុងខែទី២ (ជុំទី២) របស់រាជរដ្ឋាភិបាលកម្ពុជា នៅតាមបណ្តាភ្នាក់ងារ​វីង​តែម្តង មិនចាំបាច់ទៅឃុំ សង្កាត់ទៀតទេ។

សូមបញ្ជាក់ថា ដើម្បីទទួលបានប្រាក់ឧបត្ថម្ភនេះ គ្រួសារក្រីក្រ និងងាយរងគ្រោះ ត្រូវមានប័ណ្ណសមធម៌ ដែលមានសុពលភាព ដោយឈរលើកម្រិតភាពក្រីក្រ ក្រ កម្រិត១ (ទីទ័លក្រ) ឬ ក្រកម្រិត២ (ក្រ) និងបានទៅផ្ទៀងផ្ទាត់បញ្ជីឈ្មោះ នៃកម្មវិធីឧបត្ថម្ភសាច់​ប្រាក់​ជូនគ្រួសារក្រីក្រ ក្នុងអំឡុងពេលប្រយុទ្ធប្រឆាំងជំងឺកូវីដ-១៩ នៅសាលាឃុំ សង្កាត់៕

ភ្នំពេញ ៖ ក្រសួងធនធានទឹក និងឧតុនិយម នៅថ្ងៃទី២១ ខែកក្កដា ឆ្នាំ២០២០នេះ បានចេញសេចក្តីជូនដំណឹង ស្តីពី ស្ថានភាពធាតុអាកាស ចាប់ពីថ្ងៃទី ២២ ដល់ថ្ងៃទី ២៩ ខែកក្កដា ឆ្នាំ ២០២០។

ក្រសួងធនធានទឹកបានបញ្ជាក់ថា តាមរយៈនៃការប្រែប្រួលជាបន្តបន្ទាប់ នៃស្ថានភាពអាកាសធាតុ សង្កេតឃើញថា ជ្រលងសម្ពាធទាប និងខ្យល់មូសុងនិរតីអូសបន្លាយ និងមានឥទ្ធិពលមធ្យមមកលើកម្ពុជា។

ស្ថានភាពបែបនេះធ្វើឲ្យ ៖

១៖ បណ្តាខេត្តនៅតំបន់វាលទំនាបកណ្តាល ៖
– សីតុណ្ហភាពអប្បបរមា មានពី ២៦-២៧°C
– សីតុណ្ហភាពអតិបរមា មានពី ៣២-៣៤°C ។
នឹងអាចមានភ្លៀងធ្លាក់រាយប៉ាយ ក្នុងកម្រិតពីតិចទៅច្រើន ជាមួយគ្នានោះក៏មានផ្នែកខ្លះអាចមានភ្លៀងធ្លាក់ខ្លាំង។

២៖ បណ្តាខេត្តនៅតំបន់ជួរភ្នំដងរែក និងខ្ពង់រាបឦសាន ៖
– សីតុណ្ហភាពអប្បបរមា មានពី ២៣-២៥°C
– សីតុណ្ហភាពអតិបរមា មានពី ៣០-៣២°C ។
នឹងអាចមានភ្លៀងធ្លាក់រាយប៉ាយនៅក្នុងកម្រិតពីតិចទៅបង្គួរ ។

៣៖ បណ្តាខេត្តនៅតំបន់មាត់សមុទ្រ ៖
– សីតុណ្ហភាពអប្បបរមា មានពី ២៣-២៥°C
– សីតុណ្ហភាពអតិបរមា មានពី ២៩-៣១°C ។
នឹងអាចមានភ្លៀងធ្លាក់រាយប៉ាយនៅក្នុងកម្រិតពីខ្សោយទៅមធ្យម ។

ជាមួយគ្នានេះ សូមបងប្អូនប្រជាពលរដ្ឋ បង្កើនការប្រុងប្រយ័ត្នចំពោះ បាតុភូតផ្គរ រន្ទះ និងខ្យល់កន្ត្រាក់ ដែលនឹងអាចកើតមានជាយថាហេតុ៕

ភ្នំពេញ ៖ ព្រឹកថ្ងៃអង្គារ ១កើត ខែស្រាពណ៍ ឆ្នាំជូត ទោស័ក ពស.២៥៦៤ ត្រូវនឹងថ្ងៃទី២១ ខែកក្កដា ឆ្នាំ២០២០នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា អញ្ជើញចុះពិនិត្យការធ្វើស្រែ ព្រមទាំងសំណេះសំណាលជាមួយប្រជាកសិករនៅក្នុងស្រុកព្រៃកប្បាស ខេត្តតាកែវ។

តាមរយៈហ្វេសប៊ុក សម្តេចតេជោបានសរសេរថា ៖ «នៅព្រឹកថ្ងៃអង្គារ ទី២១ កក្កដា នេះ ខ្ញុំនឹងចុះទៅពិនិត្យមើលសកម្មភាពធ្វើស្រែបង្កបង្កើនផល និងសំណេះសំណាលជាមួយបងប្អូនប្រជាកសិករនៅក្នុងស្រុកព្រៃកប្បាស ខេត្តតាកែវ»។

សម្តេចបន្តថា ពិតណាស់ វិស័យកសិកម្ម គឺសំខាន់ខ្លាំងណាស់សម្រាប់ប្រជាពលរដ្ឋកម្ពុជាតាំងពីសម័យដូនតាយើងមកម៉្លេះ។ ប្រជាពលរដ្ឋខ្មែរស្ទើរទូទាំងប្រទេស សុទ្ធសឹងជាអ្នកប្រកបរបរកសិកម្ម។ ពេលនេះជាឱកាសល្អបំផុតក្នុងការជញរុញវិស័យកសិកម្មនៅទូទាំងប្រទេសអោយកាន់តែរីកចម្រេីន។

សម្តេចបន្តទៀតថា ខេត្តតាកែវគឺជាដែនដីដ៏មានសក្តានុពលមួយលើវិស័យកសិកម្ម។ កន្លងមកខេត្តតាកែវ បានជាប់ចំណាត់ថ្នាក់លេខ៣លើវិស័យកសិកម្ម បន្ទាប់ពីព្រៃវែង និងបាត់ដំបង។ ព្រឹកនេះ ខ្ញុំអាចនឹងចុះជួយស្ទូង និងច្រូតស្រូវជាមួយបងប្អូនប្រជាពលរដ្ឋយើង​ ប៉ុន្តែមិនច្រូតដោយដៃទៀតទេ​ គឺដោយគ្រឿងម៉ាស៊ីន​៕