ភ្នំពេញ ៖ មហាផ្ទៃ បានសម្រេចផ្ទេរសមត្ថកិច្ចពីអធិការនគរបាលក្រុង ស្រុក ខណ្ឌ ជូនទៅនាយប៉ុស្តិ៍នគរបាលឃុំ សង្កាត់ ក្នុងការពិនិត្យ និងសម្រេចផ្តល់សៀវភៅស្នាក់នៅ ទុតិយតាសៀវភៅស្នាក់នៅ លិខិតបញ្ជាក់ទីលំនៅ ការប្រែប្រួលនៃសមាជិកគ្រួសារ ការផ្លាស់ប្តូរទីលំនៅ និងរាល់ការកែតម្រូវទិន្នន័យក្នុងបញ្ជីស្នាក់នៅស្របតាមលិខិតបទដ្ឋានគតិយុត្តកំណត់។
សូមអានបន្ថែមខាងក្រោម៖ 
ភ្នំពេញ ៖ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានបញ្ជាក់ឲ្យដឹងថា គិតត្រឹមថ្ងៃទី០១ ខែកក្កដា ឆ្នាំ២០២០ ការងារបង្កបង្កើនផលស្រូវរដូវវស្សា នៅទូទាំងប្រទេសសម្រេចជិត១.៨លានហិកតាស្មើនឹង៦៩.២៤% នៃផែនការជាង២.៥លានហិកតា ខណៈការនាំចេញកសិផលវិញ សម្រេចចំនួនជាង៤លានតោន ដែលមានការកើនឡើងល្អប្រសើរ។
លោកដ្ឋមន្ត្រី វេង សាខុន បានបង្ហាញនូវរបាយការណ៍ល្បឿនការងារបង្កបង្កើនផលរដូវវស្សា និងការនាំចេញផលិផលកសិកម្មយ៉ាងដូច្នេះថា៖
១៖ ល្បឿនការងារបង្កបង្កើនផលស្រូវរដូវវស្សាឆ្នាំ២០២០
គិតមកត្រឹមថ្ងៃទី០១ ខែកក្កដា ឆ្នាំ២០២០ ការងារបង្កបង្កើនផលស្រូវរដូវវស្សា នៅទូទាំងប្រទេសសម្រេចធ្វើការស្ទូង និងព្រួសបាន ១ ៧៩១ ៩៦៤ ហិកតា ស្មើនឹង ៦៩.២៤% នៃផែនការចំនួន ២ ៥៨៨ ១៣០ ហិកតា លើសឆ្នាំមុន ៣៣៧ ៥៩១ ហិកតា ក្នុងនោះមាន៖ ស្រូវស្រាលចំនួន ៥៩៥ ៣០៥ ហិកតា លើសឆ្នាំមុន ៨៤ ៦៨៥ ហិកតា, ស្រូវកណ្តាលចំនួន ៨៣១ ១៦៨ ហិកតា លើសឆ្នាំមុន ២២៤ ៣២២ ហិកតា, ស្រូវធ្ងន់ចំនួន ៣១៤ ៧៩៩ ហិកតា លើសឆ្នាំមុន ២៧ ៧៦៤ ហិកតា, ស្រូវចម្ការចំនួន ១៧ ៦៨២ ហិកតា តិចជាងឆ្នាំមុន ១ ៣២៩ ហិកតា, ស្រូវឡើងទឹកចំនួន ៣៣ ០០៦ ហិកតា ។
ទន្ទឹមនឹងនេះ កសិករបានប្រមូលផលស្រូវស្រាលដើមរដូវវស្សាបានជាបណ្តើរៗ បានចំនួន ១៣ ៨៣៧ ហិកតា ទទួលបរិមាណផលសរុបចំនួន ៥៥ ៥០៥ តោន ទិន្នផលគិតជាមធ្យម ៤.០១តោន/ហិកតា។
២៖ ល្បឿនការងារបង្កបង្កើនផលដំណាំសាកវប្បកម្ម និងដំណាំឧស្សាហកម្ម រដូវវស្សាឆ្នាំ២០២០
ក៖ ការដាំដុះដំណាំសាកវប្បកម្ម៖ (ពោតស, ដំឡូងជ្វា, បន្លែគ្រប់មុខ, ម្ទេស, ឪឡឹក) សម្រេចបាន ៤៣ ៨៩២ ហិកតា ស្មើនឹង៨៨.៨១% នៃផែនការ ៤៩ ៤២០ ហិកតា លើសឆ្នាំមុន ៧ ៩២៩ ហិកតា។
ខ៖ ការដាំដំណាំឧស្សាហកម្ម៖ (ពោតក្រហម ដំឡូងមី សណ្តែកបាយ សណ្តែកដី, សណ្តែកសៀង, ល្ង, អំពៅ, ក្រចៅ, ថ្នាំជក់, និងឈូក) សម្រេចបានចំនួន ៦៤៥ ៥១១ ហិកតា ស្មើនឹង ៧៣.៨១% នៃផែនការ ៨៧៤ ៥៩៥ ហិកតា លើសឆ្នាំមុន ១៤ ៥៧០ ហិកតា។
៣៖ ការនាំចេញផលិតផលកសិកម្ម ឆ្លងកាត់ច្រកចេញចូលតែមួយ និងមិនបានឆ្លងកាត់
ចំពោះការនាំចេញផលិតផលកសិកម្ម ក្នុងរយៈពេល៦ខែ ក្រសួងបានពិនិត្យឃើញថាមានការកើនឡើងល្អប្រសើរ។ ដោយ
ឡែកចំពោះបរិមាណ នៃការនាំចេញផលិតផលកសិកម្មសរុប ចំនួនជាង៤លានតោន ដែលក្នុងនេះមានផលិតផលសំខាន់ៗមួយចំនួនដូចខាងក្រោម៖
១៖ អង្ករ សម្រេចបាន ៣៩៧ ៦៦០ តោន មានកំណើន ៤១.២៥% ដែលធៀបទៅនឹងរយៈពេល៦ខែដើមឆ្នាំ២០១៩ បាននាំចេញទៅកាន់ ៥៦ ប្រទេស។
២៖ ស្រូវ សម្រេចបាន ៩៨៣ ៥០៨ តោន ថយចុះ ៥១.៩០%, នាំចេញទៅកាន់ប្រទេសវៀតណាម (ក្រៅផ្លូវការ)។
៣៖ គ្រប់ស្វាយចន្ទី សម្រេចបាន ១៩៣ ២១៣ តោន មានកំណើន ១៨.០៣%, នាំចេញទៅកាន់ប្រទេស វៀតណាម, ជប៉ុន, រុស្សី, ចិន, ហុងកុង បារាំង និងថៃ
៤៖ ចេកស្រស់ សម្រេចបាន ១៤០ ៥៦៦ តោន មានកំណើន ១៥០.៤២%, បាននាំចេញទៅកាន់ប្រទេស ចិន វៀតណាម និងជប៉ុន ។
៥៖ ក្រូចថ្លុង សម្រេចបាន ១១ ៤០០ តោន ទៅកាន់ប្រទេសថៃ ។
៦៖ ដំណាប់ស្វាយ សម្រេចបាន ៤ ២៧៦ តោន មានកំណើន ២២១,៩៦%, បាននាំចេញទៅកាន់ប្រទេស ចិន, ជប៉ុន, ថៃ, កូរ៉េ និងវៀតណាម។
៧៖ ម្សៅដំឡូងមី សម្រេចបាន ១២ ០០២ តោន បានថយចុះ ៥៣,៩៦%, បាននាំចេញទៅកាន់ប្រទេស ឥណ្ឌា, ចិន, ប៊ែលហ្សិក និងអ៊ីតាលី។
៨៖ ស្វាយស្រស់ សម្រេចបាន ៤៦ ២០០ តោន មានកំណើន ៥៨,១៤%, បាននាំចេញទៅកាន់ប្រទេស ថៃ, វៀតណាម, បារាំង, រុស្សី, កូរ៉េ និងហុងកុង ។
៩៖ ម្រេច សម្រេចបាន ២ ៧៩៦ តោន មានកំណើន ១៨,៧៥%, បាននាំចេញទៅកាន់ប្រទេស ជប៉ុន, ប៊ែលហ្សិក, ហូឡង់,បារាំង, អាល្លឺម៉ង់, ស្វីស,វៀតណាម, អាមេរិច, រុស្ស៊ី, អង់គ្លេស, ឥណ្ឌា, បេឡារូស, កូរ៉េ, ឆេក, ណូវែហ្សែឡង់ និងប្រទេសអូស្ត្រាលី។
១០៖ ម្ទេសស្រស់ ៣៥ ៣៧៧ តោន មានកំណើន ១៧៣,០៨% និងម្ទេសក្រៀម ១ ២០០ តោន ស្មើនឹងឆ្នាំ២០១៩, បាននាំចេញទៅកាន់ប្រទេសថៃ ។
១១៖ មានផលិតផលជាង៥០មុខដទៃទៀត៕
បរទេស ៖ យោងតាមទិន្នន័យពីគេហទំព័រអន្តរជាតិ Worldometer បានបង្ហាញថា គិតត្រឹមម៉ោង ៧ព្រឹកថ្ងៃព្រហស្បតិ៍ ទី០២ ខែកក្កដា ឆ្នាំ២០២០នេះ ចំនួនអ្នកឆ្លងជំងឺ COVID-19 នៅទូទាំងពិភពលោក បានកើនឡើងដល់ ១០,៧៩២,៩៧២នាក់ហើយ។ ក្នុងនោះអ្នកស្លាប់មានចំនួន ៥១៨,០៤១នាក់ និងជាសះស្បើយឡើងវិញ ៥,៩៣០,០១៣នាក់។
យោងតាមទិន្នន័យពីគេហទំព័រអន្តរជាតិ Worldometer បានបង្ហាញថា ការរីករាលដាលនៃជំងឺកូវីដ១៩ នៅតែមានសភាពស្រួចស្រាវចំនួនអ្នកឆ្លង និងស្លាប់ថ្មីនៅតែមានចំនួនច្រើន។ ក្នុងនោះសហរដ្ឋអាមេរិក នៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ។ សហរដ្ឋអាមេរិក មានអ្នកឆ្លងជំងឺ COVID-19 ចំនួន ២,៧៧៨,១៣០នាក់ ស្លាប់ចំនួន ១៣០,៧៨៥នាក់ និងជាសះស្បើយចំនួន ១,១៥៩,៧៣៤នាក់។
ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺកូវីដ១៩ គឺប្រទេសប្រេស៊ីល។ ប្រេស៊ីលមានអ្នកឆ្លង ១,៤៥៣,៣៦៩នាក់ ស្លាប់ចំនួន ៦០,៧១៣នាក់ និងជាសះស្បើយ ៨២៦,៨៦៦នាក់។
ប្រទេសឈរនៅចំណាត់ថ្នាក់ទី៣ គឺប្រទេសរុស្ស៉ី។ រុស្ស៉ី មានអ្នកឆ្លង ៦៥៤,៤០៥នាក់ ស្លាប់ ៩,៥៣៦នាក់ និងជាសះស្បើយ ៤២២,៩៣១នាក់៕
ភ្នំពេញ ៖ ប្រមុខនៃរាជរដ្ឋាភិបាលកម្ពុជា សម្តេចតេជោ ហ៊ុន សែន នៅថ្ងៃទី១ ខែកក្កដា ឆ្នាំ២០២០នេះ បានអំពាវនាវដល់ប្រជាពលរដ្ឋ អាជ្ញាធរដែនដី និងមន្រ្តីមានសមត្ថកិច្ច សូមចូលរួមថែរក្សាពូជត្រី និងចូលរួមអភិរក្សជីវចម្រុះផ្សេងៗទៀត ឱ្យបានគង់វង្ស ដើម្បីធានានិរន្តរភាពធនធានជលផលឱ្យបានគ្រប់គ្រាន់ សម្រាប់តម្រូវការទទួលទានរបស់ពលរដ្ឋនៅទូទាំងប្រទេស។
សម្តេចតេជោ នាយករដ្ឋមន្ត្រី ក៏បានលើកឡើងថា ទិវាមច្ឆជាតិ ថ្ងៃទី១ កក្កដា គឺជាទិវាដ៏សំខាន់មួយដែលត្រូវបានរៀបចំឡើងជារៀងរាល់ឆ្នាំ ដើម្បីបំផុសចលនាយល់ដឹងក្នុងចំណោមប្រជាពលរដ្ឋ ឱ្យចូលរួមក្នុងការថែរក្សាពូជត្រី ឱ្យមានក្នុងដែនទឹកធម្មជាតិផង និងបង្កើនផលត្រីនៅតំបន់ឆ្ងាយពីដែននេសាទផង ជាពិសេសនៅតាមតំបន់សមស្របនៃវាលទំនាប និងនៅតាមវាលស្រែទូទាំងប្រទេស៕
ភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានបញ្ជាក់ពីលទ្ធផលប្រកបដោយភាពវិជ្ជមាននៃបញ្ហាចរាចរណ៍ក្នុងរយៈពេល១ឆមាសឆ្នាំ២០២០នេះ គឺការគ្រោះថ្នាក់ មានការថយចុះគួរកត់សម្គាល់ បើប្រៀបធៀបនឹងឆ្នាំមុន និងមុនពេលមានការរឹតបន្តឹងការអនុវត្តច្បាប់ចរាចរណ៍ផ្លូវគោក។
តាមរយៈបណ្តាញទំនាក់ទំនងសង្គមផ្លូវការ សម្តេចក្រឡាហោម បានបង្ហាញទិន្នន័យជាផ្លូវការថា ចំនួនគ្រោះថ្នាក់ចរាចរណ៍ផ្លូវគោកក្នុងរយៈពេល១ឆមាស (ពីថ្ងៃទីខែមករា រហូតដល់ថ្ងៃទី៣០ខែមិថុនា)ឆ្នាំ២០២០នេះ បើប្រៀបធៀបឆមាសទី១ឆ្នាំ២០១៩ គឺចំនួនគ្រោះថ្នាក់ចរាចរណ៍មានការថយចុះ ៥៥២លើក ស្មើ ២៥%(១៦១៩លើ២១៧១លើក) ចំនួនមនុស្សស្លាប់ថយចុះ ១៧២នាក់ ស្មើនឹង១៧% (៨៦១លើ១០៣៣នាក់) ចំនួនអ្នករងរបួសថយចុះ ៧៧៨នាក់ស្មើនឹង២៤% (២៤៤៩លើ៣២២៧នាក់)។
ដូចគ្នានេះដែរ បើប្រៀបធៀបគ្រោះថ្នាក់ចរាចរណ៍រយៈពេល២ខែ នៃការរឹតបន្តឹងច្បាប់ចរាចរណ៍ផ្លូវគោក គឺខែឧសភា និងខែមិថុនាឆ្នាំ២០២០ ធៀបនឹងខែឧសភា និងខែមិថុនាឆ្នាំ២០១៩ គឺគ្រោះថ្នាក់ចរាចរណ៍ មានការថយចុះ ២៣៣លើក ស្មើនឹង៣៤% (៤៥៧លើ៦៩០លើក) ចំនួនមនុស្សស្លាប់មានការថយចុះ ៧៩នាក់ ស្មើនឹង២៥% (២៤១លើ៣២០នាក់) និងអ្នករងរបួស បានថយចុះ២៣៣នាក់ស្មើនឹង២៣% (៧៦៦លើ៩៩៩នាក់)។
តាមទិន្នន័យបញ្ជាក់ខាងលើនេះ គឺបានបង្ហាញយ៉ាងច្បាស់ថា ប្រជាពលរដ្ឋពិតជាមានការយល់ដឹង និងបានចូលរួមគោរពច្បាប់ចរាចរណ៍កាន់តែច្រើននៅពេលប្រទេសជាតិ មានការរីកចម្រើន មានកំណើនយានយន្តធ្វើដំណើរ និង កំណើនអ្នកបើកបរក៏ដោយ តែគ្រោះថ្នាក់ចរាចរណ៍មានការថយចុះ។
លទ្ធផលវិជ្ជមាននេះ ក្នុងនាមជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក សម្តេច បានថ្លែងអំណរគុណដល់ជនរួមជាតិទាំងអស់ ជាពិសេសអ្នកប្រើប្រាស់ផ្លូវថ្នល់ដែលបានចូលរួមគោរពអនុវត្តច្បាប់ចរាចរណ៍ផ្លូវគោកយ៉ាងខ្ជាប់ខ្ជួន និងអរគុណដល់កងកម្លាំងមានសមត្ថកិច្ច ក៏ដូចជាមន្ត្រីពាក់ព័ន្ធទាំងអស់ ដែលបានអនុវត្តភារកិច្ចរបស់ខ្លួនបានល្អប្រសើរ។ សូមថ្លែងអំណរគុណចំពោះគ្រប់បណ្តាញសារព័ត៌មាន អង្គការក្រៅរដ្ឋាភិបាល និង អាជ្ញាធរមូលដ្ឋានគ្រប់ជាន់ថ្នាក់ ដែលបានចូលរួមផ្សព្វផ្សាយ និង អប់រំអំពីច្បាប់ចរាចរណ៍ផ្លូវគោកនេះជូនប្រជាពលរដ្ឋផងដែរ។
សម្តេចឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានលើកទឹកចិត្តដល់ជនរួមជាតិបន្តចូលរួមផ្តល់ជាមតិយោបល់ក្នុងន័យស្ថាបនា និងកែលម្អថែមទៀតដើម្បីបន្តការអនុវត្តច្បាប់ចរាចរណ៍ផ្លូវគោកឲ្យកាន់តែល្អប្រសើរឡើង គឺមានន័យថាអត្រាគ្រោះថ្នាក់ចរាចរណ៍ នឹងកាន់តែថយចុះ ចំនួនអ្នកស្លាប់កាន់តែតិច សណ្តាប់ធ្នាប់សាធារណៈកាន់តែមានរបៀបរៀបរយល្អប្រសើរ សមជាប្រទេសកម្ពុជា និងប្រជាពលរដ្ឋខ្មែរ ជាប្រជាជាតិស៊ីវិល័យ។
ជាមួយគ្នានេះ សម្តេចសូមក្រើនរំលឹកថែមទៀតដល់កងកម្លាំងមានសមត្ថកិច្ច ក៏ដូចជាមន្ត្រីពាក់ព័ន្ធទាំងអស់ ដែលបានចូលរួមអនុវត្តភារកិច្ចរបស់ខ្លួន ត្រូវតែបន្តការគោរពក្រមសីលធម៌វិជ្ជាជីវៈ និងវិន័យឲ្យបានខ្ជាប់ខ្ជួន ក្នុងការអនុវត្តតួនាទីភារកិច្ចរបស់ខ្លួន ត្រូវកាត់បន្ថយ ឬលប់បំបាត់ឲ្យបាននូវបាតុភាពអវិជ្ជមានផ្សេងៗ ដើម្បីបម្រើផលប្រយោជន៍ជាតិ និងប្រជាពលរដ្ឋ៕
ខេត្តកំពង់ធំ ៖ ដោយសារតែភ្លើងប្រចណ្ឌស្រ្តីម្នាក់បានយកកាំបិតប៉័ងតោកាប់លើប្រដាប់ភេទប្រុសស្នេហ៍ស្ទើរដាច់ និងមុតភ្លៅស្ទើរដល់ឆ្អឹងរួចបោះកាំបិតចោលគេចខ្លួនបាត់។ ហេតុការណ៍នេះកើតឡើង កាលពីវេលាម៉ោង១០ និង៣០នាទីព្រឹកថ្ងៃទី៣០ ខែមិថុនា ឆ្នាំ២០២០ នៅភូមិពោន ឃុំច្រនាង ស្រុកតាំងគោក ខេត្តកំពង់ធំ។
ប្រភពព័ត៌មានពីកន្លែងកើតហេតុបានឲ្យដឹងថាជនសង្ស័យមានឈ្មោះរិទ្ធ ស្រីនាង ភេទស្រីអាយុ២៨ឆ្នាំមុខរបរមន្រ្តីនគរបាលចរាចរណ៍ រស់នៅភូមិដំរីជាន់ខ្លា សង្កាត់ដំរីជាន់ខ្លា ក្រុងស្ទឹងសែន ខេត្តកំពង់ធំ។
ចំណែកបុរសឈ្មោះខៀន សុខល័ក្ខ ភេទប្រុអាយុ៣៣ឆ្នាំ មុខរបរមន្រ្តីនគរបាលចរាចរណ៍ រស់នៅភូមិតាំងក្រសៅ ឃុំតាំងក្រសៅ ស្រុកប្រាសាទសំបូរ ខេត្តកំពង់ធំ ទើបចាត់តាំងពីខេត្តកំពង់ធំមកបំពេញការងារចរាចរណ៍នៅស្រុកតាំងគោកបាប្រមាណ៣-៤ថ្ងៃប៉ុណោះ។ បុរសនេះមានប្រពន្ធ និងកូន២នាក់ហើយបានលួចបង្កាត់ភ្លើងស្នេហ៍លួចលាក់ជាមួយស្រ្តីជាជនដៃដល់យូរខែមកហើយដែរ។
មុនកើតហេតុស្រ្តីដៃដល់ដឹងថា ប្រុសស្នេហ៍របស់ខ្លួនចង់ដោះដៃមានស្រីថ្មីនៅស្រុកតាំងគោកក៏តាមទៅរករឿងដល់ទីនោះ ហើយបានយកកាំបិតបុ័ងតោកាប់ទៅលើប្រដាប់ភេទប្រុសស្នេហ៍យ៉ាងសាហាវបណ្តាលឲ្យដាច់រយះដល់សាច់ភ្លៅម្ខាងស្ទើរដល់ឆ្អឹង។
ករណីខាងលើនេះលោក សន តាល់ អធិការស្រុកតាំងគោក បានឲ្យដឹងថា លោកពុំហ៊ានផ្តល់ព័ត៌មានទេ សូមឲ្យទាក់ទងសួរលោក ស្នងការទៅ។ ចំណែកលោក អ៊ុក កុសល ស្នងការនគរបាលខេត្តកំពង់ធំ បានបដិសេធថានារីជាជនដៃដល់ខាងលើនេះ មិនមែនជាមន្រ្តីនគរបាលខេត្តកំពង់ធំទេគឺជា អតីតនារីបម្រើសេវាខារ៉ាអូខេប៉ុណ្ណោះ ហើយកម្លាំងរបស់លោកកំពុងស្វែងរកចាប់ខ្លួនហើយ៕
ខេត្តរតនគិរី ៖ លោក សាយ សំអាល់ រដ្ឋមន្ត្រីក្រសួងបរិស្ថានបានថ្លែងនូវការព្រមានថ្មីទៀតថា នឹងចាត់វិធានការតាមផ្លូវច្បាប់ចំពោះសកម្មភាពទន្ទ្រានកាន់កាប់ដីរដ្ឋដោយខុសច្បាប់ពីក្រុមមនុស្សមួយចំនួនដោយលោកសង្កត់ធ្ងន់ថា ការទន្ទ្រានកាន់កាប់ដីរដ្ឋគឺជាទង្វើខុសច្បាប់ និងជាការលួចទ្រព្យសម្បត្តិរបស់យើងទាំងអស់គ្នា។
លោករដ្ឋមន្ត្រីក្រសួងបរិស្ថានបានថ្លែងដូច្នេះកាលពីព្រឹកថ្ងៃទី៣០ ខែមិថុនា ឆ្នាំ ២០២០នេះ នៅសាលាខេត្តរតនគិរីក្នុងកិច្ចប្រជុំស្តីពីការគ្រប់គ្រងដីសាធារណៈរបស់រដ្ឋនៅក្នុងតំបន់ការពារធម្មជាតិក្នុងភូមិសាស្ត្រខេត្តរតនគិរី ដោយមានការចូលរួមពីសមាជិកនៃគណៈកម្មាធិការទី៣ នៃព្រឹទ្ធសភា និងរដ្ឋសភា សមាជិកក្រុមប្រឹក្សាខេត្ត គណៈអភិបាលខេត្តរតនគិរី និងអាជ្ញាធរពាក់ព័ន្ធរួមមានអភិបាលក្រុងស្រុកនិងមេឃុំ ចៅសង្កាត់ក្រោមចំណុះរដ្ឋបាលខេត្តរតនគិរីជាច្រើនរូបទៀត ។
ជាមួយគ្នានោះ លោកក៏បានក្រើនរម្លឹកផងដែរចំពោះអាជ្ញាធរមូលដ្ឋានដែលមានតួនាទីចូលរួមការពារ និងអភិរក្សធនធានធម្មជាតិ មិនត្រូវបើកដៃឱ្យមានការកាប់រាន ដុតឆ្ការ ទន្ទ្រានកាន់កាប់ដៃរដ្ឋដោយខុសច្បាប់ ហើយស្នើសុំកាត់ឆ្វៀលដីរំលោភទន្ទ្រានទាំងនោះឱ្យក្រុមជនខិលខូចឡើយ នេះជាទង្វើខុសច្បាប់ ហើយចាំបាច់ត្រូវទទួលខុសត្រូវចំពោះមុខ ច្បាប់ដោយគ្មានការលើកលែងឡើយ៕
បាងកក ៖ ប្រទេសថៃ នឹងលើកលែងចំពោះបម្រាមមិនឱ្យមានការហោះហើរឆ្លងប្រទេស ចាប់ពីថ្ងៃពុធ ទី០១ ខែកក្កដា ឆ្នាំ២០២០នេះតទៅ ប៉ុន្តែចំនួនជើងហោះហើរអន្តរជាតិ អាចត្រូវបានកាត់បន្ថយ។ នេះបើយោងតាមការចុះផ្សាយរបស់សារព័ត៌មានបាងកកប៉ុស្តិ៍ នៅថ្ងៃទី៣០ ខែមិថុនា។
អាជ្ញាធរអាកាសចររស៊ីវិលថៃ បានកំណត់លក្ខខណ្ឌខ្លះៗ សម្រាប់ការអនុញ្ញាតឱ្យមានជើងហោះហើរអន្តរជាតិឡើងវិញនេះ។ យ៉ាងណាមិញ មិនមានការបញ្ជាក់លម្អិតនូវលក្ខខណ្ឌទាំងនេះឡើយ ប៉ុន្តែ អាជ្ញាធរដែលអនុវត្តច្បាប់អន្តោរប្រវេសន៍ ច្បាប់ជំងឺឆ្លង អាកាសចរណ៍ និងច្បាប់គ្រាអាសន្ន ត្រូវទទួលខុសត្រូវចំពោះអ្នកដំណើរដែលចូលទៅប្រទេសថៃ។
សេចក្ដីប្រកាសរបស់អាជ្ញាធរអាកាសចរស៊ីវិលថៃ បានធ្វើឡើង បន្ទាប់ពីរាជរដ្ឋាភិបាលថៃ កាលពីថ្ងៃចន្ទម្សិលមិញ បានសម្រេចអនុញ្ញាតឱ្យជនបរទេស ជាអ្នកជំនួញ និងជាអ្នកដែលបានរៀបការជាមួយជនជាតិថៃ ពលករស្របច្បាប់ និងអ្នកស្នាក់នៅអចិន្ត្រៃយ៍ នៅក្នុងប្រទេសថៃ ចូលទៅកាន់ប្រទេសថៃឡើងវិញ។
តាមរបាយការណ៍ អ្នកដំណើរតិចជាង ៤,២លាននាក់ បានឆ្លងកាត់ព្រលានយន្តហោះទាំង ២៨ របស់ថៃ គិតចាប់ពីដើមឆ្នាំ២០២០នេះ បើធៀបនឹងរយៈពេលដូចគ្នាឆ្នាំមុន ដែលមានចំនួន ៩,៣លាននាក់។ បញ្ហាកូវីដ១៩ បានបង្ខំឱ្យថៃ ផ្អាកការហោះហើរក្នុងស្រុក និងក្រៅស្រុក កាលពីដើមខែមេសាកន្លងទៅ៕
ភ្នំពេញ ៖ ក្រសួងសុខាភិបាល ប្រកាសឱ្យដឹងនៅព្រឹកថ្ងៃទី០១ ខែកក្កដា ឆ្នាំ២០២០នេះថា អ្នកជំងឺកូវីដ១៩ម្នាក់ទៀតហើយ ត្រូវបានព្យាបាលឱ្យជាសះស្បើយឡើងវិញ សរុប១៣១នាក់ហើយ នៅសល់តែ ១០នាក់ទៀតប៉ុណ្ណោះកំពុងសម្រាកព្យាបាល។ នេះបើយោងតាមសេចក្តីប្រកាសរបស់ក្រសួងសុខាភិបាលដែលទទួបានមុននេះបន្តិច។
ក្រសួងសុខាភិបាលបញ្ជាក់ថា បុរសដែលព្យាបាលឱ្យជាសះស្បើយឡើងវិញនេះ ជាជនជាតិឥណ្ឌូនេស៊ី អាយុ២២ឆ្នាំ ស្នាក់នៅបណ្តោះអាសន្នក្នុងក្រុងព្រះសីហនុ ខេត្តព្រះសីហនុ។ ក្រសួងបានឱ្យដឹងថា បន្ទាប់ពីសម្រាកព្យាបាលអស់មួយរយៈ បុរសរូបនេះត្រូវបានពិនិត្យមិនឃើញមានមេរោគកូវីដ១៩ ចំនួនពីរដង និងត្រូវបានអនុញ្ញាតឱ្យចេញពីមន្ទីរពេទ្យមិត្តភាពខ្មែរ-សូវៀត កាលពីថ្ងៃទី២៨ ខែមិថុនា កន្លងទៅនេះ។
សូមបញ្ជាក់ថា មកដល់ព្រឹកថ្ងៃទី០១ ខែកក្កដា ឆ្នាំ២០២០នេះ រកឃើញអ្នកឆ្លងជំងឺកូវីដ១៩សរុប ១៤១នាក់។ ប៉ុន្តែអ្នកជំងឺសរុប ១៣១នាក់ហើយ ត្រូវបានព្យាបាលឱ្យជាសះស្បើយ នៅសល់តែ ១០នាក់ទៀតប៉ុណ្ណោះកំពុងសម្រាកព្យាបាល ក្រោមការយកចិត្តទុកដាក់ខ្ពស់បំផុតពីកងទ័ពអាវសដ៏អង់អាចរបស់កម្ពុជា៕
បរទេស ៖ យោងតាមទិន្នន័យពីគេហទំព័រអន្តរជាតិ Worldometer បានបង្ហាញថា គិតត្រឹមម៉ោង ៧ព្រឹកថ្ងៃពុធ ទី០១ ខែកក្កដា ឆ្នាំ២០២០នេះ ចំនួនអ្នកឆ្លងជំងឺ COVID-19 នៅទូទាំងពិភពលោក បានកើនឡើងដល់ ១០,៥៧៤,៣៩៨នាក់ហើយ។ ក្នុងនោះអ្នកស្លាប់មានចំនួន ៥១៣,១៤៣នាក់ និងជាសះស្បើយឡើងវិញ ៥,៧៨៣,៩៩៦នាក់។
គេហទំព័រដដែល បានបង្ហាញថា ការរីករាលដាលនៃជំងឺកូវីដ១៩ នៅតែមានសភាពស្រួចស្រាវចំនួនអ្នកឆ្លង និងស្លាប់ថ្មីនៅតែមានចំនួនច្រើន។ ក្នុងនោះសហរដ្ឋអាមេរិក នៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ។ សហរដ្ឋអាមេរិក មានអ្នកឆ្លងជំងឺ COVID-19 ចំនួន ២,៧២៧,០៦១នាក់ ស្លាប់ចំនួន ១៣០,១០៦នាក់ និងជាសះស្បើយចំនួន ១,១៣៦,៥៧១នាក់។
ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺកូវីដ១៩ គឺប្រទេសប្រេស៊ីល។ ប្រេស៊ីលមានអ្នកឆ្លង ១,៤០៨,៤៨៥នាក់ ស្លាប់ចំនួន ៥៩,៦៥៦នាក់ និងជាសះស្បើយ ៧៩០,០៤០នាក់។
ប្រទេសឈរនៅចំណាត់ថ្នាក់ទី៣ គឺប្រទេសរុស្ស៉ី។ រុស្ស៉ី មានអ្នកឆ្លង ៦៤៧,៨៤៩នាក់ ស្លាប់ ៩,៣២០នាក់ និងជាសះស្បើយ ៤១២,៦៥០នាក់៕
ភ្នំពេញ ៖ រដ្ឋបាលរាជធានីភ្នំពេញ មានគម្រោងនឹងកសាងចំណតរថយន្តចំនួន៣ទីតាំង ដែលគម្រោងនេះនឹងចំណោយទឹកប្រាក់វិនិយោគប្រមាណ១៦០លានដុល្លារ ហើយក្រុមហ៊ុនបានពិនិត្យទីតាំងរួចរាល់ចំនួន២កន្លែង គឺនៅតំបន់រង្វង់មូលកួរស្រូវជាប់ព្រំប្រទល់ខេត្តកណ្តាលមួយកន្លែង និងនៅតំបន់ផ្លូវជាតិលេខ៦មួយកន្លែង និងកំពុងរកទីតាំងមួយកន្លែងទៀតដែលស្ថិតនៅជាយក្រុង។
លោក ឃួង ស្រេង អភិបាលរាជធានីភ្នំពេញ បានថ្លែងបែបនេះ ខណៈលោកទទួលជួបម្ចាស់ក្រុមហ៊ុនចិន Good Car investment របស់ប្រទេសចិន កាលពីរសៀលថ្ងៃទី៣០ ខែមិថុនា ឆ្នាំ២០២០ នៅរាជធានីភ្នំពេញ។ លោកបានបញ្ជាក់ថា ចំណតក្រោមដី ស្របតាមគោលបំណងរបស់រដ្ឋបាលរាជធានីភ្នំពេញ ដែលត្រូវការចំណត រថយន្តជាចំណុចអាទិភាពក្នុងទីក្រុងសព្វថ្ងៃ ដែលកំពុងខ្វះចំណត។
លោកស្រី ចាន់ សុទ្ធា ម្ចាស់គម្រោងបានជម្រាបជូនពីគោលបំណង វិនិយោគ លើចំណតរថយន្ត និងនាំចូលរថយន្ត ដឹកជញ្ជូនទំនិញ និងរថយន្តដឹកជញ្ជូនអ្នកដំណើរ មករាជធានីភ្នំពេញ។ តំណាងក្រុមហ៊ុនបានបង្ហាញពីគោលដៅត្រូវ កសាងចំណតរថយន្ត ចំនួន៣ទីតាំងក្នុងរាជធានីភ្នំពេញ លើទឹកប្រាក់វិនិយោគ១៦០លាន ដុល្លារអាម៉េរិក ដែល ក្រុមហ៊ុនបាន ពិនិត្យទីតាំងរួចចំនួន២កន្លែង គឺនៅតំបន់រង្វង់មូលកួរស្រូវជាប់ព្រំប្រទល់ខេត្ត កណ្តាលមួយកន្លែងនិងនៅតំបន់ផ្លូវជាតិលេខ៦មួយកន្លែង និងកំពុងរកទីតាំងមួយកន្លែង ទៀតដែលស្ថិតនៅជាយក្រុង។
លោកអភិបាលបានផ្តល់អនុសាសន៍ឱ្យ ក្រុមហ៊ុនសិក្សាឱ្យច្បាស់លាស់មុនសម្រេច ចិត្តវិនិយោគ គឺធ្វើឱ្យបានជោគជ័យ ព្រោះកន្លងមកមានក្រុមហ៊ុនច្រើនមកហើយ បានលើកឡើងពីការចង់វិនិយោគបែបនេះ តែមិនទទួលបានលទ្ធផលទេ បានត្រឹមតែមក បង្ហាញគម្រោងធំ និងទំនើបរបស់ខ្លួនប៉ុណ្ណោះ៕
ហុងកុង ៖ មេសកម្មជនគាំទ្រលិទ្ធិប្រជាធិបតេយ្យនៅហុងកុង គឺលោក ចូសហ័រ វ៉ុង (Joshua Wong) បានបង្ហាញពីភាពភ័យខ្លាច និងបានប្រកាសដកខ្លួនចេញពីសកម្មភាពនយោបាយកាលព្រឹកថ្ងៃអង្គារនេះ បន្ទាប់ពីសភាប្រជាជនចិនបានសម្រេច អនុម័តច្បាប់ថ្មីមួយដ៏ចម្រូងចម្រាស់ ស្តីអំពីសន្តិសុខថ្មីសម្រាប់ដែនដីហុងកុង។ នេះបើយោងតាមការចេញផ្សាយ ដោយសារព័ត៌មាន BBC នាល្ងាចថ្ងៃអង្គារ ទី៣០ ខែមិថុនា ឆ្នាំ២០២០។
សកម្មជនគាំទ្រលទ្ធិប្រជាធិបតេយ្យដ៏លេចធ្លោនៅហុងកុងរូបនេះបានលើកឡើងថា នៅក្រោយច្បាប់សន្តិសុខថ្មីនេះបានអនុម័តយ៉ាងដូច្នេះថា «វាជាទីបញ្ចប់នៃហុងកុង ដែលពិភពលោកធ្លាប់ស្គាល់ពីមុនមក»។ ការលើកឡើងដូច្នេះ បន្ទាប់ពីសកម្មជនរូបនេះ បានប្រកាសដើរចេញពីចលនាគាំទ្រប្រជាធិបតេយ្យ ដែលគេស្គាល់ថា ដេម៉ូស៊ីសស្តូ (Demosisto)។
ចំណែកឯលោក ណាថាន់ ឡរ (Nathan Law) ដែលជាប្រធានស្ថាបនិកនៃចលនា Demosisto និងជាអតីតមេដឹកនាំនិស្សិតហុងកុង ក៏បានប្រកាសចាកចេញពី Demosisto ដូចគ្នាដែរ។ តាមរយៈសំណេរនៅលើគណនីហ្វេសប៊ុករបស់ខ្លួន លោក Law បានលើកឡើងយ៉ាងដូច្នេះថា «ច្បាប់ថ្មីនេះគឺជាចាប់ផ្តើមនៃបដិវត្តវប្បធម៌បង្ហូរឈាម»។ ប៉ុន្តែសកម្មជនរូបនេះបានបញ្ជាក់ថា បើទោះជាលោកបានចាកចេញពី Demosisto ក៏ដោយក៏លោកប្តេជ្ញានឹងបន្តប្រយុទ្ធ ដើម្បីលិទ្ធិប្រជាធិបតេយ្យទៅតាមសមត្ថភាពរបស់ខ្លួន។
ទោះជាបែបនេះក្តី អភិបាលក្រុងហុងលុងលោកស្រី ខារី ឡាំ និងសមាជិកសភាហុងកុងជាច្រើនទៀត ធ្លាប់បានបញ្ជាក់ថា ច្បាប់ថ្មីរបស់ចិននេះ នឹងមិនប៉ះពាល់ដល់សិទ្ធិស្វ័យភាពរបស់ទីក្រុងមួយនេះឡើយ ហើយលោកស្រីក៏បានអំពាវនាវផងដែរ ឲ្យគ្រប់គ្នាស្វែងយល់លម្អិត អំពីច្បាប់នេះសិន មុននឹងងើបឡើងប្រឆាំងតវ៉ានោះ។
ចិនបានបង្កើតច្បាប់ខាងលើនេះ ដោយស្ថិតនៅក្នុងគោលដៅដោះស្រាយបញ្ហា ជុំវិញអំពើហិង្សា និងតវ៉ានៅក្នុងទីក្រុងហុងកុង ដែលត្រូវបានអូសបន្លាយ ចាប់តាំងពីឆ្នាំ២០១៩។ ច្បាប់នេះមានគោលដៅប្រយុទ្ធប្រឆាំង ការធ្វើវិទ្ធង្សនា, អំពើភេរវកម្ម, ការបំបែកខ្លួន និងការគប់គិតជាមួយបរទេសជាដើម។ ទោះបីជាអាមេរិក បានចាត់វិធានការមួយចំនួន ដូចជាការរឹតត្បិតទិដ្ឋាការលើមន្ត្រីចិន និងដកឋានៈពិសេស របស់ហុងកុងក្នុងនាមជាមជ្ឈមណ្ឌលហិរញ្ញវត្ថុអាស៊ី ស្របតាមច្បាប់របស់អាមេរិករួចទៅហើយក្តី ក៏ប្រទេសចិន មិនបានបង្ហាញសញ្ញាថា នឹងដកថយវិញនោះដែរ៕
ភ្នំពេញ ៖ ក្នុងរយៈពេល៦ខែដើមឆ្នាំ២០២០ កម្ពុជានាំចេញអង្ករសម្រេចបាន ៣៩៧,៦៦០តោន កើនឡើង១១៦,១២២ តោន ស្មើនឹង៤១.២៥% ដែលធៀបទៅនឹងរយៈពេល ៦ខែដើមឆ្នាំ២០១៩ មានចំនួន ២៨១,៥៣៨តោន។ នេះបើតាមការបញ្ជាក់របស់លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។
លោកឲ្យដឹងទៀតថា សម្រាប់ខែមិថុនា ឆ្នាំ២០២០ សម្រេចការនាំចេញអង្ករបាន ចំនួន៤១,៥៦៣ តោន កើនឡើងចំនួន ១០,១៩៧តោន ស្មើនឹង ៣២.៥១% ធៀបទៅនឹងខែឧសភា ឆ្នាំ២០១៩ ដែលក្នុងនេះមាន៖ អង្ករក្រអូបគ្រប់ប្រភេទមានចំនួន ៤១,៨៦៤តោន, អង្ករចម្រុះគ្រប់ប្រភេទមានចំនួន ៨,៧៥២ តោន, អង្ករចំហ៊ុយមានចំនួន ៩២៤តោន និងអង្ករក្រហមមានចំនួន២៣តោន។
លោក វេង សាខុន បានបញ្ជាក់ទៀតថា ប្រទេសដែលបានបញ្ជាទិញអង្ករ ពីកម្ពុជាក្នុងរយៈពេល៦ខែនេះ មានចំនួន៥៦ប្រទេស៖ នៅក្នុងសហភាពអឺរ៉ុបមានប្រទេសចំនួន២៤ ក្នុងចំណោម២៨ប្រទេស, ប្រទេសចិន, ប្រទេសសមាជិកអាស៊ានចំនួន ៦ ហើយនឹងនៅទ្វីបដទៃទៀតចំនួន២៥ ប្រទេស។ ទន្ទឹមនឹងនេះក៏មានក្រុមហ៊ុនចំនួន៥ ក្នុងចំណោម៦៦ ក្រុមហ៊ុន ដែលបាននាំចេញអង្ករច្រើនជាងគេ។
សូមបញ្ជាក់ថា ការនាំចេញអង្ករកម្ពុជាក្នុងរយៈពេល ៦ខែដើមឆ្នាំនេះ មានកំណើននៅគ្រប់គោលដៅនាំចេញទាំងអស់៖ សហភាពអឺរ៉ុបកើនឡើងចំនួន ៤៥.១៩%, ប្រទេសចិនកើនចំនួន២៥.២០%, បណ្តាប្រទេសសមាជិកអាស៊ានកើនចំនួន៤៧.៦៩% និងគោលដៅដទៃទៀតបានកើនឡើងចំនួន ៧៩.២៦%៕
វេណេហ្សុយអេឡា ៖ លោក នីកូឡាស ម៉ាឌូរ៉ូ ប្រធានាធិបតីវេណេហ្សុយអេឡា បានបញ្ជាឱ្យលោក Brilhante Pedrosato ឯកអគ្គរដ្ឋទូតសហភាពអឺរ៉ុប ចេញពីប្រទេសក្នុងរយៈពេល ៧២ម៉ោង បន្ទាប់ពី EU បានដាក់ទណ្ឌកម្មលើមន្រ្តីវេណេហ្សុយអេឡា។ លោកថ្លែងដូច្នេះ តាមកញ្ចក់ទូរទស្សន៍កាលពីថ្ងៃទី២៩ ខែមិថុនា ឆ្នាំ២០២០។ នេះបើយោងតាមសារព័ត៌មាន Sputnik។
លោកថ្លែងបញ្ជាក់ដូច្នេះថា៖ «ខ្ញុំបានសម្រេចចិត្តទុកពេល ៧២ម៉ោង ឱ្យឯកអគ្គរដ្ឋទូតសហភាពអឺរ៉ុប ចាកចេញពីប្រទេស។ វាគ្រប់គ្រាន់ហើយចំពោះអាណានិគមរបស់អឺរ៉ុប មកលើវេណេហ្សុយអេឡា»។ លោក Pedrosato ត្រូវបានអនុញ្ញាតឱ្យជិះយន្តហោះចាកចេញពីប្រទេស។
សូមជម្រាបថា ក្រុមប្រឹក្សាសហភាពអឺរ៉ុប បានដាក់ទណ្ឌកម្មលើមន្រ្តីវេណេហ្សុយអេឡា ១១នាក់ រួមមាន សមាជិកសភា, ចៅក្រម និងយោធាជាន់ខ្ពស់ ដែលធ្វើសកម្មភាពប្រឆាំងនឹងសភាដែលគ្រប់គ្រងដោយបក្សប្រឆាំង។ ទណ្ឌកម្មនោះ មានដូចជាការហាមឃាត់ការធ្វើដំណើរ និងការបង្កកទ្រព្យសម្បត្តិជាដើម។ រហូតមកទល់ពេលនេះ មន្រ្តីវេណេហ្សុយអេឡា ៣៦នាក់ហើយ ដែលរងការដាក់ទណ្ឌកម្ម៕
ភ្នំពេញ ៖ ដើម្បីលើកសោភ័ណភាព និងបរិស្ថាននៅក្នុងរាជធានីភ្នំពេញអាជ្ញាធររាជធានីភ្នំពេញបានដាក់ឱ្យប្រើប្រាស់ម៉ាស៊ីនបូមសម្អាតធូលី និងសំរាម ចំនួន២គ្រឿង ដើម្បីបោសនៅតាមដងផ្លូវ និងតាមសួនច្បារនានានៅក្នុងរាជធានីភ្នំពេញ។ ម៉ាស៊ីនទាំងពីរគ្រឿងនេះ ជាអំណោយរបស់ទីក្រុង ណាននីង នៃសាធារណរដ្ឋប្រជាមានិតចិន ដែលជាទីក្រុងចងសម្ព័ន្ធមេត្រីភាពជាមួយរាជធានីភ្នំពេញ។
ការដាក់ឱ្យប្រើប្រាស់ម៉ាស៊ីនបូមសម្អាតធូលី ស្លឹកឈើទាំងពីគ្រឿងនេះស្របតាមការណែនាំរបស់អភិបាលរាចធានីភ្នំពេញ ឯកឧត្តម ឃួង ស្រេង ក្នុងកិច្ចប្រជុំកន្លងមកជាមួយអាជ្ញាធរពាក់ព័ន្ធ និងការយកចិត្តទុកដាក់ជាចម្បង ដើម្បីថែរក្សាអនាម័យ និងសុខមាលភាពជូនប្រជាពលរដ្ឋក្នុងទីក្រុង និងដើម្បីសោភ័ណភាពទីក្រុងភ្នំពេញផងដែរ ដោយលោកបានចាត់ចែងដល់អង្គភាពជំនាញធ្វើកិច្ចការងារនេះដោយផ្ទាល់។
ពាក់ព័ន្ធការងារនេះ លោក នួន សំណាវុធ អភិបាលរដ្ឋាករស្វយ័តគ្រប់គ្រងសំរាម និងសំណល់រឹងរាជធានីភំ្នពេញ បានឲ្យដឹងថា ម៉ាស៊ីនបូមធូលី ស្លឹកឈើ និងសំរាមនេះជាអំណោយរបស់ទីក្រុង ណាននីង ប្រទេសចិន ដែលបានបញ្ជូនមកឲ្យរាជធានីភ្នំពេញ ស្របពេលដែលទីក្រុងណាននីង ផ្តល់បរិក្ខារពេទ្យមួយចំនួន ដើម្បីប្រយុទ្ធប្រឆាំងនឹងជំងឺកូវីដ-១៩ កាលពីប៉ុន្មានខែកន្លងមកនេះ។
លោកក៏បានបញ្ជាក់ទៀតថា ម៉ាស៊ីនបូមទាំងពីរខាងលើនេះ គឺសមត្ថភាពប្រើប្រាស់សម្រាប់បោសសម្អាតនៅក្នុងបរិវេណដែលផ្ទៃដីទំហំ ១៦០០០ ម៉ែត្រការ៉េក្នុង១ម៉ោង និងអាចបូមសម្អាតបាន ៨គីឡូម៉ែត្រក្នុងមួយម៉ោង។
ម៉ាស៊ីនបូមទាំងពីរនេះកាលពីល្ងាចថ្ងៃទី២៩ ខែមិថុនា ឆ្នាំ២០២០ ត្រូវបានរដ្ឋបាលរាជធានីភ្នំពេញ យកមកធ្វើសកម្មភាពបូមសម្អាតនៅតាមផ្លូវដើរលើសួនច្បារមាត់ទន្លេ ចាប់ពីមុខផ្សារចាស់ រហូតដល់មុខ វត្តឧណ្ណាឡោម ហើយជាក់ស្តែងម៉ាស៊ីននេះ ពិតជាមានគុណភាពដែលអាចបូមសម្អាតធូលី ស្លឹកឈើ និងសំរាម បានស្អាត និងមិនធ្វើឱ្យធូលីហុយនោះទេ ព្រោះមានទឹកសម្រាប់បាញ់ ស្រោចនៅពេលកំពុងប្រតិបត្តិការបូមធូលី។
លោក នួន សំណាវុធ ក៏បានបញ្ជាក់ផងដែរថា៖ ម៉ាស៊ីនបូមមទាំងពីរនេះ ជាម៉ាស៊ីនប្រើប្រាស់អាគុយ ដែលមិនបង្កផលប៉ះពាល់បរិស្ថានហើយបើខណ្ឌមួយចំនួន ត្រូវការអាចយកទៅប្រើប្រាស់នៅក្នុងមូលដ្ឋានរបស់ខ្លួនបាន៕
