ភ្នំពេញ ៖ កម្ពុជានឹងពិចារណាក្នុងការស្នើសុំទៅអង្គការយូណេស្កូ ដើម្បីដាក់នាំបញ្ចុកជាសម្បត្តិបេតិកភណ្ឌ អរូបិយរបស់ពិភពលោក នៅក្រោយព្រឹត្តិការណ៍ពិសានំបញ្ចុកសន្តិភាព នៅទូទាំងប្រទេស ក្រោមគំនិតផ្តួចផ្តើមរបស់សម្តេចតេជោនាយករដ្ឋមន្ត្រីរួចរាល់។

ក្នុងកិច្ចប្រជុំជាមួយថ្នាក់ដឹកនាំ និងសមាជិកក្រុមការងារចុះជួយស្រុកបារាយណ៍ និងស្រុកតាំង គោក ខេត្តកំពង់ធំ នាព្រឹកថ្ងៃទី៨ មិថុនានេះ ដើម្បីត្រៀមរៀបចំពិធីពិសានំបញ្ចុក សាមគ្គីសន្តិភាព ជាមួយប្រជាពលរដ្ឋទាំងពីរស្រុកខាងលើ នៅថ្ងៃទី៩ មិថុនា ស្អែកនេះ លោក ថោង ខុន រដ្ឋមន្ត្រី ក្រសួងទេសចរណ៍បានលើកឡើងថា ក្រោយពេលប្រជាពលរដ្ឋ រៀបចំពិធីជួបជុំពិសានំបញ្ចុក សន្តិភាពទ្រង់ទ្រាយធំនៅទូទាំងប្រទេស តាមការអំពាវនាវរបស់ សម្ដេចតេជោ ហ៊ុន សែន នាយក រដ្ឋមន្ត្រីហើយនោះ យើងនឹងពិភាក្សាជាមួយរដ្ឋមន្ត្រី ក្រសួង វប្បធម៌ និងវិចិត្រសិល្បៈ អំពីការស្នើ ដាក់បញ្ចូលនំបញ្ចុកជាសម្បត្តិបេតិកភណ្ឌអរូបិយរបស់ពិភពលោកនៅអង្គការយូណេស្កូ ព្រោះយើង ចង់ឱ្យនំបញ្ចុក ដែលមានតាំងពីដូនតាច្រើន ជំនាន់មួយនេះ មានការទទួលស្គាល់ពីពិភពលោកទាំង មូល។

លោករដ្ឋមន្ត្រី ថោង ខុន បានអះអាងថា នៅក្នុងពិព័រណ៍ម្ហូបអាហារGastronomy ដែលក្រសួង ទេសចរណ៍គ្រោងរៀបចំក្នុងខែកញ្ញាខាងមុខនេះ នំបញ្ចុក និងម្ហូបអាហារខ្មែរ មួយចំនួនទៀត ដូច ជា សម្លរម្ជូរគ្រឿង អាម៉ុក បង្អែមគ្រាប់ត្នោត ជាដើម ក៏នឹងត្រូវបានត្រៀម រៀបចំជាអាហារតំណាង ឱ្យអត្តសញ្ញាណខ្មែរ ដើម្បីទាក់ទាញទេសចរផងដែរ៕

ខេត្តកំពង់ចាម ៖ លោក គួច ចំរើន អភិបាលនៃគណៈអភិបាលខេត្ត បានណែនាំដល់មន្រ្តី ជំនាញឲ្យយកចិត្តទុកដាក់ និងទប់ស្កាត់ការឆ្លងជំងឺប៉េសជ្រូកអាហ្វ្រិក តាមរយៈការនាំចូលជ្រូករស់ ពី ប្រទេសវៀតណាម ខណៈដែលនៅកម្ពុជា មិនទាន់មានថ្នាំព្យាបាលជំងឺសត្វប្រភេទនេះនៅឡើយទេ។

ទោះជាមានការរឹតបន្តឹង បែបនេះក្តី ក៏នៅតែមានករណីលួចនាំចូលជ្រូកមកពីប្រទេសវៀតណាម ដដែល ជាក់ស្តែង កម្លាំងសមត្ថកិច្ចសហការជាមួយនឹងស្ថាប័នជំនាញ បង្រ្កាបរថយន្តម៉ាក ហ៊ីយ៉ាន ដាយ ១គ្រឿង ពាក់ស្លាកលេខ កំពង់ចាម 3A-2345 ដឹកជ្រូកចំនួន ២៥ក្បាល ត្រង់ចំនុចភូមិព្រៃផ្តៅ ឃុំក្រឡា ស្រុកកំពង់សៀម ខេត្តកំពង់ចាម នៅព្រឹកថ្ងៃទី៧ ខែមិថុនា ២០១៩ ដែលទំនងជាត្រូវផាក ពិន័យចាស់ដៃ រួមនិងចាត់ការលើម្ចាស់នៃបទល្មើសនេះផងដែរ។

លោក នង ម៉េងហ៊ាង ប្រធានការិយាល័យផលិតកម្មនិងបសុព្យាបាលខេត្តកំពង់ចាម ប្រាប់ឲ្យដឹងថាៈ ក្រោយពីមានការផ្ទុះឡើងនូវជំងឺប៉េស្តជ្រូកអាហ្វ្រិក នៅប្រទេសវៀតណាម ត្រូវបានរដ្ឋមន្រ្តីក្រសួងកសិ កម្ម រុក្ខាប្រមាញ់ និងនេសាទ ក៏ដូចជាលោកប្រធានមន្ទីរកសិកម្មខេត្ត បានដាក់ចេញនូវវិធានការទប់ ស្កាត់មិនឲ្យមានការនាំចូលជ្រូកពីប្រទេសវៀតណាម ចូលមកកម្ពុជា ឆ្លងកាត់ស្ពានគីហ្ស៊ូណា ឬតាម កំពង់ដរនានា ដែលក្រុមឈ្មួញលួចដឹកតាមកាណូត។

លោក នង ម៉េងហ៊ាង ប្រធានការិយាល័យផលិតកម្មនិងបសុព្យាបាលខេត្ត បានបន្តថា ចាប់តាំងពី ពេលដែលបើកយុទ្ធនាការក្តៅមក កម្លាំងរបស់លោក បានសហការជាមួយនឹងសមត្ថកិច្ច ដោយបាន ចាប់ បានជ្រូកលួចដឹកតាមរថយន្ត និងតាមម៉ូតូជាបន្តបន្ទាប់ដែលក្រុមឈ្មួញប្រើប្រាស់គ្រប់រូបភាព ដោយដឹកឆ្លង ស្ពានគីហ្ស៊ុណា ចេញពីខេត្តត្បូងឃ្មុំនិងឆ្លងតាមកាណូតបានចំនួន០៦លើក។ ហើយបានបូមឈាមយកទៅពិនិត្យនៅមន្ទីរពិសោធន៏រាជធានីភ្នំពេញ តែមិនឃើញមានមេរោគប៉េស្ត ជ្រូកអាហ្វ្រិកនោះឡើយ។

សម្រាប់ករណីទី៧ ត្រូវបានបង្រ្កាបនៅក្នុងឃុំក្រឡា ស្រុកកំពង់សៀម រថយន្ត ១គ្រឿងដឹកជ្រូក ២៥ ក្បាលដែលក្រុមឈ្មួញបានដឹកចេញពីវៀតណាមតាមច្រកត្នោត ឃុំកក់ ស្រុក ពញាក្រែក ខេត្តត្បូងឃ្មុំ ក្នុងគោលបំណងមកចែកចាយតាមទីសត្តឃាតនានា ដោយបានបើកកាត់ផ្លូវជាតិលេខ ៧ឆ្លងស្ពាន គីហ្ស៊ុណា ចូលមក្រុងកំពង់ចាមនិងបានបើកដល់ត្រង់ចំនុចឃុំក្រឡា ស្រុកកំពង់សៀម ត្រូវបានបង្រ្កាប ។ តាមច្បាប់ត្រូវផាកពិន័យពី ១០ ទៅ ១៥លានរៀល ហើយបើមិនរាងចាលគុណទ្វេដង ។

• លោក ហេង ពិសិដ្ឋ ប្រធានមន្ទីរកសិកម្មរុក្ខាប្រមាញ់និងនេសាទខេត្តត្បូងឃ្មុំ វិញប្រាប់ឲ្យដឹងថាក្រោយពីមានការណែនាំពីលោកអភិបាលខេត្ត ក៏ដូចជាលោករដ្ឋមន្រ្តីក្រសួងកសិកម្ម រូបលោកបានឲ្យជំនាញការិយាល័យបសុព្យាបាលខេត្ត ត្រូវយកចិត្តទុកដាក់ទប់ស្កាត់ជ្រូកនាំចូលពីវៀតណាម ។ចំពោះរថយន្ត ដឹកជ្រូក២៥ក្បាលចាប់បាននៅខេត្តកំពង់ចាម រូបលោកមិនបានដឹងថាតើជ្រូកនោះបាននាំចូលមក ខេត្ត កំពង់ចាម ដោយរបៀបណា ជាមួយនោះរូប លោកឲ្យជួយស្រាវជ្រាវ តើមានបុគ្គលណាម្នាក់ខ្លះ ដែលនៅពីក្រោយខ្នង ដោយមានការឃុបឃិតបណ្តោយឲ្យមានករណីនាំជ្រូកហូរចេញពីវៀតណាម ចូលមកដល់ខេត្តកំពង់ចាម បានដោយងាយបែបនេះ៕

ភ្នំពេញ ៖ តាមការគ្រោងទុក អភិបាលរាជធានីភ្នំពេញ លោក ឃួង ស្រេង នឹងចូលរួម សំណេះ សំណាល និង ហូបនំបញ្ចុក ជាមួយបងប្អូនសមាគមន៍អ្នកធាក់ស៊ីក្លូ និង កម្មករ កម្មការិនី ជាង៣០០០នាក់នៅភ្នំពេញសម្រាប់មួយថ្ងៃទី៩មិថុនាខានស្អែកនេះ។

មន្ត្រីរដ្ឋបាលរាជធានីភ្នំពេញបានអោយដឹងថា បើមិនមានការប្រែប្រួលទេ លោក ឃួង ស្រេង សម្រាប់ពេលព្រឹកថ្ងៃទី៩មិថុនានេះ នឹងអញ្ជើញ ចូលរួមសំណេះសំណាល និង ហូបនំបញ្ចុកជាមួយ មន្ត្រីរាជការរដ្ឋបាលរាជធានី និងបងប្អូនសមាគមន៍អ្នកធាក់ស៊ីក្លូ នៅសាលារាជធានីភ្នំពេញ ហើយបន្តមកទៀត នៅព្រឹកថ្ងៃដដែល នឹងបន្តទៅជួបសំណេះសំណាល និងហូបនំបញ្ចុកជាមួយកម្មករ កម្មការិនី ជាង៣០០០នាក់នៅក្នុងបរិវេណវត្តជម្ពូរវ័ន្ត សង្កាត់ចោមចៅទី២ ខណ្ឌពោធិ៍សែនជ័យ។

គួររំលឹកថា ក្នុងឱកាសថ្លែងសុន្ទរក ទៅកាន់និស្សិតជ័យលាភី នៅក្នុងពិធីប្រគល់ សញ្ញាបត្រដល់និស្សិត នៃសាកលវិទ្យាល័យពុទ្ឋសាស្រ្ត នៅកោះពេជ្រ កាលពីថ្ងៃទី ៦ មិថុនា ឆ្នាំ ២០១៩ សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា បានអំពាវដល់សមាជិក សមាជិការ គណបក្សប្រជាជនកម្ពុជា និងប្រជាពលរដ្ឋទូទាំងប្រទេស សូមហូបនំបញ្ចុកទាំងអស់គ្នា នៅថ្ងៃទី៩ មិថុនា ២០១៩ ជាពិសេស នៅតាមវត្តអារាម សូមរៀបចំចង្ហាន់នំបញ្ចុកប្រគេនចង្ហាន់ព្រះសង្ឃផងដែរ។ ចំណែកខាងបងប្អូនខ្មែរឥស្លាម និងខាងវិហារគ្រឹស្ទសាសនាវិញ ក៏សូមអញ្ជើញហូបនំបញ្ចុកទាំងអស់គ្នា។ ការហូបនំបញ្ចុក នៅថ្ងៃទី៩ មិថុនា ខាងមុខនេះ គឺបង្ហាញពីសាមគ្គីជាតិ និងឯកភាពជាតិ។ សូមកុំលាបពណ៌ដាក់គ្នា ជាពិសេសនំបញ្ចុប គឺជាអាហារអត្តសញ្ញាណជាតិរបស់យើង។ សម្ដេចតេជោ ក៏បានបញ្ជាក់ផងដែរថា កុំរង់ចាំដល់ថ្ងៃទី០៩ មិថុនា បើឃ្លានថ្ងៃនេះ គឺសូមហូបថ្ងៃនេះតែម្តងទៅ ហើយថ្ងៃ០៩ មិថុនា យើងហូបជុំគ្នាម្ដងទៀត។

សម្តេចតេជោ ហ៊ុន សែន ក៏បានអរគុណទុកជាមុន ដល់ម្ចាស់ផ្ទះជួលកម្មករ និងរោងចក្រសហគ្រាសនានា ដែលនឹងរៀបចំនំបញ្ចុកសម្រាប់ បងប្អូនកូនក្មួយកម្មករ កម្មការិនី ហូបជុំគ្នាមួយពេល អោយបានសប្បាយ នៅថ្ងៃទី ៩ មិថុនា នេះ ដែលបង្ហាញពីសេចក្តីស្រឡាញ់ និងសាមគ្គីភាព រវាងម្ចាស់ផ្ទះជួល និង កម្មករ កម្មការិនី និងជាមួយម្ចាស់រោងចក្រសហគ្រាសផងដែរ។

សម្តេចតេជោនាយករដ្ឋមន្រ្តី បានបញ្ជាក់ផងដែរថា ការញាំនំបញ្ចុកជុំគ្នា នៅថ្ងៃទី ៩ មិថុនា ខាងមុខនេះ គឺមិនមែនជាជំហានឆ្ពោះ ទៅរកការចរចារ នយោបាយអ្វីឡើយ ប៉ុន្តែគឺជារឿងទទួលទាន នំបញ្ចុករួមគ្នា ដើម្បីពង្រឹងសាមគ្គីភាព មិត្តភាព និងឯកភាពខ្មែរតែប៉ុណ្ណោះ ដោយមិនរើសអើងបក្សនយោបាយណាមួយឡើយ គឺយើងអាចហូបរួមគ្នា៕

ភ្នំពេញ ៖ គណៈរដ្ឋមន្ត្រី នៅព្រឹកថ្ងៃសុក្រ ទី៧ ខែមិថុនា នេះ បានបើកកិច្ចប្រជុំពេញអង្គ ដោយលើកយករបៀបវារៈសំខាន់ចំនួន៣ មកពិភាក្សា និងអនុម័ត ក្រោមអធិបតីភាពសម្តេចតេជោ ហ៊ុន សែន ។ កិច្ចប្រជុំនេះ បានអនុម័តសេចក្តីព្រាងគោលនយោបាយជាតិ ស្តីពីការសិក្សាពេញមួយជីវិត ដើម្បីដាក់ជូនរដ្ឋសភាពិនិត្យ និងអនុម័ត។ គោលនយោបាយនេះ បានចងក្រងឡើងស្របតាមតម្រូវការសង្គម និងនិន្នាការវិវត្តរបស់សកលលោក ពិសេសបរិបទទីផ្សាការងារ។

យោងតាមសេចក្តីព្រាងគោលនយោបាយជាតិស្តីពីការសិក្សាពេញមួយជីវិត ដែល ត្រូវបានកិច្ចប្រជុំពេញអង្គគណៈរដ្ឋមន្ត្រីធ្វើការអនុម័តនៅព្រឹកថ្ងៃសុក្រនេះ គឺមានគោលដៅ ក្នុងការផ្ដល់ឱកាស និងគាំទ្រអោយប្រជាជនគ្រប់រូបទទួលបានការសិក្សាគ្រប់រូបភាព និងប្រើប្រាស់ចំណេះដឺងតាមជំនាញដែលទទួលបាន ដើម្បីបង្កើតប្រសិទ្ធភាព គុណភាព ផលិតភាពការងារ និងប្រាក់ចំណូល ស្របតាមយុគ្គសម័យ បច្ចេកវិទ្យាគមនាគមន៏និងព័ត៌មាន និងសង្គមពុទ្ធិ”។

គោលនយោបាយនេះ ក៏នឹងជួយដល់កិច្ចដំណើរការអភិវឌ្ឍប្រជាជនកម្ពុជាគ្រប់រូបអោយមានវិជ្ជាសម្បទា បំណិនសម្បទា កាយសម្បទា និងគុណសម្បទា ដើម្បីរួមចំណែកបង្កើតសេដ្ឋកិច្ច និងលើកកម្ពស់សុខដុមនីយកម្មជីវិតបុគ្គលគ្រួសារ និងសង្គម តាមរយៈការផ្ដល់ឱកាសសិក្សាពេញមួយជីវិត គ្រប់ពេលវេលា គ្រប់ទីកន្លែង និងគ្រប់មធ្យោបាយ”។ នេះបើតាមអ្នកនាំពាក្យរាជរដ្ឋាភិបាល ឯ.ឧ ផៃ ស៊ីផាន បញ្ជាក់នៅលើផេកហ្វេសប៊ុកផ្លូវការ។

ជាការកត់សំគាល់ ប្រព័ន្ធអប់រំកម្ពុជាមានការរីកចម្រើនខាងបរិមណគូរជាទីមោទនៈជាពិសេស នៅកម្រិតបឋមសិក្សា។ ទោះបីជាយ៉ាងនេះក្តី បញ្ហាសិស្សបោះបង់ការសិក្សា និងគុណភាពសិក្សានៅតែជាក្តីកង្វល់នៅឡើយ។ ជាក់ស្តែង អត្រាពិតនៃការសិក្សានៅបឋមសិក្សាមានប្រមាណ៩៧% នៅទសវត្សរ៍ចុងក្រោយនេះ។

ប៉ុន្តែសិស្សដែលអាចបញ្ចប់ការសិក្សានៅបឋមសិក្សាមានប្រមាណ៨០% បញ្ចប់មធ្យមសិក្សាបឋមភូមិមានប្រមាណ៤០% និងមធ្យមសិក្សាទុតិយភូមិមានប្រមាណ២០% ។ បើផ្អែកលើការវាយតម្លៃថ្នាក់ជាតិ លើមុខវិជ្ជាភាសាខែ្មរ និងគណិតវិទ្យា បានបង្ហាញផងដែរថា សិស្សស្ទើរតែពាក់កណ្តាលដែលបានចូលរួមក្នុងការវាយតម្លៃនៅថ្នាក់ទី៣ ទី៦ ទី៨ មិនទទួលបានចំណេះដឹងដូចការរំពឹងទុកនោះទេ ។

ដោយសារមានការខិតខំពីគ្រប់ភាគីតាមរយៈកម្មវិធីអប់រំក្នុងប្រព័ន្ធ ក្រៅប្រព័ន្ធ និងមិនផ្លូវការ អត្រាអក្ខរកម្មជនពេញវ័យអាយុ១៥ឆ្នាំឡើងមាន៨០,៥% ស្រ្តីមាន៧៥,០% ក្នុងនោះអត្រាអក្ខរកម្មនៅតាមជនបទ មានត្រឹមតែ៧៦,៨% ស្រី៧០,៧% ប៉ុណ្ណោះ។ នេះបើតាមការអង្កេតស្តីពីសេដ្ឋកិច្ចសង្គមកម្ពុជា វិទ្យាស្ថានជាតិស្ថិត ក្រសួងផែនការ ២០១៦ ។

គួរបញ្ជាក់ថា គោលនយោបាយជាតិស្ដីពីការសិក្សាពេញមួយជីវិត ជាផែនការបង្ហាញផ្លូវសម្រាប់អភិវឌ្ឍន៍សង្គម និងធនធានមនុស្ស ឆ្ពោះទៅកាន់សុខសន្ដិភាពនិងការអភិវឌ្ឍប្រកបដោយចីរភាព។ ដើម្បីសម្រេចបាននូវគោលនយោបាយនេះ ទាមទារឲ្យក្រសួង ស្ថាប័ន និងភាគីពាក់ព័ន្ធគ្រប់លំដាប់ថ្នាក់មានកិច្ចសហការ និងគាំទ្រដោយយកចិត្ដទុកដាក់ខ្ពស់។ គោលនយោបាយតម្រូវឲ្យមានយន្ដការ និងបទដ្ឋានគតិយុត្ដ ដើម្បីបង្កើតក្រុមឬអង្គភាពគាំទ្រ ក្នុងការសម្របសម្រួលការងារ ការធ្វើផែនការយុទ្ធសាស្ត្រជាតិ ការផ្សព្វផ្សាយឲ្យបានទូលំទួលាយ និងការកៀរគរជំនួយពីគ្រប់មជ្ឈដ្ឋាន សំដៅលើកកម្ពស់ ការអនុវត្ដគោលនយោបាយជាតិស្ដីពីការសិក្សាពេញមួយជីវិតឲ្យមានប្រសិទ្ធភាពខ្ពស់៕

ភ្នំពេញ ៖ ក្លឹបកម្សាន្តដ៏ល្បីមួយកន្លែងយីហោ លុច្សសារី ស្ថិតក្ន្ងងសង្កាត់បឹងរាំង ក្នុងខណ្ឌដូនពេញ ត្រូវនានសមត្ថកិច្ចឆ្មក់ចូលឆែកឆេររកឃើញថ្នាំញៀនមួយចំនួនធំ និងបានឃាត់ខ្លួនអ្នកញៀនថ្នាំ ក្លែមតន្ត្រីភ្លើងពណ៌៤២០នាក់  ដឹកបញ្ជូនយកទៅសាកសួរ និងពិនិត្យស្រាវជ្រាវរកមេខ្លោងពាក់ព័ន្ធនឹងអំពើជួញដូរគ្រឿងញៀន។

លោកឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការរាជធានីភ្នំពេញ បានដឹកនាំកម្លាំងនគរបាលស្នងការដ្ឋាននគរបាលរាជធានីភ្នំពេញ បើកប្រតិបត្តិការចុះឆែកឆេរក្លឹបកម្សាន្ត «លុច្សសារី»ទាំងកណ្តាលអាធ្រាត្រ រកឃើញថ្នាំញៀនមួយចំនួន និងឃាត់ខ្លួនអ្នកចូលលេងកម្សាន្តក្នុងក្លឹប ៤២០នាក់។

ប្រតិបត្តិការចុះឆែកឆេរក្លឹបកម្សាន្តខាងលើនេះ បានធ្វើឡើងនៅវេលាម៉ោងប្រមាណ ៤រំលងអាធ្រាត្រឈានចូលថ្ងៃទី៨ ខែមិថុនា ឆ្នាំ២០១៩ ក្លឹបកម្សាន្ត «លុច្សសារី» ស្ថិតនៅតាមបណ្ដោយផ្លូវលេខ២១៤ កែងផ្លូវ៦៣ សង្កាត់បឹងរាំង ខណ្ឌដូនពេញ។

ក្រោយការឆែកឆេរកម្លាំងសមត្ថកិច្ចបានបិទក្លឹបជាបណ្តោះអាសន្ន និងបាននាំអ្នកលេងកម្សាន្តប្រមាណ ៤២០នាក់ទៅស្នងការដ្ឋាននគរបាលរាជធានីភ្នំពេញ។ បើតាមប្រភពពីសមត្ថកិច្ចអ្នកលេងកម្សាន្តក្នុងក្លឹបនេះភាគច្រេីនវ័យក្មេងៗ ជាជនជាតិចិន  វៀតណាម និងខ្មែរ។

ក្លឹបកម្សាន្ត «លុច្សសារី» ជាក្លឹបកម្សាន្តមួយ ក្នុងចំណោមក្លឹបកម្សាន្តជាច្រើននៅក្នុងរាជធានីភ្នំពេញ ដែលត្រូវបានបិទជាបន្តបន្ទាប់ក្រោយពីសមត្ថកិច្ចបានចូលឆែកឆេររកឃើញមានការជួញដូរ និងប្រើប្រាស់គ្រឿងញៀន ចាប់តាំងពីលោក ស ថេត ចូលកាន់តំណែងជាស្នងការនគរបាលរាជធានីភ្នំពេញ កាលពីចុងឆ្នាំ២០១៨។

សូមបញ្ជាក់ថា ប្រតិបត្តិការចុះឆែកឆេរក្លឹបកម្សាន្ត «លុច្សសារី» បានធ្វើឡើងតែប៉ុន្មានថ្ងៃប៉ុណ្ណោះ បន្ទាប់ពីមានករណីបុរសម្នាក់ចូលទៅលេងក្នុងក្លឹបនេះ ហើយមានការផ្ទុះអាវុធបណ្តាលឱ្យនារីម្នាក់រងរបួសភ្លៅ៕ ដោយ ៖ សុផល

ភ្នំពេញ ៖ នារីក្លាហានម្នាក់ បានទិញកាំភ្លើងខ្លីមួយដើមមកពីប្រទេសថៃ ចូលទៅបាញ់ចំនួន២គ្រាប់ នៅក្នុងវត្តសារ៉ាវ័ន្ត មុខកុដិលេខ២៣ ដែលមានព្រះសង្ឃព្រះនាម ពិសី គង់នៅ ដើម្បីបន្ធូរកំហឹងគំនុំ បង្កការភ្ញាក់ផ្អើលដល់សមត្ថកិច្ចមួយខណ្ឌដូនពេញចេញជួយអន្តរាគមន៍។

ហេតុការណ៍ផ្ទុះអាវុធនេះ បានកើតឡើងនៅវេលាម៉ោង ០៦និង១៥នាទី នៅក្នុងវត្តសារ៉ាវ័ន្ត ត្រង់ចំណុចមុខកុដលេខ ២៣ ស្ថិតក្នុងសង្កាត់ជ័យជំនះ ខណ្ឌដូនពេញ។

តាមប្រភពព័ត៍មាននៅកន្លែងកើតហេតុនិងតាមការសាកសួរពីសមត្ថកិច្ចបានឲ្យដឹងថា នៅមុនពេលកើតហេតុត្រូវបានគេឃើញមាននារីក្លាហានម្នាក់វ័យប្រម៉ាណជា៣០ឆ្នាំបានមកឈរពីមុខកុដិព្រះសង្ឃលេខ៣និងបានធ្វើសកម្មភាពយកកាំភ្លើងខ្លីមួយដើមដែលទើបទិញពីប្រទេសថៃមកបាញ់ចំនួន០២គ្រាប់សង្ស័យមានគំនុំជាមួយនឹងព្រះសង្ឃបង្កជាការភ្ញាក់ផ្អើលដល់សមត្ថកិច្ចជួយអន្តរាគមន៍បានទាន់ពេលវេលាយកមកសួរនាំនៅអធិការដ្ឋានខណ្ឌដូនពេញ។

តាមប្រភពបានបង្ហើបឲ្យដឹងទៀតថា កន្លងមកប្តីរបស់នារីក្លាហានបានធ្លាប់ទៅរកព្រះសង្ឃឲ្យធ្វើមន្តអាគមដាក់អោយប្រពន្ធស្រឡាញ់កាន់តែខ្លាំង លុះដល់ចាប់ពីរកព្រះសង្ឃឲ្យជួយដាក់មន្តអាគមរួចមក ប្តីរបស់នាងចេះតែឈឺមិនដែលលស់ថ្ងៃសោះ។ ផ្តើមចេញពីករណីនេះ ទើបនារីក្លាហានទៅប្រទេសថៃ ទិញបានកាំភ្លើងមួយដើមម៉ាក ( ឡុកអូទ្រីស មីនី)ក្នុងតម្លៃ១៥០ដុល្លារសហរដ្ឋអាមេរិក មកធ្វើសកម្មភាពបាញ់ចំនួន២គ្រាប់ ដើម្បីបន្ធូរកំហឹងបង្កការភ្ញាក់ផ្អើលដល់ព្រះសង្ឃ និងប្រជាពលរដ្ឋត្រូវសមត្ថកិច្ច ចេញជួយអន្តរាគមន៍ និងឃាត់ខ្លួនយកទៅសាកសួរតែម្តង។

បច្ចុប្បន្ននារីក្លាហានខាងលើ ត្រូវបានសមត្ថកិច្ចនៃអធិការដ្ឋានខណ្ឌដូនពេញ កំពុងធ្វើការសាកសួរបន្ថែម តែមិនទាន់ដឹងថា នឹងត្រូវចាត់ការតាមវិធីណានៅឡើយទេ ចំណែកខាងព្រះសង្ឃដែលរងការចោទថា ធ្វើស្នេហ៍នាំឲ្យប្តីស្ត្រីខាងលើធ្លាក់ខ្លួនឈឺ ក៏មិនទាន់ចេញមកបកស្រាយបែបណានៅឡើយដែរ៕

ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជាបានបង្ហោះសារ ទាំងពាក់កណ្តាលយប់នៅថ្ងៃទី៦ ខែមិថុនា ឆ្នាំ២០១៩ នេះ ជាពីរភាសា គឺភាសាខ្មែរ និងភាសាអង់គ្លេស លើទំព័រហ្វេសប៊ុកផ្លូវការ ដែលជាប្រតិកម្មតបតមួយទៅលោក លី ស៊ានឡុង នាយករដ្ឋមន្ត្រីសិង្ហបុរី ដែលបានលើកឡើងថា «វៀតណាមឈ្លានពានកម្ពុជា ក្នុងអំឡុងទសវត្សរ៍៨០ …ហើយពួកខ្លួន អាស៊ាន៥ ប្រទេសបានរួមគ្នាប្រឆាំងការឈ្លានពានរបស់វៀតណាម មកលើកម្ពុជា និងប្រឆាំងរដ្ឋា ភិបាលកម្ពុជា ដែលបានជំនួសខ្មែរក្រហម»។

នៅក្នុងសាររបស់សម្តេចបានចោទប្រកាន់មេដឹកនាំសិង្ហបុរី ថាមេដឹកនាំសិង្ហបុរីបានចូលរួមចំណែកសម្លាប់ប្រជាជនកម្ពុជាយ៉ាងពិត ប្រាកដ ព្រមទាំងបានលើកសំណួរទៅកាន់នាយករដ្ឋមន្ត្រី សិង្ហបុរីថាតើលោកចាត់ទុកការកាត់ទោសមេដឹកនាំខ្មែរក្រហមកន្លងទៅនេះ ជាការត្រឹមត្រូវដែរឬទេ? ។

នៅក្នុងសារលិខិតនៅតាមរយៈហ្វេសបុកនេះ សម្តេចបានសរសេរថា៖«ខ្ញុំពិតជាមានការសោក ស្តាយខ្លាំងណាស់ដែលឯកឧត្តម នាយករដ្ឋមន្ត្រី សិង្ហបុរី លី ស៊ានឡុង បានបង្ហោះតាមទំព័រហ្វេសប៊ុកកាលពីថ្ងៃទី ៣១ខែឧសភាកន្លងទៅ ដោយលើកឡើងថា ” ពេលដែលគាត់(ឧត្តមសេនីយ៍ព្រេម)ធ្វើជានាយករដ្ឋមន្ត្រី (ថៃ)គាប់ជួននឹងពេលដែលសមាជិក ASEAN(កាលនោះគ្នាយើង ៥ប្រទេស) រួមគ្នាប្រឆាំងការឈ្លានពានរបស់វៀតណាមមកលើកម្ពុជានិង ប្រឆាំងរដ្ឋាភិបាលកម្ពុជាដែលបានជំនួសខ្មែរក្រហម។

…”ការលើកឡើងនេះ បង្ហាញថា កាលនោះសិង្ហបុរី បានគាំទ្ររបបប្រល័យពូជសាសន៍និងចង់ឲ្យរបបប្រល័យពូជសាសន៍វិល ត្រឡប់មកកម្ពុជាវិញដែរ។

សិង្ហបុរីបានធ្វើជាម្ចាស់ផ្ទះរៀបចំការប្រជុំដែលនាំដល់ ការបង្កើតរដ្ឋាភិបាលចម្រុះត្រីភាគីកម្ពុជា ប្រជាធិបតេយ្យនិងអូសបន្លាយ សង្គ្រាមនៅកម្ពុជា និងទុក្ខវេទនារបស់ប្រជាជនកម្ពុជាជាង១0ឆ្នាំថែមទៀត ហើយដែលស្មើនឹងការប្រឆាំងនឹងការរស់ឡើងវិញរបស់ប្រជាជនកម្ពុជាផងដែរ ។ការ លើកឡើងនេះក៏ជាការប្រមាថដល់ពលិកម្មសាច់ស្រស់ឈាមស្រស់របស់ កងទ័ពស្ម័គ្រចិត្តវៀត ណាម ដែលបានជួយរំដោះកម្ពុជាឲ្យរួចផុតពីរបប ប្រល័យពូជសាសន៍នោះ។

ការលើកឡើងរបស់ឯកឧត្តម លី ស៊ានឡុង នាពេលនេះក៏បានបង្ហាញប្រជាជនសាំងកាពួនិងពិភព លោកថាមេដឹកនាំសិង្ហ បុរីនាពេលនោះបានរួមចំណែកសម្លាប់ប្រជាជនកម្ពុជាយ៉ាងពិតប្រាកដ។

ចុងក្រោយនេះខ្ញុំចង់សួរ ឯ.ឧ នាយករដ្ឋមន្ត្រី លី ស៊ានឡុង ថា តើគាត់ចាត់ទុកការកាត់ទោសមេ ដឹកនាំខ្មែរក្រហមកន្លងទៅនេះថាជាការ ត្រឹមត្រូវដែរឬអត់ ?»។

លោកនាយករដ្ឋមន្ត្រី លី ស៊ានឡុង កាលពីថ្ងៃទី ៣១ ឧសភាបានសរសេរថា៖«ក្នុងអំឡុងពេល ដែលលោក ព្រេម ទីនស៊ូឡានុនដា ធ្វើជានាយករដ្ឋមន្ត្រីថៃនោះ វាក៏ជាពេលដែលសមាជិកអាស៊ានទាំង៥នៅពេលនោះបានប្រឆាំងនឹងការឈ្លានពាន របស់វៀតណាមមកលើកម្ពុជានិងរដ្ឋាភិបាលកម្ពុជា (ពេលនោះ) ដែលមកជំនួសរបបខ្មែរក្រហម»។ លោក លី ស៊ានឡុង សរសេរបន្តទៀតថា៖«ប្រទេសថៃបានប្រឈមនឹងកងទ័ពវៀតណាមនៅតាមបណ្តោយ ព្រំដែនរបស់ខ្លួនជាមួយកម្ពុជា។ លោកឧត្តមសេនីយ៍ ព្រេម បានសម្រេចចិត្តយ៉ាងមុតមាំដោយមិនទទួលយកអ្វីដែលកំពុងកើតឡើងនោះ ហើយបានធ្វើការជាមួយដៃគូក្នុងអាស៊ានដើម្បីប្រឆាំងវៀតណាមនៅតាម វេទិកាអន្តរជាតិនានា»។

ថ្លែងក្នុងប្រជុំគណៈរដ្ឋមន្រ្តីមួយនាព្រឹកថ្ងៃទី៧ ខែមិថុនា ឆ្នាំ២០១៩ នេះ សម្តេចនាយករដ្ឋមន្រ្តី ហ៊ុន សែន បានមានប្រសាសន៍ រំលឹក និងប្រដៅដល់នាយករដ្ឋមន្រ្តីសិង្ហបុរី លី ស៊ានឡុង ថា«យើង គួរថ្នាក់ថ្នមទំនាក់ទំនងរវាងរដ្ឋាភិបាល និងរដ្ឋាភិបាល ក៏ដូចជាប្រជាជននិងប្រជាជន នៅក្នុងប្រជា ជាតិអាស៊ាន»។ ជាមួយគ្នានេះ សម្តេចតេជោ ហ៊ុន សែន ហៅការលើកឡើងរបស់នាយករដ្ឋមន្រ្តីសិង្ហបុរី ជាការប្រមាថដល់កងទ័ពវៀតណាម និងប្រឆាំងការរស់រានរបស់ប្រជាជនខ្មែរក្រោយ ការ ដួលរលំនៃរបបខ្មែរក្រហមផងដែរ៕

ភ្នំពេញ ៖ ក្រសួងការបរទេសកម្ពុជា នៅថ្ងៃទី៦ ខែមិថុនា ឆ្នាំ២០១៩ នេះ បានចេញសេចក្តីថ្លែងការណ៍មួយ ដោយបង្ហាញពីការសោកស្តាយយ៉ាងខ្លាំង ចំពោះ នាយករដ្ឋមន្ត្រី សឹង្ហបុរី ដែលបានបង្ហោះនូវសាររំលែកទុក្ខ តាមទំព័រហ្វេសប៊ុកផ្ទាល់ខ្លួន ដោយបានរំលឹកណីការគាំទ្ររបបប្រល័យពូជសាសន៍ខ្មែរក្រហម។

នៅក្នុងខ្លឹមសារនៃសេចក្តីថ្លែងការណ៍នោះ បានសរសេរថា អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ មានការសោកស្តាយយ៉ាងខ្លាំង ដែលលោកនាយករដ្ឋមន្ត្រីសឹង្ហបុរី លី ស៊ានឡុង បានបង្ហោះតាមទំព័រ ហ្វេសប៊ុក របស់លោក កាលពីថ្ងៃទី 31 ខែ ឧសភាកន្លងទៅ នូវសាររំលែកទុក្ខ ចំពោះមរណភាព លោកឧត្តមសេនិយ៍ ព្រេម ទិនស៊ូឡាណន្ត អតីតនាយករដ្ឋមន្ត្រីថៃ ដោយលើកឡើងថា ៖” ពេលដែលគាត់ (ឧត្តមសេនិយ៏ ព្រេម) ធ្វើជានាយករដ្ឋមន្ត្រី គាប់ជួននឹងពេលដែលសមាជិក ASEAN (កាលនោះគ្នា យើង 5 ប្រទេស) រួមគ្នាប្រឆាំងការឈ្លានពានរបស់វៀតណាមមកលើកម្ពុជា និង ប្រឆាំងរដ្ឋាភិបាលកម្ពុជាដែលបានជំនួសខ្មែរក្រហម…”។

ការលើកឡើងក្នុងសារនេះ បានរំលឹកយ៉ាងច្បាស់ថា កាលពេលនោះសឹង្ហបុរី បានគាំទ្ររបបប្រល័យពូជសាសន៏ និងចង់ឲ្យរបបប្រល័យពូជសាសន៏វិលត្រឡប់មកកម្ពុជាវិញ។

សឹង្ហបុរីបានធ្វើជាម្ចាស់ផ្ទះរៀបចំកិច្ចប្រជុំ ដែលនាំដល់ការបង្កើតរដ្ឋាភិបាលចំរុះត្រីភាគី កម្ពុជាប្រជាធិបតេយ្យ និង បានធ្វើជាច្រកផ្គត់ផ្គង់សំភារះយោធា ដល់កំលាំងកម្ពុជាប្រជាធិបតេយ្យ អូសបន្លាយសង្គ្រាមនៅកម្ពុជា អូសបន្លាយទុក្ខវេទនា និងនាំដល់ការបាត់បង់ជីវិតរបស់ប្រជាជនកម្ពុជា ១០ ឆ្នាំថែមទៀត ហើយដែលស្មើនឹងការប្រឆាំងនឹងការរស់ឡើងវិញ របស់ប្រជាជនកម្ពុជាផងដែរ។

ការលើកឡើងនេះពិតជាការប្រមាថដល់ពលិកម្មសាច់ស្រស់ឈាមស្រស់ របស់កងទ័ពស្ម័គ្រចិត្តវៀតណាម ដែលបានជួយរំដោះកម្ពុជា ឲ្យរួចផុតពីរបបប្រល័យពូជសាសន៏នោះ៕

កំពង់ចាម ៖ មេប៉ុស្តិ៍រដ្ឋបាលនគរបាលឃុំពាមប្រធ្នោះ ស្រុកកោះសួទិន ខេត្តកំពង់ចាម លោក ហេង ប៊ុនថន ដែលបានចុះទៅរារាំងសិទ្ធិសេរីភាពរបស់ប្រជាជន ក្នុងការហូបនំបញ្ចុកនោះ ត្រូវបានដកចេញពីតំណែងហើយ។

នេះបើតាមការអះអាងរបស់ លោក គួច ចំរើន អភិបាលខេត្តកំពង់ចាម ដែលបង្ហោះនៅលើទំព័រ Facebook នាយប់ថ្ងៃទី៦ ខែមិថុនា ឆ្នាំ២០១៩នេះ។

លោក គួច ចំរើន បានបញ្ជាក់យ៉ាងដូច្នេះថា៖ «ខ្ញុំបាទ គួច ចំរើន អភិបាលខេត្តកំពង់ចាម បន្ទាប់ពីបានឃើញវីដេអូឃ្លិបនេះ ខ្ញុំពិតជាមានការសោកស្តាយជាខ្លាំង និងសូមអភ័យទោស ចំពោះសកម្មភាពរបស់ លោក ហេង ប៊ុនថន មេប៉ុស្តិ៍រដ្ឋបាល ឃុំពាមប្រធ្នោះ ដែលបានចុះទៅរារាំងសិទ្ធិសេរីភាពរបស់ប្រជាជន ក្នុងការហូបនុំបញ្ចុក។ គណ:បញ្ជាការឯកភាពខេត្ត បានសម្រេចដកតួនាទី លោក ហេង ប៊ុនថន មកកាន់ស្នងការនគរបាលខេត្ត»។

ក្រៅពីបង្ហាញសារអំពីការដកតួនាទីមេប៉ុស្តិ៍ខាងលើ លោកអភិបាលខេត្ត បានអញ្ជើញបងប្អូនប្រជាជនចូលរួមហូបនំបញ្ចុកសាមគ្គីភាព និងឯកភាពជាតិខ្មែរ ដោយក្តីរីករាយ នៅថ្ងៃអាទិត្យខាងមុខនេះ និងថ្ងៃបន្តបន្តាប់ទៀត៕ ដោយ ៖ សុផល

ភ្នំពេញ ៖ នៅថ្ងៃសុក្រ ទី៧ ខែមិថុនា ឆ្នាំ២០១៩  វេលាម៉ោង ៨:៣០នាទី ព្រឹក គណៈរដ្ឋមន្រ្តីនឹងបើកកិច្ចប្រជុំពេញអង្គគណៈរដ្ឋមន្រ្តី ក្រោមអធិបតីភាពសម្តេចអគ្គមហាសេនាបតី តេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា នៅវិមានសន្តិភាព។
កិច្ចប្រជុំនេះ នឹងពិភាក្សា ឆ្លងលើរបៀបវារៈមួយចំនួនដូចខាងក្រោម ៖

១. សេចក្តីព្រាងផែនការយុទ្ធសាស្រ្តអភិវឌ្ឍន៍ជាតិ (ផ.យ.អ.ជ)២០១៩-២០២៣។
២. សេចក្តីព្រាងគោលនយោបាយជាតិស្តីពីការសិក្សាពេញមួយជីវិត។

៣.បញ្ហាផ្សេងៗ សំណើសុំការយល់ព្រមពីគណៈរដ្ឋមន្រ្តីដើម្បីសុំផ្ដល់សច្ចាប័នពីស្ថាប័ននីតិប្បញ្ញត្តិលើ៖

– កិច្ចព្រមព្រៀងស្តីពីវិធានការរដ្ឋម្ចាស់កំពង់ផែដើម្បីបង្ការ ទប់ស្កាត់ និងលុបបំបាត់ការនេសាទខុសច្បាប់ គ្មានរបាយការណ៍ និងគ្មានការអនុញ្ញាត​៕

ភ្នំពេញ ៖ ខេត្តគោលដៅចំនួន៥ នៅកម្ពុជា ត្រូវបានធនាគារពិភពលោក(WB) តាមរយៈគម្រោង ស្តីពីការបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ចជំហាន២ (LASED II) ដែលកំពុងអនុវត្តន៍គួរជាទីមោទនៈ និងបន្តជំរុញទៅតាមគម្រោងដែលនឹងត្រូវបញ្ចប់នៅឆ្នាំ២០២២។

យោងតាម សង្គហ្វេសប៊ុកផ្លូវការរបស់ក្រសួងកសិកម្ម បានឲ្យដឹងថា គម្រោងរបស់ WB នេះ បានធ្វើឡើងក្នុងជំនួប ពិភាក្សាការរវាងលោក វេង សាខុន រដ្ឋមន្រ្តីក្រសួងកសិកម្ម និងលោក Nathan M. Belete នាយកប្រតិបត្តិនៃធនាគារពិភពលោក WB ប្រចាំតំបន់អាស៊ីបូព៌ា នៅថ្ងៃទី៦ ខែមិថុនា ឆ្នាំ២០១៩ ដោយលើកយកខេត្តចំនួន៥ ជាគោលដៅ ចំនួន៥នោះ រួមមាន ៖ ខេត្តត្បូងឃ្មុំ ក្រចេះ កំពង់ឆ្នាំ កំពង់ស្ពឺ និងកំពង់ធំ ស្តីពីការបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ចជំហាន២ (LASED II) យកមកអនុវត្តន៍។

ប្រភបដដែល បញ្ជាក់ថា នាយកប្រតិបត្តិនៃធនាគារពិភពលោក បានថ្លែងថា គម្រោង នេះ ។ គម្រោង LASED II នេះ បានជួយគាំទ្រដល់គម្រោងសម្បទានដី សង្គមកិច្ចរបស់រាជរដ្ឋាភិបាលក្នុងការចែកដីឲ្យកសិករដែគ្មាន ឬមានដីតិចតួច ដើម្បីប្រកបរបបកសិកម្មចិញ្ចឹមគ្រួសារ ប្រយោជន៍ដលម្បីជួយលើកកម្ពស់ជីវភាពរបស់គ្រួសារក្រីក្រ និងងាយរងគ្រោះ។

លោកបញ្ជាក់ថា “គម្រោងបានអនុវត្តលើខេត្តគោលដៅចំនួន ៥ មានខេត្តត្បូងឃ្មុំ ក្រចេះ កំពង់ឆ្នាំង កំពង់ស្ពឺ និងកំពង់ធំ ដោយបានផ្តល់ប្រយោជន៍ជូន ៤.៤៤១ គ្រួសារ តាមរយៈការរៀបចំប្រព័ន្ធធារាសាស្រ្តខ្នាតតូច និងផ្តល់សេវាគាំទ្របច្ចេកទេស កសិកម្មមូលដ្ឋានដើម្បីកែលម្អ កម្រិតជីវភាពតាម រយៈការបង្កើនប្រាក់ចំណូល”។

លោកបន្តថា គម្រោងមានរយៈពេល ៥ឆ្នាំ ចាប់ពីឆ្នាំ២០១៧-២០២២ ដែលត្រូវចំណាយថវិកាសរុប ២៥លានដុល្លារ។ បច្ចុប្បន្នដោយមាន កិច្ចសហការយ៉ាងល្អប្រសើរ ពីគ្រប់ភាគីពាក់ព័ន្ធ ជាពិសេសក្រសួងកសិកម្ម គម្រោងបានកំពុងអនុវត្តទៅតាមកម្មវិធី ដូចបានគ្រោងទុកគួរឲ្យកត់សម្គាល់៕

ខេត្តកំពង់ចាម ៖ នៅព្រឹកថ្ងៃទី៦ ខែមិថុនា ឆ្នាំ២០១៩ នេះ បន្ទាប់ពីទទួលបានព័ត៌មានអំពីគ្រោះមហន្តរាយធម្មជាតិខ្យល់កន្រ្តាក់ ដែលធ្វើឲ្យផ្ទះសំបែងរបស់បងប្អូនប្រជាពលរដ្ឋចំនួន ១៩គ្រួសារ នៅក្នុងភូមិខ្នា ឃុំស្ដើងជ័យ ស្រុកជើងព្រៃ រងការបំផ្លិចបំផ្លាញ ធ្វើឲ្យរលំ និងប៉ើងដំបូលផ្ទះ លោកបណ្ឌិត ម៉ា ឈឿន តំណាងរាស្រ្តមណ្ឌលកំពង់ចាម សមាជិកគណៈកម្មាធិការកណ្តាល និងជាប្រធានក្រុមការងារថ្នាក់កណ្តាលគណបក្សប្រជាជនកម្ពុជា ចុះជួយស្រុកជើងព្រៃ ខេត្តកំពង់ចាម បានអញ្ជើញនាំយកនូវអំណោយសង្រ្គោះបន្ទាន់ ជាស្បៀង និងថវិកា ទៅប្រគល់ជូនបងប្អូនប្រជាពលរដ្ឋរងគ្រោះទាំង ១៩គ្រួសារខាងលើ ដើម្បីចូលរួមជួយដោះស្រាយការលំបាក។

ស្ថិតក្នុងឱកាសនោះ លោក ម៉ា ឈឿន បានចូលរួមសោកស្តាយ ជាមួយបងប្អូនប្រជាពលរដ្ឋរងគ្រោះទាំង ១៩គ្រួសារ និងបាននាំនូវការផ្តាំផ្ញើរសាកសួរសុខទុក្ខ និងការចូលរួមសោកស្តាយពីសំណាក់សម្តេចតេជោ ហ៊ុន សែន នាយករដ្ឋមន្រ្តី និងជាប្រធានគណបក្សប្រជាជនកម្ពុជា ជូនចំពោះបងប្អូនប្រជាពលរដ្ឋរងគ្រោះទាំងអស់។

ទន្ទឹមនេះ ឯកឧត្តម តំណាងរាស្រ្ត ម៉ា ឈឿន បានជម្រាបជូនបងប្អូនប្រជាពលរដ្ឋថា ដោយសារ ឆ្នាំនេះ ប្រទេសកម្ពុជា បានទទួលរងនូវឥទ្ធិពល អ៊ែល នីណូ ទើបធ្វើឲ្យស្ថានភាពអាកាសធាតុ មានការប្រែប្រូលខ្លាំង ដោយមានទាំងគ្រោះរាំងស្ងូត ហើយនៅពេលមានភ្លៀវធ្លាក់ តែងតែកើតមាននូវបាតុភូតផ្គររន្ទះនិងខ្យល់កន្រ្តាក់ដែលរហូតមកដល់ពេលនេះ បានបំផ្លិចបំផ្លាញ ផ្ទះសំបែងរបស់បងប្អូនប្រជាពលរដ្ឋនៅតាមរាជធានី-ខេត្តមួយចំនួន អស់រាប់ពាន់ខ្នងផ្ទះ។ ក្នុងន័យនេះ ដោយយោងទៅលើស្ថានភាពអាកាសធាតុដូចនេះ លោក ម៉ា ឈឿន បានយកឱកាសនោះ អំពាវនាវដល់បងប្អូនប្រជាពលរដ្ឋទាំងអស់ ត្រូវមាន ការប្រុងប្រយ័ត្នខ្ពស់ចំពោះបាតុភូទផ្គរ រន្ទះ និងខ្យល់កន្រ្តាក់ នៅពេលដែលមេឃភ្លៀងម្តងៗ ដើម្បីជៀងវាសនូវការទទួលរងនូវគ្រោះថ្នាក់ផ្សេងៗ កើតឡើងចំពោះគ្រួសារជាយថាហេតុ។

ដោយឡែកចំពោះអាជ្ញាធរ ដែនដី និងកងកម្លាំងប្រដាប់អាវុធទាំងអស់ នៃស្រុកជើងព្រៃ ត្រូវយកចិត្តទុកដាក់ខ្ពស់ពីសុខទុក្ខរបស់ប្រជាពលរដ្ឋ ដែលរងគ្រោះដោយគ្រោះមហន្តរាយធម្មជាតិផ្សេងៗ ពិសេសត្រូវចុះជួយសង្រ្គោះប្រជាពលរដ្ឋឲ្យទាន់ពេលវេលា តាមលទ្ធភាពរបស់ខ្លូន ដោយមិនត្រូវទុកប្រជាពលរដ្ឋរងគ្រោះចោល ដោយមិនបានគិតគួរនោះឡើយ។ ក្រៅពីនេះ ក៏ត្រូវបន្តយកចិត្តទុកដាក់ខ្ពស់ ចំពោះសុខសុវត្ថិភាពរបស់ប្រជាពលរដ្ឋនៅក្នុងមូលដ្ឋានរបស់ខ្លូន តាមរយៈការអនុវត្តន៍ដោយយកចិត្តទុកដាក់ខ្ពស់ និងឲ្យមានប្រសិទ្ធភាពនូវគោលនយោបាយភូមិ-ឃុំ មានសុវត្ថិភាព ដើម្បីផ្តល់ភាពកក់ក្តៅជូនបងប្អូនប្រជាពលរដ្ឋ។

សូមជម្រាបថា បងប្អូនប្រជាពលរដ្ឋរងគ្រោះទាំង ១៩គ្រួសារខាងលើ ត្រូវបាន ឯកឧត្តម តំណាងរាស្រ្ត ម៉ា ឈឿន បានឧបត្ថម្ភក្នុងមួយគ្រួសារនូវគ្រឿងឧបភោគបរិភោគមួយចំនួន និងថវិកាចំនួន ១០ម៉ឺនរៀល។ ដោយឡែកគ្រួសារមួយ ដែលរងគ្រោះធ្ងន់ធ្ងរជាងគេ បានទទួលកៅស៊ូតង់មួយដុំ និងថវិកា ៥០ម៉ឺនរៀល ដោយ លោក ម៉ា ឈឿន បានបញ្ជាក់ថា អំណោយសង្រ្គោះបន្ទាន់នេះ គ្រាន់តែជាការចូលរួមសម្រូលការលំបាករបស់ បងប្អូនបានមួយគ្រាប៉ុណ្ណោះ ដូច្នេះ បងប្អូនប្រជាពលរដ្ឋ ត្រូវខិតខំបង្កបង្កើនផល តាមរយៈ ការដំាដំណាំ និងប្រកបរបរផ្សេងៗទៀត ដើម្បីចូលរួមលើកស្ទួយសេដ្ឋកិច្ចក្នុងគ្រួសារ។

សូមរំលឹកថា កាលពីវេលាម៉ោង ១៨ និង២០នាទី ថ្ងៃទី២ ខែមិថុនា ឆ្នាំ២០១៩ កន្លងទៅ ខ្យល់កន្ត្រាក់ បានបោកបក់យ៉ាងខ្លាំង បណ្ដាលឲ្យប៉ះពាល់លំនៅដ្ឋានរបស់ប្រជាពលរដ្ឋចំនួន ១៩ខ្នងផ្ទះ នៅភូមិខ្នា ឃុំស្ដើងជ័យ ស្រុកជើងព្រៃ រងការបំផ្លិចបំផ្លាញ់ ធ្វើឲ្យរលំនិងប៉ើងដំបូលផ្ទះ តែមិនបង្កឲ្យរបួសឆ្នាម និងប៉ះពាល់ដល់អាយុជីវិតប្រជាពលរដ្ឋណាម្នាក់នោះទេ៕ ដោយ  សុផល