កណ្តាល៖ យុវជនពីរនាក់បានស្លាប់ភ្លាមៗនៅនឹងកន្លែងកើតហេតុកាលពីម៉ោងជាង៩ ថ្ងៃទី៣ ខែតុលា ឆ្នាំ២០១៤ ដោយសារជិះម៉ូតូក្នុងល្បឿនលឿនជ្រុលទៅបុកគូទរថយន្តស្រាបៀរពីក្រោយចតស្ងៀមលើចិញ្ចើមផ្លូវស្ថិតនៅផ្លូវជាតិលេខ៤ ទល់មុខភូមិជ្រៃមង្គល ឃុំដំណាក់អម្ពិល ស្រុកអង្គស្នួល ខេត្តកណ្តាល។
ប៉ូលីសស្រុកអង្គស្នួលបានឲ្យដឹងថា មុនពេលកើតហេតុ មានម៉ូតូ១គ្រឿង ម៉ាកហុងដា សេ១២៥ ពណ៌ខ្មៅ ពាក់ស្លាកលេខភ្នំពេញ ១BH-១៣៤១ អ្នកបើកពុំត្រូវបានគេស្គាល់អត្តសញ្ញាណ និងមានអ្នករួមដំណើរម្នាក់ ឈ្មោះ បាន វ៉ាន ភេទប្រុស អាយុ៣៧ឆ្នាំ នៅភូមិរកាកោះ ឃុំរកាកោះ ស្រុកគងពិសី ខេត្តកំពង់ស្ពឺ មុខរបរកម្មករ បានបើកបរ ក្នុងទិសដៅ ពីកើតទៅលិច លុះដល់ចំណុចកើតហេតុ បានជ្រុលទៅបុក គូទរថយន្តមួយគ្រឿង ម៉ាក FUSO ពណ៌ក្រហម ពាក់ស្លាកលេខកំពង់ចាម ៣A-០២១០ ជារថយន្តដឹកស្រាបៀរ បណ្តាលឲ្យបោកផ្ទប់ទៅនឹងរថយន្ត ស្លាប់ទាំងពីរនាក់ភ្លាមៗនៅនឹង កន្លែង កើតហេតុ។ ចំណែកឯអ្នកបើកបររថយន្ត ដែលពុំត្រូវបានស្គាល់ឈ្មោះ ឃើញសភាពបែបនេះ បានរត់គេចខ្លួនបាត់តែម្តង។
ក្រោយពេលកើតហេតុ នគរបាលបានដឹកសាកសព យកទៅតម្កល់ទុក ដើម្បីរង់ចាំក្រុមគ្រួសារយកទៅធ្វើ បុណ្យតាមប្រពៃណី៕
