ខេត្តកំពត៖អង្គភាពប្រឆាំងអំពើពុករលួយ ( អ.ប.ព) កាលពីយប់ថ្ងៃទី១២ ខែកញ្ញា ឆ្នាំ២០១៤ បានចាប់ឃាត់ខ្លួនអ្នកយកព័ត៌មានពីរនាក់នៅខេត្តកំពតពីបទជម្រិតទារប្រាក់។នេះបើតាមប្រភពព័ត៌មានដែលអាចជឿទុកចិត្តបាន។
មន្ត្រីជាន់ខ្ពស់នៅខេត្តកំពតមួយរូបបានថ្លែងឲ្យដឹងថា អង្គភាព អ.ប.ព ពិតជាមានការចាប់ខ្លួន អ្នកយកព័ត៌មានចំនួន ២នាក់នៅខេត្តកំពតពីបទជម្រិតទារប្រាក់ ប្រាកដមែន ប៉ុន្តែមិនទាន់ដឹងពី ដំណើររឿងលម្អិតនៃការចាប់ខ្លួននេះទេ។
មន្ត្រីដដែលបន្តថា លោកថុល ហុកលី អ្នករាយការណ៍ព័ត៌មាន ទូរទស្សន៍ខ្មែរប៉ុស្តិ៍លេខ៩ និងលោក ស័រ ស៊ុនលី អ្នកឆ្លើយឆ្លងព័ត៌មាន ទូរទស្សន៍ហង្សមាស និងជាសហការីកាសែតកម្ពុជាថ្មី ប្រចាំខេត្តកំពត ត្រូវបានឃាត់ខ្លួនជាបន្តបន្ទាប់នៅកន្លែងពីរផ្សេងគ្នាកាលពីយប់ថ្ងៃទី១២ ខែកញ្ញា ឆ្នាំ ២០១៤ ដោយកម្លាំងសមត្ថកិច្ចមកពីរាជធានីភ្នំពេញ។ មិនទាន់អាចដឹងបានពីបទសង្ស័យករណីអ្វីឡើយ ដោយ សារការឃាត់ខ្លួននោះមិនមែនធ្វើឡើងពីសំណាក់សមត្ថកិច្ចក្នុងខេត្តសាមីនេះ។
តាមប្រភពក្រៅផ្លូវការបានឱ្យដឹងថា ខណៈពេលកំពុងអង្គុយហូបចុកក្នុងភោជនីយដ្ឋាន ហេងរស្មី ក្នុងទឹកដីភូមិទ្វីខាងជើង សង្កាត់អណ្តូងខ្មែរ ក្រុងកំពត នាអំឡុងម៉ោងប្រហែលជាង ៨យប់ ថ្ងៃទី១២ ខែកញ្ញា ឆ្នាំ២០១៤ លោកថុល ហុកលី អ្នករាយការណ៍ព័ត៌មានទូរទស្សន៍ខ្មែរប៉ុស្តិ៍លេខ៩ ត្រូវបានសមត្ថកិច្ច ចាប់ឃាត់ខ្លួនតែម្តង។ បន្ទាប់មកទៀត លោកស័រ ស៊ុនលី អ្នកឆ្លើយឆ្លងព័ត៌មាន ទូរទស្សន៍ហង្សមាស និងជាសហការីកាសែតកម្ពុជាថ្មី ក៏ត្រូវសមត្ថកិច្ចហៅចេញក្រៅ រួចឃាត់ខ្លួន ខណៈ ពេលកំពុងចូលរួម ពិសាភោជនាហារ នៅភោជនីយដ្ឋាន មានហួត ក្នុងកម្មវិធីប្រកាសតំណែង នាយរងខណ្ឌរដ្ឋបាលព្រៃឈើកំពតមួយរូប។
ប្រភពព័ត៌មាន បានប្រាប់ឱ្យដឹង នាព្រឹកថ្ងៃទី១៣ ខែកញ្ញា ឆ្នាំ២០១៤ លោកឧត្តមសេនីយ៍ត្រី ម៉ៅ ច័ន្ទមធុរិទ្ធ ស្នងការរងទទួលបន្ទុក ការិយាល័យកណ្តាលព្រហ្មទណ្ឌ បានបញ្ជាក់ថា ក្នុងចន្លោះពីម៉ោង៨ ទៅម៉ោង៩ យប់ថ្ងៃទី១២ ខែកញ្ញា ឆ្នាំ២០១៤ ពិតជាមានករណីឃាត់ខ្លួន អ្នកសារព័ត៌មានទាំងពីរនាក់ ខាងលើប្រាកដមែន។ តែលោកមិនបានដឹងថា ក្នុងបទសង្ស័យអ្វីមួយទេ ព្រោះខាងភ្នំពេញ ជាអ្នកចុះមកធ្វើ។
គួរបញ្ជាក់ថា លោកថុល ហុកលី និងលោកស័រ ស៊ុនលី ជាអ្នករិះគន់ដោយឥតសំចៃ តាម រយៈបណ្តាញព័ត៌មានសង្គម ដែលបានបង្កើត សម្រាប់ម្នាក់ លើសពី ពីរគណនី ហើយបង្ហោះព័ត៌មាន ស្តីពីភាពមិនប្រក្រតី ទាំងរបស់បុគ្គល ទាំងរបស់អង្គភាព ជារៀងរាល់ថ្ងៃ ធ្វើឱ្យមានការចាប់អារម្មណ៍ ជាទូទៅ ចំពោះអ្នកនិយមព័ត៌មានបណ្តាញសង្គមបែបសេរីមួយនេះ។
ក្រោយទទួលព័ត៌មាន ពីការឃាត់ខ្លួននេះ មានការវិភាគថា បើឃាត់ខ្លួន ព្រោះតែការ រិះគន់សង្គម រិះគន់បុគ្គល វាជាផ្នែកមួយនៃ ការបំបាក់ស្មារតី នូវការផ្សព្វផ្សាយរបស់ អ្នកសារព័ត៌មានហើយ។
មិនអាចសុំការអត្ថាធិប្បាយពីលោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយបាននៅឡើយទេ នៅព្រឹកថ្ងៃទី១៣ ខែកញ្ញា ឆ្នាំ២០១៤ នេះ ដោយទូរស័ព្ទរបស់លោកជាប់រវល់។ដោយឡែក រដ្ឋមន្ត្រីក្រសួងព័ត៌មានលោក ខៀវ កាញ៉ារីទ្ធ ក៏មិនអាចទាក់ទងសុំការបំភ្លឺបានដែរ ដោយទូរស័ព្ទរបស់លោកទំនាក់ទំនងមិនចូល។
រហូតមកដល់រសៀលថ្ងៃទី១៣កញ្ញានេះ ដំណើររឿងលម្អិតយ៉ាងណានោះ មិនទាន់មានការបញ្ជាក់ណាមួយពីសមត្ថកិច្ចក៏ដូចជាមន្ត្រីអង្គភាព ស.ប.ពនៅឡើយទេ៕
