ខេត្តក្រចេះ៖មន្ត្រីជាន់ខ្ពស់នៃអគ្គស្នងការនគរបាលជាតិនាយឧត្តមសេនីយ៍គៀតច័ន្ទថារិទ្ធអគ្គស្នងការរងនគរបាលជាតិ បានជម្រុញដល់កងកម្លាំងទាំងអស់នៅក្នុងខេត្តក្រចេះត្រូវលើកកម្ពស់ស្មារតីប្រុងប្រយ័ត្នជាប់ជានិច្ចក្នុងការត្រៀមអន្តរាគមទប់ស្កាត់ប្រកបដោយប្រសិទ្ធភាពចំពោះសកម្មភាពក្រុមប្រឆាំងខុសច្បាប់និងពួកអមិត្តដែលប៉ុនប៉ងឬបង្កភាពចលាចលតាមគ្រប់រូបភាពពិសេសការកៀងគរប្រមូលកម្លាំងធ្វើបាតុកម្មខុសច្បាប់ក្នុងឧបាយកលបំផ្លិចបំផ្លាញការបោះឆ្នោត។
ការលើកឡើងរបស់មន្ត្រីជាន់ខ្ពស់នៃអគ្គស្នងការនគរបាលជាតិ ធ្វើឡើងនៅថ្ងៃទី២៦ កក្កដា ក្នុងពីធីប្រគល់រថយន្តស៊ីរ៉ែនចំនួន៦គ្រឿង ដល់ស្នងការនគរបាលខេត្តក្រចេះ សម្រាប់បែងចែកដល់អធិការស្រុក,ក្រុងទាំង៦ ប្រើប្រាស់ដល់កិច្ចការងារបង្ក្រាបទប់ស្កាត់បទល្មើស ក៏ដូចជាប្រតិបត្តការការពារសន្តិសុខសណ្តាប់ធ្នាប់នៅថ្ងៃបោះឆ្នោតខាងមុខនេះ។
អគ្គស្នងការរងនគរបាលជាតិ លោកនាយឧត្តមសេនីយ៍ គៀត ច័ន្ទថារិទ្ធបានបន្តថាកងកម្លាំងទាំងអស់ត្រូវមានវត្តមានប្រចាំការនៅក្នុងអង្គភាពនិងការគ្រប់គ្រងថែរក្សាត្រួតពិនិត្យមធ្យោបាយយានយន្តអាវុធគ្រាប់រំសេវគ្រឿងសម្ភារបរិក្ខារគ្រឿងបំពាក់ធានាបានគុណភាពក្នុងកិច្ចប្រតិបត្តិការ។ក្រោយចប់ការបោះឆ្នោតកម្លាំងដែលការពារការិយាល័យបោះឆ្នោតត្រូវប្រញាប់ប្រញាល់វិលត្រឡប់មកកាន់អង្គភាពវិញដើម្បីត្រៀមអន្តរាគមន៍សភាពការណ៍រហូតដល់ការប្រកាសលទ្ធផលបោះឆ្នោតជាផ្លូវការបានចប់សព្វគ្រប់។
បើតាមរបាយការណ៍ របស់ស្នងការដ្ឋាននគរបាលខេត្តក្រចេះ បានត្រៀមកម្លាំងអន្តរាគមចំនួន២០០នាក់ និងមានកម្លាំងចំនួនចំនួន១២៨៤នាក់ សម្រាប់ការពារការិយាល័យបោះឆ្នោតទាំង៥៥៥នៅក្នុងខេត្តក្រចេះ។ ដោយឡែក សម្រាប់កម្លាំងប្រជាការពារ ក៏មានការត្រៀមអន្តរាគមនៅតាមបណ្ដាស្រុក-ក្រុង និងប៉ុស្តិ៍នគរបាលមានចំនួន ៧៤៤នាក់ ជាមួយគ្នានេះ កម្លាំងទាំងនោះក៏បានសិក្សាអំពីច្បាប់ ក្រមសីលធម៌ និងនីតិវិធីនៃការបោះឆ្នោតផងដែរ៕x
