ភ្នំពេញ ៖ គណៈកម្មការគ្រោះមហន្តរាយខេត្តព្រៃវែង បានបង្ហាញឲ្យដឹងថ្ងៃទី៧ ខែសីហា ឆ្នាំ២០១៨ នេះថា គិតមកដល់ត្រឹមដើមខែសីហានេះ ទឹកជំនន់បានបង្កផលប៉ះពាល់ទៅលើស្រុកចំនួន៦ក្នុងខេត្តព្រៃវែង ដែលធ្វើឱ្យផ្លូវ សាលារៀន ផ្ទះសម្បែង និងស្រុកចំនួន៤ ក្នុងខេត្តនេះ កំពុងជួបប្រទះគ្រោះរាំងស្ងួត ធ្វើឲ្យស្រែស្រូវរបស់ប្រជាកសិករ សរុបចំនួន១២.៥៧៣ហិកតា ប្រឈមនឹងការស្វិតងាប់ ដោយសារខ្វះទឹក។
ក្នុងស្រុកចំនួន៤ នៅខេត្តព្រៃវែង ដែលកំពុងរងគ្រោះនោះមាន គឺស្រុកកំពង់ត្របែក ស្រុកស្វាយអន្ទរ ស្រុកព្រះស្តេច និងស្រុកបាភ្នំ។
ចំណែកស្រុកដែលរងផលប៉ពាល់ដោយទឹកជំនន់រួមមាន ៖
- ស្រុកពាមរក៍ ប៉ះពាល់ចំនួន ៨ឃុំ
- ស្រុកស៊ីធរកណ្តាល ប៉ះពាល់ ១០ឃុំ
- ស្រុកព្រះស្តេច ប៉ះពាល់ ១ឃុំ
- ស្រុកកំចាយមារ ប៉ះពាល់ ៤ឃុំ
- ស្រុកពារាំង ប៉ះពាល់ ៥ឃុំ និង
- ស្រុកពោធ៌រៀង ប៉ះពាល់ ៤ឃុំ
ក្នុងនោះ ទឹកបានលិចចូលក្រោមផ្ទះអ្នកស្រុកចំនួន ៤៥៨ខ្នង ប៉ះពាល់ផ្លូវប្រវែង ២៨៥៦៦ម៉ែត្រ លិចចូលសាលារៀនចំនួន ១១កន្លែង មណ្ឌលសុខភាព ១កន្លែង វត្ត ១កន្លែង និងប៉ះពាល់ស្រូវចំនួន៦៧១៣៥ហិកតា រួមជាមួយដំណាំផ្សេងៗចំនួន១៧ហិកតា។
បច្ចុប្បន្ននេះអាជ្ញាធរខេត្ត បានសហការជាមួយអង្គភាពជំនាញនិងអាជ្ញាធរមូលដ្ឋានកំពុងចុះជួយអន្តរាគមន៍បូមទឹកជួយសង្គ្រោះស្រូវទាំងអស់នោះជាបណ្ដើៗ៕
