ភ្នំពេញ ៖ មន្ត្រីយោធាឈ្មោះ នួន ប៉ូ ត្រូវបានតុលាការ រាជ ធានីភ្នំពេញ ដោះលែងឱ្យនៅក្រៅឃុំបណ្តោះអាសន្នហើយ បន្ទាប់ពីជាប់ពន្ធនាគាររាជធានីភ្នំពេញ ឬ ប៉េហ្ស៊ី ត្រឹមតែ ១៣ថ្ងៃរួចមក។។
មជ្ឈដ្ឋានមួយចំនួន យល់ឃើញថា នេះជាការសម្រេចដោយឆន្ទានុសិទ្ធិរបស់លោកចៅក្រម រស់ ពិសិដ្ឋ ជាអំណាចឯករាជ្យរបស់តុលាការ ។
លោក អ៊ី រិន្ទ ប្រធានលេខាធិការដ្ឋាននិងជាអ្នកនាំពាក្យសាលាដំបូងរាជធានីភ្នំពេញ បញ្ជាក់ថា ពិតជាមានការអនុញ្ញាតឱ្យជនត្រូវចោទ នួន ប៉ូ បាននៅក្រៅឃុំបណ្តោះអាសន្ន មែន ។ លោក អ៊ី រិន្ទ បញ្ជាក់ថា លោកចៅក្រមរស់ ពិសិដ្ឋ បានដោះលែងតាំងពីថ្ងៃទី២០ ខែសីហា មកម្ល៉េះ តែនីតិវិធីនៅបន្តដដែល ។
គួរបញ្ជាក់ថា មន្ត្រីយោធា នួន ប៉ូ ត្រូវបានចោទប្រកាន់ពីបទហិង្សាដោយចេតនាមានស្ថានទម្ងន់ទោស តាមមាត្រា២១៨នៃក្រមព្រហ្មទណ្ឌ កំណត់ការផ្តន្ទាទោសដាក់ពន្ធនាគារពី ២ឆ្នាំ ទៅ៥ឆ្នាំ និង ពិន័យជាប្រាក់ពី ៤លានរៀលទៅ១០លានរៀល ។
គួររំលឹកដែរថា ជនសង្ស័យឈ្មោះ នួន ប៉ូ ជាមន្ត្រីយោធា បានយកកាំភ្លើងខ្លីម៉ាកP08 ពី ក្នុងឡានរបស់ខ្លួន វាយមកលើជនរងគ្រោះបណ្តាលឲ្យបែកក្បាលលើសៀតផ្កាខាងឆ្វេង ផ្តើមចេញ ពីរឿងគ្រោះថ្នាក់ចរាចរណ៍។ បន្ទាប់មកសមត្ថកិច្ចបានចុះដល់ចំណុចកើតហេតុ ធ្វើការនាំខ្លួនជន សង្ស័យឈ្មោះ នួន ប៉ូ យកមកធ្វើការសាកសួរនៅអធិការដ្ឋាននគរបាលខណ្ឌសែនសុខតែម្តង ៕
