ពោធិ៍សាត់ ៖ នៅព្រឹកព្រលឹមថ្ងៃទី២៥ ខែកញ្ញា ឆ្នាំ២០១៨ បុរសម្នាក់មានការភ័យរន្ធត់យ៉ាងខ្លាំង បន្ទាប់ពីប្រទះឃើញសត្វក្រពើ ដ៏ធំមួយក្បាល ជាប់មងរបស់គាត់ ដែលបានដាក់យកត្រី នៅក្នុងស្ទឹងមេទឹក ដែនជម្រកសត្វព្រៃ ភ្នំសំកុស ក្នុងភូមិកណ្តាល ឃុំថ្មដា ស្រុកវាលវែង ខេត្តពោធិ៍សាត់
បុរសដែលដាក់មងយកត្រីនោះ ឈ្មោះ មឿន មីន ប្រាប់ឲ្យដឹងថា ពេលគាត់ទៅរាយមង រកត្រី នៅនៅចំណុចខាងលើនាពេលល្ងាច លុះពេលព្រឹកឡើងពេលទៅដោះមង ក៏ប្រទះឃើញមងមានជាប់សត្វម្យ៉ាង រើបម្រាស់ខ្លាំង គាត់ក៏លើកទាញមងឡើងលើ ក៏ប្រទះឃើញជាប់សត្វក្រពើដ៏ធំមួយក្បាល គាត់មានការភិតភ័យ ក៏បានរាយការណ៍ទៅសមត្ថកិច្ចឱ្យជួយអន្តរាគមន៍ ចាប់លើកក្រពើមួយក្បាលនោះ ឡើងគោក ដើម្បីបញ្ចៀសគ្រោះថ្នាក់ដល់ជិវិតមនុស្ស និងសត្វ។
បច្ចុប្បន្នសត្វក្រពើនេះ ត្រូវបានដឹកយកទៅរក្សាទុក នៅទីបញ្ជាការវរការពារព្រំដែនគោកលេខ៨២៥ រង់ចាំបញ្ជាពីថ្នាក់លើ គេនៅពុំទាន់ដឹងនៅឡើយទេថា សត្វក្រពើនេះ ជាសត្វក្រពើធម្មជាតិ ឬក៏សត្វចិញ្ចឹមដែលរួចមកពីណានោះទេ ៕
