ភ្នំពេញ ៖ ក្នុងលិខិតចុះថ្ងៃទី២១ ខែកញ្ញា ឆ្នាំ២០១៨ រដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ បានជូនដំណឹង ស្ដីពីរដូវបើកនេសាទឆ្នាំ ២០១៨-២០១៩ សម្រាប់សាធារណជន និងអ្នកនេសាទ ដូចខាងក្រោម ៖ ចាប់ពីថ្ងៃទី១ ខែតុលា ដល់ថ្ងៃទី៣១ ខែឧសភា ចំពោះដែននេសាទទឹកសាប ដែលស្ថិតនៅខាងជើងខ្សែស្របចតុមុខ រួមមានខេត្តទាំងអស់ជុំវិញបឹងទន្លេសាប និងបណ្ដាខេត្ត កំពង់ចាម ត្បូងឃ្មុំ ក្រចេះ រតនគិរី មណ្ឌលគិរី ព្រះវិហារ ប៉ៃលិន ឧត្តរមានជ័យ និងរាជធានីភ្នំពេញ ព្រមទាំងខេត្តកណ្ដាល ផ្នែកខាងជើងទន្លេចតុមុខ។
ដោយឡែក ខេត្តស្ទឹងត្រែង ចាប់ពីថ្ងៃទី១ ខែតុលា ដល់ថ្ងៃទី១ ខែឧសភា។
ចាប់ពីថ្ងៃទី១ ខែវិច្ឆិកា ដល់ថ្ងៃទី៣០ ខែមិថុនា ចំពោះដែននេសាទទឹកសាបដែលស្ថិតនៅខាងត្បូងខ្សែស្របទន្លេចតុមុខ រួមមាន រាជធានីភ្នំពេញ នៅផ្នែកខាងត្បូងចតុមុខ ខេត្តកណ្ដាល ព្រៃវែង តាកែវ កំពង់ស្ពឺ និងខេត្តស្វាយរៀង៕
