ភ្នំពេញ ៖ សម្តេចវិបុលសេនាភក្តី សាយ ឈុំ បានអញ្ជើញដឹកនាំគណៈប្រតិភូជាន់ខ្ពស់ព្រឹទ្ធសភា ទៅបំពេញ កិច្ចផ្លូវការរយៈពេល៤ថ្ងៃ នៅសាធារណរដ្ឋប្រជាមានិតចិន តបតាមការអញ្ជើញរបស់ឯកឧត្តម វ៉ាង យ៉ាង ប្រធានសភាប្រឹក្សានយោបាយប្រជាជនចិន ចាប់ពីថ្ងៃទី២៣ ដល់ថ្ងៃទី២៦ ខែតុលា ឆ្នាំ ២០១៨។

យោងតាមអគ្គលេខាធិការរដ្ឋាន នៃព្រឹទ្ធសភា បានឱ្យដឹងថា ក្នុងអំឡុងពេលបំពេញទស្សនកិច្ចនេះ សម្តេចវិបុលសេនាភក្តី សាយ ឈុំ ប្រធានព្រឹទ្ធសភា នឹងជួបពិភាក្សាការងារទ្វេភាគីជាមួយថ្នាក់ ដឹក នាំសំខាន់ៗ ដូចជា ឯកឧត្តម វ៉ាង យ៉ាង ប្រធានសភាប្រឹក្សានយោបាយប្រជាជនចិន, ជួបពិភាក្សា ការងារជាមួយនឹង ឯកឧត្តម លី ហ្សាងស៊ូ ប្រធានសភាតំណាងប្រជាជនចិន និងជួបជាមួយថ្នាក់ដឹក នាំជាន់ខ្ពស់ នៃសាធារណរដ្ឋប្រជាមានិតចិន មួយចំនួនទៀត ព្រមទាំងទស្សនាតំបន់វប្បធម៌ និង ឧស្សាហកម្ម ក្នុងរដ្ឋធានីប៉េកាំងផងដែរ៕