ភ្នំពេញ ៖ នគរបាលប្រឆាំងបទល្មើសសេដ្ឋកិច្ចនៃអគ្គស្នងការនគរបាលជាតិ សហការជាមួយអគ្គនាយកដ្ឋាន កាំកុងត្រូល នៅល្ងាចថ្ងៃទី៣ ខែវិច្ឆិកា ឆ្នាំ២០១៨ នេះ បានសម្រេចដុតកំទេចចោលនូវ ស្លាប ជង្គង់ ជើង និងភ្លៅមាន់ ខូចគុណភាព ជាងមួយតោន ក្រោយពីរឹបអូសបានពីឈ្មួញទុច្ចរិតនាំចូលពីប្រទេសថៃមកលក់នៅប្រទេសកម្ពុជា ដោយខុសច្បាប់។ ការដុតបំផ្លាញចោលនេះ ធ្វើឡើងនៅទីលានចាក់សំរាម បឹង ជើងឯក។
សមត្ថកិច្ចបានបញ្ជាក់ថា ស្លាប ជង្គង់ ជើង និងភ្លៅមាន់ ខូចគុណភាព ត្រូវបានចាប់ឃាត់ខណៈ ឈ្នួញកំពុងដឹកតាមរថយន្តកូរ៉េ ១គ្រឿង ម៉ាក KIA Bongo ស្លាកលេខ 2AD 8321 នៅចំណុច ខាងកើតស្ពានច្បារអំពៅ រាជធានីភ្នំពេញ ដោយបាននាំខ្លួនអ្នបើកបរម្នាក់ និងអ្នករួមដំណើរម្នាក់មក នាយកដ្ឋាន ដើម្បីចាត់ការតាមបន្តនីតិវិធី។
គួរជម្រាបថា ជារឿយៗ ឈ្នួញតែងតែឆ្លឿតលួចដឹកកាកសំណល់សត្វពាហនៈ ដូចជា ចុងស្លាបមាន់ ជង្គង់ ជើង ភ្លៅ និងគ្រឿងក្នុងជ្រូក គោ ក្របី ដែលខូចគុណភាពពីប្រទេសថៃ មកចែកចាយនៅទូទាំងកម្ពុជា។ករណីអាចនាំមកដល់កណ្តាលក្រុងភ្នំពេបានបែបនេះ អាស្រ័យដោយ មានការឃុបឃិតគ្នា តាំងពីច្រកព្រំដែនរហូតមកដល់ទីផ្សារក្នុងស្រុកបង្កឲ្យមានផលប៉ះពាល់ដល់សុខភាពប្រជាពលរដ្ឋយ៉ាងធ្ងន់ធ្ងរ៕
