ខេត្តកំពង់ចាម ៖ ជនសង្ស័យចំនួន២នាក់ និងឩបករណ៍ឆក់ត្រីខុសច្បាប់មួយចំនួន ត្រូវបានកំលាំងការិយាលយ័ប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តកំពង់ចាម ចុះបង្ក្រាបចាប់ខ្លួន និងដកហូតដើម្បីបំពេញសំណុំឯកសារប្រគល់ជូនជំនាញខណ្ឌរដ្ឋបាលជលផល ចាត់ការបន្ត។
លោក ឩត្តមសេនីយ៍ទោ ឯម កុសល ស្នងការនគរបាលខេត្តកំពង់ចាម បានអោយដឹងថា នៅថ្ងៃទី១៦ ខែវិច្ឆិកា ឆ្នាំ២០១៨ វេលាម៉ោង ៤និង ២០នាទី លោកបានទទួលព័ត៌មានពីប្រជាពលរដ្ឋ រាយការណ៍ថា មានបទល្មើសនេសាទខុសច្បាប់ (ប្រើឩបករណ៍ឆក់)នៅតាមដងទន្លេមេគង្គ ភ្លាមនោះ លោក បានចាត់វិធានការអោយកំលាំងការិយាល័យនគរបាលប្រឆាំងបទល្មើសសេដ្ឋកិច្ច ចុះបង្ក្រាបបទល្មើសនេសាទខុសច្បាប់ទាំងនោះ នៅចំណុច ភូមិចុងថ្នល់ទី១ សង្កាត់បឹងកុក ក្រុងកំពង់ចាម ខេត្តកំពង់ចាម។ លោកស្នងការបានបន្តថា ក្នុងកិច្ចប្រតិបត្តិការបង្ក្រាបនេះ សមត្ថកិច្ចបានដកហូត វត្ថុតាងល្មើសច្បាប់ មួយចំនួនដូចជា ឧបករណ៍ឆក់ត្រីចំនួន ២គ្រឿង (ក្តៅចំនួន ១គ្រឿង និងត្រជាក់ចំនួន ១គ្រឿង) – អាគុយចំនួន ២ -ទូកម៉ាស៊ីនចំនួន ១គ្រឿង- ដងឆក់ចំនួន ១គូ – ត្រីចម្រុះចំនួន ៣០គីឡូក្រាម និងបានឃាត់ខ្លួនជនសង្ស័យចំនួន ២នាក់ ទី១- ឈ្មោះ ថាំង លី ភេទប្រុស អាយុ៣៩ឆ្នាំ ជនជាតិវៀតណាម។ ២- ឈ្មោះ គឹម នី ភេទប្រុស អាយុ ៣៤ឆ្នាំ ជនជាតិខ្មែរ អ្នកទាំងពីរមានលំនៅភូមិចុងថ្នល់ទី១ សង្កាត់បឹងកុក ក្រុងកំពង់ចាម ខេត្តកំពង់ចាម។
លោកស្នងការ បានបញ្ជាក់ថា ចំពោះសម្ភារៈវត្ថុតាង និងជនល្មើសបានប្រគល់ជូនខណ្ឌរដ្ឋបាលជលផលខេត្តកំពង់ចាម ដើម្បីចាត់ការបន្តតាមនីតិវិធី។
ប្រជាពលរដ្ឋនៅតាមដងទន្លេមេគង្គម្តុំកន្លែងកើតហេតុ បានអោយដឹងថា រៀងរាល់យប់ ពួកគាត់ឃើញ មានទូកនេសាទ ប្រើឩបករណ៍ឆក់នៅតាមដងទន្ល ជាច្រើនហើយ តែមិនឃើញកំលាំងខាងខណ្ឌជលផលចុះបង្ក្រាបទេ ទើបតែពេលនេះ ស្រាប់តែឃើញកំលាំងនគរបាលចុះមកបង្ក្រាបជំនួសមន្ត្រីជលផលទៅវិញ។
ប្រជាពលរដ្ឋ បានសំណូមពរដល់លោកស្នងការនគរបាលខេត្តកំពង់ចាម ជួយមានវិធានការបង្ក្រាបបទល្មើសនេសាទ អោយដូចភ្លៀងរលឹមផង ដើម្បីអភិរក្សមច្ឆជាតិអោយសម្បូរឡើងវិញ បើមើលទៅអស់លោកខាងរដ្ឋបាលជលផល គឺពួកគាត់គ្មានជំនឿសោះឡើយ ព្រោះកំលាំងជលផលត្រូវថ្នាំសណ្តំ របស់អ្នកនេសាទខុសច្បាប់អស់ហើយ ដូចករណីខាងលើនេះជាដើម ព្រោះបើតាមការឲ្យដឹងពីប្រជាពលរដ្ឋបានប្រាប់ថា ជនល្មើសខាងលើនេះ ជាសាច់ញាតិរបស់មន្ត្រីជលផលខេត្តកំពង់ចាមស្រាប់៕ ដោយ ៖ សុផល
