ភ្នំពេញ ៖ ឆ្នាំនេះ សហភាពអឺរ៉ុប ប្រចាំកម្ពុជា បានឧបត្ថម្ភទូកចែវនារី មួយគ្រឿងឈ្មោះ «ព្រះពៃស្រពណ៌» ដោយឧបត្ថម្ភការស្នាក់នៅ និងការហាត់សមរបស់ទូក មុនពេលចូលប្រកួត និងនៅក្នុងព្រឹត្តិការណ៍ប្រកួត ដែលមានរយៈពេលបីថ្ងៃ ដើម្បីចូលរួមនៅក្នុងព្រះរាជពិធីបុណ្យ អុំទូក បណ្តែតប្រទីប អកអំបុក និង សំពះព្រះខែ ដែលប្រារព្ធធ្វើឡើងក្នុងរាជធានីភ្នំពេញ។
ការឧបត្ថម្ភរបស់សហភាពអឺរ៉ុបប្រចាំកម្ពុជានេះ ដោយផ្តល់ជាសម្ភារៈ និង អាហារសម្រាប់ ក្រុមទូកចែវនារី ឈ្មោះព្រះពៃស្រពណ៌ ដោយមានកីឡាការិនីចំនួន៤២នាក់ មកពីភូមិកំពង់បាស្រូវ ឃុំជលសា ស្រុកជលគិរី ខេត្តកំពង់ឆ្នាំង។
លោក George Edgar ឯកអគ្គរដ្ឋទូត ប្រចាំកម្ពុជា និងជាប្រធានប្រតិភូសហភាពអឺរ៉ុបប្រចាំកម្ពុជា បានថ្លែងឱ្យដឹងថា ក្នុងនាមជាដៃគូអភិវឌ្ឍន៍ដ៏សំខាន់មួយរបស់រាជរដ្ឋាភិបាលកម្ពុជា សហភាពអឺរ៉ុប មានសេចក្តីរីករាយយ៉ាងខ្លាំង ដែលបានគាំទ្រប្រពៃណី វប្បធម៌ ដ៏សំខាន់នេះ របស់ប្រទេសកម្ពុជា ព្រមទាំងកិច្ចខិតខំប្រឹងប្រែងនានា ឱ្យស្ត្រីនៅមូលដ្ឋាន បានចូលរួមការអភិវឌ្ឍ ដើម្បីភាពស្មើគ្នាក្នុងសង្គម។
លោកបញ្ជាក់ថា ព្រះរាជពិធីបុណ្យអុំទូក បណ្តែតប្រទីប អកអំបុក និង សំពះព្រះខែ ជាផ្នែកមួយយ៉ាងសំខាន់ នៅក្នុងវប្បធម៌របស់ប្រទេសកម្ពុជា ជាពិសេសសម្រាប់ឆ្នាំនេះ ត្រូវបានជ្រើសរើសជាឆ្នាំ នៃកេរ្តិ៍ដំណែល វប្បធម៌អឺរ៉ុប ហើយព្រះរាជពិធីនេះ គឺជាព្រឹត្តិការណ៍ វប្បធម៌ ប្រចាំឆ្នាំដ៏ធំបំផុត របស់ប្រទេសកម្ពុជា ដោយទាក់ទាញមនុស្សរាប់លាននាក់ មករាជធានីភ្នំពេញ។ សហភាពអឺរ៉ុបក៏ឆ្លៀតយកឱកាសដ៏ពិសេសនេះ ដើម្បីជួយផ្សព្វផ្សាយសារ អំពី អំពើហិង្សាលើស្ត្រី និងកុមារី។ អាវយឺតដែលពាក់ដោយកីឡាការិនី មានសារសរសេរថា «និយាយថាទេ ចំពោះអំពើហិង្សាលើស្ត្រី»។
លោកគាំទ្រគម្រោងនានា ដើម្បីកាត់បន្ថយភាពក្រីក្រ និង លើកកម្ពស់ជីវភាព របស់ប្រជាជនកម្ពុជា។ គម្រោងដែលឧបត្ថម្ភដោយសហភាពអឺរ៉ុប ចាប់ពី វិស័យនេសាទ អប់រំ កសិកម្ម ការប្រែប្រួលអាកាសធាតុ ជំនួយពាក់ព័ន្ធនឹងពាណិជ្ជកម្ម រហូតដល់ការលើកកម្ពស់អភិបាលកិច្ចល្អ និងសិទ្ធិមនុស្ស កំពុងតែផ្តល់ប្រយោជន៍ ដល់ប្រជាជនកម្ពុជារាប់លាននាក់ផងដែរ៕
