ប៉ាគីស្ថាន ៖ ទីភ្នាក់ងារព័ត៌មាន ស៊ិនហួ បានរាយការណ៍ថា មនុស្ស២៣នាក់ស្លាប់ និង៣១នាក់ផ្សេងទៀតរងរបួស ករណីផ្ទុះយ៉ាងកក្រើកផ្ទួនៗ នៅតំបន់ពីដាច់ដោយឡែកពីគ្នា គឺទីក្រុងការ៉ាជី និងតំបន់ជនជាតិភាគតិច Orakzai នៅភាគពាយ័ព្យប្រទេសប៉ាគីស្ថាន។
បើតាមមន្ត្រីប៉ាគីស្ថាន ការវាយប្រហារដោយបំផ្ទុះគ្រាប់បែកយ៉ាងកក្រើកទី១ គឺបានកើតមានឡើងនៅតំបន់ក្បែរព្រំដែនប៉ាគីស្ថាន-អាហ្វហ្គានីស្ថាន ដែលជាតំបន់ភ្នំទី ៧ នៃជនជាតិភាគតិចរបស់ប្រទេសអាស៊ីខាងត្បូងមួយនេះ។ បន្ទាប់ពីកើតមានការផ្ទុះភ្លាមៗ ក្រុមសង្គ្រោះបានទៅដល់កន្លែងកើតហេតុ និងបញ្ជូនមនុស្សរងរបួសទៅកាន់មន្ទីរពេទ្យដែលសិ្ថតនៅក្បែរនោះ។ អាជ្ញាធរអះអាងថា ចំនួនមនុស្សស្លាប់នឹងអាចកើនឡើងបន្ថែមទៀត ដោយសារតែអ្នករងរបួសមួយចំនួនមានសភាពធ្ងន់ធ្ងរខ្លាំង។
ទោះបីយ៉ាងណាជុំវិញករណីនេះពុំមានក្រុមណាមួយចេញមុខអះអាងថា ជាអ្នកស្ថិតនៅពីក្រោយការវាយប្រហារខាងលើនេះនៅឡើយទេ៕
