ភ្នំពេញ ៖ នៅរសៀលថ្ងៃទី២៨ ខែវិច្ឆិកា ឆ្នាំ២០១៨ នេះ មានការភ្ញាក់ផ្អើលយ៉ាងខ្លាំង ដោយលេចឮថា មានជនសង្ស័យម្នាក់ បានធ្វើអត្តឃាតដោយចងក នៅក្នុងបន្ទប់ឃុំខ្លួនបណ្តោះអាសន្ន នៃអធិការដ្ឋាននគរបាលខណ្ឌច្បារអំពៅ មានទីតាំងនៅតាមបណ្តោយផ្លូវលេខ ៦២៨ ក្នុងសង្កាត់ច្បារអំពៅទី១ ខណ្ឌច្បារអំពៅ ។ ក្នុងពេលកើតហេតុ គ្មានមន្ត្រីណាម្នាក់ ហ៊ានបង្ហើបឲ្យដឹងពីអត្តសញ្ញាណ ឬពីមូលហេតុនៃការចាប់ឃុំខ្លួន និងការធ្វើអត្តឃាតដ៏អាថ៌កំបាំងនោះឡើយ។
ប្រភពព័ត៌មានពីក្រៅរបងអធិការដ្ឋានគរបាលខណ្ឌ បានឲ្យដឹងថា ករណីចងកធ្វើអត្តឃាត នៅក្នុងបន្ទប់ឃុំខ្លួនបណ្តោះអាសន្ន ដ៏អាថ៌កំបាំងនេះ មិនមានអ្នកណាម្នាក់បានដឹងពីមូលហេតុអ្វីនោះឡើយ ព្រោះតែកម្លាំងមានសមត្ថកិច្ច មិនបានអនុញ្ញាតអោយអ្នកយកព័ត៌មានចូលទៅថតរូបភាព និងហាក់ដូចជាព្យាយាមលាក់បាំងព័ត៌មាននេះទៀតផង។
ប្រភពព័ត៌មានដដែលបានប្រាប់ឱ្យដឹងថា ក្រោយពីកម្លាំងនគរបាលរបស់អធិការខណ្ឌច្បារអំពៅ បាននាំខ្លួន បុរសជាជនសង្ស័យដែលធ្វើអត្តឃាតនោះ វិលត្រឡប់មកពីតុលាការាជធានីវិញ ក៏បាននាំយកមកកាន់បន្ទប់ឃុំខ្លួនជាបណ្តោះអាសន្នសិន មុននឹងបញ្ជូនបន្តទៅកាន់ពន្ធនាគារព្រៃស នាល្ងាចម៉ោង ៣រសៀល ថ្ងៃទី២៨ ខែវិច្ឆិកា ដដែលនេះ។
លុះដល់ពេលដែលត្រូវនាំខ្លួនបុរសជនសង្ស័យ ទៅកាន់ពន្ធនាគារព្រៃស ក៏ស្រាប់តែប្រទះឃើញរូបគេ ចងក ធ្វើអត្តឃាតស្លាប់បាត់ទៅហើយ ទើបបង្កអោយមានការភ្ញាក់ផ្អើលកើតឡើងយ៉ាងខ្លាំងតែម្តង។
សូមបញ្ជាក់ថា ក្រោយពេលកើតហេតុ គេឃើញមានកម្លាំងយាមកាមនៅមាត់ទ្វារនៃអធិការដ្ឋាននគរបាលខណ្ឌយ៉ាងតឹងរ៉ឹង និងមិនអនុញ្ញាតអោយចូលដូចលើកពេលមុនៗឡើយ ហើយអ្នកកាសែតរាប់សិបនាក់ដែលរង់ចាំប្រមាញ់ព័ត៌មាននៅខាងក្រៅរបងទាំងអស់ គ្មាននរណាម្នាក់អាចដឹងបានថា ជនសង្ស័យត្រូវបានចាប់ខ្លួនដោយសារបទល្មើសអ្វីនោះឡើយ ហើយក៏មិនដឹងថា ការសម្រេចចិត្តធ្វើអត្តឃាតរបស់ជនសង្ស័យដោយសារមូលហេតុអ្វីនោះដែរ៕
