ភ្នំពេញ ៖ រថភ្លើងដឹកអ្នកដំណើរចូលព្រលានយន្តហោះអន្តរជាតិភ្នំពេញបានបុករះបង្កឲ្យខូចខាតរថយន្តតូចធំ និងម៉ូតូជាច្រើនគ្រឿង បណ្តាលឲ្យមនុស្សចំនួន២នាក់ បានរងបួសធ្ងន់។ ហេតុការណ៍នេះកើតឡើងនៅព្រឹកថ្ងៃទី៣ ខែធ្នូ នៅចំណុចមុខ អាកាសយានដ្ឋានអន្តរជាតិភ្នំពេញ តាមមហាវិថីសហព័ន្ធរុស្សី កែងផ្លូវចូលវត្តតាំងកសាង ក្នុងភូមិក្បាលដំរី សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ។
តាមសមត្ថកិច្ចឲ្យដឹងថា រថយន្តដែលបានរងការខូចខាតនោះរួមមាន ៖ រថយន្តម៉ាក ហ៊ីយ៉ាន់ដាយ ពណ៌ស ពាក់ស្លាកលេខ បាត់ដំបង៣A-០៣៨០ អ្នកបើកបរបានរត់គេចខ្លួនបាត់ និង១គ្រឿងទៀត ម៉ាកកាមរីបាឡែន ពណ៌ស្ករ ពាក់ស្លាកលេខ ភ្នំពេញ ២H-៦៣៤៤ បើកបរដោយបុរសម្នាក់ពុំបានស្គាល់ឈ្មោះឡើយ។ ចំណែកម៉ូតូម៉ាកហុងដា សេ១២៥ពណ៌ខ្មៅ ជិះដោយបុរសម្នាក់ និងស្ត្រីម្នាក់ បានរងរបួសធ្ងន់មិនត្រូវបានស្គាល់អត្តសញ្ញាណនៅឡើយទេ។
បើតាមសមត្ថកិច្ចបន្តថា នៅមុនពេលកើតហេតុ គេឃើញរថយន្ត និងម៉ូតូខាងលើ បានឈប់ជាបន្តបន្ទាប់ នៅចំណុចស្តុបខាងលើ ខណៈនោះមានរថភ្លើងបានធ្វើដំណើរដឹកភ្ញៀវអន្តរជាតិ ក្នុងទិសដៅពីជើងទៅត្បូង ចូលអាកាសយានដ្ឋានអន្តរជាតិភ្នំពេញ ក៏បានបុកពីក្រោយរថយន្តម៉ាកហ៊ីយ៉ាន់ដាយ ដែលឈប់រំលោភលើផ្លូវរថភ្លើង។
ប្រភពបន្តទៀតថា នៅពេលគ្រោះថ្នាក់រថភ្លើង បានបុករុញរថយន្ត១គ្រឿង ទៅបុករថយន្តកាមរីចំហៀង ហើយរុញទៅផ្ទប់បង្គោលភ្លើង និងចូលផ្ទះបណ្តាលឲ្យបាក់បង្គោលបាណូ។ ខណៈនោះមានម៉ូតូ១គ្រឿង ក៏ត្រូវបានរថភ្លើង បុករុញរថយន្តទៅបុកបណ្តាលឲ្យអ្នកបើកបរ និងអ្នករួមដំណើរបានរងរបួស ទាំង២នាក់ផងដែរ។ បន្ទាប់ពីកើតមានគ្រោះថ្នាក់រថភ្លើង ក៏បានបើកចូលរ៉ាក្នុងអាកាសយានដ្ឋាន អន្តរជាតិភ្នំពេញ។
សមត្ថកិច្ចបានបញ្ជាក់ថា ក្រោយកើតហេតុជនរងគ្រោះ ត្រូវបានបញ្ជូនទៅកាន់មន្ទីរពេទ្យ ហើយរថយន្តទាំង២គ្រឿង និងម៉ូតូ១គ្រឿង ត្រូវបាននគរបាលចុះទៅវាស់វែង បញ្ជូនទៅកាន់ការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីដោះស្រាយ៕
