ខេត្តព្រៃវែង ៖ មន្ត្រីសាខាកាំកុងត្រូលខេត្តព្រៃវែងសហការជាមួយមន្ត្រីមន្ទីរពាណិជ្ជកម្ម និងគណៈកម្មការផ្សារ នៅថ្ងៃទី១៧ ខែធ្នូ ឆ្នាំ២០១៨បានសរសៃគុយទាវមានសារធាតុគីមីចំនួន ៥,១គ.ក្រ. ខណៈបន្តចុះត្រួតពិនិត្យ និងផ្សព្វផ្សាយអំពីគុណភាព សុវត្ថិភាពម្ហូបអាហារ និងម្ហូបអាហារវេចខ្ចប់ស្រាប់ នៅក្នុងផ្សារពោធិ៍កន្លែង ស្ថិតនៅភូមិវាំង ឃុំជីផុច ស្រុកមេសាង ខេត្តព្រៃវែង។
មន្ត្រីជំនាញបានធ្វើវិភាគបឋមទៅលើផលិតផលគំរូម្ហូបអាហារមួយចំនួន ដូចជា៖សរសៃគុយទាវ នំបញ្ចុក នំបាញ់ហយ ត្រីងៀត ស្ករត្នោត សណ្តែកបណ្តុះ ត្រពាំងជ្រក់ លតស្វិត ដំណាប់ល្ហុង ដើម្បីរកសារធាតុគីមីហាមឃាត់ដែលអាចធ្វើឱ្យប៉ះពាល់ដល់សុខភាពប្រជាពលរដ្ឋ ។ ជាមួយគ្នានោះ មន្ត្រីជំនាញបានធ្វើការត្រួតពិនិត្យរកភាពមិនអនុលោមនៅលើសំបកវេចខ្ចប់ផលិតផលម្ហូបអាហារផងដែរ ។
ជាលទ្ធផល មន្ត្រីជំនាញបានរកឃើញមានវត្តមានសារធាតុគីមីហាមឃាត់ ប៉ូរ៉ាក់ ក្នុងសរសៃគុយទាវ ចំនួនសរុប ៥.១ គីឡូក្រាម។ ដោយឡែកទំនិញមិនមានភាពអនុលោមនៅលើសំបកវេចខ្ចប់ផលិតផលសរុបចំនួន ៥២.៥ គីឡូក្រាម និងទឹកបរិសុទ្ទ ម៉ាក អូគិថាណា ចំណុះ ៥០០ មីលីលីត្រ ចំនួន ៧២ ដប ត្រូវបានមន្ត្រីជំនាញធ្វើការដកហូតយកមករក្សាទុកដើម្បីកម្ទេចចោលនៅពេលក្រោយ។ បន្ទាប់មកមន្ត្រីកាំកុងត្រូលបានធ្វើកំណត់ហេតុដកហូត និងបានឱ្យតំណាងម្ចាស់ផលិតផលទំនិញធ្វើកិច្ចសន្យាបញ្ឈប់ការដាក់តាំងលក់ទំនិញហួសកាលបរិចេ្ឆទប្រើប្រាស់បន្តទៀត។
ក្នុងឱកាសនោះដែរ មន្ត្រីសាខាកាំកុងត្រូលបានណែនាំ និងចែកខិត្តប័ណ្ណអប់រំដល់អាជីវករ ឱ្យយល់ដឹងអំពីអនាម័យនៃការដាក់លក់ចំណីអាហារ ជៀសវាងធ្វើឱ្យផលិតផលខូចគុណភាព មានចម្លងមេរោគ ដែលនាំឱ្យប៉ះពាល់ដល់សុខភាពអ្នកបរិភោគ៕
