បាត់ដំបង ៖ បុរសស្ត្រីវ័យចំណាស់ពីរនាក់ប្តីប្រពន្ធ បានស្លាប់ខណៈដុតភ្លើងដេញចាប់សត្វត្រកួតក្នុងចម្ការដំឡូង ហើយផ្ទុះក្បាលគ្រាប់យ៉ាងកក្រើកបង្កការភ្ញាក់ផ្អើលតែម្តង។
របាយការណ៍សមត្ថកិច្ច ឲ្យដឹងថា នៅថ្ងៃទី២៤ ខែធ្នូ ឆ្នាំ២០១៨ វេលាម៉ោង ១៣ ៖ ៣០នាទី នៅចំណុចបឹងអន្ទង់ ស្ថិតក្នុងភូមិបួរ ឃុំបួរ ស្រុកភ្នំព្រឹក ខេត្តបាត់ដំបង មានករណីផ្ទុះគ្រាប់ ត្បាល់៦០ បណ្តាលអោយជនរងគ្រោះ២នាក់ ប្តីប្រពន្ធបានស្លាប់ ដោយបុរសជាប្តីឈ្មោះ ជាតិ អាយុប្រហែល ៥០ឆ្នាំ ស្លាប់នៅកន្លែងកើតហេតុ ប្រពន្ធមិនទាន់ស្គាល់អត្តសញ្ញាណ បានស្លាប់ពេលបញ្ជូនដល់មណ្ឌលសុខភាពបួរ។ អ្នកទាំងពីរ មានស្រុកកំណើត នៅភូមិត្រាំស ឃុំតានី ស្រុកទូកមាស ខេត្តកំពត មកស្នាក់នៅបណ្តោះអាសន្ន ធ្វើកម្មករកាប់ដំឡូង អោយម្ចាស់ចំការឈ្មោះ ហៀង រ៉េត ភេទស្រី អាយុ៦៤ឆ្នាំ នៅភូមិ-ឃុំកើតហេតុខាងលើ ។
របាយការណ៍ដដែលបញ្ជាក់ថា មូលហេតុ ជនរងគ្រោះ០២នាក់ប្តីប្រពន្ធ បានមកដុតគល់ឈើក្នុងចំការ ដើម្បីចាប់សត្វព្រួត ដោយមិនដឹងថា មានក្បាលគ្រាប់ត្បាល់៦០ ដែលនៅទីនោះ បណ្តាលអោយផ្ទុះស្លាប់តែម្តង ។
ក្រោយពីសមត្ថកិច្ចយើង ពិនិត្យកន្លែងកើតហេតុ និងសាកសព ជនរងគ្រោះរួចមក យើងបានប្រគល់សាកសពអោយទៅលោកមេភូមិ និងម្ចាស់ចំការ យកទៅធ្វើបុណ្យតាមប្រពៃណី ៕ ដោយ ៖ សុផល
