ក្រុងព្រះសីហនុ ៖ អាជ្ញាធរខេត្តព្រះសីហនុបានអះអាងថា គ្មានករណីចែកចាយបន្លែមានជាតិគីមីរបស់ចិន ក្នុងទឹកដីរបស់ខ្លួនឡើយ ហើយបានចាត់ទុកក្រុមដែលផ្សព្វផ្សាយព័ត៌មានមិនពិត នេះមានចេតនាមួលបង្កាច់បង្ខូច នូវទំនាក់ទំនងរវាងរាជរដ្ឋាភិបាលកម្ពុជា និងចិន ដែលកំពុងតែល្អប្រសើរ។ នេះបើយោងតាមការចុះផ្សាយរបស់ ក្រសួងព័ត៌មាន កាលពីថ្ងៃទី១៧ ខែមករា ឆ្នាំ២០១៩។
អ្នកនាំពាក្យរដ្ឋបាលខេត្តព្រះសីហនុ បានច្រានចោលការផ្សព្វផ្សាយព័ត៌មានមិនពិតដែលនិយាយផ្ទុយពីការពិតនេះ ។លោក ឱ សារឿន ប្រធានមន្ទីរព័ត៌មាន និងជាអ្នកនាំពាក្យរដ្ឋបាលខេត្តព្រះសីហនុ បានបំភ្លឺថា តាមការពិត កងទ័ពជើងទឹកចិននៃនាវាទាំង ៣គ្រឿងនេះ បានប្រមូលទិញបន្លែ និងស្បៀង ជាច្រើន ពីតាមទីផ្សារ ក្នុងខេត្តព្រះសីហនុ វិញទេ ដើម្បីរក្សាទុកក្នុងនាវារបស់ពួកគេ មុនចាកចេញពី ព្រះរាជាណាចក្រកម្ពុជា សម្រាប់ធ្វើជាម្ហូប អាហារប្រចាំថ្ងៃ ៕
