អ៊ីរ៉ង់ ៖ លោក Mohammad Saleh Jokar អគ្គមេបញ្ជាការរងនៃកងកម្លាំងឆ្មាំបដិវត្តន៍អ៊ីរ៉ង់ បានអះអាងនៅចុងសប្តាហ៍នេះ ថា កងកម្លាំងឆ្មាំបដិវត្តន៍អ៊ីរ៉ង់ បានត្រៀមខ្លួនរួចរាល់ហើយ ទាំងមីស៊ីល និងគ្រឿងសព្វាវុធផ្សេងទៀត ក្នុងការវាយបកទៅលើកម្លាំងរបស់អាមេរិកវិញ ប្រសិនបើមេដឹកនាំអាមេរិក ហ៊ានប៉ះពាល់ដល់ប្រទេសអ៊ីរ៉ង់ ជាមុន ។
លោក Mohammad Saleh Jokar បានបន្ថែមថា កងកម្លាំងឆ្មាំបដិវត្តន៍ ប្រើតែមីស៊ីលរយៈចម្ងាយខ្លីរបស់ខ្លួនប៉ុណ្ណោះ ក៏អាចបំផ្លាញនាវាដឹកយន្តហោះចម្បាំង និងក្រុមនាវាប្រយុទ្ធអាមេរិកនៅឈូងសមុទ្រ ពែក្ស (Persian gulf) បានយ៉ាងងាយដែរ។
គួររំលឹកថា រហូតដល់ថ្ងៃសុក្រ ទី១៧ ខែឧសភា នេះ អាមេរិកបានបញ្ជូននាវាពិឃាតចំនួន ២គ្រឿង គឺនាវា USS Gonzalez (DDG-66) និងនាវា USS McFaul (DDG-74) នាវាដឹកយន្តហោះចម្បាំង USS Ibraham Lincoln ក្រុមនាវាប្រយុទ្ធ Strike Group យន្តហោះទម្លាក់គ្រាប់បែកធុនធ្ងន់ B-52 និងប្រព័ន្ធមីស៊ីល Patriots នៅតំបន់មជ្ឈិមបូព៌ា ដើម្បីដាក់សម្ពាធ ដោយគំរាមវាយប្រហារលើអ៊ីរ៉ង់៕ ប្រភព ៖ Daily-khmer
