ភ្នំពេញ៖ ជនសង្ស័យពីរនាក់ត្រូវបានឃាត់ខ្លួន កាលពីម៉ោង៦និង១៥នាទីព្រលប់ ថ្ងៃទី១៨ខែ កញ្ញាឆ្នាំ២០១៤ ពាក់ព័ន្ធការគំរាមទារប្រាក់ចំនួន៥ម៉ឺនដុល្លារអាមេរិកពីថៅកែជនជាតិចិនសាំងហ្គាពួរនិងជាអគ្គនាយកក្រុមហ៊ុន HLH។
មន្ត្រីប៉ូលីសមួយរូបបានបញ្ជាក់ថា កម្លាំងសមត្តកិច្ចកងរាជអាវុធហត្ថរាជធានីភ្នំពេញ សហការជាមួយអាវុធហត្ថលើផ្ទៃប្រទេស និងខេត្តកណ្តាល ចាប់ជនសង្ស័យ៣នាក់ ទី១.ឈ្មោះ ឡេង សុខលាង អាយុ ២៨ឆ្នាំ មន្ត្រីពន្ធនាគារខេត្តកណ្តាល ផ្នែកកាន់សោរគុក ទី២.ឈ្មោះ ជួន រតនៈ មន្ត្រីពន្ធនាគារ ផ្នែក ការពារទណ្ឌិត និងទី៣.ឈ្មោះ សៅ កុសល (អ្នកកំពុងជាប់គុក) ជាមេខ្លោងរៀបចំផែនការ។ ចំណែកជនរងគ្រោះ ជាជនជាតិចិនសាំងហ្គាពួរ និងជាអគ្គនាយកក្រុមហ៊ុន HLH Agriculture Cambodia រកស៊ីនៅប្រទេសកម្ពុជាវិស័យកសិកម្ម ។
មន្ត្រីដដែលបន្តថា អ្នករៀបចំគម្រោងនេះគឺជាទណ្ឌិតដែលកំពុងជាប់ឃុំក្នុងពន្ធនាគារខេត្តកណ្តាល។គេបានទាកទងតាមទូរស័ព្ទទៅកាន់ថៅកែជនជាតិចិនសាំងហ្គាពួរ តាមរយៈស្ត្រីម្នាក់ដែលជាអ្នកអនាម័យ នៅក្រុមហ៊ុន HLH ។ក្រោយពីពួកគេសាកសួរដឹងរឿងរ៉ាវផ្ទៃក្នុងអស់ហើយ ក៏បានចាប់ផ្តើមប្រើល្បិចជំរិតទារប្រាក់ចំនួន៥ម៉ឺនដុល្លារពីថៅកែជនជាតិសាំងហ្គាពួរនោះតែម្តងដោយ គំរាមថា ប្រសិនបើមិនឲ្យតាមការទាមទារនោះទេគេនឹងសម្លាប់ចោល។
ដោយសារការភ័យខ្លាចថៅកែ ជនជាតិសាំងហ្គាពួររូបនោះ បានយល់ប្រគល់លុយចំនួន៥ម៉ឺនដុល្លារ តាមរយៈកន្លែងផ្ទេរប្រាក់ WING។ លុះដល់ពេលវេលានៅថ្ងៃទី១៨ ខែកញ្ញា ទៅយកលុយ ជនចាប់ជំរិត (កំពុងជាប់ឃុំ) បានឲ្យអនុរក្សពន្ធនាគារ ២នាក់ទៅយកលុយ នៅសាខា WING ចាក់ អង្រែក្រោម ខណ្ឌមានជ័យ នៅល្ងាចថ្ងៃទី១៨ ខែកញ្ញានេះ ត្រូវបានកម្លាំងអាវុធហត្ថ រាជធានីភ្នំពេញ ចាប់ខ្លួនតែម្តង។
គេបានដឹងថា បច្ចុប្បន្ននៅក្នុងពន្ធនាគារខេត្តកណ្តាល អ្នកទោសអាចមានសិទ្ធិទូរស័ព្ទចេញចូល បានដោយសេរី តាមអ្នករកស៊ីទូរស័ព្ទសាធារណៈនៅក្នុងនោះដោយយកថ្លៃក្នុងមួយនាទី ៣.០០០រៀល ៕រដ្ឋា
ជនសង្ស័យពេលសមត្ថកិច្ចឃាត់ខ្លួន
