បន្ទាយមានជ័យ៖ កាលពីថ្ងៃទី១៩ ខែកញ្ញា ឆ្នាំ២០១៤នេះ បុរសម្នាក់បានស្លាប់ដោយឆក់ខ្សែភ្លើង ខណៈតខ្សែភ្លើងឆក់ត្រីខុសបច្ចេក ទេសនៅក្នុងស្រះទឹកចម្ងាយប្រហែល៥ម៉ែត្រពីផ្ទះជនរងគ្រោះស្ថិតនៅភូមិបន្ទាយមានរិទ្ធ ឃុំគោករមៀត ស្រុកថ្មពួក ខេត្តបន្ទាយ មានជ័យ។
អ្នកភូមិបានឲ្យដឹងថា បុរសរងគ្រោះឈ្មោះ គង់ ដឿន ភេទប្រុស អាយុ៥៤ឆ្នាំ ។មុនពេលកើតហេតុគេឃើញជនរងគ្រោះ តខ្សែភ្លើងចុះទៅឆក់ត្រីក្នុងស្រះ ខណៈដែលជនរងគ្រោះកាន់ដងឆក់ចុះដល់ក្នុងទឹក ស្រាប់តែត្រូវភ្លើងឆក់ប្រកាច់ក្នុងទឹកតែម្តង។
ប្រភពបន្តថា ពេលនោះបងប្អូន ២ទៅ៣នាក់បានរត់ទៅបិទភ្លើង និងនាំគ្នាចុះទៅស្រង់ជនរងគ្រោះចេញពីទឹករួចយកទៅកប់ក្នុងដីតាមជំនឿតៗគ្នាដើម្បីសង្គ្រោះជីវិត ប៉ុន្តែមិនអាចជួយសង្គ្រោះបាននោះឡើយព្រោះជនរងគ្រោះបានស្លាប់តាំងពីនៅក្នុងទឹកស្រះមកម្ល៉េះ៕ រដ្ឋា
