ភ្នំពេញ៖ លោក ផៃ ស៊ីផាន រដ្ឋលេខាធិការ និងជាអ្នកនាំពាក្យទីស្តីការគណៈរដ្ឋមន្ត្រី បានបន្តផ្សព្វផ្សាយអំពីសកម្មជនការពារបរិស្ថានរបស់លោក ឈុត វុទ្ធី ដែលលោក ផៃ ស៊ីផាន ហៅថា ជាឈ្មួញឈើ និងជាអ្នកបាញ់សត្វព្រៃដ៏ល្បីល្បាញម្នាក់។នេះបើយោងតាមសារក្នុងហ្វេសប៊ុករបស់លោក ផៃស៊ី ផាន បានជូនជាពិសេសដល់ឯកអគ្គរដ្ឋទូតអាមេរិក ប្រចាំកម្ពុជានាថ្ងៃម្សិលមិញ។
ក្នុងហ្វេសប៊ុករបស់លោក ផៃ ស៊ីផាន បានសរសេរ ជាលើកទី២នេះថា “គោរពជូនបណ្តាញសារព័ត៌មាន និងប្រិយមិត្ត FBFs ជាពិសេសអគ្គរដ្ឋទូតសហរដ្ឋអាមេរិកប្រចាំទីក្រុងភ្នំពេញ ដោយឡែកពីមរណៈភាព ដែលគួរអោយសោកស្តាយនៃជីវិតរបស់ឪពុក ប្តី នៃគ្រួសារមួយ ខ្ញុំសូមខមាលទោសក្នុងកិច្ចបកស្រាយ ជម្រាបជូននូវអតីតភាព របស់លោក ឈុត វុទ្ធី ដើម្បីជាផលប្រយោជន៍ ដល់លោកប្រធានាធិបតី Barack Obama និងមន្ត្រីនៅសេតវិមាន ដើម្បីអោយអស់មន្ទិលសង្ស័យ ដែលខ្ញុំបានបកស្រាយពីលើកមុន”។ លោក ផៃ ស៊ីផាន បានលើកឡើងថា “លោក ឈុត វុទ្ធី ជាមនុស្សម្នាក់តស៊ូក្នុងឆាកជីវិតដូចបុរសដទៃទៀត។ ស្រុកកំណើតរបស់គាត់គឺនៅវិហាសួគ៌ ដែលមានបងប្អូនប្រុស ប្រុស ជាអ្នកចូលចិត្តដូចរូបលោកដែរ គឺការកំសាន្តជាអ្នកព្រានព្រៃ ដោយអ្នកស្រុកជិតស្និតជាមួយលោក បានឲ្យដំណឹងថា លោកមានកម្មសិទ្ធិយ៉ាងហោចណាស់ មានកាំភ្លើងប្រាំដើម អ្វីដែលអ្នកស្រុកបានឲ្យតម្លៃ និងកោតសរសើរដល់រូបលោក គឺលោកជាអ្នកបាញ់ត្រង់បំផុត ( Great Hunter ) ជាពិសេសកាំភ្លើងខ្លី Revolver ដែលអាចបាញ់សត្វបានដោយឡែកពីអ្នកដទៃ”។
លោក ផៃ ស៊ីផាន ក៏បានរៀបរាប់ពីកាំភ្លើង ដែលលោកឈុតវុទ្ធី បានប្រើនោះ គឺកាំភ្លើងទាំងប្រាំដើមនោះ គឺ: ១. CZ 452 Caliber 22 Lr ២. CZ 452 Caliber 22 Lr (with silencer) ៣. Marlin Stainless Caliber 22 magnum (with Silencer) ៤. Revolver RUGGER SP 101 Caliber 22 Lr ៥. Revolver Smith and Wesson Caliber 38 Special លោក ផៃ ស៊ីផាន បន្តថា “កាំភ្លើងដែលលោកស្ពាយជាប់និងស្មានៅក្នុងរូបថតនេះ គឺ Marlin Stainless Caliber 22 magnum ដែលភ្ជាប់ឧបករណ៍មិនឲ្យលឺសម្លេង ( Silencer )។ ប្រភេទសត្វ ដែលលោកចូលចិត្តបាញ់ និងបាញ់បានគឺ ប្រើស ជិតម្ភៃ ឈ្លូសរាប់រយ ទន្សាយ និងសំពោចរាប់រយ។ ស្នាដៃនេះ ដែលគេប្រសិទ្ធិនាមថា ជាព្រានឯក ប្រចាំតំបន់វាលវែង និងឱរ៉ាល”។
លោក ផៃ ស៊ីផាន បានបន្ថែមថា “លោក ឈុត វុទ្ធី ជាអ្នកលក់ឆ្អឹងខ្លា អ្វីដែលឈ្មួញសត្វព្រៃបានផ្តល់ព័ត៌មាន។ ចំណែករឿងពាក់ព័ន្ធ និងព្រៃឈើ លោក ឈុត វុទ្ធី ជាឈ្មួយដៃគូជាមួយ លោក វ៉ា សារិទ្ធ (កុំច្រឡំ និងមន្ត្រីនគរបាល) ដែលលោកពូកែទាក់ទង់ និងអតីតយោធាចូលនិវត្តន៏ក្នុងការកាប់ប្រមូល និងបោះដុំ អោយឈ្មួញធំៗ ( Great Log trader )។ លោកបានផ្លាស់ប្តូរអាជីពជាច្រើនអង្គភាព។ អ្នកស្រុកគេប្រាប់ខ្ញុំថាគាត់ជាកងរាជអាវុធហត្ថ (ខ្ញុំមិនច្បាស់ទេ)។ From Great Hunter and Great Log trader to The Great man.”។
សូមរម្លឹកថា កាលពីថ្ងៃទី២៦ ខែកញ្ញា ឆ្នាំ២០១៤ លោក ផៃ ស៊ីផាន សរសេរសារមួយលើហ្វេសប៊ុក ដោយសម្តែងការភ្ញាក់ផ្អើល ឬអាម៉ាស់ ចំពោះការលើកឡើងរបស់លោកប្រធានាធិបតីអាមេរិក នៅក្នុងករណីលោក ឈុត វុទ្ធី ដែលគេ និងលោកប្រធានាធិបតីអាមេរិក ជឿជាក់ថា ជាសកម្មជនព្រៃឈើ ហើយលោកអូបាម៉ា បានប្រកាសថា ជាបុគ្គលឆ្នើម ” Great Man “។
ប៉ុន្តែតាមលោកផៃស៊ីផាន គឺលោក ឈុត វុទ្ធី ជាឈ្មួញឈើ និងជាអ្នកបាញ់សត្វព្រៃដ៏ល្បីល្បាញ។ នេះបើតាមអ្វីដែលលោកផៃស៊ីផាន អះអាងថា អ្នកស្រុកវាលវែង បានប្រាប់រូបលោក។ សូមរម្លឹកថា កាលពីថ្ងៃទី២៦ ខែមេសា ឆ្នាំ២០១២ លោក ឈុត វុទ្ធី ជាប្រធានអង្គការការពារព្រៃឈើ បានជូនដំណើរស្ត្រីអ្នកកាសែតពីរនាក់របស់កាសែត The Cambodia Daily គឺកញ្ញា ផន បុប្ផា អាយុ ២៧ ឆ្នាំ និងកញ្ញា Plokhii ជនជាតិកាណាដា អាយុ ២៧ឆ្នាំ តាមឡានឡង់គ្រីស័រ ពណ៌ឈាមជ្រូកដ៏ចាស់របស់លោក ឈុត វុទ្ធី ពីខេត្តពោធិ៍សាត់ ទៅកាន់ខេត្តកោះកុង តាមជួរភ្នំក្រវាញ។
ទៅដល់ក្រុមហ៊ុន Timber Green ក៏កើតមានជម្លោះជាមួយប៉េអឹម និងទាហាន យាមក្រុមហ៊ុន ហើយលោក ឈុត វុទ្ធី ក៏ត្រូវប៉េអឹម បាញ់សម្លាប់លើឡានរបស់លោក៕fpm
លោក ផៃ ស៊ីផាន បង្ហាញរូលោក ឈុត វុទ្ធី ក្នុងហ្វេសប៊ុក កាលពីថ្ងៃម្សិលមិញ
