បន្ទាយមានជ័យ ៖ នេះជាលើកទី២ហើយ ដែលខ្សែរថភ្លើងមួយបានបុកចំទទឹងរថយន្តប្រភេទ មួយ បាំងកន្លះមួយគ្រឿង កាលពីវេលាម៉ោង១០ និង៣៥ នាទី ថ្ងៃទី២១ ខែមេសា ឆ្នាំ២០១៨ នៅចំណុច សួនច្បារប៉ោយប៉ែតមានជ័យ និងឃ្លាំងស្តុកកៅស៊ូបេទីម ចាក់ថ្នល់ក្នុងភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត បណ្តាលឲ្យ អ្នកបើកបររថយន្តរបួសធ្ងន់។
ប្រភពព័ត៌មានពីកន្លែងកើតហេតុ បានឲ្យដឹងថា ខ្សែរថភ្លើងមួយ បានចេញដំណើរពីក្រុងប៉ោយប៉ែតទៅក្រុងសិរីសោភ័ណ តែត្រូវស្ទះមួយអស់រយ: ទម្រាំស្ទូចឡាននោះចេញបាន។ រថយន្តតូចម៉ាកនីសាន់១បាំងកន្លះ ពាក់ស្លាកលេខភ្នំពេញ ២L ៨៧២៧ អ្នកបើកបររថយន្ត ឈ្មោះ ជន សុវណ្ណា ភេទប្រុស អាយុប្រមាណជាង៤០ឆ្នាំ។ អ្នកបើកបររថយន្តបានរងរបួសធ្ងន់ធ្ងរ ហើយត្រូវកម្លាំងកង រាជអាវុធហត្ថដឹកទៅសង្គ្រោះនៅមន្ទីរពេទ្យបង្អែកក្រុងប៉ោយប៉ែត។ ក្បាលរថភ្លើងបានបុក និងរុញរថយន្តចម្ងាយជាង៥០ម៉ែត្រទើបឈប់។ ក្រុមសង្គ្រោះបានយកឡានស្ទូចមកស្ទូចរថយន្តនីសាន់ពណ៌ នោះចេញ ដើម្បីបើកផ្លូវអោយខ្សែរថភ្លើងអាចបន្តដំណើរមកក្រុងសិរីសោភ័ណទៀត។
សាក្សីនៅកន្លែងកើតហេតុ បានប្រាប់ឲ្យដឹងថា ៖ នៅកន្លែងកើតហេតុ ជាទីប្រសព្វផ្លូវដែកនិងផ្លូវលំបំបែក ជាមួយនឹងផ្លូវជាតិលេខ៥ ម្តុំឃ្លាំងស្តុកកៅស៊ូចាក់ថ្នល់ និងសួនច្បារប៉ោយប៉ែតមានជ័យ ហើយនៅទីនោះ គ្មានបុគ្កលិកក្រុមហ៊ុនរ៉ូយ៉ាល់ផ្នែកលើកទង់ពណ៌ក្រហមសម្រាប់បញ្ជៀសចរាចរ ណ៍ ទេ។ ប៉ុន្តែអ្នកបើកបរតាមផ្លូវថ្នល់ និងអ្នកដំណើរឆ្លងកាត់ទទឹងផ្លូវដែកសុទ្ធតែបានឮសម្លេងស៊ីប្លេរបស់រថភ្លើង ហើយត្រូវឈប់ ដោយឡែកតែរថយន្តដែលរងគ្រោះថ្នាក់មួយគ្រឿងប៉ុណ្ណោះ ដែលបើកឆ្លងកាត់ទើបបណ្តាលឲ្យជួបគ្រោះថ្នាក់បែបនេះតែម្តង៕
