ភ្នំពេញ ៖ នៅវេលាម៉ោង ៩ និង៣០នាទី ព្រឹកថ្ងៃទី២៦ ខែសីហា ឆ្នាំ២០១៨ មានហេតុការណ៍គ្រោះថ្នាក់ចរាចរណ៍មួយបានកើតឡើងនៅម្តុំទួលទំពូង មុខវត្តទួលទំពូងតែម្តង តាមបណ្តោយផ្លូវម៉ៅសេទុង ស្ថិតក្នុងសង្កាត់ទួលទំពូង១ ខណ្ឌចំការមន រាជធានីភ្នំពេញ រវាង NISSAN ដែលបានបត់ត្រលប់ក្រោយមិនប្រយ័ត្នបានជ្រុលទៅគៀរម៉ូតូសណ្តោងរ៉ុម៉ក់និងថយន្តដឹកឥដ្ឋទៅផ្ទប់នឹងរបាំងបុកចែកទ្រូងផ្លូវបាក់អស់១កង់ បណ្តាលអោយរថយន្តនិងម៉ូតូសណ្តោងរ៉ុម៉ក់រងការខូចខាតទាំងសងខាង។
ប្រភពពីកន្លែងកើតហេតុបានអោយដឹងថា មុនពេលកើតហេតុរថយន្ត NISSAN បើកបរក្នុងទិសដៅពីលិចទៅកើតពេលដែលមកដល់ចំណុចកើតហេតុបម្រុងបត់ឆ្លងផ្លូវត្រលប់ក្រោយ តែដោយសារការបត់លឿនពេកខ្វះការប្រុងប្រយ័ត្ន ធ្វើឲ្យម៉ូតូសណ្តោងរ៉ុកម៉ក់ និងរថយន្តដឹកឥដ្ឋមួយគ្រឿងដែលមកពីក្រោយស្របទិសគ្នា បានគៀប ជាប់ផ្ទប់គ្នាទៅនឹងរបាំងពុះចែកទ្រូងផ្លូវតែម្តង។ ក្នុងហេតុករណ៍នេះមិនបណ្តាលអោយមាននរណាម្នាក់រងរបួសទេ គ្រាន់តែរងការខូចខាតសម្ភារៈ និងបាក់របាំងបុកចែកទ្រូងផ្លូវដែលសម្បិត្តសាធារណៈ អស់មួយកង់ និងខូចខាតរថយន្តតែប៉ុណ្ណោះ។
ក្រោយពេលកើតហេតុសមត្ថកិច្ចបានចុះវាស់វែងហើយបានយករថយន្ត និងរ៉ុម៉ក់ទៅរក្សាទុកបណ្តោះអាសន្នរង់ចាំការដោះស្រាយពេលក្រោយទៀត៕
