ខេត្តព្រះសីហនុ ៖ ស្ត្រីម្នាក់បានស្លាប់ និង៤នាក់ផ្សេងទៀត បានរងអាការៈពុលធ្ងន់ធ្ងរ បន្ទាប់ពីពួកគាត់ដកផ្សិតយកមកចម្អិនបរិភោគ។

ហេតុការណ៍នេះ បានកើតឡើងនៅរសៀលថ្ងៃទី១៧ ខែឧសភា ឆ្នាំ ២០១៩ វេលាម៉ោង ១៣៖៣០ ស្ថិតនៅតំបន់សេដ្ឋកិច្ចពិសេស ខេត្តព្រះសីហនុ ។

បន្ទាប់ពីមានករណីពុលភ្លាមៗ មនុស្សចំនួន៥នាក់ ត្រូវបានប្រជាពលរដ្ឋនៅជិតខាង ជួយបញ្ជូនទៅមន្ទីរពេទ្យបង្អែកខេត្តព្រះសីហនុ។ គ្រូពេទ្យបង្ហាញក្តីបារម្ភថា ប្រជាពលរដ្ឋចំនួនបីនាក់ ក្នុងចំណោម ៥នាក់ មានសភាពធ្ងន់ធ្ងរជាងគេ ដែលអាចប្រឈមដល់អាយុជីវិតជីវិត។

យ៉ាងណាក៏ដោយ នៅរសៀលថ្ងៃដដែលនេះ ស្ត្រីម្នាក់ដែលរងអាការៈពុលខ្លាំងជាងគេ បានទទួលមរណភាពហើយ បន្ទាប់ត្រូវបានបញ្ជូនមកដល់មន្ទីរពេទ្យបង្អេកខេត្ត។

អាជ្ញាធរ និងមន្ត្រីជំនាញ កំពុងចុះស្រាវជ្រាវ ដើម្បីកំណត់ពីមូលហេតុពិតដែលនាំឲ្យមានមនុស្សស្លាប់ ដោយករណីផ្សិតនេះ៕