ដោយ៖ខេមរា
សៀមរាប៖ ជនដៃដល់២នាក់ពាក់ព័ន្ធករណីកាត់ផ្តាច់ក្បាលនារីវ័យក្មេងម្នាក់នៅក្នុងផ្ទះសំណាក់យីហោ “ប្រាសាទកែវ” ស្ថិតនៅភូមិតាភុល សង្កាត់ស្វាយដង្គុំ ក្រុងសៀមរាប ត្រូវបានសមត្ថកិច្ចចាប់ខ្លួនបានហើយ កាលពីល្ងាចថ្ងៃទី១៣ ខែកុម្ភៈ ឆ្នាំ២០១៦នេះ។ សមត្ថកិច្ចបញ្ជាក់ថាឃាតកម្មនេះបណ្តាលមកពីស្តីដណ្តឹងមិនបាន។
សេចក្តីរាយការណ៍បឋមបានឲ្យដឹងថា ឃាតកម្មដ៏សាហាវព្រៃផ្សៃនេះ គឺផ្តើមចេញពីរឿងបុរសជាឃាតករមានគំនុំដោយសារចូលស្តីដណ្តឹងនារីរងគ្រោះមិនបាន ហើយក៏ណាត់ជួបគ្នានៅផ្ទះសំណាក់ខាងលើរួចធ្វើឃាតតែម្តង។
នារីរងគ្រោះមានឈ្មោះ ឡេន សិលា អាយុ២៤ឆ្នាំ រស់នៅភូមិបឹងខ្នាត ឃុំខ្នាត ស្រុកពួក ខេត្តសៀមរាប។ ចំណែកបុរសត្រូវចោទជាឃាតករម្នាក់ឈ្មោះ ចាន់ ឆាយ៉ា ហៅសំ ភារ៉ាត់ អាយុ៤០ឆ្នាំ មានស្រុកកំណើតនៅខេត្តបាត់ដំបង និងធ្លាប់មានប្រពន្ធ និងកូនរួចហើយ។
ប្រភពព័ត៌មានបានបន្តថា កន្លងមកបុរស ចាន់ ឆាយ៉ា បានព្យាយាមចូលស្តីដណ្តឹងនារីរងគ្រោះ ខណៈដែលខ្លួនមិនទាន់បានលែងលះជាមួយប្រពន្ធដើមដាច់ស្រេចនៅឡើយ ទើបមិនអាចស្តីដណ្តឹងនាងបានសម្រេច។ដោយសារតែករណីនេះ ជនដៃដល់បានខឹងសម្បានឹងនារីរងគ្រោះដែលបដិសេធមិនព្រមរៀបការក៏សម្រេចចិត្តណាត់ជួបនារីរងគ្រោះនៅផ្ទះសំណាក់ខាងលើហើយក៏សម្លាប់ដោយកាត់ក្បាលផ្តាច់ចេញពីខ្លួន រួចលួចយកចេញពីផ្ទះសំណាក់ទៅដុតនៅកណ្តាលវាលស្រែខាងក្រោយផ្ទះ ស្ថិតនៅ ភូមិព្រៃចាស់ សង្កាត់គោកចក ក្រុងសៀមរាប ពោលជិតព្រលានយន្តហោះ ដើម្បីបំបាត់ភ័ស្តុតាង ដោយបន្សល់ទុកសាកសពគ្មានក្បាលនៅក្នុងផ្ទះសំណាក់ប៉ុណ្ណោះ។
បន្ទាប់ពីកើតមានការភ្ញាក់ផ្អើលពីឃាតកម្មដ៏ឃោរឃៅនៅវេលាម៉ោង១២ ថ្ងៃត្រង់ថ្ងៃទី១៣ ខែកុម្ភៈ នេះ កម្លាំងមានសមត្ថកិច្ចខេត្តសៀមរាបគ្រប់ថ្នាក់បានចេញប្រតិបត្តិការតាមប្រមាញ់រកឃាតករហើយនៅរសៀលថ្ងៃទី១៣ ខែកុម្ភៈដដែល ជនត្រូវចោទម្នាក់ឈ្មោះ ចាន់ ឆាយ៉ា ក្នុងចំណោមគ្នីគ្នា២នាក់ត្រូវបានសមត្ថកិច្ចចាប់ឃាត់ខ្លួនខណៈកំពុងដុតក្បាលនារីរងគ្រោះនៅកណ្តាលវាលស្រែក្បែរភូមិស្ថិតក្នុងក្រុមទី៣ ភូមិគោកដូង សង្កាត់ទឹកវិល ក្រុងសៀមរាប ដើម្បីបំបាត់ភ័ស្តុតាង។
ប្រភពបញ្ជាក់ថា ជនត្រូវចោទ២នាក់ក្នុងអំពើឃាតកម្មនេះ ត្រូវបានសមត្ថកិច្ចចាប់ខ្លួនដាច់ដោយឡែកពីគ្នាគឺម្នាក់ត្រូវចាប់ខ្លួនដោយកម្លាំងកងរាជអាវុធហត្ថ និងម្នាក់ទៀតចាប់ខ្លួនដោយកម្លាំងនគរបាលខេត្ត ប៉ុន្តែជនត្រូវចោទម្នាក់ទៀតដែលគេអះអាងថា ចាប់ខ្លួនបានដែរនោះមិនទាន់ស្គាល់អត្តសញ្ញាណនៅឡើយទេ ។បច្ចុប្បន្នសមត្ថកិច្ចកំពុងបន្តស៊ើបអង្កេតបន្ថែមទៀតមុនពេលបញ្ជូនសំនុំរឿងនេះទៅតុលាការដើម្បីចាត់ការតាមនីតិវិធី៕
