ដោយ៖រដ្ឋា
ខេត្តក្រចេះ៖ ស្ពានដែកដែលស្ថិតនៅចំណុចផ្លូវាងស្ពានកំពង់រាំង នៅព្រឹកមិញនេះ បានរងការបាក់ស្រុតខូចខាតទាំងស្រុងដោយសាររថយន្តធុនធ្ងន់មួយគ្រឿងដែលដឹកដំឡូងមីពេញបន្ទុកបានបើកឆ្លងកាត់ ប៉ុន្តែមិនបង្កគ្រោះថ្នាក់ដល់មនុស្សទេ។
គួររំឭកថា កន្លងមកនេះ មានស្ពាន ថ្នល់ជាច្រើនកន្លែងបានរងការខូចខាតដោយសាររថយន្តដឹកទំនិញធុនធ្ងន់បើកឆ្លងកាត់ ហើយថ្មីៗនេះ រាជរដ្ឋាភិបាកកម្ពុជាបញ្ចេញប្រតិកម្មយ៉ាងខ្លាំងករណីសមត្ថកិច្ចបើកដៃឲ្យរថយន្តយីឌុបដឹកអង្ករលើសចំណុះរហូតដល់ជាង៧០តោនបើកឆ្លងកាត់ស្ពានអ្នកលឿងបង្កឲ្យមានការខួចខាត។ ឥលូវនេះ មានរថយន្ដយីឌុបខ្នាតយក្យមួយគ្រឿងទៀតបានដឹកដំឡូងពេញបន្ទុកធ្វើឲ្យបាក់ស្ពាននៅស្រុកឆ្លូង។
ហេតុការណ៍នេះកើតឡើង កាលពីវេលាម៉ោង១និង ៣០នាទីទៀបភ្លី ឈនចូលថ្ងៃទី២៦ ខែកុម្ភៈឆ្នាំ២០១៦ បង្កឲ្យមានការភ្ញាក់ផ្អើលយ៉ាងខ្លាំងត្រង់ចំណុចស្ពានដែកមួយកន្លែងនៅផ្លូវថ្មី ជាធ្វើវាងស្ពានកំពង់រាំង ខណៈកំពុងជួសជុលស្ថិត នៅស្រុកឆ្លូង ខេត្តក្រចេះ។
លោក ហេង ចន្ថា អភិបាលស្រុកឆ្លូងបានប្រាប់តាមទូរស័ព្ទថា ក្រោយរថយន្ដនោះបានធ្វើចរាចរណ៍ បណ្ដាលឲ្យបាក់ស្ពានរួចមក ម្ចាស់រថយន្ដបំរុងយកឡានស្ទួចយករថយន្ដ និងកើបដំឡូងយកវិញ ប៉ុន្តែត្រូវកំលាំងរបស់លោកចុះទៅដល់ឃាត់មិនទាន់ឲ្យស្ទួចយកដោយរង់ចាំធ្វើការស្រាវជ្រាវ រកផលប៉ះពាល់សិន។លោកអភិបាលស្រុកបន្តថា ម្ចាស់រថយន្ដដឹកដំឡូងនោះលោកមិនបានចាំឈ្មោះនោះទេ ប៉ុន្តែលោក បានបញ្ជាក់ថា ម្ចាស់រថយន្ដនោះជាអ្នករស់នៅស្រុកឆ្លូង ខេត្តក្រចេះ ដែរ ៕
