ដោយ៖ ប៉ែន សុផល
បាត់ដំបង÷ក្រុមហ៊ុនជីកកកាយរុករករ៉ែយ៉ាងអនាធិបតេយ្យដែលគេដឹងថា គ្មានច្បាប់ទម្លាប់មួយកន្លែងស្ថិតក្នុងឃុំភ្នំព្រឹក ស្រុកភ្នំព្រឹក ខេត្តបាត់ដំបង កំពុងធ្វើសកម្មភាពជីកកកាយរករ៉ែក្រោមដីយ៉ាងគគ្រឹកគគ្រេងមិនតែប៉ុណ្ណោះ បានបង្ហូរនូវកាកសំណល់សារធាតុគីមីចូលទៅក្នុងអូរទឹកបង្កឲ្យមានផលប៉ះពាល់ដល់ប្រជាពលរដ្ឋដែលរស់នៅក្នុងតំបន់នោះយ៉ាងធ្ងន់ធ្ងរ។
ពាក់ព័ន្ធទៅនឹងករណីខាងលើនេះត្រូវបានបុគ្គលិក កម្មករ និងថៅកែជនជាតិចិន បានប្រាប់ មេគង្គប៉ុស្តិ៍ ថា:ក្រុមហ៊ុនកំពុងរត់ច្បាប់ហើយសកម្មភាពជីករុករករ៉ែនា ពេលនេះគឺក្រុមហ៊ុនគ្រាន់តែសាកល្បងធ្វើតែប៉ុណ្ណោះ។
លោក អ៊ាន មាឃ ប្រធានមន្ទីររ៉ែ និងថាមពលខេត្តបាត់ដំបងបានប្រាប់តាមរយៈទូរស័ព្ទកាលពីព្រឹកមិញនេះថា៖រឿងនឹងលោកបានប្រគល់អោយអាជ្ញាធរស្រុកជាអ្នកមើលខុសត្រូវព្រោះស្រុកនៅជិត និងមានកម្លាំងគ្រប់គ្រាន់ហើយបើក្រុមហ៊ុននៅតែរឹងរុះធ្វើបំពានគ្មានច្បាប់ទំលាប់ទៀតលោកនឹងដាក់ពាក្យ បណ្តឹងចូលទៅខាងតុលាការ។
ពាក់ព័ន្ធបញ្ហានេះលោក សួន គឿន អភិបាលស្រុកភ្នំព្រឹក បានប្រាប់តាមទូរស័ព្ទថា: លោកដឹងតែក្រុមហ៊ុនភូយ៉ាង និងប្រជាពលរដ្ឋប្រម៉ាណជាង១០គ្រួសារដែលកំពុងជីកកកាយរករ៉ែនៅចំណុចខាងលើ ព្រោះគេមានច្បាប់អនុញ្ញាតិត្រឹមត្រូវ។ ចំណែកថាមានក្រុមហ៊ុនថ្មីដែលកំពុងជីកកកាយនៅចំណុចខាងលើនោះដែរ លោកមិនបានដឹងទេ។លោកថា លោកនឹង ចាត់តាំងអោយ លោក ហែម ស៊ីណាក់ ជាអភិបាលរងស្រុក ដឹកនាំកម្លាំងចុះទៅមើលព្រឹកថ្ងៃទី៧ ខែមីនា នេះហើយ។
គួរកត់សម្គាល់ថា ភាពអនាធិបតេយ្យជាច្រើននៅខេត្តបាត់ដំបងបានកើតឡើងក្រោមលេសដែលមិនសមហេតុផលហើយមិនត្រូវបានអាជ្ញាធរមូលដ្ឋានចាត់វិធានការឡើយ មិនតែប៉ុណ្ណោះរឹតតែខំបិទបាំងនិងធ្វើ របាយការណ៍ភូតថ្នាក់លើដើម្បីបំភាន់ពីអំពើពុករលួយរបស់ខ្លួន ដូចជាភាពអនាធិបតេយ្យនៃការ ជីកដីលក់ជាដើម ហើយលើកនេះនៅស្រុកភ្នំព្រឹក គេឃុបឃិតគ្នាឲ្យមានការជីករ៉ែធម្មជាតិតាមអំពើចិត្ត លុះត្រូវបានសាកសួរដោយអ្នកកាសែត ផ្នែកជំនាញ និងអាជ្ញាធរបានឆ្លើយដាក់ដូចសម្លកំពឹស៕
