ដោយ៖ស សាម
ភ្នំពេញ: មួយរយៈពេលចុងក្រោយនេះរឿងគួរឲ្យភ្ញាក់ផ្អើល និងនឹកស្មានមិនដល់មួយបានកើតឡើងក្នុងពន្ធនាគារកែប្រែទី១ ឬគុកព្រៃស ក្នុងខណ្ឌដង្កោជាយរាជធានីភ្នំពេញពាក់ព័ន្ធនឹងករណីទណ្ឌិតបញ្ជាការជួញដូរគ្រឿងញៀនដ៏ធំចេញពីក្នុងគុក ។
ការភ្ញាក់ផ្អើលនេះ បន្ទាប់ពីមានការសារភាពពីមេខ្លោងជាទណ្ឌិតគ្រឿងញៀនកំពុងអនុវត្តទោសក្នុងពន្ធនាគារអាចបញ្ជាឲ្យបណ្តាញធ្វើសកម្មភាពនៅខាងក្រៅបានយ៉ាងរំភើយ ។
មានការចោទសួរថា បញ្ហាបែបនេះ តើប្រធានគុកព្រៃសគួរទទួលខុសត្រូវកម្រិតណា ឬមិនត្រូវមានទោសអ្វីទាំងអស់ ? ។ប៉ុន្តែទោះជាយ៉ាងនេះក្តី រហូតមកដល់ពេលនេះ គ្មានលេចឮព័ត៌មានណាមួយដែលពាក់ព័ន្ធនឹងលោកប្រធានគុកព្រៃសនោះទេ ។
មជ្ឈដ្ឋានមួយចំនួនបានរិះគន់ថា វាជាគំរូអាក្រក់មួយសម្រាប់ពន្ធនាគារដែលជាទីសម្រាប់អប់រំ កែប្រែមនុស្សធ្លាប់ប្រព្រឹត្តអំពើខុសឆ្គងឲ្យវិលត្រឡប់ចូលក្នុងសង្គមដ៏ល្អប្រពៃវិញដោយត្រឹមត្រូវ ។ តើក្រុមទណ្ឌិតទាំងនោះ អាចនឹងកែប្រែខ្លួនបានដែរឬទេ ប្រសិនបើភាពធូររលុងកើតមានឡើងក្នុងពន្ធនាគារព្រៃស បែបនេះ ។
កន្លងមក អង្គការសង្គមស៊ីវិល និងក្រុមសិទ្ធិមនុស្សក្នុងស្រុកធ្លាប់បានអំពាវនាវដោយសម្តែងក្តីព្រួយបារម្ភយ៉ាងខ្លាំងពីបញ្ហាមានការចរាចរណ៍គ្រឿងញៀនក្នុងពន្ធនាគារ។
ឥឡូវនេះ មិនត្រឹមតែជួញដូរក្នុងគុកប៉ុណ្ណោះទេ ពួកគេនូវបានបញ្ជាការចរាចរណ៍គ្រឿងញៀនដ៏ធំចេញពីពន្ធនាគារថែមទៀតផង ដែលករណីនេះត្រូវគេមើលឃើញថា ពិតជាមានបណ្តាញ និងការចាត់តាំងច្បាស់លាស់ទើបអាចធ្វើទៅបាន៕
