ខេត្តរតនគិរី៖ស្ត្រីជាជនជាតិដើមភាគតិចម្នាក់ ត្រូវសាឡាងបុកស្លាប់ មុនពេលបញ្ជូនដល់មន្ទីរពេទ្យ។ ហេតុការណ៍នេះកើតឡើងនៅវេលាម៉ោង១១ និង០០នាទី ថ្ងៃត្រង់ ថ្ងៃទី១០ ខែមីនា ឆ្នាំ២០១៦ ស្ថិតក្នុងភូមិលូមចាស់ ឃុំម៉ាលិក ស្រុកអណ្ដូងមាស ខេត្តរតនគិរី ត្រង់ចំណុចកំពង់ចំឡង ឆ្លងទន្លេសាសាន្ត។
ស្ត្រីជនរងគ្រោះក្នុងករណីនេះមានឈ្មោះ រម៉ាម អុញ អាយុ៤៥ ឆ្នាំ ជនជាតិដើមភាគតិចកាចក់ រស់នៅភូមិ តាណង ឃុំតាលាវ ស្រុកអណ្ដូងមាស ខេត្តរតនគិរី មានកូន១០នាក់ ប្រុស៥នាក់ ស្រី៥នាក់ មានប្ដីឈ្មោះ រចំ ផ្លេក អាយុ៥២ឆ្នាំ ជនជាតិដូចគ្នា។
តាមប្រភពព័ត៌មានពីកន្លែងកើតហេតុបានអោយដឹងថា មុនពេលកើតហេតុគេឃើញស្ត្រីរងគ្រោះ ជិះសាឡាងឆ្លងទន្លេសេសាន្តពីត្រើយខាងលិចទៅ ត្រើយខាងកើត គឺពីទីរួមស្រុកអណ្ដូងមាស ទៅភូមិ តាណង ដោយមានមនុស្សជាច្រើនលើនោះ ព្រមទាំងមានរថយន្ត២គ្រឿងផងដែរ ខណៈទៅដល់កៀនច្រាំងទន្លេ ស្រាប់តែជនរងគ្រោះ លោតពីលើសាឡាងទៅច្រាំងទន្លេ ហើយក៏រអិលដីខ្សាច់ចុះមកក្រោមវិញ បណ្ដាលអោយសាឡាងបុកចូលច្រាំង បុកចំជនរងគ្រោះតែម្ដង។
ក្រោយពេលកើតហេតុ ម្ចាស់សាឡាងក៏ប្រញាប់ប្រញាល ដឹកយកជនរងគ្រោះ ទៅសង្គ្រោះបន្ទាន់នៅមន្ទីរពេទ្យស្រុក ពេលទៅដល់ ត្រូវបុគ្គលិកពេទ្យពិនិត្យ ហើយប្រាប់ថា ជនរងគ្រោះស្លាប់បាត់ទៅហើយ៕
