ខេត្តកោះកុង៖ចៅក្រមស៊ើបសួរ នៃសាលាដំបូង ខេត្តកោះកុង បានចេញដីកាចាប់ខ្លួន សកម្មជនអារ៉ែងជនជាតិអេស្ប៉ាញ លោក អាឡិច ហ្សង់ដ្រូ ហ្គន់សាឡេស ដេវិតសិន ( Alejandro Gonzalez Davidson ) ខណៈដែល សកម្មជន រូបនោះ អះអាងថា លោក នឹង ចូលមកប្រទេសកម្ពុជា បើទោះជាលោកមិនទទួលបានទិដ្ឋាការក៏ដោយ ដើម្បីប្រឈមមុខនឹងតុលាការ។
លោក អាឡិច ដែលត្រូវបានរដ្ឋាភិបាលបណ្តេញចេញពីកម្ពុជាកាលពីឆ្នាំ២០១៥ បានប្រាប់បណ្តាញសារព័ត៌មានថា លោកបានទទួលដីកាមួយ ចោទប្រកាន់លោកពីបទសមគំនិតក្នុងអំពើគំរាមកំហែងនិងធ្វើឲ្យខូចខាតដោយភ្ជាប់នូវបញ្ហាអ្វីមួយ ប្រព្រឹត្តទៅនៅស្រុកបទុមសាគរ ខេត្តកោះកុង កាលពីថ្ងៃទី២៦ដល់ថ្ងៃទី២៨ខែកក្កដា ឆ្នាំ២០១៥និងនៅថ្ងៃទី១២ខែសីហា ឆ្នាំ២០១៥។
លោក អាឡិច បានបញ្ជាក់ថា តុលាការបានបង្គាប់ឲ្យចាប់ខ្លួនលោកនិងបញ្ជាដល់កងកម្លាំងសាធារណៈឲ្យស្រាវជ្រាវចាប់និងនាំខ្លួនរូបលោកទៅពន្ធនាគារកោះកុងឬមណ្ឌលឃុំខ្លួនបណ្តោះអាសន្ននៅកន្លែងចាប់ខ្លួន។
តាមសកម្មជន តំបន់អារ៉ែង រូបនោះបានអះអាងថា លោកក៏បានស្នើរដ្ឋមន្ត្រីក្រសួងមហាផ្ទៃ ដើម្បីសុំទិដ្ឋាការចូលមកកម្ពុជាវិញ ដើម្បីចូលរួមសវនាការបំភ្លឺនៅខេត្តកោះកុង ។ ប៉ុន្តែត្រូវបានបដិសេធមិនទទួលលិខិតនោះ។ យ៉ាងណាក៏ដោយលោកនឹងរកមធ្យោបាយផ្សេងទៀត ដើម្បីចូលមកប្រទេសកម្ពុជា៕
