ខេត្តបាត់ដំបង៖យ៉ាងហោចណាស់ក៏មានកម្មករប្រមាណ៣០នាក់ដែរ ដែលបានដួលសន្លប់នៅក្នុងរោងចក្រស្បែកជើងមួយកន្លែង ស្រុកសំពៅលូន ដែលចាំបាច់ ត្រូវបញ្ជូនទៅកាន់មន្ទីរពេទ្យជាបន្ទាន់ដើម្បីសង្គ្រោះ ដោយសារតែពួកគេមានការអស់កំលាំងក្នុងការខំធ្វើការលើសម៉ោងផងនិងការទទួលស្រូបយកក្លិនសារធាតុជ័រកៅស៊ូពីក្នុងរោងចក្រនោះផង ទើបធ្វើអោយពួកគេមានការដួលសន្លប់ជាបន្តបន្ទាប់បែបនេះ ។
តាមសេចក្តីរាយការណ៍ពីខ្សែបន្ទាត់ព្រំដែនកម្ពុជា ថៃ បានអោយដឹងថា ចាប់ពីម៉ោង១០ និង១០នាទី ព្រឹកថ្ងៃទី៦ ខែមេសា ឆ្នាំ២០១៦ ត្រង់ចំនុចក្នុងរោងចក្រផលិតស្បែកជើងមួយកន្លែង ស្ថិតក្នុងភូមិវាលវង់ ឃុំតាស្តា ស្រុកសំពៅលូន ខេត្តបាត់ដំបង គឺមានកម្មករដែលបម្រើការជាកម្មករនៅក្នុងរោងចក្រនោះ បានដួលសន្លប់ជាបន្តបន្ទាប់ដែលគិតមកទល់នឹងម៉ោង១១គត់ មានចំនួន៣០នាក់ហើយដែលក្នុងនោះគឺមាននារីចំនួន២៩នាក់ ។
ប្រភពដដែលបានបន្តថា នៅពេលនោះដែរគឺមានកម្មករជាច្រើននាក់បានរត់ចេញមកក្រៅនិងធ្វើអោយមានការភ្ញាល់ផ្អើលយ៉ាងខ្លាំង ដោយសារតែមានកម្មករជាច្រើននាក់បានដួលសន្លប់បែបនេះ ហើយនៅពេលនោះដែរ គេសង្គេតឃើញថា ទាំងខាងសមត្ថកិច្ចក៏ដូចជាខាងរោងចក្រ បានយករថយន្តមួយជួយដឹកកម្មករទាំងនោះបញ្ជូនទៅសង្គ្រោះនៅឯមន្ទីរពេទ្យបង្អែកស្រុកសំពៅលូន ។
នៅពេលនោះដែរក៏មានកម្មករខ្លះបានដឹងខ្លួន និងមានអការៈធូរស្រាលឡើងវិញ ដោយពួកគេបាននិយាយថា បញ្ហានេះគឺបណ្តាលមកពីការខំប្រឹងប្រែងធ្វើការលើសម៉ោងដោយគ្មានពេលសម្រាក ព្រមទាំងមានការបង្ខំអោយធ្វើការពីសំណាក់ថៅកែដែលជាជនជាតិថៃ ផងដែរ ដែលពួកគេមិនអនុញ្ញាតិអោយឈប់សម្រាកដោយគ្មានហេតុផលនោះឡើយហើយម្យ៉ាងទៀត រោងចក្រពុំមានបង្អួចត្រឹមត្រូវដើម្បីអោយខ្យល់ចេញចូល ដែលបញ្ហានេះហើយបានធ្វើអោយសារធាតុក្លិនជ័រមិនអាចហោះហើរចេញក្រៅបាន ទើបបង្កអោយមានការពុលបែបនេះ ។
គួរបញ្ជាក់ដែរថា កន្លងមករោងចក្រនេះធ្លាប់បង្កបញ្ហាបែបនេះច្រើនដងមកហើយ ដោយគ្រាន់តែមិនមានទ្រង់ទ្រាយធំតែប៉ុណ្ណោះ ហើយក៏គ្មានដំំណោះស្រាយពីសំណាក់អ្នកដឹកនាំក្នុងរោងចក្រនេះដែរ រឿងដែលសំខាន់គឺ កម្មករមិនមានអ្នកម្នាក់ហ៊ានទម្លាយរឿងរ៉ាវដែលកើតមានឡើងនៅក្នុងរោងចក្រឡើយ ដោយសារតែមានការគម្រាមថាបើមានការបែកធ្លាយរឿងអ្វីមួយពីកម្មករណាម្នាក់ នោះរោងចក្រនឹងបញ្ឈប់ការងារភ្លាម ទើបពុំមាននរណាហ៊ានទម្លាយរឿងប្រាប់សារព័ត៌មានឡើយ ។
ក្រោយពេលកើតហេតុ កម្ពុជាថ្មី បានព្យាយាមទាក់ទងទៅប្រធានរោងចក្រដែលនៅក្នុងប្រទេសថៃ ឈ្មោះ ចែអេ និងចែអយ ដែលត្រូវជាបងប្អូនបង្កើត តាមរយៈទូរស័ព្ទដែរប៉ុន្តែទូរស័ព្ទត្រូវបានបិទ មិនអាចទាក់ទងបានឡើយ ហើយរហូតដល់ពេលនេះ កម្មករមួយចំនួនបានធូរស្រាលខ្លះហើយ៕
